(vovworld)- ມາຮອດປະຈຸບັນ, ບັ້ນຂົນຂວາຍ“ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ” ໂດຍກົມການເມືອງ, ຄະນະບໍລິຫານງານສູນກາງພັກກອມມູນິດຫວຽດນາມ ປຸກລະດົມ ໄດ້ກ້າວເຂົ້າສູ່ປີທີ 5. ໝາກຜົນໃຫຍ່ສຸດຂອງບັ້ນຂົນຂວາຍ ແມ່ນໄດ້ຊ່ວຍໃຫ້ວິສາຫະກິດຍົກສູງສະຕິຮັບຮູ້ກ່ຽວກັບຄວາມສຳຄັນຂອງຕະຫລາດພາຍໃນ ແລະ ສິ່ງສຳຄັນຫນຶ່ງອີກຜູ້ອຸປະໂພກບໍລິໂພກຫລາຍຄົນໄດ້ມີການປ່ຽນແປງຄວາມຮັບຮູ້ກ່ຽວກັບສິນຄ້າຫວຽດນາມ, ປຸກລຸກນຳ້ໃຈ“ຊົມໃຊ້ສິນຄ້າພາຍໃນປະເທດແມ່ນຮັກຊາດ”.
ສິນຄ້າຫວຽດນາມ ກວມອັດຕາສ່ວນເຖິງ 90-95%ຢູ່ໃນລະບົບຮ້ານ
ລະບົບຮ້ານຊັບພະສິນຄ້າຢູ່ບໍລິເວນ ຮ່າໂນ້ຍ
ພາບ:internet
|
ເມື່ອເຂົ້າຮ້ານຊັບພະສິນຄ້າ Fivimart ຢູ່ ຖະຫນົນ ຫລີທາຍໂຕ ນະຄອນຫລວງ ຮ່າໂນ້ຍ, ລູກຄ້າທັງຫລາຍຈະເຫັນສິນຄ້າທຸກປະເພດທີ່ໄດ້ຮັບການຜະລິດພາຍໃນປະເທດຫວຽດນາມຄື: ສິນໃນນຳ້, ອາຫານ, ເຂົ້າໜົມຕະຫລອດຮອດເຄື່ອງນຸ່ງຮົ່ມ, ເຄື່ອງໃຊ້ສອຍໃນຄອບຄົວ… ແມ່ນກວມເອົາສ່ວນຫລາຍໃນຈຳນວນປະເພດສິນຄ້າທີ່ວາງຂາຍຢູ່ທີ່ນີ້. ໃນນັ້ນ, ອາຫານຜະລິດຢູ່ພາຍໃນປະເທດແມ່ນປະເພດສິນຄ້າທີ່ລູກຄ້າຊື້ຫລາຍກວ່າໝູ່. ນາງ ຫງວຽນທິງາ, ລູກຄ້າຢູ່ ເມືອງ ຮາຍບ່າຈືງ ຮ່າໂນ້ຍ ໃຫ້ຮູ້ວ່າ:
“ປະຈຸບັນ ສິນຄ້າຜະລິດພາຍໃນປະເທດກວມເຖິງ 90%, ສ່ວນສິນຄ້ານຳເຂົ້າຈາກຕ່າງປະເທດແມ່ນຫນ້ອຍກວ່າ ເພາະວ່າ ສິນຄ້າຜະລິດພາຍໃນປະເທດມີລາຄາຖືກກວ່າ ແລະ ຄຸນນະພາບກໍດີພໍສົມຄວນ.ຄອບຄົວຂ້າພະເຈົ້າ ກໍຄືເພື່ອນບ້ານສ່ວນຫລາຍແມ່ນຊົມໃຊ້ສິນຄ້າທີ່ຜະລິດຢູ່ພາຍໃນປະເທດ.”
ຮ້ານຊັບພະສິນຄ້າ Fivimart ຢູ່ຖະຫນົນຫລີທາຍໂຕແມ່ນຫນຶ່ງໃນຈຳນວນຮ້ານຊັບພະສິນຄ້າ 14ແຫ່ງໃນລະບົບ Fivimart ທີ່ຂຶ້ນບໍລິສັດຫຸ້ນສ່ວນ ເຍີດນາມ ໄດ້ຕອບສະຫນອງບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ” ນັບແຕ່ຊຸມມື້ທຳອິດ. ໃນຊຸມປີມໍ່ໆມານີ້, ສິນຄ້າຫວຽດນາມ ໃນລະບົບຮ້ານຊັບພະສິນຄ້ານີ້ ໄດ້ກວມອັດຕາສ່ວນໃຫຍ່ໃນການຈຳຫນ່າຍ ແລະນຳມາເຊິ່ງລາຍຮັບສູງ. ສະເພາະປີ 2013, ຢູ່ລະບົບຮ້ານຊັບພະສິນຄ້າ Fivimart, ລາຍຮັບເກັບມາໄດ້ຈາກການຂາຍສິນຄ້າຜະລິດພາຍໃນປະເທດໄດ້ເພີ່ມຂຶ້ນກວ່າ 31% ເມື່ອທຽບໃສ່ປີກ່ອນ. ທ່ານນາງ ຫງວຽນທິມີງເຟືອງ, ຜູ້ອຳນວຍການຮ້ານຊັບພະສິນຄ້າ Fivimart ຫລີທາຍໂຕ ຮ່າໂນ້ຍ ໃຫ້ຮູ້ວ່າ:
“ຍາມໃດບໍລິສັດກໍສະຫງວນສະຖານທີ່ໃຈກາງ, ມີນະໂຍບາຍບຸລິມະສິດໃຫ້ແກ່ບັນດາວິສາຫະກິດຫວຽດນາມມີເຄື່ອງໝາຍການຄ້າ. ມາຮອດປະຈຸບັນ, ສິນຄ້າທີ່ວາງຂາຍຢູ່ໃນຮ້ານຊັບພະສິນຄ້ານີ້ ສ່ວນຫລາຍມີເຄື່ອງໝາຍການຄ້າຫວຽດນາມ., ໃນນັ້ນ ມີເຄື່ອງໝາຍທີ່ມີຊື່ສຽງຄື: ນຳ້ປາ ຟຸກວັກ, ນຳ້ຈຳ້ຈູງແທ່ງ, ເຂົ້າຫນົມ ຫາຍຮ່າ, ກີງໂດ…ພວກຂ້າພະເຈົ້າເຫັນວ່າ ລູກຄ້າມາຊື້ສິນຄ້າຢູ່ຮ້ານນີ້ ສ່ວນຫລາຍເຂົາເຈົ້າເລືອກຊື້ສິນຄ້າຜະລິດພາຍໃນປະເທດ.”
ປະຈຸບັນ, ລະບົບຮ້ານຊັບພະສິນຄ້າຢູ່ບໍລິເວນ ຮ່າໂນ້ຍຄື: BigC, Citimart, Hapromart… ສິນຄ້າຫວຽດນາມ ກວມອັດຕາສ່ວນເຖິງ 90-95%. ສິ່ງດັ່ງກ່າວສະແດງໃຫ້ເຫັນວ່າ ສິນຄ້າຫວຽດນາມ ມີທີ່ຕັ້ງສຳຄັນສຳລັບຜູ້ອຸປະໂພກບໍລິໂພກ.
ຄຽງຄູ່ກັບການໂຄສະນາສິນຄ້າຫວຽດນາມແລ້ວ, ງານຕະຫລາດນັດສິນຄ້າຫວຽດນາມ ທີ່ມີຄຸນນະພາບສູງຄັ້ງຕ່າງໆ, ການເຄື່ອນໄຫວສົ່ງເສີມການຄ້າ, ລາຍການສົ່ງສິນຄ້າລົງໄປຂາຍຢູ່ເຂດຊົນນະບົດ ໂດຍພະແນກອຸດສາຫະກຳ ແລະ ການຄ້າ ນະຄອນຮ່າໂນ້ຍ ຈັດຕັ້ງ ໄດ້ຊ່ວຍໃຫ້ຜູ້ອຸປະໂພກບໍລິໂພກຫລາຍຄົນຮູ້ຈັກເຖິງເຄື່ອງໝາຍການຄ້າ, ເຂົ້າໃຈຕື່ມອີກກ່ຽວກັບຄຸນນະພາບສິນຄ້າຫວຽດນາມຫລາຍກວ່າ. ໃນ 3 ເດືອນຕົ້ນປີນີ້ ລະບົບຮ້ານຊັບພະສິນຄ້າ BigC ໄດ້ຈັດຕັ້ງບັ້ນເຄື່ອນໄຫວສົ່ງເສີມການຄ້າຫລາຍຄັ້ງ ແລະ ມາຮອດປະຈຸບັນ ລາຍຮັບຈາກການຂາຍສິນຄ້າຫວຽດນາມ ໄດ້ເພີ່ມຂຶ້ນ 30-40%, ຄວາມສາມາດແກ້ງແຍ້ງກັບສິນຄ້ານຳເຂົ້າຈາກຕ່າງປະເທດແມ່ນເພີ່ມຂຶ້ນຫລາຍພໍສົມຄວນ. ທ່ານ ຫງວຽນທາຍຢູງ, ຮອງຜູ້ອຳນວຍການໃຫຍ່ຮ້ານຊັບພະສິນຄ້າ Big C ໃຫ້ຮູ້ວ່າ:
“ບັນດາບໍລິສັດສະຫນອງເຂົ້າໜົມພາຍໃນປະເທດ ໄດ້ປ່ຽນແທນບັນດາບໍລິສັດນຳເຂົ້າຈາກໄທ, ອິນໂດເນເຊຍ, ມາເລເຊຍ. ສ່ວນອາຫານບາງປະເພດຄື: ຊີ້ນງົວນຳເຂົ້າຈາກຕ່າງປະເທດ ກຳລັງຊື້ກໍຖືກຫລຸດລົງ ແລະ ຜູ້ຊົມໃຊ້ມີທ່າອ່ຽງຊື້ອາຫານຜະລິດຢູ່ຫວຽດນາມ.”
ຄວາມຈິງ ຢູ່ ຮ່າໂນ້ຍ ອາດຈະເຫັນໄດ້ວ່າ ສິນຄ້າຫວຽດນາມ, ເປັນຕົ້ນແມ່ນສິນຄ້າທີ່ມີຄຸນນະພາບສູງ ຍາມໃດກໍໄດ້ຮັບຄວາມສົນໃຈຈາກຜູ້ໃຊ້ສອຍ. ຫວ່າງແລ້ວນີ້ ໃນໂອກາດສະຫລຸບຕີລາຄາຜົນຂອງການປະຕິບັດບັ້ນຂົນຂວາຍ“ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ” ຖືກຈັດຂຶ້ນຢູ່ ຮ່າໂນ້ຍ, ບົດລາຍງານຂອງຄະນະຊີ້ນຳສູນກາງກ່ຽວກັບບັ້ນຂົນຂວາຍດັ່ງກ່າວໄດ້ຊີ້ແຈ້ງວ່າ: ການຕອບສະຫນອງຂອງບັນດາວິສາຫະກິດໃນບັ້ນຂົນຂວາຍ“ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ” ໄດ້ສົ່ງຜົນກະທົບຢ່າງຕັ້ງຫນ້າເຖິງທົ່ວສັງຄົມ. ບັ້ນຂົນຂວາຍໄດ້ຊ່ວຍໃຫ້ບັນດາວິສາຫະກິດຍູ້ແຮງການຮ່ວມສຳພັນ ບົນພື້ນຖານເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງຕະຫລາດພາຍໃນປະເທດ, ຈາກນັ້ນ ປະກອບສ່ວນນັບມື້ນັບຕັ້ງຫນ້າໃຫ້ແກ່ກິດຈະການພັດທະນາເສດຖະກິດສັງຄົມຂອງປະເທດຊາດ.