(vovworld)- ດ້ວຍທິດນຳຖືເປັນສຳຄັນການປັບປຸງສະພາບແວດລ້ອມແຫ່ງການລົງທຶນຮອບດ້ານ ຈາກຈີນຕະນາການ, ວິທີສຳພັດ, ການຈັດຕັ້ງສົ່ງເສີມການລົງທຶນຕະຫລອດຮອດນະໂຍບາຍບຸລິມະສິດດຶງດູດເງິນລົງທຶນ ໄດ້ປະກອບສ່ວນຊຸກຍູ້ກະແສເງິນລົງທຶນໂດຍກົງຂອງຕ່າງປະເທດ(FDI) ເຂົ້າແຂວງ ກວ໋າງນີງ. ຄວາມສາມາດບົ່ມຊ້ອນ, ທ່າໄດ້ປຽບຂອງແຂວງຫນຶ່ງຢູ່ແຄມທະເລກໍແມ່ນທ່າໄດ້ປຽບເພື່ອໃຫ້ແຂວງ ກວ໋າງນີງ ສ້າງພື້ນຖານ ແລະ ກຳລັງຫນູນໃຫມ່ໃນການດຶງດູດເງິນລົງທຶນໂດຍກົງຂອງຕ່າງປະເທດ. ບົດຂຽນທີ່ມີຫົວຂໍ້ວ່າ: ການຫັນປ່ຽນໃນການດຶງດູດເງິນລົງທຶນໂດຍກົງຈາກຕ່າງປະເທດເຂົ້າແຂວງ ກວ໋າງນີງ ” ຂອງນັກຂ່າວ ເລມີງ ຈະແນະນຳກ່ຽວກັບທ່າອ່ຽງຕັ້ງຫນ້າດັ່ງກ່າວ.
ນະຄອນ ຮ້າລອງ ແຂວງກວ໊າງນີງ
ພາບ:internet
|
ໂດຍຕັ້ງຢູ່ເຂດຕາເວັນອອກສຽງເຫນືອຂອງຫວຽດນາມ, ແຂວງ ກວ໋າງນີງ ໄດ້ຮັບຖືວ່າແມ່ນປະເທດຫວຽດນາມນ້ອຍ. ກວ໋າງນີງ ມີລະບົບພື້ນຖານໂຄງລ່າງຄົມມະນາຄົມທາງນ້ຳແລະ ທາງບົກຢ່າງສະດວກ, ມີທ່າກຳປັ່ນນ້ຳເລິກ ດ້ວຍຝັ່ງທະເລຍາວປະມານ 250 ກິໂລແມັດ ແລະ ມີເສັ້ນຊາຍແດນສາກົນຕິດຈອດກັບ ຈີນ ກວ່າ 118 ກິໂລແມັດ ພ້ອມກັບດ່ານຊາຍແດນສາກົນ 3 ແຫ່ງ. ນີ້ແມ່ນບັນດາເງື່ອນໄຂດີທີ່ສຸດເພື່ອດຶງດູດການລົງທຶນຂອງຕ່າງປະເທດ. ໃນໄລຍະຜ່ານມາ, ກວ໋າງນີງ ກໍໄດ້ສ້າງບາດກ້າວບຸກທະລຸໃນການດຶງດູດເງິນລົງທຶນໂດຍກົງຂອງຕ່າງປະເທດ ດ້ວຍຫລາຍນະໂຍບາຍທີ່ສະດວກຄື: ໂຄສະນາກ່ຽວກັບຄວາມສາມາດບົ່ມຊ້ອນ, ທ່າແຮງຂອງ ກວ໋າງນີງ, ສ້າງເງື່ອນໄຂດຶງດູດນັກລົງທຶນ, ປະຕິບັດບັນດານະໂຍບາຍບຸລິມະສິດ, ຍົກເວັ້ນອາກອນເຊົາທີ່ດິນ, ອາກອນລາຍຮັບ ແລະ ຍູ້ແຮງການປະຕິຮູບລະບຽບການບໍລິຫານ… ສ້າງເງື່ອນໄຂສະດວກໃຫ້ແກ່ບັນດານັກລົງທຶນ. ທ່ານ ເຈີນດຶກເລີມ, ຫົວຫນ້າພະແນກແຜນການ ແລະ ການລົງທຶນ ແຂວງ ກວ໋າງນີງ ໃຫ້ຮູ້ວ່າ:
“ແຂວງ ກວ໋າງນີງ ໄດ້ສ້າງອົງການສົ່ງເສີມ ແລະ ຫນູນຊ່ວຍການລົງທຶນ(IPA) ເພື່ອຮັບປະກັນການປະຕິບັດກົນໄກ ປະຕູດຽວ ໃນການແກ້ໄຂບັນດາລະບຽບການລົງທຶນຢ່າງເປີດເຜີຍ, ໂປ່ງໃສ, ວ່ອງໄວ, ຮັບປະກັນຫລຸດຜ່ອນເວລາໃຫ້ແກ່ບັນດານັກລົງທຶນ. ອົງການນີ້ໄດ້ຊີ້ນຳບັນດາພະແນກ, ຂະແຫນງການ ເຂົ້າຮ່ວມວຽກງານຂົນຂວາຍຫນູນຊ່ວຍການລົງທຶນ, ຮັບປະກັນໃຫ້ແກ່ການຮ່ວມສຳພັນ, ເຊື່ອມຕໍ່, ສົມທົບກັນລະຫວ່າງບັນດາພະແນກ, ຂະແຫນງການກັບບັນດາເຈົ້າຂອງລົງທຶນເປັນຢ່າງດີ. ບໍ່ພຽງແຕ່ປະຕິຮູບລະບຽບການບໍລິຫານເທົ່ານັ້ນ, ແຂວງ ກວ໋າງນີງ ຍັງສ້າງສະພາບແວດລ້ອມແຫ່ງການລົງທຶນໃຫ້ສົມບູນແບບ, ເປັນເຈົ້າການໃນຂອດບຸກເບີກຫນ້າພຽງ, ປະຕິບັດວຽກງານວາງແຜນຜັງເປັນຢ່າງດີ.”
ດ້ວຍບັນດາແຜນນະໂຍບາຍທີ່ຕັ້ງຫນ້ານັ້ນ, ແຂວງ ກວ໋າງນີງ ໄດ້ ແລະ ພວມສ້າງຄວາມດູດດື່ມຢ່າງແຂງສຳລັບບັນດານັກລົງທຶນ. ສະເລ່ຍແຕ່ລະປີ, ແຂວງ ກວ໋າງນີງ ຕ້ອນຮັບ ແລະ ເຮັດວຽກກັບນັກລົງທຶນກວ່າ 50 ເທື່ອ, ໃນນັ້ນ ມີນັກລົງທຶນມາຈາກ ສເກົາຫລີ, ການາດາ, ຈີນ, ຕາເວັນອອກກາງ, ຍີ່ປຸນ, ອາເມລິກາ… ມາຮອດປະຈຸບັນ, ແຂວງ ກວ໋າງນີງ ມີ 93 ໂຄງການລົງທຶນຂອງຕ່າງປະເທດຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນກວ່າ 4 ຕື້ USD. ສະເພາະປີ 2012 ເຖິງວ່າຖືກຜົນສະທ້ອນຈາກສະພາບເສດຖະກິດໂລກກໍ່ຕາມ, ແຕ່ແຂວງ ກວ໋າງນີງ ຍັງຄົງດຶງດູດທຶນ FDI ໄດ້ກວ່າ 411 ລ້ານ USD ແລະ ໄລ່ຮອດໄຕມາດ 2 ປີ 2013, ແຂວງ ກວ໋າງນີງດຶງດູດໂຄງການ FDI ໃຫມ່ ໄດ້ 4 ໂຄງການ, ດ້ວຍຍອດຈຳນວນເງິນລົງທຶນເກືອບ 77 ລ້ານ USD. ສະພາບການຈະດີກວ່າຖ້າຫາກບັດນາໂຄງການໃຫຍ່ຄື: ໂຄງການກໍ່ສ້າງສະຫນາມບິນ ເວີນດົນ, ເຂດທ່ອງທ່ຽວພັກຜ່ອນບຳລຸງສຸຂະພາບປະສົມ ເວີນດົນ, ຂົວ ແບກດັ່ງ… ດ້ວຍມີການເຂົ້າຮ່ວມຂອງບັນດາບໍລິສິດທີ່ມີຊື່ສຽງຄື: Joinus, ບໍລິສັດໃຫຍ່ການບິນ ສເກົາຫລີ, Genting ຂອງມາເລເຊຍ, SE ຂອງຍີ່ປຸ່ນ ໄດ້ຮັບການປະຕິບັດໃນໃກ້ໆນີ້. ເພື່ອເປັນເຈົ້າການໃນການດຶງດູດເງິນລົງທຶນ, ແຂວງ ກວ໋າງນີງ ໄດ້ປະຕິບັດການວາງແຜນກຳນົດລະບົບບັນດາເຂດອຸດສາຫະກຳ, ເຂດເສດຖະກິດ. ໄລ່ຮອດປະຈຸບັນ, ກວ໋າງນີງ ມີເຂດເສດຖະກິດ 3 ແຫ່ງ ແລະ ເຂດອຸດສາຫະກຳ 11 ແຫ່ງ ໄດ້ຮັບການອະນຸມັດຈາກລັດຖະບານ. ການພັດທະນາບັນດາເຂດອຸດສາຫະກຳ, ເຂດເສດຖະກິດ ບໍ່ພຽງແຕ່ສ້າງເງື່ອນໄຂດຶງດູດການລົງທຶນເທົ່ານັ້ນ ຫາກຍັງປະຕິບັດບົດບາດນຳພາ, ສ້າງຄວາມດຶງດູດ ແລະພັດທະນາເສດຖະກິດອອກສູ່ເຂດອ້ອມຂ້າງອີກດ້ວຍ. ທ່ານ ຟຸ່ງແຢງດ່າຍ, ຫົວຫນ້າຄະນະຄຸ້ມຄອງບັນດາເຂດເສດຖະກິດ, ເຂດອຸດສາຫະກຳແຂວງ ກວ໋າງນີງ ໃຫ້ຮູ້ວ່າ:
“ຄະນະຄຸ້ມຄອງເຂດເສດຖະກິດສືບຕໍ່ເປັນເສນາທິການເພື່ອໃຫ້ຄະນະກຳມະການປະຊາຊົນແຂວງ ກວ໋າງນີງ ພັດທະນາບັນດາເຂດອຸດສາຫະກຳ, ເຂດເສດຖະກິດ. ຫນ້າທີ່ສຳຄັນນັ້ນແມ່ນ ຜັນຂະຫຍາຍບັນດາແຜນກຳນົດ, ໃນນັ້ນ ຜັນຂະຫຍາຍແຜນກຳນົດບັນດາເຂດເສດຖະກິດຢູ່ດ່ານຊາຍແດນ, ແຜນກຳນົດເຂດເສດຖະກິດ ເວີນດົນ ແລະ ແຜນກຳນົດບັນດາເຂດອຸດສາຫະກຳ ເພື່ອດຶງດູດບັນດານັກລົງທຶນສຳຮອງເຂົ້າມາລົງທຶນດຳເນີນທຸລະກິດຢູ່ເຂດອຸດສາຫະກຳດັ່ງກ່າວ.”
ກວ໋າງນີງຈັດກອງປະຊຸມສຳມະນາດຶງດູດນັກລົງທຶນຍີ່ປຸ່ນ
ພາບ:internet
|
ຕາມການວາງແຜນສັງລວມພັດທະນາເສດຖະກິດສັງຄົມຮອດປີ 2020, ວິໄສທັດ 2030, ແຂວງ ກວ໋າງນີງ ຈະສຸມໃສ່ຈຸດໝາຍກາຍເປັນສູນພັດທະນາອອກສູ່ທະເລ, ສູນພົວພັນແລກປ່ຽນການຄ້າສາກົນໃຫຍ່ ແລະ ທັນສະໄຫມ. ເພາະສະນັ້ນ ໃນບັນຊີລາຍຊື່ 32 ໂຄງການ ຊື່ງແຂວງ ກວ໋າງນີງ ດຶງດູດການລົງທຶນໃນປີ 2013 ແລະ ໄລຍະ 2013-2015, ມີຫລາຍໂຄງການກ່ຽວຂ້ອງເຖິງທະເລຄື: ໂຄງການເຂດ ພັກຜ່ອນບຳລຸງສຸຂະພາບປະສົມທີ່ມີຄຸນນະພາບສູງ, ດ້ວຍເງິນລົງທຶນ 4 ຕື້ USD ພ້ອມດ້ວຍຫລາຍໂຄງການທ່ອງທ່ຽວອື່ນທີ່ມີມູນຄ່ານັບລ້ານ USD ຄື: ໂຄງການທ່ອງທ່ຽວຊີວະພາບເວີນດົນ, ສະຫນາມກອບສ, ໂຮງແຮມ 5 ດາວ ເວີນດົນ. ຄຽງຄູ່ກັນນັ້ນ ທາງແຂວງ ຍັງດຶງດູດການລົງທຶນເຂົ້າບັນດາໂຄງການພື້ນຖານຄົງລ່າງຄົມມະນາຄົມ, ພື້ນຖານໂຄງລ່າງບັນດາເຂດອຸດສາຫະກຳພົ້ນເດັ່ນຄື: ໂຄງການກໍ່ສ້າງ ແລະ ດຳເນີນທຸລະກິດພື້ນຖານໂຄງລ່າງທ່າກຳປັ່ນ ຫາຍຮ່າ, ດ້ວຍເງິນລົງທຶນກວ່າ 3 ຕື້ USD, ໂຄງການກໍ່ສ້າງເຂດອຸດສາຫະກຳ ແລະ ການບໍລິການບຶງ ຍ່າມາກ, ດ້ວຍເງິນລົງທຶນກວ່າ 2-3 ຕື້ USD, ໂຄງການເຂດປອດພາສີ, ເຂດອຸດສາຫະກຳສະອາດ ຢູ່ ເວີນດົນ, ມີເງິນລົງທຶນແຕ່ 1,3-1,5 ຕື້ USD.
ດ້ວຍການພັດທະນາຢ່າງວ່ອງໄວບົນພື້ນຖານວິໄສທັດຍາວນານ, ແຂວງ ກວ໋າງນີງ ພວມພັດທະນາກາຍເປັນສູນເສດຖະກິດສຳຄັນໃນພາກພື້ນເສດຖະກິດຈຸດສຸມທາງພາກເຫນືອ. ໃນທ່າອ່ຽງນັ້ນ ເລື່ອງເພີ່ມທະວີການດຶງດູດເງິນລົງທຶນຕ່າງປະເທດມີຄວາມໝາຍສຳຄັນເພື່ອໃຫ້ແຂວງ ກວ໋າງນີງ ຫັນຄວາມມຸ້ງຫວັງໃຫ້ປະກົດຜົນເປັນຈິງຢ່າງໝັ້ນຄົງ.