ຄວມເຄັ່ງຕຶງລະຫວ່າງ ສປປ ເກົາຫຼີ ແລະ ສເກົາຫຼີ ນັບມື້ນັບເພີ່ມຂຶ້ນພາຍຫຼັງຄຳຖະແຫຼງ ແລະ ການກະທຳທີ່ແຂງກະດ້າງຂອງສອງຝ່າຍໃນຊຸມມື້ຜ່ານມາ. ຫາງສຽງໄດ້ປຽບທຽບສະພາບການຢູ່ແຫຼມເກົາຫຼີໃນປະຈຸບັນຄືດັ່ງຖັງລະເບີດ ແລະ ມີຄວາມວິຕົກກັງວົນວ່າ ຖ້າສອງຝ່າຍບໍ່ລະງັບໃຈ, ອາດຈະເກີດການປະທະກັນ.
(ພາບປະກອບ:pda.vietbao.vn)
ຄວາມເຄັ່ງຕຶງເພີ່ມຂຶ້ນເລີ່ມຈາກການຊ້ອມຮົບຮ່ວມໃນໄລຍະເວລາ 11 ວັນ ລະຫວ່າງອາເມລິກາ ແລະ ສເກົາຫຼີ ທີ່ໃສ່ຊື່ວ່າ “ມາດຕະການຕົ້ນຕໍ“ ໂດຍມີການເຂົ້າຮ່ວມຂອງນັກຮົບສອງປະເທດກ່ວາ 13.000 ຄົນ ພ້ອມກັບເຮືອບບິນສູ້ຮົບປະເພດຕ່າງໆ, ກຳປັ່ນຂັບໄລ່ປະກອບລູກສອນໄຟພາທາງ. ເຈົ້າໜ້າທີ່ພຽງຢາງ ກ່າວຫາວ່າ: ນີ້ແມ່ນຮຸກຮານໂດຍສເກົາຫຼີ ດຳເນີນ ໂດຍມີການໜູນຫຼັງຂອງອາເມລິກາ. ຍິ່ງໄປກ່ວານັ້ນ, “ມາດຕະການຕົ້ນຕໍ“ ຍັງໄດ້ດຳເນີນໄປພ້ອມກັບການຊ້ອມຮົບຮ່ວມລະຫວ່າງອາເມລິກາ-ສເກົາຫຼື ທີ່ມີຊື່ວ່າ “ນົກອິນຊີນ້ອຍ“ ຊື່ງແກ່ຍາວໃນໄລຍະເວລາ 2 ເດືອນ.
ໃນການກະທຳທີ່ຖືກຖືວ່າມີຄວາມອັນຕະລາຍ, ວັນທີ 11/3, ສປປເກົາຫຼີ ໄດ້ປະກາດພຽງລຳພັງຝ່າຍດຽວວ່າ: ສັນຍາຢຸດຮົບເຊັນໃນໄລຍະທ້າຍສົງຄາມເກົາຫຼີ 1950-1953 ຊື່ງແມ່ນເອະສານສະບັບດຽວຜູກມັດສອງພາກເກົາຫຼີ ເພື່ອບໍ່ຕົກເຂົ້າສູ່ສະພາບສົງຄາມ, ປະຈຸບັນຖືກຍຸບເລິກຍ້ອນວ່າ ສເກົາຫຼີ ແລະ ອາເມລິກາ ເລີ່ມດຳເນີນການຊ້ອນຮົບຮ່ວມເປັນປະຈຳ. ໜັງສືພິມ Rodong Simmun ສຽງຂອງພັກແຮງງານສປປເກົາຫຼີ ຍັງຢັ້ງຢືນວ່າ: ອາວຸດຂອງ ສປປເກົາຫຼີ ໄດ້ນຳເຂົ້າທີ່ຕັ້ງເພື່ອກຽມພ້ອມສູ້ຮົບແລ້ວ. ພ້ອມກັນນັ້ນ, ພຽງຢາງ ໄດ້ຕັດໂທລະສັບສາຍດ່ວນລະຫວ່າງສອງພາກເກົາຫຼີ ຊື່ງໄດ້ຮັບການສ້າງຂຶ້ນເພື່ອແກ້ໄຂບັນດາກໍລະນີເກີດຂຶ້ນຢູ່ເຂດປອດທະຫານໃນເຂດຊາຍແດນ. ໃນການໄປຢ້ຽມຢາມບັນດາກອງປືນໃຫ່ຍຢູ່ເຂດຊາຍແດນເມື່ອວັນທີ 11/3, ການນຳ ສປປເກົາຫຼີ Kim Jong un ໄດ້ກ່າວເຕືອນວ່າຈະທຳລາຍເກາະ Baengnyeong ຊື່ງແມ່ນເກາະນ້ອຍນອນໃນເຂດທະເລພວມພິພາດກັນ, ປະຈຸບັນໂດຍ ສເກົາຫຼີ ຄຸ້ມຄອງ. ຕາມທ່ານ Kim Jong un ແລ້ວ, ເກາະແຫ່ງນີ້ຈະແມ່ນເປົ້າໝາຍທຳອິດ ຖ້າຫາກເຫີດຄວາມເຄັ່ງຕຶງດ້ານການທະຫານສືບຕໍ່ເພີ່ມຂຶ້ນໃນແຫຼມເກົາຫຼີ. ພ້ອມກັນນັ້ນ, ທ່ານ Kim Jong un ກໍ່ຮຽກຮ້ອງໃຫ້ບັນດານັກຮົບຈົ່ງກະກຽມຈິດໃຈ ຖ້າຫາກເກີດສົງຄາມ.
ທ່ານນາງ Park Geun Hye ປະທານາທິບໍດີສເກົາຫຼີ
(ພາບ:world.kbs.co.kr)
ເຖິງວ່າໃນດ້ານທິດສະດີ, ສອງພາກເກົາຫຼີ ບໍ່ທັນເຊັນສັນຍາສັນຕິພາບສອງຝ່າຍເທື່ອໃດກໍ່ຕາມ ແຕ່ວ່າເລື່ອງສປປເກົາຫຼີ ປະກາດພຽງລຳພັງຝ່າຍດຽວຈະຖອນອອກຈາກສັນຍາຢຸດຮົບ ກໍ່ເຮັດໃຫ້ຝ່າຍຕ່າງໆທີ່ກ່ຽວຂ້ອງ ແລະ ຫາກສຽງໂລກມີຄວາມວິຕົກກັງວົນ. ໃນຄຳປະກາດຫຼ້າສຸດ, ທ່ານ Martin Nesirky ໂຄສົກຂອງທ່ານເລຂາທິການໃຫ່ຍ ສປຊ ຢືນຢັນວ່າ: ສັນຍາຢຸດຮົບໃນແຫຼມເກົາຫຼີ ຍັງມີຜົນບັງຄັບໃຊ້ ຍ້ອນວ່າເອກະສານສະບັບນີ້ ໄດ້ຮັບການຮັບຮອງເອົາຈາກ ສະມັດຊາໃຫ່ຍ ສປຊ ແລະ ບັນດາຂໍ້ມາດຕາລະບຸໃນນັ້ນ ບໍ່ອະນຸຍາດໃຫ້ບໍ່ວ່າຝ່າຍໃດ ສາມາດຍຸບເລິກພຽງລຳພັງຝ່າຍດຽວໄດ້. ທ່ານນາງ Park Geun Hye ປະທານາທິບໍດີສເກົາຫຼີ ໃຫ້ຄຳໝັ້ນສັນຍາຈະຮັບມືຢ່າງແຮງກັບການເກາະຜິດຂອງສປປເກົາຫຼີ ແລະ ຢັ້ງຢືນວ່າລັດຖະບານຈະບໍ່ປະລະຄວາມມານະພະຍາຍາມຊອກຫາວິທີເຈລະຈາກັບພຽງຢາງ. ທ່ານ Kim Min Seok ໂຄສົກກະຊວງປ້ອງກັນປະເທດສເກົາຫຼີ ສະແດງໃຫ້ເຫັນທ່າທີ່ແຂງກະດ້າງ ເມື່ອຢັ້ງຢືນວ່າ ສເກົາຫຼີ ຈະໂຕ້ຕອບຄືນ ຖ້າຫາກວ່າ ສປປເກົາຫຼີ ໄດ້ເກາະຜິດ. ໃນຂະນະນັ້ນ, ອາເມລິກາ ແລະ ຫຼາຍປະເທດຕາເວັນຕົກ ສືບຕໍ່ຈັດວາງບັນດາຄຳສັ່ງລົງໂທດໃໝ່ຕໍ່ສປປເກົາຫຼີ, ໃນນັ້ນມີບັນດາມາດຕະການລົງໂທດດ້ານການເງິນ, ສະເໜີຮ່າງມະຕິສະບັບໜຶ່ງຕື່ມອີກ ຮຽກຮ້ອງໃຫ້ສ້າງຕັ້ງຄະນະກຳມະການສືບສວນກ່ຽວກັບສິດທິມະນຸດຢູ່ສປປເກົາຫຼີ.
ສປປເກົາຫຼີ ມີການກະທຳແຂງກະດ້າງຄືດັ່ງກ່າວແມ່ນເພື່ອປັບປຸງຄວາມຈົ່ງຮັກພັກດີຂອງປະຊາຊົນ ແລະ ກອງທັບຕໍ່ການນຳໜຸ່ມ Kim Jong un. ການກະທຳດັ່ງກ່າວກໍ່ແມ່ນຄວາມມມານະພະຍາຍາມສະແດງໃຫ້ເຫັນຄວາມເດັດດ່ຽວຂອງ ສປປເກົາຫຼີ ທີ່ວ່າ: ເຂົາເຈົ້າພ້ອມແລ້ວທີ່ຈະຜ່ານຜ່າບັນດາໄພອັນຕະລາຍທີ່ໃຫ່ຍຫຼວງກ່ວາ ດ້ວຍຄວາມຫວັງປະເທດຕ່າງໆຈະປະນີປະນອມ ແລະ ສະໜອງສິ່ງທີ່ເຂົາເຈົ້າຕ້ອງການ.
ດ້ວຍສິ່ງຕ່າງໆພວມເກີດຂຶ້ນໃນແຫຼມເກົາຫຼີ, ຫາງສຽງຖືວ່າ, ແຫຼມເກົາຫຼີພວມຈະຕົກເຂົ້າສູ່ສະພາບເກີດສົງຄາມ, ອັນຕະລາຍທີ່ສຸດແມ່ນມີທັງອາວຸດນິວເຄຼຍ. ແນ່ນອນວ່າ, ຖ້າຫາກເກີດສົງຄາມຈະບໍ່ມີປະໂຫຍດໃຫ້ທັງສອງຝ່າຍ, ຊ້ຳບໍ່ໜຳ, ອາດຈະກໍ່ໃຫ້ເກີດການຊ່ວງເສັງອາວຸດໃນທົ່ວພາກພື້ນ ເຮັດໃຫ້ສະພາບການເມືອງໃນພາກພື້ນມີການປ່ຽນແປງໄປນຳ.