(vovworld)- ຕ້ອງເຮັດສິ່ງໃດແດ່ເພື່ອປະຕິບັດຈຸດໝາຍນຳຫວຽດນາມກາຍເປັນປະເທດເຂັ້ມແຂງກ່ຽວກັບທະເລ, ຮັ່ງມີຈາກທະເລ ແລະ ພັດທະນາເສດຖະກິດແບບຍືນຍົງ. ນີ້ແມ່ນເນື້ອໃນຕົ້ນຕໍທີ່ເວທີປາໄສເສດຖະກິດທະເລຫວຽດນາມຄັ້ງທີ 4 ຊື່ງຈັດຂຶ້ນຢູ່ແຂວງ ຮ່າຕີ້ງ ໃນຂອບເຂດບັນດາການເຄື່ອນໄຫວຂອງສັບປະດາທະເລ ແລະ ໝູ່ເກາະຫວຽດນາມ ປີ 2013.
ຫວຽດນາມ ແມ່ນປະເທດແຄມທະເລຕາເວັນອອກ ດ້ວຍຝັ່ງທະເລຍາວກວ່າ 3.260 ກິໂລແມັດ
ພາບ:internet
|
ຫວຽດນາມ ແມ່ນປະເທດແຄມທະເລຕາເວັນອອກ ດ້ວຍຝັ່ງທະເລຍາວກວ່າ 3.260 ກິໂລແມັດ, ເຂດ ເສດຖະກິດພິເສດກວ່າ 1 ລ້ານຕາລາງກິໂລແມັດ ແລະ ມີເກາະໃຫຍ່ນ້ອຍກວ່າ 3.000ແຫ່ງ, ໃນນັ້ນ ມີໝູ່ເກາະ ຮ່ວາງຊາ ແລະ ເຈື່ອງຊາ. ຫວຽດນາມ ກໍແມ່ນຫນຶ່ງໃນຈຳນວນ 10 ປະເທດ ທີ່ມີຝັ່ງທະເລຍາວກ່ວາໝູ່ເມື່ອທຽບໃສ່ເນື້ອທີ່ຜືນແຜນດິນ. ທາງທິດຕາເວັນອອກ, ທິດໃຕ້, ທິດຕາເວັນຕົກສຽງໃຕ້ລ້ວນແຕ່ມີຝ່ັງທະເລ, ສະນັ້ນ ການແລກປ່ຽນການຄ້າສາກົນແມ່ນສະດວກຫລາຍ. ໃນຫລາຍປີຜ່ານມາ, ພ້ອມກັບການຢືນຢັນຕັດສິນໃຈປົກປັກຮັກສາອະທິປະໄຕເຂດທະເລໝູ່ເກາະ, ລັດຖະບານຫວຽດນາມ ເອົາໃຈໃສ່ເປັນພິເສດເຖິງການພັດທະນາເສດຖະກິດທະເລແບບຍືນຍົງ. ກ່າວຄຳເຫັນເນື່ອງໃນໂອກາດສັບປະດາທະເລ ແລະ ໝູ່ເກາະ ຫວຽດນາມ ປີ 2013, ທ່ານຮອງນາຍົກລັດຖະມົນຕີ ຫວູວັນນີງ ໃຫ້ຮູ້ວ່າ:
“ທະເລຫວຽດນາມຮັ່ງມີດ້ານຊັບພະຍາກອນທຳມະຊາດ. ໃນໄລຍະຜ່ານມາ, ບັນດາແຫລ່ງຜົນປະໂຫຍດຈາກທະເລໄດ້ປະກອບສ່ວນສຳຄັນເຂົ້າໃນວິວັດທະນາການພັດທະນາເສດຖະກິດສັງຄົມຂອງປະເທດຊາດ. ເສດຖະກິດທະເລ ແລະ ເຂດແຄມທະເລພັດທະນາຢ່າງບໍ່ຢຸດຢັ້ງ ແລະ ປະຈຸບັນໄດ້ປະກອບສ່ວນປະມານ 48% GDP ຂອງທັງປະເທດ, ໃນນັ້ນ ເສດຖະກິດຈາກທະເລກວມປະມານ 22%. ບັນດາຂະແຫນງເສດຖະກິດທະເລສຳຄັນຄື: ນ້ຳມັນອາຍແກສ, ການເດີນທະເລ, ສິນໃນນ້ຳ,ທ່ອງທ່ຽວທະເລລ້ວນແຕ່ເຕີບໂຕດ້ວຍລະດັບສູງ. ແຫລ່ງຊັບພະຍາກອນທຳມະຊາດທະເລ ໄດ້ ແລະ ພວມໄດ້ຮັບການຂຸດຄົ້ນ, ນຳໃຊ້ຢ່າງມີປະສິດທິຜົນໃນກິດຈະການສ້າງສາປະເທດຊາດ ແລະ ຮັບໃຊ້ຊີວິດການເປັນຢູ່ຂອງປະຊາຊົນ.”
 |
ດ້ວຍຄວາມສຳຄັນຂອງພື້ນຖານເສດຖະກິດ, ກອງປະຊຸມຄັ້ງທີ 4 ຄະນະບໍລິຫານງານສຸູນກາງພັກຊຸດທີ 10 ໄດ້ວາງອອກມະຕິກ່ຽວກັບ“ຍຸດທະສາດທະເລຫວຽດນາມ ຮອດປີ 2020”, ໃນນັ້ນ ຊີ້ແຈງວ່າ: ຈຸດໝາຍນຳຫວຽດນາມກາຍເປັນປະເທດເຂັ້ມແຂງກ່ຽວກັບທະເລ, ຮັ່ງມີຈາກທະເລ, ສົມທົບກັນຢ່າງແຫນ້ນແຟ້ນລະຫວ່າງການພັດທະນາເສດຖະກິດສັງຄົມກັບການປ້ອງກັນຊາດ, ປ້ອງກັນຄວາມສະຫງົບ ແລະ ປົກປັກຮັກສາສິ່ງແວດລ້ອມ, ມີນະໂຍບາຍດູດດ່ືມເພື່ອດຶງດູດທຸກແຫລ່ງກຳລັງໃຫ້ແກ່ການພັດທະນາເສດຖະກິດຈາກທະເລ, ກໍ່ສ້າງບັນດາສູນເສດຖະກິດໃຫຍ່ເຂດແຄມທະເລຕິດພັນກັບບັນດາການເຄື່ອນໄຫວເສດຖະກິດທະເລເປັນກຳລັງຫນູນສຳຄັນສຳລັບການພັດທະນາຂອງປະເທດຊາດ. ສູ້ຊົນຮອດປີ 2020, ເສດຖະກິດທະເລປະກອບ 53-55% GDP, 55-60% ວົງເງິນສົ່ງອອກຂອງທັງປະເທດ, ແກ້ໄຂບັນດາບັນຫາສັງຄົມເປັນຢ່າງດີ, ປົວແປງຊີວິດການເປັນຢູ່ຂອງປະຊາຊົນຢູ່ເຂດແຄມທະເລໃຫ້ດີຂຶ້ນ. ເພື່ອບັນລຸໄດ້ຈຸດໝາຍນີ້, ຫວຽດນາມ ມີແຜນນະໂຍບາຍກໍ່ສ້າງບັນດາທ່າກຳປັ່ນສາກົນມີລະດັບພາກພື້ນ, ສ້າງບາງກຸ່ມບໍລິສັດເສດຖະກິດແຂງແຮງ.ໃນການພັດທະນາເສດຖະກິດທະເລ, ຫວຽດນາມ ບຸລິມະສິດສຸມໃສ່ພັດທະນາບັນດາໝວດຂະແຫນງການ, ຂົງເຂດຄື: ຊອກຫາ, ສຳຫລວດ, ຂຸດຄົ້ນ, ປຸງແຕ່ງນ້ຳມັນອາຍແກສ ແລະ ບັນດາປະເພດຊັບພະຍາກອນຢູ່ທະເລ, ພັດທະນາການຂົນສົ່ງທາງທະເລ, ທ່າກຳປັ່ນ, ຕໍ່ກຳປັ່ນໃຫມ່ ແລະ ສ້ອມແປງເຮືອກຳປັ່ນ, ຍານພາຫະນະເດີນທະເລ ແລະ ບັນດາບໍລິການເດີນທະເລອື່ນ, ພັດທະນາທ່ອງທ່ຽວທະເລ ແລະ ເສດຖະກິດຢູ່ເກາະ.
ເພື່ອບັນລຸໄດ້ຈຸດໝາຍຂອງຍຸດທະສາດທະເລ, ຫວຽດນາມ ພວມເພີ່ມທະວີບັນດາຄວາມມານະພະຍາຍາມຮັບມືກັບສະພາບປ່ຽນແປງຂອງດິນຟ້າອາກາດ, ນ້ຳທະເລຂຶ້ນສູງ, ແກ້ໄຂຂໍ້ຂາດຕົກບົກຜ່ອງໃນອາຊີບຫາປາ ແລະ ຂຸດຄົ້ນສິນທະເລທີ່ຂາດຄວາມຍືນຍົງ. ຕາມທ່ານ ຫງວຽນມີງກວາງ, ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມແລ້ວ, ນີ້ແມ່ນບັນຫາຮຽກຮ້ອງທຸກຂະແຫນງການ, ຂັ້ນຕ່າງໆ ຕ້ອງຮ່ວມແຮງຮ່ວມໃຈປະຕິບັດຢ່າງແຂງແຮງກວ່າ ແລະ ມີລັກສະນະບຸກທະລຸກວ່າ, ທ່ານ ລັດຖະມົນຕີ ຫງວຽນມີງກວາງ ຊີ້ແຈງວ່າ:
“ໃນທ່າອ່ຽງພັດທະນາຕາມທິດໝັ້ນຄົງ, ພວກເຮົາຕ້ອງພັດທະນາຢ່າງກົມກຽວລະຫວ່າງເສດຖະກິດສັງຄົມທຸກດ້ານ ກັບສິ່ງແວດລ້ອມ. ລັດໄດ້ມານະພະຍາຍາມກະທຳເພື່ອມຸ້ງໄປເຖິງຈຸດໝາຍຄຸ້ມຄອງພັດທະນາທະເລ, ໝູ່ເກາະຫວຽດນາມແບບຍືນຍົງ. ເພື່ອບັນລຸໄດ້ຈຸດໝາຍນີ້, ພວກເຮົາຄວນສືບຕໍ່ສ້າງນະໂຍບາຍ, ກົດໝາຍກ່ຽວກັບການປະຕິບັດວຽກງານຄຸ້ມຄອງຊັບພະຍາກອນ ແລະ ປົກປັກຮັກສາທະເລ, ໝູ່ເກາະ. ປັບປຸງກົງຈັກຄຸ້ມຄອງກ່ຽວກັບທະເລ ແລະ ໝູ່ເກາະຈາກສູນກາງຕະຫລອດຮອດທ້ອງຖິ່ນ. ສຸມໃສ່ພັດທະນາແຫລ່ງຊັບພະຍາກອນມະນຸດມີຄຸນນະພາບສູງຮັບໃຊ້ວຽກງານຄຸ້ມຄອງທະເລ ແລະ ໝູ່ເກາະ, ເສີມຂະຫຍາຍແຫລ່ງກຳລັງແຮງພາຍໃນ, ຍາດແຍ່ງການຊ່ວຍເຫລືອຈາກສາກົນເພື່ອຫນູນຊ່ວຍວຽກງານຄຸ້ມຄອງທະເລ, ໝູ່ເກາະ, ນຳມາເຊິ່ງປະສິດທິຜົນ, ປະສິດທິພາບ.”
ໃນສະພາບພື້ນຖານເສດຖະກິດປະສົບກັບຄວາມຫຍຸ້ງຍາກຫລາຍຢ່າງ, ຫວ່າງແລ້ວນີ້ ນາຍົກລັດຖະມົນຕີໄດ້ເຫັນດີເລືອກເຟັ້ນ 5 ກຸ່ມເຂດເສດຖະກິດແຄມທະເລເພື່ອສຸມໃສ່ລົງທຶນພັດທະນາຈາກແຫລ່ງງົບປະມານແຫ່ງລັດໄລຍະ 2013 - 2015, ນັ້ນແມ່ນເຂດເສດຖະກິດ ຈູລາຍ - ຢຸງກວັດ(ກວ໋າງຫງາຍ), ເຂດເສດຖະກິດ ດີງຫວູ(ຫາຍຟ່ອງ), ເຂດເສດຖະກິດ ງີເຊີນ(ແທງຮວາ), ເຂດເສດຖະກິດ ຫວູງອາງ(ຮ່າຕີ້ງ) ແລະ ເຂດເສດຖະກິດເກາະຟູກວກ ແລະ ກຸ່ມເກາະ ນາມອານເທີຍ. ການສຸມໃສ່ພັດທະນາບັນດາເຂດເສດຖະກິດດັ່ງກ່າວແມ່ນກຳລັງຫນູນເພື່ອພັດທະນາເສດຖະກິດທະເລຢ່າງວ່ອງໄວ ແລະ ເຂັ້ມແຂງໃນໄລຍະຈະມາເຖິງ.