ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີແຫ່ງ ສ.ສິງກະໂປ ຫຼີຊຽນຫຼົງ, ວັນທີ 25 ເມສາ, ທ່ານນາຍົກລັດຖະມົນຕີແຫ່ງ ສສ.ຫວຽດນາມ ຫງວຽນຊວນຟຸກ ຈະເລີ່ມຕົ້ນການຢ້ຽມຢາມ ສິງກະໂປຢ່າງເປັນທາງການ. ນີ້ແມ່ນການຢ້ຽມຢາມ ສິງກະໂປ ຄັ້ງທຳອິດຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນຖານະຕຳແໜ່ງເປັນຜູ້ນຳໜ້າລັດຖະບານ ຫວຽດນາມ. ການຢ້ຽມຢາມຖືກດຳເນີນໃນສະພາບທີ່ 2 ປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (01/08/1973 – 01/08/2018) ແລະ 5 ປີແຫ່ງວັນສ້າງການພົວພັນຄູ່ຮ່ວມມືຍຸດທະສາດ (09/2013 – 09/2018), ເພື່ອແນໃສ່ເພີ່ມທະວີການພົວພັນ 2 ຝ່າຍໃຫ້ເຂັ້ມແຂງກ່ວາອີກ, ສ້າງບຸກທະລຸໃໝ່ໃນການພົວພັນລະຫວ່າງ 2 ປະເທດໃນໄລຍະຈະມາເຖິງ.
 ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບທ່ານນາຍົກລັດຖະມົນຕີ ຫຼີຊຽນຫຼົງ ຢ້ຽມຢາມ ຫວຽດນາມ ເມື່ອເດືອນ 3/2017 (ພາບ: /TTXVN) |
ສືບຕໍ່ທ່າການພົວພັນດ້ານການເມືອງຢ່າງໄວ້ເນື້ອເຊື່ອໃຈ, ສະໜິດແໜ້ນ, ປີ 2018, 2 ປະເທດ ພວມຕັ້ງໜ້າສົມທົບກັນດຳເນີນພິທີສະເຫຼີມສະຫຼອງ 45 ປີແຫ່ງວັນສ້າງການພົວພັນທາງການທູດ ແລະ 5 ປີແຫ່ງວັນສ້າງຕັ້ງຄູ່ຮ່ວມມືຍຸດທະສາດ. ການຢ້ຽມຢາມຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນສະພາບການນັ້ນ ແມ່ນພື້ນຖານເພື່ອຊຸກຍູ້ການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປ ຂຶ້ນສູ່ລະດັບສູງໃໝ່.
ການພົວພັນຄູ່ຮ່ວມມືຍຸດທະສາດຢ່າງມີປະສິດທິຜົນແທດຈິງ
ຫວຽດນາມ ແລະ ສິງກະໂປ ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດໃນປີ 2013. ຄຽງຂ້າງການພົວພັນດ້ານການເມືອງອັນດີງາມນັ້ນ, ການພົວພັນຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງ ຫວຽດນາມ ແລະ ສິງກະໂປ ກໍ່ນັບມື້ນັບພັດທະນາຢ່າງແທດຈິງ ແລະ ມີປະສິດທິຜົນ. ສິງກະໂປ ແມ່ນຄູ່ຄ້າລາຍໃຫຍ່ທີ່ສຸດຂອງ ຫວຽດນາມ ໃນ ອາຊຽນ ແລະ ຢືນອັນດັບທີ 6 ໃນໂລກ, ວົງເງິນການຄ້າ 2 ປະເທດໄດ້ເພີ່ມຂຶ້ນໃນແຕ່ລະປີ. ສິງກະໂປ ແມ່ນນັກລົງທຶນທີ 3 ຂອງ ຫວຽດນາມ ດ້ວຍໂຄງການລົງທຶນເກືອບ 2000 ໂຄງການ, ຍອດຈຳນວນທຶນຈົດທະບຽນບັນລຸ 42 ຕື້ USD, ເພີ່ມຂຶ້ນເກືອບທົບ 2 ເທົ່ານັບແຕ່ເມືຶ່ອຍົກລະດັບການພົວພັນຂຶ້ນລະດັບຄູ່ຮ່ວມມືຍຸດທະສາດ. ໃນນັ້ນ ຕ້ອງເວົ້າເຖິງການປະກອບສ່ວນສຳຄັນຂອງເຂດອຸດສາຫະກຳ ຫວຽດນາມ - ສິງກະໂປ (VSIP) 8 ແຫ່ງ ດ້ວຍການພັດທະນາເສດຖະກິດເຂດພາກຂອງ ຫວຽດນາມ. ທ່ານ ຫງວຽນຕ໋ຽນມິງ ອະດີດເອກອັກຄະລັດຖະທູດ ຫວຽດນາມ ປະຈຳ ສິງກະໂປ ຖືວ່າ:
“ການຮ່ວມມືເສດຖະກິດແມ່ນຈຸດສຸມໃຫຍ່. ປັດຈຸບັນ, ເສດຖະກິດຂອງ ຫວຽດນາມ ແລະ ສິງກະໂປ ພັດທະນາທີ່ສຸດ. ລະດັບການລົງທຶນຂອງ ສິງກະໂປ ເຂົ້າ ຫວຽດນາມ ໄດ້ເພີ່ມຂຶ້ນ. ໃນ 3 ປີມານີ້, ແຕ່ລະປີ ການຄ້າ 2 ຝ່າຍເພີ່ມຂຶ້ນປະມານ 22%. 2 ຝ່າຍສາມາດຮ່ວມມືນຳກັນ ເພື່ອຜະລິດອອກບັນດາຜະລິດຕະພັນຫລາຍຮູບຫລາຍແບບ ແລະ ອຸດົມສົມບູນ ບັນລຸໄດ້ມາດຕະຖານຄຸນນະພາບຂອງ ສິງກະໂປ ເພື່ອມຸ່ງໄປເຖິງຕະຫລາດກ້ວາງໃຫຍ່ກ່ວາ”.
ບໍ່ພຽງແຕ່ຮ່ວມມືຢ່າງແທດຈິງ ແລະ ມີປະສິດທິຜົນໃນຂົງເຂດເສດຖະກິດ, ການຄ້າ ແລະ ການລົງທຶນເທົ່ານັ້ນ, ຫາກການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບລະຫວ່າງ 2 ປະເທດກໍ່ມີບາດກ້າວໃໝ່, ເປັນຕົ້ນແມ່ນໃນການພົບປະແລກປ່ຽນກ່ຳປັ່ນກອງທັບເຮືອ, ສົມທົບກັນຕ້ານການກໍ່ການຮ້າຍ, ຄວາມໝັ້ນຄົງທາງອິນເຕີແນັດ. ການຮ່ວມມືວັດທະນະທຳ, ພົບປະແລກປ່ຽນປະຊາຊົນນັບມື້ນັບພັດທະນາ, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນ ແລະ ກັນຂອງປະຊາຊົນ 2 ປະເທດ.
ໃນສະພາບການໃໝ່, ສິງກະໂປ ໃຫ້ຄຳໝັ້ນສັນຍາວ່າ ຈະສືບຕໍ່ເພີ່ມທະວີການລົງທຶນເຂົ້າ ຫວຽດນາມ ໃນບັນດາຂົງເຂດພະລັງງານ, ພັດທະນາຕົວເມືອງ ແລະ ກໍ່ສ້າງຕາໜ່າງຮ່ວມສຳພັນນະຄອນສະຫລາດ. ເມື່ອຕີລາຄາກ່ຽວກັບຄວາມສາມາດບົ່ມຊ້ອນການຮ່ວມມື 2 ປະເທດໃນປັດຈຸບັນ, ທ່ານ ຫງວຽນຕ໋ຽນມິງ ອະດີດເອກອັກຄະລັດຖະທູດ ຫວຽດນາມ ປະຈຳ ສິງກະໂປ ຢືນຢັນວ່າ:
“ລະຫວ່າງຫວຽດນາມ ແລະ ສິງກະໂປ ມີຄວາມສາມາດບົ່ມຊ້ອນຮ່ວມມືຢ່າງໃຫຍ່ຫລວງ ຍ້ອນ 2 ພື້ນຖານເສດຖະກິດລ້ວນແຕ່ມີລັກສະນະໜູນຊ່ວຍກັນ. ຝ່າຍ ສິງກະໂປ ມີທຶນ, ມີບົດຮຽນກ່ຽວກັບເສດຖະກິດການຕະຫລາດ, ບົດຮຽນກ່ຽວກັບການພັດທະນາພື້ນຖານເສດຖະກິດ. ສ່ວນ ຫວຽດນາມ ພັດມີແຫຼ່ງຊັບພະຍາກອນມະນຸດເຂັ້ມແຂງ, ຊັບພະຍາກອນທຳມະຊາດທີ່ອຸດົມສົມບູນ ແລະ ກໍ່ມີທີ່ຕັ້ງພູມສາດກ້ວາງຂວາງທີ່ສຸດ. ດັ່ງນັ້ນ, 2 ພື້ນຖານເສດຖະກິດສາມາດໜູນຊ່ວຍເຊິ່ງກັນ ແລະ ກັນ, ສ້າງຄວາມສາມາດບົ່ມຊ້ອນການຮ່ວມມື. ພິເສດ, ປັດຈຸບັນ ໃນສະພາບການບັນດາ FTA ໄດ້ສ້າງຂຶ້ນ ແລະ ພັດທະນານັ້ນ ຂົງເຂດການຮ່ວມມືແມ່ນໃຫຍ່ທີ່ສຸດ. ການຮ່ວມມືລະຫວ່າງ ຫວຽດນາມ ແລະ ສິງກະໂປ ບໍ່ພຽງແຕ່ຖືກຈຳກັດໃນຂົງເຂດຂອງ ສິງກະໂປ ເທົ່ານັ້ນ ຫາກຍັງສາມາດນອນໃນຂອບເຂດໃຫຍ່ກ່ວາ ນັ້ນແມ່ນພາກພື້ນ ອາຊຽນ, ທົ່ວພາກພື້ນອາຊີ - ປາຊີຟິກ ອີກດ້ວຍ”
ໃນການຢ້ຽມຢາມ ສິງກະໂປ ຄັ້ງນີ້, ທ່ານນາຍົກລັດຖະມົນຕີ ຫງວຽນຊວນຟຸກ ມີການເຈລະຈາກັບທ່ານນາຍົກລັດຖະມົນຕີ ຫຼີຊຽນຫຼົງ, ພົບປະກັບປະທານາທິບໍດີ ສິງກະໂປ, ກ່າວຄຳເຫັນຢູ່ໂຮງຮຽນຄຸ້ມຄອງ ສິງກະໂປ, ເຂົ້າຮ່ວມເວທີປາໄສເສດຖະກິດ ຫວຽດນາມ - ສິງກະໂປ, ຢ້ຽມຢາມບາງຮາກຖານເສດຖະກິດຂອງ ສິງກະໂປ. ບັນດາການເຄື່ອນໄຫວດັ່ງກ່າວ ປະກອບສ່ວນກຳນົດທິດການພົວພັນ 2 ປະເທດໃນໄລຍະຈະມາເຖິງ.
ຕັ້ງໜ້າສົມທົບກັນຢ່າງແໜ້ນແຟ້ນໃນບັນດາເວທີປາໄສຫລາຍຝ່າຍພາກພື້ນ ແລະ ສາກົນ
ໃນການຮ່ວມມືຫລາຍຝ່າຍ, ຫວຽດນາມ ແລະ ສິງກະໂປ ຍາມໃດກໍ່ຮ່ວມມືນຳກັນຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະ ສາກົນ. ປັດຈຸບັນ ສິງກະໂປ ພວມເປັນປະທານ ອາຊຽນ 2018. ຫວຽດນາມ ຍາມໃດກໍ່ສະໜັບສະໜູນ ແລະ ຕີລາຄາສູງບັນດາຄວາມມານະພະຍາຍາມ, ຂໍ້ລິເລີ່ມຂອງ ສິງກະໂປ, ສະໜັບສະໜູນຫົວຂໍ້ ອາຊຽນ ປີນີ້ແມ່ນ “ສ້າງຄວາມເຂັ້ມແຂງດ້ວຍຕົນເອງ ແລະ ມີຫົວຄິດປະດິດສ້າງ”. 2 ຝ່າຍເຫັນດີເປັນເອກະສັນວ່າ ອາຊຽນ ຄວນເຊີດຊູຈິດໃຈສ້າງຄວາມເຂັ້ມແຂງດ້ວຍຕົນເອງໃນທຸກດ້ານ ອີງໃສ່ພື້ນຖານແມ່ນບັນດາຫຼັກການ, ຄຳໝັ້ນສັນຍາຮ່ວມຂອງ ອາຊຽນ, ຮັກສາຄວາມສາມັກຄີ ແລະ ບົດບາດເປັນໃຈກາງຂອງ ອາຊຽນ ໃນບັນດາບັນຫາຍຸດທະສາດພາກພື້ນໃຫ້ໝັ້ນຄົງ. ສິງກະໂປ ໃຫ້ຄຳໝັ້ນສັນຍາວ່າ ຈະສືບຕໍ່ຊຸກຍູ້ການຮ່ວມມືອະນຸພາກພື້ນ ດ້ວຍບົດບາດເປັນປະທານ ອາຊຽນ.
ການຢ້ຽມຢາມ ສິງກະໂປ ຄັ້ງທຳອິດຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນຖານະເປັນນາຍົກລັດຖະມົນຕີ ໃນສະພາບການທີ່ 2 ປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (01/08/1973 – 01/08/2018) ແລະ 5 ປີແຫ່ງວັນສ້າງການພົວພັນຄູ່ຮ່ວມມືຍຸດທະສາດ (09/2013 / 09/2018), ແນ່ນອນວ່າຈະສ້າງບັນດາບາດກ້າວບຸກທະລຸໃໝ່ ໃນການພົວພັນ 2 ປະເທດໃນໄລຍະຈະມາເຖິງ./.
