ເລຂາທິການໃຫຍ່ ໂຕເລິມ ພົບປະກັບຜູ້ມີສິດເລືອກຕັ້ງ ຮ່າໂນ້ຍ ກ່ອນກອງປະຊຸມສະໄໝສາມັນເທື່ອທີ 10, ສະພາແຫ່ງຊາດຊຸດທີ XV

(VOVWORLD) - ຕອນບ່າຍວັນທີ 23 ກັນຍາ ຢູ່ຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກຄອມມູນິດ ຫວຽດນາມ ພ້ອມດ້ວຍບັນດາສະມາຊິກໃນຄະນະຜູ້ແທນສະພາແຫ່ງຊາດນະຄອນ ຮ່າໂນ້ຍ, ຫົວໜ່ວຍເລືອກຕັ້ງເລກທີ 1 ໄດ້ລົງພົບປະກັບຜູ້ມີສິດເລືອກຕັ້ງຂອງ 11 ຕາແສງ; ລາຍງານແຜນການຂອງກອງປະຊຸມສະໄໝສາມັນເທື່ອທີ 10, ສະພາແຫ່ງຊາດ ຫວຽດນາມ ຊຸດທີ XV ແລະ ຮັບຟັງບັນດາຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ.

ທ່ານເລຂາທິການໃຫຍ່ ໂຕເລິມ ກ່າວຄຳເຫັນທີ່ການພົບປະ

ເມື່ອກ່າວຄຳເຫັນນະທີ່ນີ້, ທ່ານເລຂາທິການໃຫຍ່ ໂຕເລິມ ໄດ້ແຈ້ງໃຫ້ບັນດາຜູ້ມີສິດເລືອກຕັ້ງຮັບຊາບກ່ຽວກັບວຽກງານກະກຽມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກຄອມມູນິດ ຫວຽດນາມ, ຄາດວ່າ ຈະດຳເນີນໃນເດືອນມັງກອນ 2026 ແລະ ກ່ຽວກັບສະພາບການເສດຖະກິດສັງຄົມຂອງປະເທດຊາດ. ໃນການພົບປະ, ເມື່ອຕອບຄຳເຫັນຂອງບັນດາຜູ້ມີສິດເລືອກຕັ້ງກ່ຽວກັບບັນຫາແກ້ໄຂລະບຽບການບໍລິຫານຢູ່ຂັ້ນຮາກຖານ, ທ່ານເລຂາທິການໃຫຍ່ ໂຕເລິມ ໃຫ້ຮູ້ວ່າ:

“ຂ້າພະເຈົ້າເຫັນວ່າ ບັນດາຂໍ້ສະເໜີແນະຂອງຜູ້ມີສິດເລືອກຕັ້ງ, ແມ່ນຖືກຕ້ອງຊັດເຈນ. ນີ້ກໍແມ່ນບັນດາບັນຫາ ເຊິ່ງກົມການເມືອງ, ຄະນະເລຂາທິການ ໃຫ້ຄວາມເອົາໃຈໃສ່ຊີ້ນຳພິຈາລະນາເປັນປະຈຳ. ໂດຍລວມແລ້ວ, ກົງຈັກການຈັດຕັ້ງຂອງອຳນາດການປົກຄອງທ້ອງຖິ່ນ 2 ຂັ້ນ ຂອງທ້ອງຖິ່ນຕ່າງໆເວົ້າລວມ ແລະ ຮ່າໂນ້ຍ ເວົ້າສະເພາະ ໄດ້ເຂົ້າສູ່ການເຄື່ອນໄຫວເທື່ອລະກ້າວ ແລະ ມີປະສິດທິຜົນ. ເຖິງຢ່າງໃດກໍຕາມ, ໂດຍແມ່ນຮູບແບບໃໝ່, ສະນັ້ນ ກໍບໍ່ສາມາດຫຼີກລ້ຽງຄວາມຫຍຸ້ງຍາກ, ບັນຫາທີ່ຍັງບໍ່ທັນສອດຄ່ອງ, ຕ້ອງສືບຕໍ່ປັບປຸງໃຫ້ສົມບູນແບບ, ໂດຍສະເພາະແມ່ນຢູ່ຂັ້ນ ຕາແສງເຄື່ອນໄຫວຖືກຕ້ອງຕາມພາລະໜ້າທີ່ ແລະ ຮັບໃຊ້ປະຊາຊົນເປັນດີກວ່າເກົ່າ”.