ທ່ານ ເຈິ່ນແທັງເໝີ້ນ ຮັບດຳລົງຕຳແໜ່ງປະທານສະພາແຫ່ງຊາດຊຸດທີ 16 ຄືນໃໝ່

[VOVWORLD] - ຕອນເຊົ້າວັນທີ 06 ເມສາ, ຢູ່ ຮ່າໂນ້ຍ, ທີ່ກອງປະຊຸມຄັ້ງປະຖົມມະເລິກ, ສະພາແຫ່ງຊາດ ຫວຽດນາມ ຊຸດທີ 16, ໄດ້ເລືອກຕັ້ງທ່ານ ເຈິ່ນແທັງເໝີ້ນ, ປະທານສະພາແຫ່ງຊາດຊຸດທີ 15, ສະມາຊິກສະພາແຫ່ງຊາດຊຸດທີ 16 ດຳລົງຕຳແໜ່ງປະທານສະພາແຫ່ງຊາດປະເທດ ສສ.ຫວຽດນາມ ຊຸດທີ 16, ດ້ວຍບັດເຫັນດີ 100%.

(ທ່ານ ເຈິ່ນແທັງເໝີ້ນ ສາບານຕົວ ຮັບດຳລົງຕຳແໜ່ງປະທານສະພາແຫ່ງຊາດຊຸດທີ 16 )

ສາບານຕົວຕໍ່ສະພາແຫ່ງຊາດ, ທ່ານ ເຈິ່ນແທັງເໝີ້ນ, ປະທານສະພາແຫ່ງຊາດຊຸດທີ 16 ຢືນຢັນວ່າ:

“ພາຍໃຕ້ທຸງແດງດາວເຫຼືອງທີ່ສັກສິດຂອງປະເທດຊາດ, ຕໍ່ໜ້າສະພາແຫ່ງຊາດ ແລະ ພໍ່ແມ່ປະຊາຊົນ, ຜູ້ມີສິດເລືອກຕັ້ງໃນທົ່ວປະເທດ, ຂ້າພະເຈົ້າ, ປະທານສະພາແຫ່ງຊາດແຫ່ງປະເທດ ສສ.ຫວຽດນາມ, ສາບານຕົວຈົ່ງຮັກພັກດີຕໍ່ປະເທດຊາດ, ຕໍ່ປະຊາຊົນ, ລັດຖະທຳມະນູນຂອງປະເທດ ສສ.ຫວຽດນາມ; ມານະພະຍາຍາມປະຕິບັດສຳເລັດໜ້າທີ່ເຊິ່ງພັກ, ລັດ ແລະ ປະຊາຊົນມອບໝາຍໃຫ້”.

ກ່າວຄຳເຫັນຮັບດຳລົງຕຳແໜ່ງ, ທ່ານປະທານສະພາແຫ່ງຊາດ ເຈິ່ນແທັງເໝີ້ນ ຊີ້ແຈ້ງວ່າ ນີ້ແມ່ນຄວາມເປັນກຽດຢ່າງໃຫຍ່ຫຼວງ, ທັງແມ່ນຄວາມຮັບຜິດຊອບອັນສູງສົ່ງຂອງທ່ານຕໍ່ພັກ, ລັດ, ຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດ. ທ່ານປະທານສະພາແຫ່ງຊາດຊີ້ແຈ້ງວ່າ:

“ສະພາແຫ່ງຊາດຊຸດທີ 16 ຈະສືບຕໍ່ມານະພະຍາຍາມສູ້ຊົນ, ສົມເປັນສະພາແຫ່ງຊາດຂອງປະຊາຊົນ, ໂດຍປະຊາຊົນ ເພື່ອປະຊາຊົນ, ເປັນອົງການຜູ້ແທນສູງສຸດຂອງປະຊາຊົນຢ່າງແທ້ຈິງ; ປະຕິບັດໜ້າທີ່, ສິດອຳນາດທີ່ໄດ້ກຳນົດໃນລັດຖະທຳມະນູນຂອງປະເທດ ສສ.ຫວຽດນາມ ແລະ ໜ້າທີ່ເຊິ່ງພັກ, ລັດ ແລະ ປະຊາຊົນມີຄວາມເຊື່ອໝັ້ນມອບໝາຍໃຫ້. ຂ້າພະເຈົ້າໝັ້ນໝາຍຈະອຸທິດຈົນສຸດຄວາມສາມາດຂອງຕົນ, ຮັບໃຊ້ປະເທດຊາດ, ຮັບໃຊ້ປະຊາຊົນ; ສຸມໃສ່ປັບປຸງລະບອບລະບຽບການໃຫ້ສົມບຸນແບບເພື່ອໃຫ້ປະເທດ ພັດທະນາຢ່າງວ່ອງໄວ, ຍືນຍົງ, ຕອບສະໜອງຄວາມຮຽກຮ້ອງເຊື່ອມໂຍງເຂົ້າກັບສາກົນ”.