 ທ່ານປະທານປະເທດ ເລືອງເກືອງ ໃຫ້ການຕ້ອນຮັບທ່ານ Gombojav Zandanshatar ຫົວໜ້າຫ້ອງວ່າການປະທານາທາບໍດີ ມົງໂກນ |
ຕອນເຊົ້າວັນທີ 13 ມັງກອນ, ຢູ່ທຳນຽບປະທານປະເທດ (ຮ່າໂນ້ຍ), ທ່ານປະທານປະເທດ ເລືອງເກືອງ ໄດ້ໃຫ້ການຕ້ອນຮັບທ່ານ Gombojav Zandanshatar ຫົວໜ້າຫ້ອງວ່າການປະທານາທາບໍດີ ມົງໂກນ ທີ່ພວມຢ້ຽມຢາມ ແລະ ເຮັດວຽກຢູ່ ຫວຽດນາມ.
ທີ່ການຕ້ອນຮັບ, ທ່ານປະທານປະເທດ ເລືອງເກືອງ ໄດ້ສະແດງຄວາມຊົມເຊີຍຕໍ່ຫ້ອງວ່າການປະທານປະເທດ ຫວຽດນາມ ແລະ ຫ້ອງວ່າການປະທານາທາບໍດີ ມົງໂກນ ໄດ້ເຊັນຂໍ້ຕົກລົງການຮ່ວມມື, ຜ່ານນັ້ນກໍ່ປະກອບສ່ວນຢ່າງແທດຈິງເຂົ້າໃນການເພີ່ມທະວີການຮ່ວມມືຢ່າງແໜ້ນແຟ້ນລະຫວ່າງສອງຫ້ອງວ່າການ, ກໍ່ຄືການພົວພັນຄູ່ຮ່ວມມືຮອບດ້ານ ຫວຽດນາມ - ມົງໂກນ ໃນໄລຍະຈະມາເຖິງ. ທ່ານປະທານປະເທດ ຢັ້ງຢືນວ່າ ຫວຽດນາມ ມີຄວາມສະເໝີຕົ້ນສະເໝີປາຍຖືເປັນສຳຄັນ ແລະ ມີຄວາມຫວັງຢາກສືບຕໍ່ເພີ່ມທະວີການຮ່ວມມືມິດຕະພາບທີ່ເປັນມູນເຊື້ອກັບ ມົງໂກນ ໃນບັນດາຂົງເຂດ, ເໝາະສົມກັບຄວາມສາມາດ ແລະ ຄວາມຕ້ອງການຂອງທັງສອງຝ່າຍ, ພິເສດແມ່ນໃນຂະນະທີ່ສອງຝ່າຍໄດ້ສ້າງຕັ້ງການພົວພັນຄູ່ຮ່ວມມືຮອບດ້ານໃນປີ 2024.
ສ່ວນທ່ານ Gombojav Zandanshatar ຫົວໜ້າຫ້ອງວ່າການປະທານາທາບໍດີໄດ້ສະແດງຄວາມຊົມເຊີຍຕໍ່ຫວຽດນາມ ເມື່ອບັນລຸໄດ້ບັນດາຜົນສຳເລັດໃນໄລຍະເກືອບ 40 ປີແຫ່ງການປ່ຽນແປງໃໝ່, ທ່ານປາດຖະໜາວ່າ ໃນໄລຍະຈະມາເຖິງ ສອງຝ່າຍຈະສືບຕໍ່ຮັກສາການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງ, ຜ່ານນັ້ນກໍ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ພ້ອມທັງຊຸກຍູ້ການຮ່ວມມືໃນທຸກຂົງເຂດໃຫ້ດີຍິ່ງກ່ວາອີກ.
