(vovworld) – ຕາມຂໍ້ຕົກລົງທີ່ປະກາດເມື່ອວັນທີ 31/7, ບໍລິສັດນ້ຳມັນແຫ່ງລັດ YPF ຂອງ Argentina ໄດ້ກາຍເປັນບໍລະສັດໃໝ່ສຸດ ໄດ້ຮັບໜັງສືອະນຸຍາດໃຫ້ຂຸດຄົ້ນນ້ຳມັນຢູ່ເຂດລຸ່ມແມ່ນ້ຳ Orinoco, ເຊິ່ງແມ່ນເຂດມີນ້ຳມັນຫຼາຍຂອງ Venezuela. ຂໍ້ຕົກລົງໄດ້ຮັບການລົງນາມ ຢູ່ນະຄອນຫຼວງ Brasilia ຂອງ Braxin ລະຫວ່າງ ປະທານາທິບໍດີ Venezuela Hugo Chavez ແລະ ຄູ່ຕຳແໜ່ງ Argentina Cristina Fernandez. ຂໍ້ຕົກລົງຮຽກຮ້ອງໃຫ້ສ້າງຕັ້ງບໍລິສັດຮ່ວມທຸລະກິດ ລະຫວ່າງບັນດາບໍລິສັດນ້ຳມັນ 2 ປະເທດ ເພື່ອຂຸດຄົ້ນບັນດາແຫຼ່ງນ້ຳມັນສະສົມທີ່ຫຼວງຫຼາຍຢູ່ເຂດລຸ່ມແມ່ນ້ຳ Orinoco. ກ່າວຄຳເຫັນຕໍ່ວົງການນັກຂ່າວ, ທ່ານປະທານາທິບໍດີ Chavez ໃຫ້ຮູ້ວ່າ, ພາຍຫຼັງຂໍ້ຕົກລົງນີ້ໄດ້ຮັບການລົງນາມ, ລັດຖະມົນຕີກະຊວງພະລັງງານ ແລະ ນ້ຳມັນ, ຫົວໜ້າບໍລິສັດນ້ຳມັນແຫ່ງຊາດ Venezuela, ຈະໄປຍັງ Buenos Aires ເພື່ອສືບຕໍ່ປຶກສາຫາລື ກັບຫົວໜ້າບໍລະສັດນ້ຳມັນ YPF ເຊິ່ງແມ່ນບໍລິສັດຫາກໍໄດ້ຫັນເປັນລັດວິສາຫະກິດເມື່ອເດືອນ 4 ຜ່ານມາ.