(vovworld)- ໃນຊຸມປີມໍ່ໆມານີ້ ມີ 90% ຈຳນວນສິນຄ້າຂາອອກຂາເຂົ້າຂອງຫວຽດນາມໄດ້ຂົນສົ່ງຜ່ານທາງທະເລ. ໃນຍຸດທະສາດນັ້ນ ການພັດທະນາທ່າກຳປັ່ນທະເລ ເວົ້າລວມ ແລະ ທ່າກຳປັ່ນຫາຍຟ່ອງ ຢູ້ພາກເຫນືອຫວຽດນາມ ເວົ້າສະເພາະ ມີຄວາມໝາຍສຳຄັນ.
ປະຈຸບັນ, ທ່າກຳປັ່ນຫາຍຟ່ອງ ແມ່ນຫນຶ່ງໃນບັນດາທ່າກຳປັ່ນສຳຄັນ ແລະ ສວມບົດບາດຫລັກແຫລ່ງໃນລະບົບທ່າກຳປັ່ນທະເລຂອງຫວຽດນາມ. ເຖິງຢ່າງໃດກໍຕາມ, ໃນຫລາຍປີມານີ້ ທ່າກຳປັ່ນ ຫາຍຟ່ອງ ຍັງຄົງປະຕິບັດບົດບາດຕົ້ນຕໍແມ່ນຂົນຖ່າຍສິນຄ້າ, ໃນຂະນະບໍ່ທັນມີທ່າກຳປັ່ນນ້ຳເລິກເພື່ອໃຫ້ກຳປັ່ນໃຫຍ່ເຂົ້າທຽບທ່າໄດ້ ແລະ ລະບົບຄົມມະນາຄົມຂົນສົ່ງທາງລົດໄຟ, ທາງບົກທີ່ເຊື່ອມຕໍ່ກັບທ່າກຳປັ່ນ ດ້ວຍຕາງຫນ່າງຄົມມະນາຄົມແຫ່ງຊາດບໍ່ທັນພັດທະນາຢ່າງຄົບຊຸດນັ້ນ. ໃນໄລຍະ 2006 - 2010, ນະຄອນຫາຍຟ່ອງ ໄດ້ສະຫງວນຈຳນວນເງິນກວ່າ 1.500 ຕື້ດົ່ງເພື່ອລົງທຶນກໍ່ສ້າງຂົວທ່າກຳປັ່ນໃນລະບົບທ່າກຳປັ່ນ ດີງຫວູ. ປີ 2012, ຂົວທ່າກຳປັ່ນເລກ 6 ແລະ ເລກ 7 ຂຶ້ນກັບລະບົບທ່າກຳປັ່ນ ດີງຫວູ ກໍໄດ້ຮັບການກໍ່ສ້າງສຳເລັດ. ພ້ອມກັບການຍົກລະດັບ, ຂະຫຍາຍທ່າກຳປັ່ນ ດີງຫວູ, ພື້ນຖານໂຄງລ່າງຢູ່ເຂດ ເຕີນກາງ ກໍ່ຄ່ອຍໆໄດ້ຮັບການກໍ່ສ້າງສຳເລັດ. ມາຮອດປະຈຸບັນ, ທ່າກຳປັ່ນ ດີງຫວູ ແມ່ນທ່າກຳປັ່ນແຫ່ງທຳອິດຢູ່ ຫາຍຟ່ອງ ມີເງື່ອນໄຂດ້ານເຕັກນິກຢ່າງຄົບຖ້ວນເພື່ອໃຫ້ກຳປັ່ນບັນທຸກສິນຄ້າດ້ວຍນ້ຳຫນັກ 2 ລ້ານໂຕນເຂົ້າທຽບທ່າ. ເຖິງຢ່າງໃດກໍຕາມ, ບັນຫາທີ່ການນຳນະຄອນຫາຍຟ່ອງສົນໃຈທີ່ສຸດໃນປະຈຸບັນ ນັ້ນແມ່ນການປັບປຸງແຜນກຳນົດພື້ນຖານໂຄງລ່າງ, ຄົມມະນາຄົມຂົນສົ່ງ, ຄັງສາງຢ່າງຄົບຊຸດ ໃຫ້ເໝາະສົມກັບການເຄື່ອນໄຫວຂອງລະບົບທ່າກຳປັ່ນທະເລ. ທ່ານ ເຢືອງງອກຕວນ, ຮອງຫົວຫນ້າພະແນກແຜນການ ແລະ ການລົງທຶນ ນະຄອນຫາຍຟ່ອງ ຖືວ່າ:
“ກ່ອນນີ້, ເມື່ອວາງແຜນກຳນົດ ພວກເຮົາເອົາໃຈໃສ່ເຖິງທີ່ດິນເປັນຕົ້ນຕໍ່, ຫາກບໍ່ທັນເອົາໃຈໃສ່ເຖິງການພັດທະນາເຂດທະເລເວົ້າລວມ. ຂ້າພະເຈົ້າຄິດວ່າ ພວກເຮົາຄວນແກ້ໄຂບັນຫາດັ່ງກ່າວໃນໄລຍະຈະມາເຖິງ.”
ຕາມທິດປັບປຸງແຜນກຳນົດດັ່ງກ່າວ, ປະຈຸບັນ ນະຄອນ ຫາຍຟ່ອງໄດ້ປະຕິບັດການກໍ່ສ້າງກິດຈະກຳຄົມມະນາຄົມສຳຄັນ ເພື່ອຮັບປະກັນຂຸດຄົ້ນບັນດາທ່າກຳປັ່ນໃນລະບົບທ່າກຳປັ່ນ ດີງຫວູ ຢ່າງມີປະສິດທິຜົນ. ພ້ອມກັບບັນດາໂຄງການພັດທະນາລະບົບອຸປະກອນທ່າກຳປັ່ນແລ້ວ, ໂຄງການລົງທຶນກໍ່ສ້າງພື້ນຖານໂຄງລ່າງຢູ່ເຂດ ເຕີນກາງ ພວມດຶງດູດບັນດາວິສາຫະກິດທັງພາຍໃນ ແລະ ຕ່າງປະເທດເຂົ້າມາລົງທຶນເພື່ອພັດທະນາເຂດອຸດສາຫະກຳ ດີງຫວູ ແລະ ນະຄອນ ຫາຍຟ່ອງ. ດ້ວຍທິດນຳ “ສ້າງຄວາມເຂັ້ມແຂງ ແລະ ຄວາມຮັ່ງມີຈາກທະເລ”, ໃນຊຸມປີມໍ່ໆມານີ້ ນະຄອນຫາຍຟ່ອງ ໄດ້ສຸມໃສ່ລົງທຶນພັດທະນາລະບົບທ່າກຳປັ່ນຢ່າງຄົບຊຸດ. ມາຮອດປະຈຸບັນ, ບັນດາຄວາມມານະພະຍາຍາມດັ່ງກ່າວໄດ້ເສີມຂະຫຍາຍຢ່າງມີປະສິດທິຜົນ. ປີ 2012 ໃນສະພາບພວມປະສົບກັບຄວາມຫຍຸ້ງຍາກຫລາຍຢ່າງ ແຕ່ຈຳນວນສິນຄ້າຂົນສົ່ງຜ່ານທ່າກຳປັ່ນທະເລ ຫາຍຟ່ອງ ບັນລຸເກືອບ 49 ລ້ານໂຕນ, ເພີ່ມຂຶ້ນກວ່າ 12% ເມື່ອທຽບໃສ່ປີ 2011.
ໃນແຜນກຳນົດພັດທະນາລະບົບທ່າກຳປັ່ນທະເລ ຫວຽດນາມ ຮອດປີ 2020, ແລະທິດທາງຮອດປີ 2030, ລັດຖະບານ ຫວຽດນາມ ໄດ້ກຳນົດວ່າ: ທ່າກຳປັ່ນສາກົນ ຫາຍຟ່ອງ ຈະເປັນທ່າກຳປັ່ນສຳຄັນພິເສດ. ຕາມທິດທາງພັດທະນານີ້, ໃນກາງເດືອນ 4 ຜ່ານມາ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ອອກຄຳສັ່ງເລີ່ມລົງມືກໍ່ສ້າງທ່າກຳປັ່ນສາກົນ ຫາຍຟ່ອງ (ທ່າກຳປັ່ນແລກຮ້ວຽນ) ອັນໄດ້ສ້າງບາດກ້າວບຸກທະລຸໃນການພັດທະນາເສດຖະກິດທ່າກຳປັ່ນທະເລຂອງ ຫາຍຟ່ອງ ເວົ້າສະເພາະ ແລະ ທັງປະເທດເວົ້າລວມ. ໂຄງການກໍ່ສ້າງທ່າກຳປັ່ນ ສາກົນ ຫາຍຟ່ອງ ໄດ້ຮັບການກໍ່ສ້າງ ດ້ວຍຍອດຈຳນວນເງິນລົງທຶນຂຶ້ນເຖິງ 25.100 ຕື້ດົ່ງ.
ທ່າກຳປັ່ນຫາຍຟ່ອງ
ພາບ:internet
|
ເນັ້ນຫນັກເຖິງຄວາມສຳຄັນຂອງໂຄງການດັ່ງກ່າວ, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈງວ່າ:
“ທ່າກຳປັ່ນ ຫາຍຟ່ອງ ປະຈຸບັນແມ່ນທ່າກຳປັ່ນແລກປ່ຽນຄ້າຂາຍສິນຄ້າ, ສົ່ງອອກນຳເຂົ້າສິນຄ້າເປັນຕົ້ນຕໍ່ ແລະໃຫຍ່ສຸດຂອງພາກເຫນືອຫວຽດນາມ. ເຖິງວ່າ ໄດ້ຮັບການຍົກລະດັບ, ເປີດກວ້າງແລ້ວກໍຕາມ ແຕ່ມາຮອດປະຈຸບັນ ການເຄື່ອນໄຫວຂົນສົ່ງສິນຄ້າຜ່ານທ່າກຳປັ່ນໄດ້ເກີນກຳນົດແລ້ວ. ສະນັ້ນ ການກໍ່ສ້າງທ່າກຳປັ່ນສາກົນ ຫາຍຟ່ອງ ມີຄວາມໝາຍສຳຄັນ ແລະ ແກ້ໄຂຄວາມຮຽກຮ້ອງຕ້ອງການຢ່າງຮີບດ່ວນໃນພາຍພາກຫນ້າ, ສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດນະຄອນຫາຍຟ່ອງ.”
ເມື່ອໄດ້ຮັບການກໍ່ສ້າງສຳເລັດ, ທ່າກຳປັ່ນສາກົນ ຫາຍຟ່ອງ ຈະຕອບສະຫນອງຄວາມຕ້ອງການຂອງຕະຫລາດນັບມື້ນັບສູງ, ປະກອບສ່ວນສົ່ງອອກນຳເຂົ້າສິນຄ້າລະຫວ່າງພາກເຫນືອກັບຕະຫລາດເອີລົບ, ທະວີອາເມລິກາໂດຍກົງໄດ້. ຄາດວ່າ ທ່າກຳປັ່ນສາກົນ ຫາຍຟ່ອງ ຈະໄດ້ຮັບການກໍ່ສ້າງສຳເລັດໃນປີ 2016 ປະກອບສ່ວນປະຕິບັດຍຸດທະສາດນຳຫວຽດນາມ ກາຍເປັນປະເທດແຂງແຮງກ່ຽວກັບທະເລ, ໃນນັ້ນ ເສດຖະກິດທະເລປະກອບສ່ວນ 52- 53% GDP ແລະ 55- 60% ວົງເງິນສົ່ງອອກຂອງທັງປະເທດ.