ທ່ານນາງຮອງປະທານປະເທດຫວຽດນາມ ຫງວຽນທິຢວານ ໄດ້ມາຖາມຂ່າວ, ລະດົມກຳລັງໃຈແກ່ບັນດາເພື່ອນໜຸ່ມມາເຂົ້າຮ່ວມບັ້ນບໍລິຈາກເລືອດ (ພາບ : baomoi.com)
|
ວັນທີ 3/3, ຢູ່ສະໜາມກິລາແຫ່ງຊາດ ມີ້ດິງ-ຮ່າໂນ້ຍ, ທ່ານນາງຮອງປະທານປະເທດຫວຽດນາມ ຫງວຽນທິຢວານໄດ້ປະກາດໄຂວັນບຸນບໍລິຈາກເລືອດລະດູບານໃໝ່ປີ 2013 ດ້ວຍສານທີ່ວ່າ “ ຢາດເລືອດແດງເພື່ອຊີວິດມະນຸດ ” . ນີ້ແມ່ນວັນບຸນຖືກຈັດຂຶ້ນປະຈຳປີ, ແນໃສ່ຊ່ວຍກອບກູ້ເອົາຊີວິດຂອງຄົນເຈັບ ແລະ ສູງສົ່ງກ່ວານັ້ນແມ່ນເພື່ອວົງຄະນະຍາດມີສຸຂະພາບເຂັ້ມແຂງ.
ກໍເຊັ່ນດຽວກັນກັບປີກ່ອນໆ, ແຕ່ເຊົ້າໆ, ຢູ່ສະໜາມກິລາແຫ່ງຊາດ ມີ້ດິງ ໄດ້ດຶງດູດບັນດາເພື່ອນໜຸ່ມມາເຂົ້າຮ່ວມບັ້ນບໍລິຈາກເລືອດຢ່າງຫຼວງຫຼາຍ, ປະກອບ ສ່ວນຕອບສະໜອງປະລິມານເລືອດເພື່ອປິ່ນປົວຄົນເຈັບຢູ່ໂຮງໝໍ 120 ກ່ວາແຫ່ງໃນເຂດພາກເໜືອ. ຈຸດພົ້ນເດັ່ນໃນ ວັນບຸນບໍລິຈາກເລືອດລະດູບານໃໝ່ປີນີ້, ແມ່ນມີບາວສາວພວມເປັນແຟນກັນນັບຮ້ອຍຄູ່ ພ້ອມກັບບັນດາຄອບຄົວ, ຫົວໜ່ວຍຕ່າງໆໄດ້ມາຮ່ວມ. ໂດຍໄດ້ມີໜ້າແຕ່ເຊົ້າ, ທ້າວ ຝ້າມວັນມິງ ແລະ ນາງ ຝ້າມທິແທງເວີນ ຊຶ່ງຄູ່ຮັກຄູ່ໜຶ່ງໃນຈຳນວນ 6000 ຄູ່ທີ່ເຂົ້າຮ່ວມ ວັນບຸນບໍລິຈາກເລືອດລະດູບານໃໝ່ປີ 2013. ນີ້ແມ່ນການມາບໍລິຈາກເລືອດຄັ້ງທີ 8 ຂອງເວີນ, ແລະ ເປັນຄັ້ງທີ 2 ຂອງມິງ. ທັງ 2 ຄົນຕ່າງກໍສະແດງຄວາມຫວັງຈະສືບຕໍ່ເຂົ້າຮ່ວມ ວັນບຸນບໍລິຈາກເລືອດລະດູບານໃໝ່ປີຕໍ່ໍ່ໆໄປອີກ. ທ້າວ ຝ້າມວັນມິງ ເວົ້າວ່າ :
“ ເຮົາກັບເພື່ອນຍິງຂອງຕົນມານີ້ ຢາກແບ່ງປັນເລືອດຂອງຕົນ. ນີ້ແມ່ນວັນບຸນໃຫຍ່ຢ່າງແທ້ຈິງ, ມີຂອບຂະໜາດໃຫຍ່. ໄດ້ແບ່ງປັນເລືອດຂອງຕົນ, ຂ້າພະເຈົ້າຄິດວ່າ ນີ້ແມ່ນວັນທີ່ມີຄວາມໝາຍ ແລະ ເປັນໜ້າເອກອ້າງທະນົງໃຈຍ້ອນວ່າ ເຮົາເອງໄດ້ປະຕິບັດຕາມຄວາມຫວັງ ”
ວັນບຸນບໍລິຈາກເລືອດລະດູບານໃໝ່ປີ 2013 ມີຄວາມອົບອຸ່ນ ຍິ່ງຂຶ້ນ ແລະ ແຕກຕ່າງກັບ ວັນບຸນບໍລິຈາກເລືອດຄັ້ງກ່ອນໆ, ເມື່ອໄດ້ມີການເຂົ້າຮ່ວມຂອງບັນດາຜູ້ເປັນແມ່ໂດຍສະໝັກໃຈ. ມີແມ່ປ້າ 60 ຄົນຂອງພວກເພື່ອນໜຸ່ມອາສາສະໝັກຂົນຂວາຍບໍລິຈາກເລືອດໄດ້ມີໜ້າແຕ່ເຊົ້າເພື່ອເຂົ້າຮ່ວມບັ້ນບໍລິຈາກເລືອດພ້ອມກັບລູກໆຂອງຕົນ. ປ້າ ລິວທິຖຽບ ມາຈາກແຂວງ ນິງບີງ ຊຶ່ງເປັນແມ່ຂອງເພື່ອນ ຫງວຽນທິທູເວີນ ຜູ້ອາສາສະໝັກບໍລິຈາກເລືອດສັງກັດມະຫາ ວິທະຍາໄລວິທະຍາສາດສັງຄົມ ແລະ ມະນຸດຊາດ ເປີດເຜີຍວ່າ :
“ ຂ້າພະເຈົ້າຄິດວ່າ ຄວາມເບີກບານມ່ວນຊື່ນຢ່າງໃຫຍ່ຫຼວງຂອງແມ່ ແມ່ນໄດ້ເຫັນລູກຂອງຕົນແຂງແຮງ, ເຕີບໃຫຍ່ ແລະ ມີຜົນປະໂຫຍດຕໍ່ສັງຄົມ. ບັນດາວຽກງານທີ່ພວກລູກຫຼານພວມເຮັດນັ້ນ, ຈະນຳມາເຊິ່ງຄວາມມ່ວນຊື່ນ ແລະ ຄວາມເອກອ້າງທະນົງໃຈໃຫ້ແກ່ບັນດາຜູ້ເປັນແມ່ຄື ຂ້າພະເຈົ້າ. ຍິ່ງກວ່ານັ້ນ, ບັນດາວຽກງານທີ່ເຕັມໄປດ້ວຍຄວາມເປັນມະນຸດນີ້ຂອງພວກລູກ ຈະຊ່ວຍກອບ ກູ້ເອົາຊີວິດຂອງຄົນເຈັບ. ສິ່ງນີ້ແມ່ນບໍ່ມີຫຍັງປະເສີດເລີດລ້ຳກ່ວາ ”
ໂດຍຕາງໜ້າຄະນະຈັດຕັ້ງ, ທ່ານນາງ ຫງວຽນທິຊວຽນ ຮອງລັດຖະມົນຕີ ກະຊວງສາທາລະນະສຸກຫວຽດນາມ ໄດ້ຮຽກຮ້ອງປະຊາຊົນທັງປວງ ຈົ່ງພ້ອມກັນຊ່ວຍກອບກູ້ເອົາຊີວິດຂອງຄົນເຈັບຊຶ່ງພວມຕ້ອງການເລືອດດ້ວຍນ້ຳໃຈ, ຄວາມເປັນມະນຸດດ້ວຍກັນ. ວັນບຸນບໍລິຈາກເລືອດລະດູບານໃໝ່ ໄດ້ກາຍເປັນວັນບຸນແຫ່ງຄວາມຮັກແພງມະນຸດດ້ວຍກັນຂອງທັງປະເທດ. ທ່ານນາງ ຫງວຽນ ທິຊວຽນ ຮອງລັດຖະມົນຕີ ກະຊວງສາທາລະນະສຸກຫວຽດນາມ ກ່າວວ່າ :
“ ຂ້າພະເຈົ້າເຊື່ອໝັ້ນວ່າ ວັນບຸນບໍລິຈາກເລືອດລະດູບານໃໝ່ປີນີ້ ຈະໄດ້ຮັບການຕອບສະໜອງຈາກປະຊາຊົນຢ່າງຕັ້ງໜ້າ, ພິເສດແມ່ນໄວໜຸ່ມ, ນັກຮຽນ, ນັກສຶກສາ. ຂ້າພະເຈົ້າຮຽກຮ້ອງມາຍັງປະຊາຊົນທັງປວງ ຈົ່ງກະທຳເພື່ອພ້ອມກັນ ກອບກູ້ເອົາຊີວິດຂອງຄົນເຈັບດ້ວຍນ້ຳໃຈ, ຄວາມເປັນມະນຸດ ແລະ ດ້ວຍເລືອດຂອງຕົນ ”.