ນ້ຳປາ ນາມໂອ ໄດ້ຜະລິດຕາມແຕ່ລະຂັ້ນຕອນ (ພາບ: VOV)

   ໃນຊຸມວັນໃກ້ຈະຮອດບຸນເຕັດ, ຄອບຄົວ, ປຊຊ ໄດ້ກະກຽມສິນຄ້າຢ່າງຄົບຖ້ວນ. ບັນດາຄອບຄົວໄດ້ຫຸ້ມຫໍ່ຜະລິດຕະພັນ, ຕິດຍີ່ຫໍ້ໃສ່ລຽບລ້ອຍ, ແຂກສັ່ງຊື້ກໍ່ມີສິນຄ້າສາມາດຂາຍໄດ້ເລີຍ. ສິນທະເລປະເພດຕ່າງໆຂາຍດີທີ່ສຸດໃນໂອກາດບຸນເຕັດແມ່ນ: ປາແຫ້ງ, ນ້ຳປາ, ກະປິຫວຽດ, ປາດາບເງິນສຳເລັດຮູບ, ສາລ່າຍ… ໃນຊຸມວັນໃກ້ຈະຮອດບຸນເຕັດຂອງທຸກປີ, ນ້ຳປາໄດ້ສົ່ງໄປຂາຍຢູ່ທຸກແຫ່ງ.

   ໃນເດືອນມັງກອນນີ້, ຄອບຄົວເອື້ອຍ ເຈິ່ນທິມິນທາຍ ຢູ່ຕາແສງ ຮ່ວາຮຽບນາມ, ເມືອງ ລຽນຈຽວ ໄດ້ຟ້າວຟັ່ງກັບການກັ່ນຕອງນ້ຳປາ, ຮ່າຍໃສ່ແກ້ວ, ຫໍ່ເປັນແກັດເພື່ອກະກຽມຂາຍໃນໂອກາດບຸນເຕັດ. ກໍ່ຄືກັນກັບທຸກໆປີ, ໝູ່ບ້ານອາຊີບຜະລິດນ້ຳປາພື້ນເມືອງ ນາມໂອ ກໍ່ມີຄວາມຄຶກຄື້ນຜູ້ຊື້ຜູ້ຂາຍໄປມາ, ປະລິມານຂາຍອອກແມ່ນຫຼາຍພໍສົມຄວນ.

ລູກຄ້ານິຍົມນ້ຳປາ ນາມໂອ ກໍ່ຄືສິນທະເລປະເພດຕ່າງໆທີ່ສຸດ (ພາບ: VOV)

     ໝູ່ບ້ານອາຊີບຜະລິດນ້ຳປາພື້ນເມືອງ ນາມໂອ ໄດ້ສ້າງຕັ້ງຂຶ້ນ ແລະ ພັດທະນານັບແຕ່ຮ້ອຍປີກ່ອນ. ນ້ຳປາ ນາມໂອ ຍັງແມ່ນຜະລິດຕະພັນດ້ານວັດທະນະທຳທາງດ້ານຈິດໃຈທີ່ພິເສດຂອງໝູ່ບ້ານທີ່ເປັນມູນເຊື້ອນັບແຕ່ຫຼາຍລຸ້ນຄົນກ່ອນ ຊື່ງສະແດງໃຫ້ເຫັນສີສັນຂອງວົງຄະນາຍາດທ້ອງຖິ່ນ, ສ່ອງແສງວັດທະນະທຳຫຼາຍຮູບຫຼາຍແບບ, ການປະດິດສ້າງຂອງມະນຸດ, ໄດ້ຮັບການສືບທອດຜ່ານຫຼາຍລຸ້ນຄົນ. ນ້ຳປາ ນາມໂອ ເຄີຍແມ່ນອາຫານພິເສດເພື່ອຖະຫວາຍເຈົ້າຊີວິດ, ໂດຍມີສິີແດງເຂັ້ມ, ມີລົດຊາດກົມກ່ອມຂອງເຂດທະເລ ດ່ານັງ. ແຕ່ດົນນາມາແລ້ວ, ນ້ຳປາ ນາມໂອ ໄດ້ກາຍເປັນເຄື່ອງປຸງ, ນ້ຳແຈ່ວທີ່ບໍ່ສາມາດຂາດໄດ້ໃນແຕ່ລະຄາບເຂົ້າຂອງ ປຊຊ ດ່ານັງ. ເອື້ອຍ ຫຼີຮວ່າງເຈິມ, ຢູ່ແຂວງ ດັກລັກ ແບ່ງປັນວ່າ:

   ຂ້າພະເຈົ້າມັກລົດຊາດຂອງນ້ຳປາພື້ນເມືອງ ນາມໂອ ທີ່ສຸດ. ປີໃດກໍ່ຄືກັນ, ເມື່ອກັບເມືອບ້ານຍາມບຸນເຕັດ, ຂ້າພະເຈົ້າກໍ່ສັ່ງຊື້ນ້ຳປາເຖິງສິບລິດເພື່ອເປັນຂອງຕ້ອນພີ່ນ້ອງ ແລະ ໃຊ້ໃນຄອບຄົວ.

   ປະຈຸບັນ, ໝູ່ບ້ານຜະລິດນ້ຳປາ ນາມໂອ ມີປະມານ 260 ຄອບຄົວດ້ວຍແຮງງານເຂົ້າຮ່ວມການເຮັດນ້ຳປາກ່ວາ 300 ຄົນ. ປີ 2024, ປະລິມານນ້ຳປາທັງໝົດທີ່ທົ່ວໝູ່ບ້ານໄດ້ຜະລິດອອກແມ່ນປະມານ 300.000 ລິດ ດ້ວຍລາຄາແຕ່ 80.000-150.000 ດົ່ງ/ລິດ, ລາຍຮັບກ່ວາ 24 ຕື້ດົ່ງ (ເກືອບ 1 ລ້ານ USD). ທ່ານ ເຈິ່ນງອກວິງ, ປະທານສະມາຄົມໝູ່ບ້ານອາຊີບນ້ຳປາພື້ນເມືອງ ນາມໂອ ໃຫ້ຮູ້ວ່າ: ຈຳນວນຄອບຄົວທີ່ຟື້ນຟູອາຊີບຜະລິດນ້ຳປາ ນາມໂອ ໄດ້ເພີ່ມຂຶ້ນຢ່າງໄວວາ. ປີ 2005 ມີພຽງປະມານ 20 ຄອບຄົວເທົ່ານັ້ນ ແຕ່ປະຈຸບັນ, ຈຳນວນຜູ້ເຮັດອາຊີບຄືນໃໝ່ໄດ້ເພີ່ມຂຶ້ນຮອດນັບຮ້ອຍຄອບຄົວແລ້ວ:

     ພວກຂ້າພະເຈົ້າຫວັງວ່າຈະມີສະຖານທີ່ວາງສະແດງຮູບແບບເຕັກນິກການຜະລິດນ້ຳປາ ນາມໂອ ແລະ ປາແຫ້ງ, ນ້ຳປາປະເພດຕ່າງໆ… ເພື່ອດຶງດູດແຂກທ່ອງທ່ຽວ. ສ້າງຕັ້ງໜ່ວຍຫາສິນທະເລຢູ່ ນາມໂອ ຮັບໃຊ້ການເຮັດນ້ຳປາ. ເພື່ອໃຫ້ຊີວິດຂອງ ປຊຊ ພັດທະນາ, ຕ້ອງປົກປັກຮັກສາສິ່ງແວດລ້ອມເຂດທ່ອງທ່ຽວ.

  ອຳນາດການປົກຄອງທ້ອງຖິ່ນ ພວມສ້າງສຳເນົາລະບຽບການໃຫ້ສຳເລັດ ເພື່ອຍື່ນສະເໜີຕໍ່ຜູ້ມີສິດອຳນາດຂັ້ນຕ່າງໆ ຮັບຮູ້ໝູ່ບ້ານຜະລິດນ້ຳປາພື້ນເມືອງ ນາມໂອ. ພ້ອມກັນນັ້ນ, ທ້ອງຖິ່ນກໍ່ຈະຜັນຂະຫຍາຍການລົງທຶນພື້ນຖານໂຄງລ່າງ, ເຂດວາງສະແດງ, ແນະນຳຜະລິດຕະພັນ, ຂັ້ນຕອນການຜະລິດນ້ຳປາພື້ນເມືອງ ນາມໂອ, ເຊື່ອມຕໍ່, ໂຄສະນາ, ຈຳໜ່າຍຜະລິດຕະພັນ, ປະກອບສ່ວນອະນຸລັກຮັກສາ, ເສີມຂະຫຍາຍຄຸນຄ່າໝູ່ບ້ານອາຊີບ, ຍົກສູງລາຍຮັບໃຫ້ ປຊຊ…. ທ່ານ ເຈິ່ນກົງງວຽນ, ປະທານຄະນະກຳມະການ ປຊຊ ເມືອງ ລຽນຈຽວ ໃຫ້ຮູ້ວ່າ:

   ພວກຂ້າພະເຈົ້າພວມຜັນຂະຫຍາຍແຜນຮ່າງທັງພັດທະນາຜະລິດຕະພັນ, ທັງສົມທົບກັບການທ່ອງທ່ຽວວົງຄະນາຍາດ. ພວກຂ້າພະເຈົ້າໜູນຊ່ວຍບັນດາຄອບຄົວ, ຮາກຖານດຳເນີນທຸລະກິດ, ວິສາຫະກິດ ທັງຂຸດຄົ້ນທັງພັດທະນາເສດຖະກິດ, ເສີມຂະຫຍາຍທ່າໄດ້ປຽບຢ່າງສຸດຂີດ ເມື່ອໄດ້ຮັບການຈົດທະບຽນກຳມະສິດພູມປັນຍາ.

    ກະຊວງວັດທະນະທຳ ກິລາ ແລະ ການທ່ອງທ່ຽວ ໄດ້ຮັບຮູ້ອາຊີບຜະລິດນ້ຳປາ ນາໂອ ແມ່ນມໍລະດົກວັດທະນະທຳບໍ່ເປັນຮູບຮ່າງລະດັບຊາດ ເມື່ອເດືອນມິຖຸນາ ປີ 2019. ຫຼັງຈາກນັ້ນ 5 ປີ, ຄືເດືອນມິຖຸນາ ປີ 2024, ກົມກຳມະສິດພູມປັນຍາ ໄດ້ອອກ ໜັງສືປົກປ້ອງການແນະນຳແຫ່ງທີ່ມາທີ່ຕັ້ງພູມສາດ “ນາມໂອ” ໃຫ້ແກ່ຜະລິດຕະພັນນ້ຳປາ ນາມໂອ ນະຄອນ ດ່ານັງ. ນີ້ແມ່ນການແນະນຳພູມສາດທຳອິດຂອງນະຄອນ ດ່ານັງ ແລະ ແມ່ນການແນະນຳພູມສາດທີ 3 ໃຫ້ແກ່ຜະລິດຕະພັນນ້ຳປາຢູ່ ຫວຽດນາມ (ຖັດຈາກນ້ຳປາ ຝູກວັກ ແລະ ນ້ຳປາ ຟານທຽດ)./.