 (ຄະນະຜູ້ແທນ VOV ຖ່າຍຮູບກັບທ່ານເລຂາທິການໃຫຍ່ ABU Ahmed Nadeem) |
ຕອນເຊົ້າວັນທີ 14 ກັນຍາ, ຢູ່ນະຄອນຫຼວງ Ulaanbaatar, ປະເທດ ມົງໂກນ, ໄດ້ຈັດພິທີໄຂກອງປະຊຸມສະມັດຊາໃຫຍ່ສະມາຄົມກະຈາຍສຽງ - ໂທລະພາບ ອາຊີ - ປາຊີຟິກ (ABU) ຄັ້ງທີ 62. ເຫດການໂດຍວິທະຍຸໂທລະພາບແຫ່ງຊາດ ມົງໂກນເປັນເຈົ້າພາບຈັດຂຶ້ນ ດ້ວຍການເຂົ້າຮ່ວມຂອງຜູ້ແທນເກືອບ 300 ທ່ານທີ່ມາຈາກ 65 ປະເທດ. ຄະນະຜູ້ແທນວິທະຍຸກະຈາຍສຽງ ຫວຽດນາມ (VOV) ໂດຍທ່ານ ຫງວຽນວັນຈີ, ຮອງເລຂາຮັບຜິດຊອບອົງຄະນະພັກ ເປັນຫົວໜ້າຄະນະ ເຂົ້າຮ່ວມເຫດການ.
ກ່າວຄຳເຫັນທີ່ເຫດການ, ທ່ານຮອງປະທານ ABU Inoue Tatsuhiko ເນັ້ນໜັກວ່າ ດ້ວຍການນຳໃຊ້ເຕັກໂນໂລຊີໃໝ່ ແລະ ບັນດາການປະກອບສ່ວນຂອງວິທະຍຸ - ໂທລະພາບ, ບັນດາອົງການສື່ມວນຊົນ ສາມາດຍົກສູງຄວາມໄວ້ເນື້ອເຊື່ອໃຈຂອງຜູ້ຊົມຜູ້ຟັງ ແລະ ປະຕິບັດສຳເລັດພາລະກຳພິເສດຕໍ່ກັບສັງຄົມ. ພາລະກຳ ແລະ ຫຼັກການເຄື່ອນໄຫວຂອງ ABU ແມ່ນເຊື່ອມຕໍໍ່ບັນດາທ່າແຮງທີ່ອຸດົມສົມບູນຂອງບັນດາວິທະຍຸສະມາຊິກໃນຊາຍຄາລວມ ແລະ ສ້າງເປັນ “ຄວາມເປັນເອກະພາບໃນຫຼາຍຮູບຫຼາຍແບບ”.
ໃນຂອບເຂດກອງປະຊຸມໃຫຍ່ທີ່ຈັດຂຶ້ນແຕ່ວັນທີ 11 – 15 ກັນຍາ ໄດ້ຈັດຫຼາຍການເຄື່ອນໄຫວທີ່ອຸດົມສົມບູນ. ພິເສດ, ໃນຕອນຄ່ຳວັນທີ 14 ກັນຍາ (ຕາມເວລາທ້ອງຖິ່ນ) ຈະຈັດພິທີມອບລາງວັນ ABU. ວິທະຍຸກະຈາຍສຽງ ຫວຽດນາມ ມີ 2 ບົດປະພັນໄດ້ລອດເຂົ້າຮອບສຸດທ້າຍຂອງລາງວັນ ABU 2025.
ໃນຫຼາຍປີຜ່ານມາ, ສະມັດຊາໃຫຍ່ ABU ແມ່ນເວທີປາໄສສຳຄັນເຊື່ອມຕໍ່ບັນດາອົງການກະຈາຍສຽງ, ໂທລະພາບ, ສື່ສານໃນພາກພື້ນ ແລະ ໃນໂລກ, ປະກອບສ່ວນຊຸກຍູ້ການຮ່ວມມື, ແລກປ່ຽນ ແລະ ພັດທະນາການກະຈາຍສຽງ, ໂທລະພາບ, ການສື່ສານ ເພື່ອໂລກແຫ່ງສັນຕິພາບ, ກ້າວໜ້າ ແລະ ພັດທະນາ. ໂດຍແມ່ນສະມາຊິກຂອງ ABU ມາເປັນເວລາຫຼາຍປີ, VOV ຍາມໃດກໍ່ເຂົ້າຮ່ວມການເຄື່ອນໄຫວຂອງ ABU ຢ່າງຕັ້ງໜ້າ ແລະ ມີຄວາມຮັບຜິດຊອບ.
