 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ແລະ ພັນລະຍາ ເດີນທາງມາຮອດສະໜາມບິນ Tallinn, ເລີ່ມຕົ້ນການຢ້ຽມຢາມ ແອັດໂຕນີ |
ໂດຍຕອບຮັບຄຳເຊີນຂອງທ່ານເລຂາທິການໃຫຍ່ ສປຊ Antonio Guterres ແລະ ທ່ານປະທານາທິບໍດີ ຝລັ່ງ Emmanuel Macron, ທ່ານນາຍົກລັດຖະມົນຕີ ແອັດໂຕນີ Kristen Michal ແລະ ທ່ານນາຍົກລັດຖະມົນຕີ ຊູແອັດ Ulf Kristersson, ໃນເວລາ 00 ໂມງ 30 ນາທີ ຂອງວັນທີ 5 ມິຖຸນາ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ອອກຈາກສະໜາມບິນສາກົນ ໂນ້ຍບ່າຍ, ຮ່າໂນ້ຍ ເດີນທາງໄປເຂົ້າຮ່ວມກອງປະຊຸມມະຫາສະໝຸດ ສປຊ ຄັ້ງທີ 3 (UNOC 3), ດຳເນີນການເຄື່ອນໄຫວສອງຝ່າຍຈຳນວນໜື່ງຢູ່ ຝລັ່ງ, ຢ້ຽມຢາມ ແອັດໂຕນີ ແລະ ຊູແອັດ ຢ່າງເປັນທາງການ ແຕ່ວັນທີ 5 ມິຖຸນາ ຫາວັນທີ 14 ມິຖຸນາ 2025.
ນີ້ແມ່ນຄັ້ງທຳອິດທີ່ທ່ານນາຍົກລັດຖະມົນຕີ ຫວຽດນາມ ເຂົ້າຮ່ວມກອງປະຊຸມມະຫາສະໝຸດຂອງ ສປຊ; ແມ່ນຄັ້ງທຳອິດທີ່ທ່ານນາຍົກລັດຖະມົນຕີເດີນທາງໄປຍັງ ຝລັ່ງ ນັບແຕ່ເມື່ອສອງປະເທດຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ (ເດືອນ ຕຸລາ 2024); ນີ້ແມ່ນການຢ້ຽມຢາມ ຊູແອັດ ຄັ້ງທຳອິດຂອງທ່ານນາຍົກລັດຖະມົນຕີ ຫວຽດນາມ ພາຍຫຼັງໄລຍະ 6 ປີ ແລະ ກໍແມ່ນຄັ້ງທຳອິດທີ່ການນຳຫຼັກແຫຼ່ງຂອງ ຫວຽດນາມ ເດີນທາງຢ້ຽມຢາມ ແອັດໂຕນີ ນັບແຕ່ເມື່ອສອງປະເທດສ້າງຕັ້ງການພົວພັນທາງການທູດເມື່ອປີ 1992.
ເລີ່ມຕົ້ນການເດີນທາງໄປປະຕິບັດງານຢູ່ 3 ປະເທດເອີຣົບຄັ້ງນີ້ ແມ່ນການຢ້ຽມຢາມ ສ.ແອັດໂຕນີ ຢ່າງເປັນທາງການ. ຕ້ອນຮັບທ່ານນາຍົກລັດຖະມົນຕີ ຟ້າມມິງຈິງ ພ້ອມດ້ວຍພັນລະຍາ ແລະ ຄະນະຜູ້ແທນ ຫວຽດນາມ ຢູ່ສະໜາມບິນ Lenmart Meri Tallin ມີທ່ານ Hannes Hanso ເອກອັກຄະລັດຖະທູດ ແອັດໂຕນີ ປະຈຳ ຈີນ ແລະ ຫວຽດນາມ; ທ່ານ Sven Tolp ຮອງຫົວໜ້າກົມພິທີການແຫ່ງລັດ ແອັດໂຕນີ; ທ່ານນາງ ຟ້າມທິແທັງບິ່ງ ເອກອັກຄະລັດຖະທູດ ຫວຽດນາມ ປະຈຳ ແຟງລັງ ແລະ ແອັດໂຕນີ.
ຄາດວ່າ ໃນການຢ້ຽມຢາມຄັ້ງນີ້, ທ່ານນາຍົກລັດຖະມົນຕີ ຟ້າມມິງຈິງ ຈະມີການພົບປະເຈລະຈາ, ພົບປະກັບການນຳຂັ້ນສູງຂອງ ແອັດໂຕນີ, ເຂົ້າຮ່ວມເວທີປາໄສວິສາຫະກິດ ຫວຽດນາມ - ແອັດໂຕນີ, ຢ້ຽມຢາມບາງຮາກຖານເສດຖະກິດ - ສັງຄົມ, ວັດທະນະທຳຈຳນວນໜຶ່ງຂອງ ແອັດໂຕນີ.
