ບັ້ນມອດໄຟ 1 ຊົ່ວໂມງເພື່ອໜ່ວຍໂລກປີ 2012 ພວມດຳເນີນໄປຢູ່ໃນທົ່ວໂລກ. ຢູ່ໂຮງຮຽນປະຖົມ Kim Dong ນະຄອນ Ha Noi, ອາຈານ ແລະ ນັກຮຽນກໍໄດ້ດຳເນີນຊົ່ວໂມງຮຽນກ່ຽວກັບໜ່ວຍໂລກ ແລະ ການປົກປັກຮັກສາໜ່ວຍໂລກໃຫ້ພົ້ນໄພພິບັດຂອງສິ່ງແວດລ້ອມ.
ນັກຮຽນລະຫຼີ້ນກ່ຽວກັບການຮັກສາສິ່ງແວດລ້ອມ
(ພາບ:violet.vn)
ໃນຊົ່ວໂມງຮຽນຊອກຮູ້ກ່ຽວກັບ ບັ້ນມອດໄຟ 1 ຊົ່ວໂມງເພື່ອໜ່ວຍໂລກປີ 2012 ຂອງນັກຮຽນຫ້ອງ ປໍ4A, ໂຮງຮຽນປະຖົມ Kim Dong , ພວກນ້ອງໄດ້ຮັບຊົມ video clip ກ່ຽວກັບໜ່ວຍໂລກທີ່ສວຍງາມທີ່ພວມຖືກທຳລາຍ ຍ້ອນການພັດທະນາຢ່າງໄວວາຂອງມວນມະນຸດ. ບັນດາພາບພົດທີ່ກະທັດລັດໄດ້ສ້າງຄວາມປະທັບໃຈອັນເລິກເຊີ່ງຕໍ່ພວກນ້ອງ. ນ້ອງ Quoc Khanh ນັກຮຽນ ປໍ4A ໄດ້ສະແດງຄວາມຮູ້ສຶກຂອງຕົນວ່າ: “ນ້ອງເຫັນວ່າຄົນເຮົາມີຄວາມສະຫຼຽວສະຫຼາດທີ່ສຸດ ແຕ່ຄວນນຳໃຊ້ຄວາມສະຫຼຽວສະຫຼາດນັ້ນເຂົ້າໃນຈຸດປະສົງທີ່ດີ. ພວກເຮົາບໍ່ຄວນຕັດຕົ້ນໄມ້, ລ່າເນື້ອສັດທີ່ຫາຍາກ”
ພາຍຫຼັງໄດ້ຮັບຊົມ video clip, ພວກນ້ອງໄດ້ເຂົ້າຮ່ວມບັນດາການລະຫຼີ້ນຖາມຕອບດ້ວຍບັນດາຄຳຖາມກ່ຽວກັບສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດໃນທົ່ວໂລກ. ຜ່ານນັ້ນ, ພວກນ້ອງຈະເຫັນໄດ້ວ່າ ຕົນເອງຈະສາມາດປະກອບສ່ວນຫລຸດຜ່ອນຜົນສະທ້ອນຂອງການປ່ຽນແປງຂອງດິນຟ້າອາກາດທີ່ມີຕໍ່ຊີວິດຂອງຕົນເອງ ດ້ວຍບັນດາວຽກງານອັນເລັກນ້ອຍ ແຕ່ແທດຈິງທີ່ສຸດ. ນ້ອງ Phuong Linh ໃຫ້ຮູ້ວ່າ: “ເມື່ອໄດ້ເຂົ້າຮ່ວມລາຍການນີ້, ນ້ອງຈະບໍ່ຖີ້ມຂີ້ເຫຍື່ອຊະຊາຍອີກ ແລະ ຈະຕັກເຕືອນພວກນ້ອງນັກຮຽນລຸນນ້ອງຕ້ອງຖີ້ນຂີ້ຫຍື່ອໃນບ່ອນທີ່ກຳນົດ, ປະຢັດໄຟຟ້າ”
ນັກຮຽນໂຮງຮຽນປະຖົມ Kim Dong
(ພາບ: ອິນເຕີແນັດ)
ຊົ່ວໂມງຮຽນບໍ່ພຽງແຕ່ສ້າງຄວາມປະທັບໃຈອັນເລິກເຊີ່ງໃນໝູ່ນັກຮຽນເທົ່ານັ້ນ ຫາກຍັງມີຄວາມໝາຍສຳລັບບັນດາຄູອາຈານອີກດ້ວຍ. ເອື້ອຍຄູ Bui Hoa Le, ອາຈານສອນຢູ່ໂຮງຮຽນປະຖົມ Kim Dong ໃຫ້ຮູ້ວ່າ: ບັນດາຊົ່ວໂມງຮຽນຄືແນວນີ້ ຄວນຮັກສາເປັນປະຈຳ ເພື່ອຍົກສູງສະຕິໃຫ້ແກ່ພວກນ້ອງນັກຮຽນ ກ່ຽວກັບຜົນສະທ້ອນໂດຍກົງຂອງການປ່ຽນແປງຂອງດິນຟ້າອາກາດ ທີ່ມີຕໍ່ຊີວິດຂອງມະນຸດ. ເອື້ອຍຄູ Bui Hoa Le ເວົ້າວ່າ: “ລາຍການດັ່ງກ່າວຈະໄດ້ຮັບການຕອບສະໜອງເປັນຢ່າງດີກ່ວາອີກໃນໂຮງຮຽນ. ທາງໂຮງຮຽນຈະປຸກລະດົມພວກນ້ອງ ເພື່ອປະຕິບັດການປະຢັດໄຟຟ້າ. ຂະບວນການນີ້ຈະຄ່ອຍໆຂະຫຍາຍຕົວ”
ໃນຕະຫຼອດຊົ່ວໂມງຮຽນແມ່ນເຕັມໄປດ້ວຍບັນຍາກາດທີ່ຟົດຟື້ນມ່ວນຊື່ນໃນໂຮງຮຽນ. ຜ່ານຊົ່ວໂມງຮຽນ, ພວກນ້ອງເຫັນໄດ້ວ່າ ຕົນເອງຕ້ອງມີຄວາມຮັບຜິດຊອບໃນການປົກປັກຮັກສາສິ່ງແວດລ້ອມ ກໍຄືຮັບມືກັບການປ່ຽນແປງຂອງດິນຟ້າອາກາດ. ຈາກນັ້ນ ພວກນ້ອງຈະກາຍເປັນບັນດານັກໂຄສະນາຂົນຂວາຍທີ່ຕັ້ງໜ້າໃນຄອບຄົວ ແລະ ວົງຄະນາຍາດ
.