ເຂົ້າຈີ່ໝໍ້ລວມມິດປ້າເຮົ້າ

(vovworld) - ເມື່ອເຕື້ອງເຖິງເຂົ້າຈີ່, ຜູ້ຄົນທັງຫຼາຍຈະເຕື້ອງເຖິງເຂົ້າຈີ່ປາເຕ, ເຂົ້າຈີ່ໄຂ່ດາວ ຫຼື ເຂົ້າຈີຊີ້ນປີ້ງ……ແຕ່ວ່າຢູ່ຮ່າໂນ້ຍ, ເຂົາເຈົ້າຍັງໄດ້ຮູ້ຈັກເຖິງເຂົ້າຈີ່ ອີກຊະນິດໜຶ່ງ ນັ້ນແມ່ນເຂົ້າຈີ່ໝໍ້ລວມມິດ. ບາງເທື່ອເພື່ອນ ບໍ່ເຄີຍໄດ້ຍິນ ຫຼື ພຽງແຕ່ໄດ້ຟັງຊື່ໆລ້າໆເທົ່ານັ້ນ, ແຕ່ຍັງບໍ່ທັນຮູ້ເຂົ້າຈີ່ຊະນິດນີ້ເປັນແນວໃດ. ໃນລາຍການສາລະຄະດີພາກນີ້ ພວກຂ້າພະເຈົ້າຈະແນະນຳໃຫ້ທ່ານຜູ້ຟັງຮູ້ຈັກເຖິງອາຫານແບບທຳມະດາ, ແຕ່ລາຄາພັດຖືກ ແລະ ສ້າງຄວາມດູດດື່ມທີ່ສຸດນີ້.

(ເຂົ້າຈີ່ໝໍ້ລວມມິດປ້າເຮົ້າ)

ຕອນຫົວຄໍ່າເວລາປະມານ 7 ໂມງ, ເມື່ອອາກາດເລີ່ມເຢັນລົງ. ບັນດາຮ້ານຂາຍເຄື່ອງລ້ວນແຕ່ໄຕ້ໄຟ ແລະ ແຂກມາກິນໃນຮ້ານອາຫານຕ່າງໆກໍ່ເລີ່ມຫຼາຍຂຶ້ນ, ຢູ່ຖະໜົນມາຍຫັກເດ ກໍ່ມີຮ້ານກິນດຶ່ມແຫ່ງໜຶ່ງທີ່ໄດ້ດຶງດູດແຂກມາກິນເປັນຈຳນວນຫຼວງຫຼາຍ, ໃນນັ້ນມີທັງບັນດາເພື່ອນໜຸ່ມ ແລະ ຜູ້ເຖົ້າອີກ. ເຂົາເຈົ້າກຳລັງນັ່ງຢູ່ຕໍ່ໜ້າໝໍ້ເຂົ້າຈີ່ລວມມິດທີ່ພວມມີອາຍກຸ້ມຂຶ້ນຢູ່ນັ້ນ. ຮ້ານເຂົ້າຈີ່ລວມມິດປ້າເຮົ້າ, ມີຊື່ສຽງຢູ່ຄຸ້ມຖະໜົນນີ້ເປັນເວລາວ່າ 40 ປີແລ້ວ. ອ້າຍທາຍ ແລະ ເອື້ອຍລິງ ແມ່ນແຂກປະຈຳຂອງຮ້ານ ໃຫ້ຮູ້ວ່າ:

ຂ້າພະເຈົ້າເຄີຍມາກິນຢູ່ຮ້ານປ້າເຮົ້າເກືອບ 10 ປີແລ້ວ, ລົດຊາດ ແລະ ວິທີປຸງແຕ່ງກໍ່ບໍ່ໄດ້ປ່ຽນແປງຫຼາຍ, ສ່ວນອາຫານໃນໝໍ້ກໍ່ເພີ່ມຂຶ້ນ. ຂ້າພະເຈົ້າມັກກິນປາເຕຫຼາຍ ສະນັ້ນເມື່ອມາກິນ ຂ້າພະເຈົ້າມັກເລືອກເອົາໝໍ້ທີ່ມີປາເຕຫຼາຍກວ່າ.

ໃນແຕ່ລະສັບປະດາ, ຂ້າພະເຈົ້າກິນແຕ່ 3-4 ເທື່ອ, ບາງເທື່ອກິນໃນຕອນເຊົ້າ, ບາງເທື່ອກິນໃນຕອນແລງ. ເຖິງວ່າກິນຊີ້ນ, ບາເຕ, ໄຂ່…ຫຼາຍຈະຮູ້ສຶກເບື່ອ, ແຕ່ເມື່ອກິນພ້ອມກັບ ຫົວຜັກດອງ ຈະຮູ້ສຶກວ່າແຊບຫຼາຍ. ຮັບປະທານອາຫານຢູ່ທີ່ນີ້ສະອາດກວ່າ ເມື່ອທຽບໃສ່ຮ້ານຈຳນວນໜຶ່ງເຊິ່ງຂ້າພະເຈົ້າເຄີຍກິນແລ້ວ. ຊີ້ນໃນແຕ່ລະໝໍ້ກໍ່ບໍ່ຫຼາຍປານໃດ, ມັນພໍດີສຳລັບຂ້າພະເຈົ້າ.

ຮ້ານເຂົ້າຈີ່ປ້າເຮົ້າ ຕັ້ງຢູ່ແຄມຖະໜົນນ້ອຍ ມາຍຫັກເດ໋, ຕໍ່ໜ້າຮ້ານມີໂຕະພຽງສອງໜ່ວຍ ແລະ ຕັ່ງຢາງນ້ອຍສອງສາມໜ່ວຍເທົ່ານັ້ນ, ບ່ອນປຸງແຕ່ງກໍ່ງ່າຍດາຍ, ດ້ວຍບັນດາໝໍ້ປຸງແຕ່ງທີ່ຕັ້ງກ່າຍກອງກັນ, ກັບເຕົາໄຟໃຊ້ຖ່ານ 2 ເຕົາ ແລະ ຕູ້ແກ້ວທີ່ບັນຈຸວັດຖຸດິບເພື່ອປຸງແຕ່ງ. ເຖິງວ່າຮ້ານບໍ່ກວ້າງ ແລະ ບໍ່ງາມປານໃດ, ແຕ່ເວລາໃດຮ້ານຂອງປ້າເຮົ້າກໍ່ມີແຂກມາກິນເຕັມທີ່ນັ່ງ. ເມື່ອເວົ້າເຖິງອາຫານເຍື່ອງນີ້, ປ້າເຮົ້າໄດ້ແບ່ງປັນວ່າ :

ໃນເບື້ອງຕົ້ນຮ້ານຂອງປ້າພຽງແຕ່ຂາຍເຂົ້າຈີ່ປາເຕເທົ່ານັ້ນ, ຕໍ່ມາມີແຂກຕ້ອງການໃສ່ໄຂ່, ຊີ້ນມຸ່ນຕື່ມອີກ….. ແລະເຂົ້າຈີ່ປາເຕນີ້ຄ່ອຍປ່ຽນມາເປັນເຈົ້າຈີ່ລວມມິດຄືປະຈຸບັນນີ້. ເຂົ້າຈີ່ລວມມິດໝໍ້ໜຶ່ງປະກອບດ້ວຍ: ເຂົ້າຈີ່, ປາເຕ, ໄຂ່, ຮອັດດອັກ, ໄສ້ກອກ, ຊີ້ນນ້ຳມັນ, ຊີ້ນປີ້ງ, ແລະ ກິນພ້ອມກັບຫົວຜັກດອງ ເພື່ອບໍ່ໃຫ້ເປັນຕາເບື່ອ. ໝໍ້ເຂົ້າຈີ່ລວມມິດຄືແນວນີ້ມີລາຄາ 35.000 ດົງ.

ເຂົ້າຈີ່ໝໍ້ລວມມິດ ມີລັກສະນະບໍ່ຄືອາຫານທົ່ວໄປເຊັ່ນວ່າ : ຊີ້ນຈຸ່ມ ແລະ ອາຫານປີ້ງປະເພດຕ່າງໆ, ແຕ່ເມື່ອຍາມອາກາດເລີ່ມເຢັນລົງ, ຈຳນວນແຂກມາກິນເຂົ້າຈີ່ໝໍ້ລວມມິດກໍ່ຄ່ອຍໆເພີ່ມຂຶ້ນ. ເຂົ້າຈີ່ໝໍ້ລວມມິດ ລວມມີເຂົ້າຈີ່ທີ່ຈົ່ງໄວ້ສະເພາະ, ສ່ວນບັນດາວັດຖຸດິບອື່ນໆແມ່ນໃສ່ໃນໝໍ້ຂາງນ້ອຍ, ກວ້າງປະມານ 20 cm. ພາຍຫຼັງຈືນໃຫ້ຮ້ອນແລ້ວຈຶ່ງນຳມາໃຫ້ແຂກ. ປ້າ ເຮົ້າ ໃຫ້ຮູ້ວ່າ:

“ເຖິງວ່າຮ້ານຂ້າພະເຈົ້າບໍ່ກວ້າງ, ພຽງແຕ່ສາມາດຮັບໃຊ້ແຂກໄດ້ປະມານສອງສາມຄົນເທົ່ານັ້ນ, ແຕ່ຂ້າພະເຈົ້າຍັງມີ 3 ຫ້ອງຢູ່ໃນຮ່ອມບ້ານທີ່ສາມາດບັນຈຸ ແຂກມາກິນໄດ້ 50 ຄົນ. ສຳລັບແຂກທີ່ລື້ງເຄີຍ, ບາງເທື່ອເຂົາເຈົ້າກໍ່ມາຈັດງານລ້ຽງນ້ອຍຢູ່ທີ່ນີ້ອີກ. ບາງເທື່ອແຂກ ມາກິນມີຫຼາຍຄົນໂພດ, ເຂົາເຈົ້າກໍ່ຕ້ອງໄປເອົາຂອງກິນ ແລະ ຊອກຫາບ່ອນນັ່ງເອງ“.

ພາຍຫຼັງຕິດພັນກັບອາຊີບເປັນເວລາເກືອບ 40 ປີ, ມາຮອດປະຈຸບັນປ້າໄດ້ມີອາຍຸກວ່າ 80 ປີແລ້ວ. ຍ້ອນສຸຂະພາບບໍ່ແຂງແຮງອີກ, ປ້າຈຶ່ງຖ່າຍທອດເຄັດລັບເຮັດເຂົ້າຈີ່ໝໍ້ລວມມິດໃຫ້ລູກຂອງຕົນ. ປະຈຸບັນ, ລູກຊາຍທັງສອງຄົນຂອງປ້າພວມເຮັດອາຊີບນີ້ຢູ່ໃນຮ້ານ. ຜູ້ໜຶ່ງຂາຍໃນຕອນເຊົ້າ, ແລະອີກຜູ້ໜຶ່ງແມ່ນຂາຍໃນຕອນແລງ, ສ່ວນປ້າມີແຕ່ຊ່ວຍເກັບເງິນ ຫຼືແນະນຳບ່ອນຈອດລົດໃຫ້ແຂກເທົ່ານັ້ນ. ເມື່ອເຕື້ອງເຖິງອະນຸສອນທີ່ໜ້າປະທັບໃຈກ່ຽວກັບອາຊີບຂອງຕົນ. ປ້າເຮົ້າ ແບ່ງປັນວ່າ:

“ອະນຸສອນປະທັບໃຈທີ່ສຸດຂອງປ້າໃນຕະຫຼອດ 40 ປີທີ່ຂາຍເຂົ້າຈີ່ໝໍ້ລວມມິດນັ້ນແມ່ນເລື່ອງ, ມີແຂກຜູ້ໜຶ່ງທີ່ມາຈາກທາງໄກ, ບັງເອີນອ່ານໜັງສືພິມໃນນັ້ນມີບົດແນະນຳກ່ຽວກັບຮ້ານເຂົ້າຈີ່ໝໍ້ລວມມິດຂອງປ້າ, ລາວກໍ່ຕົກລົງຊອກຫາເພື່ອກິນອາຫານເຍື່ອງນີ້. ເຖິງວ່າຢູ່ອ້ອມຂ້າງຮ້ານຂອງປ້ານີ້ ມີສອງ, ສາມຮ້ານທີ່ຂາຍເຂົ້າຈີ່ໝໍ້ລວມມິດຄືກັນກັບປ້າກໍ່ຕາມ, ແຕ່ລາວ ກໍ່ໄດ້ເລືອກເອົາຮ້ານຂອງປ້າເທົ່ານັ້ນ. ປ້າຮູ້ສຶກດີໃຈຫຼາຍຕໍ່ສິ່ງດັ່ງກ່າວນີ້“.

ຖ້າຫາກເພື່ອນຢາກທົດລອງຊີມ ເຂົ້າຈີ່ໝໍ້ລວມມິດນີ້, ເຊີນເພື່ອນມາຮ້ານຂອງປ້າເຮົ້າຢູ່ເຮືອນເລກທີ 116 ຖະໜົນ ມາຍຮັກເດ໋, ເມືອງຮາຍບ່າຈຶງ, ຮ່າໂນ້ຍ. ນອກຈາກໄດ້ກິນອາຫານເຍື່ອງນີ້ແລ້ວ, ຖ້າໂຊກດີ, ເພື່ອນຍັງໄດ້ຮັບຟັງບັນດາເລື່ອງລາວກ່ຽວກັບຊີວິດ ແລະ ອາຊີບຂອງເຈົ້າຂອງຮ້ານນີ້ອີກ.