ໃນການພົບປະ, ທ່ານປະທານສະພາແຫ່ງຊາດ ເຈິ່ນແທັງເໝິນ ສະເໜີໃຫ້ສອງຝ່າຍສືບຕໍ່ເພີ່ມທະວີການເປີດປະຕູຕະຫຼາດ, ພິຈາລະນາການລົງນາມໃນສັນຍາການຄ້າເສລີຕາມທິດຍືນຍົງ ແລະ ດຸ່ນດ່ຽງໂດຍໄວ, ສ້າງເງື່ອນໄຂໃຫ້ສິນຄ້າທີ່ມີທ່າແຮງຂອງສອງປະເທດ ພ້ອມທັງຈຳກັດບັນດາຮົ້ວກີດຂວາງດ້ານການຄ້າ. ທ່ານປະທານສະພາແຫ່ງຊາດ ຕວັກກີ ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືສຳຄັນຂອງ ຕວັກກີ ຢູ່ ອາຊີຕາເວັນອອກສ່ຽງໃຕ້, ພ້ອມທັງປາດຖະໜາວ່າ ຊຸກຍູ້ການນຳສາຍພົວພັນຂອງສອງປະເທດຂຶ້ນສູ່ລະດັບສູງໃໝ່; ສະເໜີໃຫ້ສອງປະເທດຍູ້ແຮງການຮ່ວມມືໃນບັນດາຂົງເຂດທີ່ສຳຄັນອື່ນໆ, ພິເສດແມ່ນອຸດສາຫະກຳປ້ອງກັນຊາດ, logistics, ເຊື່ອມຕໍ່ທາງການບິນ - ທ່າກ່ຳປັ່ນທະເລ…
ປະທານສະພາແຫ່ງຊາດສອງປະເທດເຫັນດີສືບຕໍ່ຊຸກຍູ້ການຮ່ວມມືລະຫວ່າງສອງສະພາແຫ່ງຊາດ, ເພີ່ມທະວີການແລກປ່ຽນຄະນະຜູ້ແທນທຸກຂັ້ນ; ຈັດງານພົບພັນແລກປ່ຽນລະຫວ່າງກຸ່ມສະມາຊິກລັດຖະສະພາມິດຕະພາບສອງປະເທດເປັນປະຈຳ; ແບ່ງປັນບົດຮຽນປະສົບການສ້າງກົດໝາຍ ແລະ ຕິດຕາມກວດກາ, ສ້າງກອບນິຕິກຳສະດວກໃຫ້ແກ່ການຮ່ວມມືສອງຝ່າຍ, ຜ່ານນັ້ນ ປະກອບສ່ວນປັບປຸງ ແລະ ເຮັດໃຫ້ສາຍພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ ຫວຽດນາມ ແລະ ຕວັກກີ ເລິກເຊິ່ງກວ່າອີກ.
ກໍໃນວັນດຽວກັນ, ທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ຕ້ອນຮັບທ່ານ Ali Tezolmez ກົງສູນກຽດຕິມະສັກ ຫວຽດນາມ ຢູ່ນະຄອນ Istanbul.
ຕອນຄ່ຳຂອງວັນດຽວກັນ, ທ່ານປະທານສະພາແຫ່ງຊາດ ໄດ້ມີການພົບປະກັບພະນັກງານ, ພາລະກອນສະຖານທູດ ແລະ ປະຊາຄົມຊາວ ຫວຽດນາມ ອາໄສ ຢູ່ ຕວັກກີ.
ເລຕວຽດ
