(vovworld) - ຈາກສີມືທີ່ຄ່ອງແຄ້ວຂອງຊ່າງແກະສະຫຼັກຫີນ, ບັນດາກ້ອນຫີນໄດ້ກາຍເປັນພະພຸດທະຮູບ, ສັດທີ່ເປັນມົງຄຸນຫຼາຍປະເພດ. ນັບແຕ່ຮ້ອຍປີມານີ້, ບັນດາຊ່າງແກະສະຫຼັກຫີນຢູ່ບ້ານ ລອງເຈົາມ໋ຽວ (ຟຸ້ງເຈົາ, ເຈືອງມີ້) ດ້ວຍສີມືແຮງງານຂອງຕົນໄດ້ສ້າງເປັນບັນດາຜະລິດຕະພັນຫັດຖະກຳສິລະປະທີ່ຫຼັກແຫຼມແຍບຍົນ.
ຊາວບ້ານລອງເຈົາມ໋ຽວກຳລັງແກະສະຫຼັກຫີນ
(ພາບ: ອິນເຕີແນດ)
ຢູ່ “ບ້ານແກະສະຫຼັກຫີນ”, ປະຊາຊົນຫຼາຍຄົນໄດ້ສະແດງຄວາມນັບຖືຕໍ່ຄວາມສາມາດຂອງພໍ່ຕູ້ ຫງວຽນວັນກຸງ ແລະ ລູກຊາຍຂອງລາວແມ່ນອ້າຍ ຫງວຽນວັນເຈື່ອງ. ພໍ່ຕູ້ແມ່ນຜູ້ຊຳນານງານ, ທັງເປັນຜູ້ດຽວໃນບ້ານທີ່ສາມາດແກະສະຫຼັກຕົວໜັງສືຈີນເທິງແຜ່ນຫີນໄດ້. ໃນເກືອບ 60 ປີ ທີ່ເຮັດອາຊີບນີ້, ພໍ່ຕູ້ສາມາດແກະສະຫຼັກສີລາເລກເປັນພາສາຈີນໄດ້ເກືອບ ຮອຍແຜ່ນ, ໃນນັ້ນມີ 5 ແຜ່ນແມ່ນຕັ້ງຢູ່ ວັນມ໋ຽວ - ກວົກຕືຢ໋າມ... ໂດຍສືບທອດອາຊີບທີ່ເປັນມູນເຊື້ອຂອງຄອບຄົວ, ນັບແຕ່ຄາວທີ່ມີອາຍຸແຕ່ 10 – 11 ປີ, ພາຍຫຼັງເລີກຮຽນ, ອ້າຍ ເຈື່ອງ ກໍ່ຊ່ວຍພໍ່ແກະສະຫຼັກຫີນ. ເຖິງວ່າໄດ້ຮຽນຈົບມະຫາວິທະຍາໄລ, ແລະກາຍເປັນອາຈານແລ້ວກໍ່ຕາມ, ແຕ່ດ້ວຍຄວາມນິຍົມຕໍ່ອາຊີບທີ່ເປັນມູນເຊື້ອນັ້ນ, ອ້າຍໄດ້ຂໍພັກການ, ກັບເມືອບ້ານເປີດໂຮງງານແກະສະຫຼັກຫີນສະເພາະໃຫ້ແກ່ຄອບຄົວ. ໃນຊຸ່ມວັນເລີ່ມດຳເນີນອາຊີບ, ການດຳເນີນທຸລະກິດຂອງອ້າຍ ເຈື່ອງປະສົບກັບຄວາມຫຍຸ້ງຍາກຫຼາຍ. ເພື່ອແກ້ໄຂຄວາມຫຍຸ້ງຍາກອ້າຍໄດ້ວາງແຜນການຊອກຫາແຂກຜ່ານການຊື້ຫີນ, ແກະສະຫຼັກເອງ ແລະວາງສະແດງຢູ່ໂຮງງານ. ເມື່ອແຂກແວ່ຢາມບັນດາໂຮງງານແກະສະຫຼັກຫີນໃນເຂດ, ໃນນັ້ນມີໂຮງງານຂອງຄອບອ້າຍ ເຈື່ອງ, ເຫັນວ່າຜະລິດຕະພັນງາມກໍ່ຊື້ເລີຍ. ດັ່ງນັ້ນໂຮງງານຂອງອ້າຍກໍ່ຄ່ອຍໆພັດທະນາເຖິງປະຈຸບັນ. ບໍ່ພຽງແຕ່ເມົາມົວກັບອາຊີບ ແລະ ສ້າງຄວາມຮັ່ງມີໃຫ້ຕົວເອງເທົ່ານັ້ນ, ຫາກອ້າຍ ເຈື່ອງຍັງແກ້ໄຂວຽກເຮັດງານທຳໃຫ້ຜູ້ອອກແຮງງານເປັນປະຈຳ 20 ຄົນ ແລະ ແຮງງານຕາມລະດູການນັບສິບຄົນອີກດ້ວຍ.
ອ້າຍຫງວຽນວັນເຈື່ອງຢູ່ບ້ານລອງເຈົາມ໋ຽວກຳລັງແກະສະຫຼັກຮູບສິລະປະ
(ພາບ: ອິນເຕີແນດ)
ທ່ານ ຟ້າມກວາງດິ້ງ, ຮອງປະທານຄະນະກຳມະການປະຊາຊົນຕາແສງ ຟຸ້ງເຈົາ ໃຫ້ຮູ້ວ່າ, ໃນສະພາບການທີ່ຫຼາຍໝູ່ບ້ານອາຊີບຖືກຊຸດໂຊມນັ້ນ, ແຕ່ອາຊີບແກະສະຫຼັກຫີນຍັງຄົງຮັກສາໄວ້ເປັນປົກກະຕິ ແລະ ພັດທະນາ. ປະຈຸບັນ, ບ້ານ ລອງເຈົາມ໋ຽວ ມີ 32 ຄອບຄົວເຮັດອາຊີບ ແກະສະຫຼັກຫີນ, ສາມາດແກ້ໄຂວຽກເຮັດງານທຳໃຫ້ຜູ້ອອກແຮງງານຢູ່ໃນ ແລະ ນອກຕາແສງໄດ້ເກືອບ 300 ຄົນ. ບໍ່ພຽງແຕ່ເຈົ້າຂອງມີລາຍຮັບສູງເທົ່ານັ້ນ, ຫາກຜູ້ຮັບຈ້າງກໍ່ມີລາຍຮັບສະເລ່ຍແມ່ນ 6,5 ລ້ານດົ່ງ/ເດືອນອີກດ້ວຍ. ຕົວຢ່າງຄືຄອບຄົວທ່ານ ຫງວຽນວັນຈ້ອງ, ເຖິງວ່າມີອາຍຸ 40 ກວ່າປີແລ້ວກໍ່ຕາມ, ແຕ່ຍາມໃດທ່ານກໍ່ຮັບປະກັນວຽກເຮັດງານທຳໃຫ້ຜູ້ອອກແຮງງານໄດ້ແຕ່ 30-40 ຄົນ.
ປະຈຸບັນ, ຜະລິດຕະພັນຫີນທີ່ເປັນມູນເຊື້ອຂອງບ້ານຫີນສ່ວນຫຼາຍແມ່ນຮູບສັດທີ່ເປັນມົງຄຸນ, ຫີນສີລາ, ໂຖປັກທູບ, ພະພຸດທະຮູບ... ແລະ ໄດ້ມີໜ້າຢູ່ຫຼາຍແຂວງ, ນະຄອນໃນທົ່ວປະເທດ. ມີຫຼາຍຮາກຖານຜະລິດໃນບ້ານຍັງສົ່ງຜະລິດຕະພັນໄປຍັງຍີ່ປຸ່ນ, ລາວ, ກຳປູເຈຍ, ສິງຄະໂປ.
ຫວ່າງແລ້ວນີ້, ທ້ອງຖີ່ນໄດ້ຜັນຂະຫຍາຍການສ້າງເຂດທົ່ງນາຂະໜາດໃຫຍ່ ແລະ ຫັນປ່ຽນຜົນລະປູກສຳເລັດຜົນ ແລະ ໄດ້ວາງແຜນພັດທະນາໝູ່ບ້ານອາຊີບໃນເນື້ອທີ່ 4 ເຮັກຕາ. ຄຽງຂ້າງນັ້ນ, ໄດ້ສ້າງເງື່ອນໄຂສະດວກດ້ານໄຟຟ້າ, ທາງຄົມມະນາຄົມ, ເພື່ອໃຫ້ໝູ່ບ້ານພັດທະນາ. ອາດເວົ້າໄດ້ວ່າ, ອາຊີບ ແກະສະຫຼັກຫີນ ໄດ້ຊ່ວຍໃຫ້ຊາວບ້ານ ລອງເຈົາມ໋ຽວ ມີຊີວິດເປັນປົກກະຕິ ແລະ ບືນຕົວຂຶ້ນສ້າງຄວາມຮັ່ງມີ.