(vovworld)- ບັນດາເອື້ອຍນອ້ງແມ່ຍິງຊາວເຜົ່າ ປາໂກ, ເວີນກ່ຽວ ແຕ່ລະມື້ໄດ້ຂົນສົ່ງສິນຄ້າດ້ວຍລົດລາກ ຈາກດ່ານຊາຍແດນລາວບາວ ແຂວງ ກວ໋າງຈີ້ ຂອງຫວຽດນາມ ໄປຍັງ ດ່ານຊາຍແດນ ແດນສະຫວັນຂອງແຂວງ ສະຫວັດນະເຂດຂອງລາວເພື່ອຫາເງິນລ້ຽງຊີບ. ຈາກ ລົດລາກ 10 ຄັນໃນເບື້ອງຕົ້ນ ມາຮອດປະຈຸບັນ ຫນ່ວຍລົດຂອງພວກເອື້ອຍແມ່ນຂຶ້ນເຖິງເກືອບ 100 ຄັນແລ້ວ. ອາຊີບນີ້ບໍ່ພຽງແຕ່ປັບປຸງຊີວິດການເປັນຢູ່ໃຫ້ແກ່ພວກເອື້ອຍເທົ່ານັ້ນ ຫາກຍັງປະກອບສ່ວນຮັກສາຄວາມເປັນລະບຽບຮຽບຮ້ອຍທາງສັງຄົມ, ປ້ອງກັນຄວາມສະຫງົບຢູ່ເຂດຊາຍແດນອີກດ້ວຍ.
ເອື້ອຍນ້ອງແມ່ຍິງຊາວເຜົ່າປາໂກຫາລ້ຽງຊີບຢູ່ເຊດຊາຍແດນ
ພາບ:vietbao.vn
|
ເຖິງວ່າ ໃນຊຸມມື້ທີ່ ອາກາດແດດຮ້ອນເອົ້າຢູ່ດ່ານຊາຍແດນ ລາວບາວ -ແດນສະຫວັນ ກໍຕາມ ແຕ່ພວກເອື້ອຍນ້ອງແມ່ຍິງນັບສີບໆຄົນຍາມໃດກໍສຸດຈິດສຸດໃຈໃນວຽກງານເປັນຄົນຮັບຈ້າງຂົນສົ່ງສິນຄ້າໃຫ້ລູກຄ້າຜ່ານຊາຍແດນ.
ເອື້ອຍ ຫງວຽນທິເທືອງ, ຫົວຫນ້າສະມາຄົມແມ່ຍິງ ບ້ານກາຕັງ ພ້ອມທັງແມ່ນຜູ້ລິເລີ່ມສ້າງຕັ້ງຫນ່ວຍລົດລາກດັ່ງກ່າວໃຫ້ຮູ້ວ່າ: ໃນຊຸມປີ 2003-2004, ການເຮັດໄຮ່ເຮັດນາບໍ່ກຸ້ມກິນ, ຂະນະທີ່ເສດຖະກິດດ່ານຊາຍແດນພັດທະນາ, ເອື້ອຍນ້ອງແມ່ຍິງໃນບ້ານໄດ້ພາກັນໄປເປັນຄົນຮັບຈ້າງຫາບສິນຄ້າຜ່ານຊາຍແດນ ຫວັງຢາກຫາເງິນລ້ຽງຄອບຄົວ ແລະ ແຕ່ລະມື້ຫາເງິນຈາກອາຊີບນີ້ໄດ້ 50.000 ດົງ. ໄລຍະຕໍ່ມາ ເພື່ອເພີ່ມສະມັດຕະພາບການແຮງງານກໍຄືເພີ່ມລາຍຮັບ, ເອື້ອຍນ້ອງໃນບ້ານໄດ້ຮ່ວມແຮງຮ່ວມໃຈຕິດຕັ້ງລົດລາກ. ເມື່ອມີລົດແລ້ວ, ການຂົນສົ່ງສິນຄ້າໄດ້ຫລາຍກວ່າ ແລະ ບໍ່ເສຍກຳລັງເຫື່ອແຮງປານໃດ, ລາຍຮັບກໍເພີ່ມຂຶ້ນສູງທົບ 5-6 ເທົ່າ.
ໂດຍໄດ້ຮັບການແນະນຳຢ່າງສຸດຈິດສຸດໃຈຈາກອຳນດາການປົກຄອງທ້ອງຖິ່ນ, ປີ 2005 ຫນ່ວຍລົດລາກຄຸ້ມຄອງເອງຂອງພວກເອື້ອຍ ໄດ້ຮັບການສ້າງຕັ້ງຂຶ້ນ. ມາຮອດປະຈຸບັນ ຫນ່ວຍລົດດັ່ງກ່າວມີເກືອບ 100 ຄັນ ແລະ ສະມາຊິກ ລວມມີ 80 ຄົນ. ຍ້ອນມີອາຊີບນີ້, ຈາກອັດຕາຄອບຄົວທຸກຍາກໃນບ້ານກວມກວ່າ 50% ມາຮອດປະຈຸບັນ ຫລຸດລົງຍັງເຫລືອປະມານ 5%. ເອື້ອຍ ໂຮ່ທິນຸ, ສະມາຊິກຂອງຫນ່ວຍລົດລາກແບ່ງປັນວ່າ: ຊີວິດການເປັນຢູ່ຂອງຄອບຄົວເອື້ອຍໄດ້ຮັບການປັບປຸງຢ່າງເຫັນໄດ້ຊັດ.
“ປະຈຸບັນ ຊີວິດການເປັນຢູ່ຂອງຄອບຄົວຂ້າພະເຈົ້າດີຂຶ້ນ. ແຕ່ລະມື້ສາມາດຫາເງິນໄດ້ 300.000 ດົງ ກ່ອນນີ້ ພຽງແຕ່ 5000 ດົງເທົ່ານັ້ນ. ຈຳນວນເງິນທີ່ຫາມາໄດ້ນັ້ນກໍພໍຢູ່ພໍກິນ.”
ແຕ່ລະມື້ພວກເອື້ອຍສາມາດຫາເງິນໄດ້ 300.000 ດົງ ຈາກອາຊີບຮັບຈ້າງຂົນສົ່ງສິນຄ້າຜ່ານຊາຍແດນ
ພາບ:baomoi.vn
|
ມາຮອດປະຈຸບັນ, ຫລາຍຄອບຄົວໃນບ້ານໄດ້ມີລົດຈັກ, ໂທລະທັດ, ເງິນຝາກປະຢັດ. ລູກຫລານມີກາລະໂອກາດໄດ້ໄປໂຮງຮຽນ, ບາງຄົນເສັງເຂົ້າມະຫາວິທະຍາໄລ.
ນອກຈາກຫາເງິນລ້ຽງຊີບນັ້ນ ພວກເອື້ອຍນ້ອງໃນຫນ່ວຍລົດລາກຍາມໃດກໍຍົກສູງນ້ຳໃຈຕໍ່ສູ້ໃນການກ່າວໂທດອາດຊະຍາກຳ, ສະຫນອງຂໍ້ມູນຂ່າວໃຫ້ອຳນາດການປົກຄອງທ້ອງຖິ່ນ, ພິເສດໃນການຕໍ່ສູ້ກັບບັນດາກໍລະນີສໍ້ໂກງການຄ້າ, ປະກອບສ່ວນປົກປັກຮັກສາຄວາມເປັນລະບຽບຮຽບຮ້ອຍ, ຄວາມປອດໄພຢູ່ເຂດຊາຍແດນ. ເອື້ອຍເທືອງໃຫ້ຮູ້ວ່າ:
“ຖ້າຜູ້ໃດເຂົ້າເປັນສະມາຊິກຂອງຫນ່ວຍລົດລາກແລ້ວ ຕ້ອງປະຕິບັດຕາມກົດລະບຽບຢູ່ຊາຍແດນ ກໍຄືຂອງສະມາຄົມ. ທີຫນຶ່ງ ບໍ່ໄດ້ພາຄົນຂ້າມຊາຍແດນຢ່າງຜິດກົດໝາຍ. ທີສອງ ບໍ່ໄດ້ຂົນສົ່ງສິນຄ້າທີ່ຖືກຫ້າມ. ທີສາມ ຕ້ອງພະຍາຍາມເຮັດວຽກເພື່ອຫລຸດພົ້ນອອກຈາກຄວາມທຸກຍາກ.”
ນອກຈາກຫາເງິນລ້ຽງຊີບແລ້ວ, ນັບແຕ່ປີ 2008 ມາຮອດປະຈຸບັນ ໂດຍຕອບສະຫນອງບັ້ນຂົນຂວາຍຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ, ບັນດາເອື້ອຍນອ້ງໃນສະມາຄົມຫນ່ວຍລົດລາກດັ່ງກ່າວ ໄດ້ຕັ້ງຫນ້າປະຕິບັດຂະບວນການ “ໄຫເຂົ້າປະຢັດ” ໂດຍສະມາຄົມແມ່ຍິງ ບ້ານ ກາຕັງ ປຸກລະດົມ. ຈຳນວນເຂົ້າສານທີ່ປະກອບມາໄດ້ ພວກເອື້ອຍໄດ້ນຳເອົາໄປຊ່ວຍເຫລືອຫລາຍຄອບຄົວທຸກຍາກ. ນອກນັ້ນ ແຕ່ລະເດືອນ ພວກເອື້ອຍຍັງຫັກເງິນ 20.000ດົງ/ເດືອນ/ຄົນ ປະກອບເຂົ້າກອງທຶນເພື່ອຊ່ວຍເຫລືອເອື້ອຍນອ້ງໃນສະມາຄົມເມື່ອເຈັບເປັນ, ຫລືຊ່ວຍເຫລືອຜູ້ປະສົບກັບຄວາມຫຍຸ້ງຍາກ, ລູກຫລານໃນບ້ານໄປໂຮງຮຽນ.
ເລື່ອງລາວກ່ຽວກັບພວກເອື້ອຍນ້ອງໃນຫນ່ວຍລົດລາກຢູ່ ບ້ານ ກາຕັງ ແມ່ນສ້າງຄວາມຕື້ນຕັນໃຈທີ່ສຸດ. ເຖິງວ່າ ວຽກງານຍັງຫຍຸ້ງຍາກລຳບາກຫລາຍກໍຕາມ ແຕ່ໝາກຜົນການອອກແຮງງານຂອງພວກເອື້ອຍແມ່ນບັນລຸໄດ້ຫລາຍຢ່າງ. ວຽກງານຮັບຈ້າງຂົນສົ່ງສິນຄ້ານີ້ ບໍ່ພຽງແຕ່ນຳມາເຊິ່ງລາຍຮັບເທົ່ານັ້ນ ຫາກຍັງແມ່ນບ່ອນເພື່ອໃຫ້ພວກເອື້ອຍແບ່ງປັນ, ລະດົມກຳລັງໃຈ, ຊ່ວຍເຫລືອເຊິ່ງກັນ ແລະ ກັນໃນຊີວິດ, ສິ່ງສຳຄັນກວ່າ ພວກເອື້ອຍພ້ອມກັນປະກອບສ່ວນເຂົ້າໃນການປົກປັກຮັກສາຄວາມສະຫງົບຢູ່ເຂດຊາຍແດນ.