 ທ່ານປະທານປະເທດ ເລືອງເກື່ອງ ກ່າວຄຳເຫັນທີ່ການເຮັດວຽກ (ພາບ: VOV) |
ຕອນເຊົ້າວັນທີ 5 ມິຖຸນາ, ຢູ່ຮ່າໂນ້ຍ, ທ່ານປະທານປະເທດ ເລືອງເກື່ອງ ແລະ ຄະນະປະຕິບັດງານ ສູນກາງໄດ້ມີການເຮັດວຽກກັບຄະນະພັກແຂວງ ກ໋ວາງນິງກ່ຽວກັບການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງ ຄະນະບໍລິຫານງານສູນກາງພັກຊຸດທີ XIII ຕິດພັນກັບການສ້າງ, ປັບປຸງເອກະສານໃຫ້ສົມບູນແບບ, ວຽກງານບຸກຄະລາກອນ.
ກ່າວຄຳເຫັນສະຫຼຸບການເຮັດວຽກ, ທ່ານປະທານປະເທດ ເລືອງເກື່ອງຮຽກຮ້ອງໃຫ້ແຂວງ ກ໋ວາງນິງຕ້ອງສົມເປັນທ້ອງຖິ່ນນຳໜ້າຂອງເຂດທົ່ງພຽງພາກເໜືອ, ເປັນແຂວງມີທ່າເຕີບໂຕຢ່າງຮອບດ້ານຂອງເຂດພາກເໜືອ. ທ່ານປະທານປະເທດ ຖືວ່າ ໃນໄລຍະຈະມາເຖິງ, ທາງທ້ອງຖິ່ນຕ້ອງສືບຕໍ່ປະຕິບັດວຽກງານຖະແຫຼງຂ່າວ, ໂຄສະນາໃຫ້ເປັນຢ່າງດີໃນຖັນແຖວພະນັກງານທຸກຂັ້ນ ແລະ ປະຊາຊົນທຸກຊັ້ນວັນນະ ດ້ວຍຫຼາຍຮູບແບບທີ່ເໝາະສົມ. ກ່ຽວກັບການປະຕິບັດການຈັດຕັ້ງຊັບຊ້ອນກົງຈັກອຳນາດການປົກຄອງທ້ອງຖິ່ນສອງຂັ້ນ, ທ່ານປະທານປະເທດ ຮຽກຮ້ອງວ່າ:
ຕ້ອງຮັບປະກັນເປົ້າໝາຍແມ່ນກະທັດລັດ, ມີການເຄື່ອນໄຫວຢ່າງມີປະສິດທິຜົນ, ປະສິດທິພາບ. ຂ້າພະເຈົ້າຕີລາຄາສູງ ແລະ ສະແດງຄວາມຊົມເຊີຍ ແຂວງກ໋ວາງນິງ ໃນວັນທີ 15 ມິຖຸນາ ຈະເຄື່ອນໄຫວທົດລອງອຳນາດການປົກຄອງຂັ້ນຕາແສງ. ຂ້າພະເຈົ້າເຊື່ອໝັ້ນວ່າ ວຽກງານກະກຽມໄດ້ປະຕິບັດເປັນຢ່າງດີ ແນ່ນອນວ່າການເຄື່ອນໄຫວຈະໄດ້ປະຕິບັດເປັນຢ່າງດີ. ຜ່ານການປະຕິບັດຕົວຈິງ, ດ້ານໜຶ່ງແມ່ນຖອດຖອນໄດ້ບົດຮຽນປະສົບການ, ດ້ານອື່ນ ທາງແຂວງກໍ່ສະໜອງໃຫ້ສູນກາງບັນດາບົດຮຽນ, ນັບທັງຈຸດດີຈຸດອ່ອນ, ສິ່ງທີ່ເໝາະສົມກັບສະພາບການໃນທົ່ວປະເທດ.
