ປີ 2016, ການສົ່ງອອກຜະລິດຕະພັນກະເສດຈະມີການຈະເລີນເຕີບໂຕຫຼາຍຢ່າງ ຍ້ອນຄວາມຮຽກຮ້ອງຕ້ອງການຂອງຕະຫຼາດເພີ່ມຂຶ້ນ ແລະ ສັນຍາການຄ້າເສລີບາງສະບັບເຊິ່ງ ຫວຽດນາມ ໄດ້ລົງນາມເລີ່ມມີຜົນສັກສິດ. ເພື່ອຊ່ວຍໃຫ້ບັນດາອົງການ, ວິສາຫະກິດເພີ່ມທະວີການສົ່ງອອກຜະລິດຕະພັນກະເສດ, ກະຊວງກະສິກຳ ແລະ ພັດທະນາຊົນນະບົດ ແລະ ກະຊວງອຸດສາຫະກຳ ການຄ້າ ໄດ້ວາງອອກຫຼາຍມາດຕະການເພື່ອແນໃສ່ຍູ້ແຮງການສົ່ງອອກຜະລິດຕະພັນກະເສດໃນໄລຍະຈະມາເຖິງ. ບົດຂຽນ “ຕະຫຼາດສົ່ງອອກຜະລິດຕະພັນກະເສດໃນປີ 2016 ມີສັນຍານຈະເລີນເຕີບໂຕ” ຂອງ ຈູງຖູຍ, ນັກຂ່າວ VOV.
ໝາກລີ້ນຈີ |
ໃນ 2 ເດືອນຕົ້ນປີ, ວົງເງິນສົ່ງອອກໝວດສິນຄ້າຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນຳ້ ບັນລຸຈຳນວນເງິນເກືອບ 3 ຕື້ USD, ເພີ່ມຂຶ້ນ 9,7% ເມື່ອທຽບໃສ່ໄລຍະດຽວກັນຂອງປີກາຍ ແລະ ກວມອັດຕາສ່ວນ 12,5% ໃນຍອດວົງເງິນສົ່ງອອກ. ສິນຄ້າຜະລິດຕະພັນກະເສດບາງປະເພດມີປະລິມານການສົ່ງອອກເພີ່ມຂຶ້ນສູງແມ່ນໝາກມ່ວງຫິມະພານ, ເຂົ້າສານ, ກາເຟ ແລະ ອື່ນໆ…
ປີ 2016 ນີ້, ການສົ່ງອອກຜະລິດຕະພັນກະເສດຂອງ ຫວຽດນາມ ໄດ້ຮັບການຕີລາຄາວ່າມີຫຼາຍກາລະໂອກາດຈະເລີນເຕີບໂຕກ່ວາຍ້ອນຄວາມຮຽກຮ້ອງຕ້ອງການຂອງຕະຫຼາດເພີ່ມຂຶ້ນ, ພິເສດແມ່ນມີການກະທົບຈາກບັນດາສັນຍາການຄ້າເສລີລະຫວ່າງ ຫວຽດນາມ ແລະ ບັນດາຄູ່ຮ່ວມມືທີ່ມີຜົນສັກສິດຢ່າງເປັນທາງການ. ປະຈຸບັນ, ການສົ່ງອອກຜະລິດຕະພັນກະເສດ ຂອງ ຫວຽດນາມ ສຸມໃສ່ຕົ້ນຕໍເຂົ້າຕະຫຼາດຈຸດສຸມນັ້ນແມ່ນ ອາເມລິກາ, ເອີລົບ, ຈີນ, ອາບຟຣີກາ. ໜຶ່ງໃນບັນດາຕະຫຼາດສົ່ງອອກຈຸດສຸມຂອງ ຫວຽດນາມ ແມ່ນ ອາເມລິກາ ໄດ້ຮັບການຄາດຄະເນວ່າຈະມີການເຕີບໂຕຢ່າງແຮງ. ໃນໄລຍະຜ່ານມາ, ບັນດາ ຜະລິດຕະພັນກະເສດສົ່ງອອກຕົ້ນຕໍຄື: ເຂົ້າສານ, ໄມ້, ກາເຟ, ໝາກພິກໄທ, ໝາກມ່ວງຫິມະພານ ຍັງຮັກສາໄດ້ທ່າເຕີບໂຕເປັນຢ່າງດີ. ສະເພາະປະເພດສິນຄ້າຜັກ, ໝາກໄມ້ສົ່ງອອກມີລະດັບພັດທະນາກະໂດດຂັ້ນ. ກ່ອນນີ້, ບັນດາປະເພດໝາກໄມ້ຄື: ໝາກມັງກອນ, ໝາກມ່ວງ, ໝາກລີ້ນຈີ, ໝາກລຳໄຍ… ຍັງບໍ່ເຄີຍໄດ້ສົ່ງອອກໄປຕ່າງປະເທດເທື່ອ ແລະ ປະຈຸບັນ ໄດ້ສົ່ງອອກໄປຍັງບັນດາຕະຫຼາດທີ່ມີຄວາມຕ້ອງການດ້ານຄຸນນະພາບສູງຄື: ອາເມລິກາ, ອີຢູ ແລະ ຍີ່ປຸ່ນ. ຖ້າຫາກຮັກສາສະພາບການສົ່ງອອກຜັກ, ໝາກໄມ້ໄດ້ຄືໃນໄລຍະຜ່ານມາ, ທ້າຍປີ 2016 ນີ້, ການສົ່ງອອກຜັກ ໝາກໄມ້ອາດຈະບັນລຸຈຳນວນເງິນ 2 ຕື້ USD. ສິ່ງດັ່ງກ່າວສະແດງໃຫ້ເຫັນວ່າການສົ່ງອອກຜະລິດຕະພັນກະເສດຍັງມີຄວາມສາມາດບົ່ມຊ້ອນຫຼາຍຢ່າງຢູ່. ເຖິງຢ່າງໃດກໍ່ຕາມ, ການສົ່ງອອກ ຜະລິດຕະພັນກະເສດ ກໍປະສົບກັບສິ່ງທ້າທາຍບໍ່ແມ່ນໜ້ອຍ, ສິ່ງສຳຄັນທີ່ສຸດໃນປະຈຸບັນແມ່ນຕ້ອງມີບັນດາມາດຕະການຈັດຕັ້ງການຜະລິດຄືນໃໝ່, ຕິດພັນກັບຄວາມຕ້ອງການຂອງຕະຫຼາດ. ທ່ານ ຫງວຽນວັນບີກ, ນັກຊ່ຽວຊານໄຈ້ແຍກຕະຫຼາດ, ຖືວ່າ:
“ຕາມຂ້າພະເຈົ້າແລ້ວ, ກ່ອນອື່ນໝົດ, ພວກເຮົາຕ້ອງດັດປັບແຜນການຜະລິດກະສິກຳຄືນໃໝ່ ແລະ ຄວນມີການຄາດຄະເນບັນດາການຜັນແປຂອງຕະຫຼາດຢ່າງຖືກຕ້ອງ. ປະຈຸບັນ, ພວກເຮົາມີຜະລິດຕະພັນກະເສດສົ່ງອອກຕົ້ນຕໍ 11 ປະເພດ, ແຕ່ໃນນັ້ນມີສິນຄ້າຫຼາຍປະເພດພວມຢູ່ໃນລະດັບຍາກທີ່ຈະເພີ່ມຂຶ້ນຕື່ມອີກ ຫຼືສາມາດເພີ່ມຂຶ້ນໄດ້ແຕ່ໃນລະດັບຈຳກັດເທົ່ານັ້ນ. ດັ່ງນັ້ນ, ຄວນກຳນົດບັນດາປະເພດຜະລິດຕະພັນກະເສດໃໝ່ທີ່ມີຄວາມສາມາດບົ່ມຊ້ອນ, ມີຄວາມສາມາດ ແກ່ງແຍ້ງ ແລະ ມີທ່າແຮງເພື່ອພັດທະນາຕື່ມອີກ. ຕົວຢ່າງຄື: ໃນອະນາຄົດສາມາດສ່ົງອອກໝາກກ້ວຍໄດ້ 1 ຕື້ USD ຫຼືວ່າສົ່ງອອກຜັກໄດ້ນັບອາດຈະບັນລຸນັບຕື້ USD, ຕາມຂ້າພະເຈົ້າໄດ້ຮູ້ແລ້ວວ່າ, ບັນດາປະເທດອ້ອມຂ້າງ ຫວຽດນາມ ຄື: ມາເລເຊຍ, ອິນໂດເນເຊຍ ແລະ ສິງກະໂປ ພວມມີຄວາມຕ້ອງການນຳເຂົ້າຜັກ”
ແຕ່ເຖິງຢ່າງໃດກໍ່ຕາມ, ໄປຄຽງຄູ່ກັບບັນດາກາລະໂອກາດນັ້ນ, ຫວຽດນາມ ກໍພວມປະເຊີນໜ້າກັບຄວາມກົດດັນຈາກການແກ່ງແຍ້ງໃນການສົ່ງອອກຜະລິດຕະພັນກະເສດ. ຄຽງຄູ່ກັບບັນດາຮົ້ວກີດຂວາງດ້ານເຕັກນິກ, ຄຸນນະພາບ, ຄວາມປອດໄພ ແລະ ສຸຂະອະນາໄມດ້ານສະບຽງອາຫານ, ບັນຫາຕົ້ນກຳເນີດສຳລັບຜະລິດຕະພັນກະເສດກໍ່ພວມເປັນບັນຫາທີ່ບັນດາຮາກຖານຜະລິດ, ວິສາຫະກິດສົ່ງອອກພວມມານະພະຍາຍາມແກ້ໄຂ. ເພື່ອບັນລຸໄດ້ຈຸດໝາຍເຕີບໂຕລະດັບການສົ່ງອອກຜະລິດຕະພັນກະເສດຄື ຄວາມສາມາດບົ່ມຊ້ອນທີ່ມີຢູ່ແລ້ວ, ກະຊວງອຸດສາຫະກຳ - ການຄ້າ ແລະ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ວາງອອກຫຼາຍມາດຕະການສົ່ງອອກບັນດາປະເພດສິນຄ້ານີ້ໃນໄລຍະຈະມາເຖິງ. ຄຽງຄູ່ກັບການຍູ້ແຮງການວາງແຜນຜັງ, ສ້າງຕັ້ງບັນດາເຂດປູກຝັງໂດຍສະເພາະ, ຫັນຜະລິດຕະພັນເປັນຫຼາຍຮູບຫຼາຍແບບນັ້ນ, ຊາວກະສິກອນເອງ ແລະ ວິສາຫະກິດກໍ່ພວມມານະພະຍາຍາມ ແລະ ມີຍຸດທະສາດໃນການຜະລິດອອກເພື່ອຜະລິດບັນດາຜະລິດຕະພັນທີ່ມີຄຸນນະພາບສູງ, ເປັນປົກກະຕິ, ຮັບປະກັນສຸຂະອະນາໄມດ້ານສະບຽງອາຫານ, ຕອບສະໜອງຄວາມຮຽກຮ້ອງຕ້ອງການຂອງບັນດາຕະຫຼາດທີ່ມີຄວາມຕ້ອງການດ້ານຄຸນນະພາບສູງ. ເພື່ອສ້າງທີ່ຕັ້ງໃນເວທີສາກົນໃຫ້ໄດ້ນັ້ນ, ບັນດາວິສາຫະກິດຕ້ອງບືນຕົວຂຶ້ນດ້ວຍກຳລັງພາຍໃນ, ຢືນຢັນໄດ້ຄຸນນະພາບ ແລະ ເຄື່ອງໝາຍການຄ້າຂອງຕົນເອງ. ນັກຊ່ຽວຊານ ຫວູດິ່ງແອ໋ງ, ຖືວ່າ:
“ປະຈຸບັນ, ທັງປະເພດສິນຄ້າສົ່ງອອກຕົ້ນຕໍ ແລະ ສິນຄ້າສົ່ງອອກທີ່ມີຄວາມສາມາດບົ່ມຊ້ອນໃນຊຸມປີຈະມາເຖິງ ຫວຽດນາມ ຕ້ອງເອົາໃຈໃສ່ເປັນພິເສດເຖິງ 2 ບັນຫາ: ທີໜຶ່ງແມ່ນຕ້ອງກຳນົດຈະເລືອກເອົາດ້ານປະລິມານ ຫຼື ຄຸນນະພາບ. ບັນຫາທີສອງແມ່ນເຮັດແນວໃດເພື່ອຮັບປະກັນຄຸນນະພາບຢ່າງສະໝຳ່ສະເໝີເພື່ອສ້າງອິດທິພົນຊື່ສຽງ ແລະ ຄຸນນະພາບ, ຫຼືເວົ້າລະອຽດແມ່ນສ້າງເຄື່ອງໝາຍການຄ້າໃຫ້ແກ່ ຜະລິດຕະພັນກະເສດສົ່ງອອກແຕ່ລະປະເພດ.”
ໝາກມັງກອນ
|
ເພື່ອໝູນໃຊ້ກາລະໂອກາດເຊິ່ງວິວັດທະນາການເຊື່ອມໂຍງນຳມາໃຫ້, ວຽກງານການຄາດຄານຂໍ້ມູນຂ່າວຕະຫຼາດຕ່າງງປະເທດ, ວຽກງານສົ່ງເສີມການຄ້າສຳລັບບັນດາປະເພດສິນຄ້າຜະລິດຕະພັນກະເສດ - ເຄື່ອງປ່າຂອງດົງ - ສິນໃນນຳ້ ພວມໄດ້ຮັບການເພີ່ມທະວີ. ກະຊວງກະສິກຳ ແລະ ພັດທະນາຊົນນະບົດ ແລະ ກະຊວງ ອຸດສາຫະກຳ - ການຄ້າ, ພິເສດແມ່ນລະບົບຫ້ອງການການຄ້າທີ່ປະຈຳຢູ່ຕ່າງປະເທດ ຕ້ອງເປັນຂົວຕໍ່ສຳຄັນໃນການສ້າງເຄືອຂ່າຍຂໍ້ມູນຂ່າວ, ຊຸກຍູ້ການພົວພັນ, ເຊື່ອມຕໍ່ການສົ່ງອອກ -ນຳເຂົ້າ ຜະລິດຕະພັນກະເສດ - ເຄື່ອງປ່າຂອງດົງ - ສິນໃນນຳ້. ນີ້ກໍ່ແມ່ນພື້ນຖານເຊື່ອມຕໍ່ສຳຄັນລະຫວ່າງບັນດາຕະຫຼາດກັບ ຫວຽດນາມ ເພື່ອຕອບສະໜອງການຍົກສູງຄຸນນະພາບສິນຄ້າສົ່ງອອກຕາມມາດຕະຖານ, ຂໍ້ກຳນົດດ້ານຄຸນນະພາບຂອງບັນດາປະເທດນຳເຂົ້າ.
ເພື່ອບັນລຸຈຸດໝາຍລະດັບເຕີບໂຕການສົ່ງອອກຜະລິດຕະພັນກະເສດໃນປີ 2016, ລັດກໍໄດ້ວາງອອກຫຼາຍມາດຕະການຢ່າງລະອຽດໃນການໜູນຊ່ວຍຊາວກະສິກອນລົງທຶນປ່ຽນໃໝ່ເຕັກໂນໂລຢີ, ໝູນໃຊ້ວິທະຍາສາດ - ເຕັກໂນໂລຢີ, ພິເສດແມ່ນດ້ານແນວພັນປູກ, ເຕັກໂນໂລຢີຊີວະພາບ, ເຕັກໂນໂລຢີໃນການຮັກສາປຸງແຕ່ງ, ເຕັກໂນໂລຢີຂໍ້ມູນຂ່າວສານ ແລະ ການຜະລິດຕິດພັນກັບການປຸງແຕ່ງ ແລະ ຈຳໜ່າຍ. ພ້ອມກັນນັ້ນແມ່ນການສ້າງຕັ້ງລະບົບຮ່ວມສຳພັນໃນການຈຳໜ່າຍຜະລິດຕະພັນໃນຕະຫຼາດພາຍໃນປະເທດ ແລະ ສົ່ງອອກຕ່າງປະເທດ.