នេះគឺជាសកម្មភាពកិច្ចការបរទេសដ៏សំខាន់បំផុតរបស់រដ្ឋសភាវៀតណាមក្នុងឆ្នាំ២០២៥ ដែលមានសារៈសំខាន់ជាពិសេសលើកម្រិតពហុភាគី និងទ្វេភាគី។

ប្រធានរដ្ឋសភាវៀតណាមនិងលោកជំទាវនឹងអញ្ជើញចូលរួម IPU-150 នៅទីក្រុង Tashkent និងបំពេញទស្សនកិច្ចផ្លូវការនៅសាធារណរដ្ឋអ៊ូសបេគីស្ថាន និងសាធារណរដ្ឋអាមេនី។ (រូបថត៖ quochoi.vn)

វៀតណាមគាំទ្រយ៉ាងពេញទំហឹងចំពោះពហុភាគីនិយម

ចាប់តាំងពីចូលជាសមាជិក IPU ក្នុងឆ្នាំ ១៩៧៩ រដ្ឋសភាវៀតណាមជានិច្ចកាលជាសមាជិកដ៏សកម្ម និងមានការទទួលខុសត្រូវ។ រដ្ឋសភាវៀតណាមបានកាន់តំណែង ជាអ្នកដឹកនាំក្នុងយន្តការ IPU ជាច្រើនលើក ធ្លាប់បានធ្វើជាម្ចាស់ផ្ទះនៃមហាសន្និបាត IPU លើកទី១៣២ (ឆ្នាំ២០១៥) និងកិច្ចប្រជុំសមាជិកសភាវ័យក្មេងជាសកលលើកទី៩ (ឆ្នាំ២០២៣) ប្រកបដោយជោគជ័យ។ ការរួមចំណែករបស់រដ្ឋសភាវៀតណាមត្រូវបាន វាយតម្លៃខ្ពស់ដោយលេខាធិការដ្ឋាន និងសមាជិក IPU ជាពិសេសក្នុងវិស័យជំរុញការ តភ្ជាប់ក្នុងតំបន់អាស៊ីប៉ាស៊ីហ្វិក។

អនុរដ្ឋមន្ត្រីការបរទេសវៀតណាមលោកស្រី Le Thi Thu Hang។ (រូបថត៖ ក្រសួងការបរទេស)

នៅក្នុងវេទិកា IPU-150 លើកនេះ វៀតណាមក៏នឹងបង្ហាញសារអំពីប្រទេសមួយដែលកំពុងឈានចូលយុគសម័យថ្មី ជាមួយនឹងសមិទ្ធិផលអភិវឌ្ឍន៍សេដ្ឋកិច្ច-សង្គមដ៏ លេចធ្លោជាច្រើន ក្នុងនោះប្រជាជនជាត្រូវបានដាក់ជាមជ្ឈភាព ជាគោលដៅ និង កម្លាំងចលករនៃគោលនយោបាយអភិវឌ្ឍន៍ទាំងអស់ជានិច្ច។ អនុរដ្ឋមន្ត្រីការបរទេស វៀតណាមលោកស្រី Le Thi Thu Hang បានអះអាងថា៖

“ការដែលប្រធានរដ្ឋសភាវៀតណាមអញ្ជើញចូលរួមមហាសន្និបាត IPU លើកទី ១៥០ គឺជាសក្ខីភាពដ៏រស់រវើកដែលបង្ហាញឲ្យឃើញថា វៀតណាមគាំទ្រយ៉ាងពេញ ទំហឹងចំពោះពហុភាគីនិយម គោរពតួនាទីរបស់ IPU ក៏ដូចជាបន្តអះអាងថា រដ្ឋសភា វៀតណាមជាសមាជិកដ៏សកម្ម ម្ចាស់ការ និងមានការទទួលខុសត្រូវរបស់ IPU ផងដែរ”។

ជំរុញកិច្ចសហប្រតិបត្តិការមិត្តភាពជាប្រពៃណីជាមួយអាមេនី និងអ៊ូសបេគីស្ថាន

ក្នុងកម្រិតទ្វេភាគី ដំណើរទស្សនកិច្ចជាផ្លូវការនៅសាធារណរដ្ឋអាមេនី និងសាធារណរដ្ឋអ៊ូសបេគីស្ថាន របស់ប្រធានរដ្ឋសភាលោក ត្រិន ថាញ់មិន បន្ទាប់ពី ចូលរួម IPU-150 គឺជាដំណើរទស្សនកិច្ចលើកដំបូងរបស់ប្រធានស្ថាប័ននីតិប្បញ្ញត្តិ វៀតណាម ហើយក៏ជាដំណើរទស្សនកិច្ចកម្រិតខ្ពស់បំផុតរបស់ថ្នាក់ដឹកនាំវៀតណាម ទៅកាន់ប្រទេសទាំងពីរនេះ ចាប់តាំងពីបង្កើតទំនាក់ទំនងការទូតកាលពីឆ្នាំ១៩៩២មកផងដែរ។ ដំណើរទស្សនកិច្ចមានអត្ថន័យនយោបាយយ៉ាងជ្រាលជ្រៅ បង្ហាញពីការគោរពរបស់វៀតណាមចំពោះប្រទេសជាមិត្តប្រពៃណី; ចាក់គ្រឹះសម្រាប់ពង្រីកកិច្ចសហ ប្រតិបត្តិការលើគ្រប់វិស័យ។ ប្រធានសមាគមមិត្តភាពអ៊ូសបេគីស្ថាន លោក Alisher Rustamovich បានមានប្រសាសន៍ថា៖

“យើងខ្ញុំមានសេចក្តីសោមនស្សរីករាយយ៉ាងក្រៃលែងចំពោះដំណើរទស្សនកិច្ចលើកនេះ ដែលជាដំណើរទស្សនកិច្ចលើកដំបូងរបស់ប្រធានរដ្ឋសភាវៀតណាម ទៅកាន់អ៊ូសបេគីស្ថាន ដែលបង្ហាញថាទំនាក់ទំនងរបស់យើងកំពុងឈាន ទៅកម្រិតខ្ពស់ថ្មីមួយ។ រដ្ឋសភាវៀតណាមគឺជាស្ថាប័នរដ្ឋាភិបាលដ៏សំខាន់បំផុត ដែលដើរតួនាទីយ៉ាងសំខាន់ក្នុងជីវភាពនយោបាយរបស់ប្រទេសជាតិ។ ដូច្នេះ ដំណើរទស្សនកិច្ចរបស់ប្រធានរដ្ឋសភា នឹងបើកឱកាសដ៏អស្ចារ្យសម្រាប់ការ អភិវឌ្ឍកិច្ចសហប្រតិបត្តិការរវាងប្រទេសទាំងពីរលើវិស័យជាច្រើនដូចជា៖ នយោបាយ ពាណិជ្ជកម្ម និងវិនិយោគ វប្បធម៌ និងការផ្លាស់ប្តូររវាងប្រជាជននិងប្រជាជន”។

ប្រធានរដ្ឋសភាវៀតណាម លោក ត្រិន ថាញ់មិន (ស្ដាំ) និងប្រធានរដ្ឋសភាអាមេនី ក្នុងជំនួបពិភាក្សាការងារនាខែវិច្ឆិកា ឆ្នាំ ២០២៤។ (រូបថត៖ quochoi.vn)

ក្នុងពេលជាមួយគ្នានោះ សម្រាប់អាមេនី វៀតណាមបានរក្សាកិច្ចសហប្រតិបត្តិការមិត្តភាពលើគ្រប់វិស័យ ដោយតែងតែសម្របសម្រួល និងគាំទ្រគ្នាទៅវិញទៅ មកនៅវេទិកា និងក្របខ័ណ្ឌពហុភាគី រួមទាំងអង្គការសហប្រជាជាតិ និងសហគមន៍ ហ្វ្រង់កូហ្វូនផងដែរ។ អំពីយថាទស្សន៍នៃកិច្ចសហប្រតិបត្តិការរវាងប្រទេសទាំងពីរ ឯកអគ្គរដ្ឋទូតសាធារណៈរដ្ឋអាមេនីប្រចាំនៅវៀតណាម លោក Suren Baghdasaryanបានឲ្យដឹងថា៖

“យើងខ្ញុំទន្ទឹងរង់ចាំកិច្ចសហប្រតិបត្តិការជាមួយវៀតណាមនឹងកាន់តែស៊ីជម្រៅលើវិស័យសំខាន់ៗដូចជា ឧស្សាហកម្មបច្ចេកវិទ្យាខ្ពស់ ពាណិជ្ជកម្ម ការអប់រំ និងការ ផ្លាស់ប្តូររវាងប្រជាជននិងប្រជាជន។ វៀតណាមជាដៃគូយុទ្ធសាស្ត្រសំខាន់របស់ អាមេនីក្នុងតំបន់អាស៊ាន។ យើងខ្ញុំមានបំណងចង់កសាងកម្មវិធីកិច្ចសហប្រតិបត្តិការ ដើម្បីធានាបាននូវវិបុលភាពរួម សន្តិសុខ សន្តិភាពយូរអង្វែង និងសម្រេចបាននូវចក្ខុ វិស័យរួមអំពីប្រទេសវៀតណាម និងអាមេនីដ៏រឹងមាំ ឯករាជ្យ និងការអភិវឌ្ឍ ប្រកបដោយចីរភាព”។

ដំណើរបំពេញទស្សនកិច្ចការងាររបស់ប្រធានរដ្ឋសភាវៀតណាមលោក ត្រិន ថាញ់មិន ទៅចូលរួម IPU-150 និងបំពេញទស្សនកិច្ចជាផ្លូវការនៅសាធារណរដ្ឋអាមេនី និងសាធារណរដ្ឋអ៊ូសបេគីស្ថាន នឹងជាព្រឹតិ្តការណ៍ពិសេស បញ្ជាក់ពីការប្តេជ្ញាចិត្តខ្ពស់របស់វៀតណាមចំពោះវេទិកាសភាពហុភាគី ទន្ទឹមនឹងនោះក៏បានបើកទូលាយ កិច្ចសហប្រតិបត្តិការទ្វេភាគីជាមួយប្រទេសមិត្តជាប្រពៃណីនៅតំបន់អាស៊ីកណ្តាល និងតំបន់ Kavkaz ផងដែរ៕