ໃນບົດລາຍງານຫຼ້າສຸດທີ່ມີຊື່ວ່າ “Global Debt Monitor” (ການຕິດຕາມໜີ້ສິນທົ່ວໂລກ) ປະກາດໃນວັນທີ 25 ກັນຍາ, ສະຖາບັນການເງິນສາກົນ (IIF) ໃຫ້ຮູ້ວ່າ ໜີ້ສິນທົ່ວໂລກບັນລຸລະດັບສະຖິຕິ 337.700 ຕື້ USD ໄລ່ຮອດທ້າຍໄຕມາດທີ II/2025, ເພີ່ມຂຶ້ນກວ່າ 21.000 ຕື້ USD ໃນຮອບເວລາພຽງແຕ່ 6 ເດືອນຕົ້ນປີ 2025 ເທົ່ານັ້ນ.
IIF ຊີ້ແຈ້ງວ່າ ໜີ້ສິນທົ່ວໂລກມີທ່າອ່ຽງເພີ່ມຂຶ້ນ ຍ້ອນບັນດາເງື່ອນໄຂດ້ານການເງິນສາກົນໄດ້ຮັບການຜ່ອນຜັນ, ສະກຸນເງິນ USD ອ່ອນຄ່າ ແລະ ບັນດາທະນາຄານສູນກາງໃຫຍ່ ຫັນໄປສູ່ຫຼັກໝັ້ນນະໂຍບາຍຜ່ອນຜັນເງິນຕາ. ມູນຄ່າໜີ້ສິນເພີ່ມຂຶ້ນຢ່າງແຮງທີ່ສຸດ ໂດຍໄດ້ຮັບຮູ້ຢູ່ ຈີນ, ຝລັ່ງ, ເຢຍລະມັນ, ອັງກິດ ແລະ ຍີ່ປຸ່ນ, ສ່ວນໜຶ່ງຍ້ອນສະກຸນເງິນ USD ຫຼຸດລົງເກືອບ 10% ເມື່ອທຽບໃສ່ສະກຸນເງິນຂອງບັນດາຄູ່ຮ່ວມມືການຄ້າ ນັບແຕ່ຕົ້ນປີ.
ນອກຈາກນັ້ນ, IIF ກ່າວເຕືອນວ່າ, ໃນຊຸມເດືອນທ້າຍປີ 2025, ບັນດາຕະຫຼາດຫາກໍ່ພົ້ນເດັ່ນ ຈະຕ້ອງຊຳລະບ້ວງໜີ້ສິນລະດັບສະຖິຕິເກືອບ 3.200 ຕື້ USD ຈາກພັນທະບັດ ແລະ ບັນດາບ້ວງເງິນກູ້ທີ່ຮອດກຳນົດເວລາຊຳລະ.
