ໃນຂະນະທີ່ທຸກຄົນ, ທຸກຄອບຄົວຍັງພາກັນໄປນະມັດສະການວັດໃນລະດູບານໃຫມ່ ແລະ ມີຄວາມມ່ວນຊ່ືນຕ້ອນຮັບບຸນເຕັດນັ້ນ, ແຕ່, ບັນຍາກາດການເຄື່ອນໄຫວຜະລິດຍາມຕົ້ນລະດູບານໃຫມ່ຢູ່ເຂດເສດຖະກິດ ຢູງກວັດ ແຂວງ ກວ໋າງຫງາຍ ຍັງຄົງດຳເນີນໄປຢ່າງຟົດຟື້ນ. ພະນັກງານ, ນັກວິສາວະກອນ, ກຳມະກອນເຮັດວຽກທັງວັນ ແລະ ຄືນ ເພື່ອຮັກສາການເຄື່ອນໄຫວ, ຮັບປະກັນລະດັບຄວາມໄວທີ່ໄດ້ວາງອອກ.
ພະນັກງານ ກຳມະກອນຢູ່ເຂດເສດຖະກິດ ຢູງກວດ
ໃນຊຸມມື້ບຸນເຕັດປີມະໂຣງ 2012, ໃນຂະນະທີ່ທຸກຄອບຄົວພວມຕ້ອນຮັບປີໃຫມ່, ມີພະນັກງານ, ນັກວິສາວະກອນ, ກຳມະກອນກວ່າ 1000 ຄົນ ຢູ່ ໂຮງງານກັ່ນນ້ຳມັນ ຢູງກວັດ ຍັງຕັ້ງຫນ້າເຮັດວຽກຕະຫລອດ 3 ຜຽນ. ທ່ານ ຫງວຽນຮ່ວາຍຢາງ, ຜູ້ອຳນວຍການໃຫຍ່ ບໍລິສັດກັ່ນນ້ຳມັນ ບີ່ງເຊີນ ແຂວງ ກວາ໋ງຫງາຍ ໃຫ້ຮູ້ວ່າ: ເພື່ອຮັບປະກັນການເຄື່ອນໄຫວຂອງໂຮງງານໃຫ້ປອດໄພ, ເປັນປົກກະຕິ, ໃນຕະຫລອດຊຸມມື້ກອ່ນ ແລະ ພາຍຫລັງບຸນເຕັດ, ຍາມໃດ ທາງບໍລິສັດ ກໍຮັກສາແຜນການເຮັດວຽກໃນຕະຫລອດ 24 ຊົ່ວໂມງ. ຈຸດໝາຍຂອງບໍລິສັດໃນປີໃຫມ່ນີ້ ແມ່ນສືບຕໍ່ຮັກສາການເຄື່ອນໄຫວຂອງໂຮງງານຢ່າງປອດໄພ, ເພີ່ມທະວີປະສິດທິຜົນ, ກຳລັງການຜະລິດ. ຕາມນັ້ນແລ້ວ, ປີ 2012 ທາງບໍລິສັດຮັບປະກັນການສະຫນອງ ນ້ຳມັນປະມານ 6 ລ້ານໂຕນໃຫ້ແກ່ຕະຫລາດ, ສູ້ຊົນບັນລຸຍອດລາຍຮັບແຕ່ 130.000 - 150.000 ຕຶ້ດົ່ງ. ທ່ານ ຫງວຽນຮ່ວາຍຢາງ, ຜູ້ອຳນວຍການໃຫຍ່ບໍລິສັດກັ່ນນ້ຳມັນ ບີ່ງເຊີນ ໃຫ້ຮູ້ວ່າ:
“ຊຸມມື້ບຸນເຕັດ ຢູ່ບໍລິສັດອື່ນພະນັກງານກຳມະກອນລ້ວນແຕ່ໄດ້ພັກຜ່ອນ, ແຕ່ຢູ່ໂຮງານກັ່ນນ້ຳມັນ ຢູງກວັດ ຕ້ອງເຮັດວຽກຕະຫລອດ 24 ຊົ່ວໂມງ, ວຽກງານການເຄື່ອນໄຫວຂອງບໍລິສັດຕ້ອງໄດ້ຮັບບຸລິມະສິດຕົ້ນຕໍ. ແລະ ທຸກສິ່ງທຸກຢ່າງຕ້ອງຮັກສາການເຄື່ອນໄຫວຢ່າງຕໍ່ເນື່ອງ. ສຳລັບໂຮງງານກັ່ນນ້ຳມັນ ຢູງກວັດ ບໍ່ສະເພາະແຕ່ບຸນເຕັດປີນີ້ເທົ່ານັ້ນ ຫາກບຸນເຕັດປີກ່ອນນີ້ ແລະ ປີຕໍ່ໆໄປ ກໍເຊັ່ນດຽວກັນ. ພວກຂ້າພະເຈົ້າຕ້ອງຮັກສາການເຄື່ອນໄຫວທຸລະກິດແລະດຳເນີນການຜະລິດຕະຫລອດ 24 ຊົ່ວໂມງ.”
ເມື່ອລະດູບານໃຫມ່ວຽນມາ, ບໍ່ສະເພາະພະນັກງານ, ນັກວິສາວະກອນ ບໍລິສັດກັ່ນນ້ຳມັນ ບີ່ງເຊີນ ເທົ່ານັ້ນ ຫາກບັນດາພະນັກງານ, ກຳມະກອນເຮັດວຽກຢູ່ເຂດເສດຖະກິດ ຢູງກວັດ ແຂວງກວ໋າງຫງາຍ ກໍຕ້ອນຮັບບຸນເຕັດຢູ່ ກິດຈະກຳເປັນປະຈຳ. ອ້າຍເຈີນວັນແຢນ, ກຳມະກອນຢູ່ບໍລິສັດກຳປັ່ນ ຢູງກວັດ ໃຫ້ຮູ້ວ່າ: ນີ້ແມ່ນເທື່ອທີ 5 ອ້າຍສະໝັກໃຈຕ້ອນຮັບບຸນເຕັດຢູ່ກິດຈະກຳ. ອ້າຍເວົ້າວ່າ: ໃນໂອກາດບຸນເຕັດ ຂ້າພະເຈົ້າບໍ່ໄດ້ເຕົ້າໂຮມກັບຄອບຄົວແລະຍາດຕິພີ່ນ້ອງດັ່ງນັ້ນ ກໍຮູ້ສຶກຄິດຮອດຄອບຄົວຫລາຍ, ແຕ່ເມື່ອຄິດເຖິງວຽກງານ ອ້າຍພ້ອມກັບທຸກຄົນຕັດສິນໃຈຜ່ານຜ່າຄວາມຫຍຸ້ງຍາກ.
“ໃນຊຸມມື້ຕົ້ນປີໃຫມ່ປີມະໂຣງນີ້, ບັນຍາກາດເຮັດວຽກກໍຟົດຟື້ນມ່ວນຊື່ນ. ທີຫນຶ່ງ ກໍ ຍ້ອນໄດ້ຮັບຄວາມເອົາໃຈໃສ່ຈາກການນຳບໍລິສັດ. ພວກຂ້າພະເຈົ້າກໍສຸດຈິດສຸດໃຈກັບວຽກງານການເຄື່ອນໄຫວຂອງໂຮງງານ, ຮັບປະກັນໃຫ້ແກ່ການຕໍ່ກຳປັ່ນຫລາຍລຳໃຫ້ສຳເລັດ. ”
ທ່ານ ຫງວຽນວັນໂຮ້ຍ, ປະທານສະພາບໍລິຫານບໍລິສັດອຸດສາຫະກຳກຳປັ່ນ ຢູງກວັດ ໃຫ້ຮູ້ວ່າ: ພາຍຫລັງເລີ່ມການເຄື່ອນໄຫວຜະລິດໃນຕອນເຊົ້າວັນທີ 4 ຂອງບຸນເຕັດ ມາຮອດປະຈຸບັນ ມີພະນັກງານ, ກຳມະກອນກວ່າ 1.300 ຄົນໃນບໍລິສັດອຸດສາຫະກຳກຳປັ່ນ ຢູງກວັດ ໄດ້ເລີ່ມຕົ້ນການເຮັດວຽກ, ຕັດສິນໃຈຕໍ່ກຳປັ່ນບັນທຸກນ້ຳມັນດິບກວ່າ 100.000 ໂຕນ ຊຶ່ງແມ່ນກຳປັ່ນໃຫຍ່ກວ່າ ໝູ່ຢູ່ຫວຽດນາມໃຫ້ສຳເລັດ ເພື່ອມອບສົ່ງໃຫ້ບໍລິສັດໃຫຍ່ຂົນສົ່ງນ້ຳມັນອາຍແກສໃຫ້ຖືກຕາມແຜນການໃນເດືອນ 3 ນີ້, ຕໍ່ໄປຈະຕໍ່ສຳເລັດກຳປັ່ນທີ່ສາມາດບັນທຸກນ້ຳມັນດິບ 105.000 ໂຕນ.
“ໃນປີຈະມາເຖິງ, ນອກຈາກສ້ອມແປງບັນດາກຳປັ່ນຂົນສົ່ງນ້ຳມັນແລ້ວ, ພວກຂ້າພະເຈົ້າສືບຕໍ່ສ້ອມແປງຮ້ານເຈາະນ້ຳມັນ ຕາມດ໋າວ ຂອງ Vietsopetro. ສ່ວນວຽກງານຕໍ່ກຳປັ່ນໃຫມ່ ພວກຂ້າພະເຈົ້າສືບຕໍ່ຕໍ່ກຳປັ່ນບັນທຸກນ້ຳມັນ 105.000 ໂຕນ ໃຫ້ສຳເລັດ ແລະ ຫລັງຈາກນັ້ນ ພວກຂ້າພະເຈົ້າຈະຕໍ່ກຳປັ່ນບໍລິການໃຫມ່ດ້ວຍກຳລັງ 10000 ແຮງມ້າ ແລະ ສືບຕໍ່ຄົ້ນຄ້ວາສົມທົບກັບບັນດາຄູ່ຮ່ວມມືຕ່າງປະເທດ ເພື່ອເຂົ້າຮ່ວມໂຄງການເຈາະນ້ຳມັນ.”
ດ້ວຍບັນຍາກາດການເຄື່ອນໄຫວຜະລິດໃນຕົ້ນລະດູບານໃຫມ່ຢ່າງຟົດຟື້ນນັ້ນ ພວກເຮົາເຊື່ອໝັ້ນວ່າ ບັນດາຫົວຫນ່ວຍຢູ່ເຂດເສດຖະກິດ ຢູງກວດ ແຂວງ ກວ້າງຫງາຍ ຈະສຳເລັດ ແລະ ລື່ນກາຍແຜນການທີ່ໄດ້ວາງອອກໃນປີນີ້./.
ຫວີຟອງ