ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດ ຫວຽດນາມ ໄດ້ກຳນົດຢ່າງຈະແຈ້ງເປົ້າໝາຍພັດທະນາຮອດປີ 2030, ວິໄສທັດຮອດປີ 2045 ພ້ອມທັງເນັ້ນໜັກເຖິງຄຳຮຽກຮ້ອງຕ້ອງປ່ຽນແປງໃໝ່ຈິນຕະນາການພັດທະນາແກ້ໄຂແຫຼ່ງກຳລັງ, ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດໃຫ້ສູງສຸດ.
ສ້າງດ້ວຍລະບົບນິຕິບັນຍັດທັນສະໄໝ, ມີຄວາມເປັນໄປໄດ້ ແລະ ສ້າງສາພັດທະນາ
ຕາມທ່ານເລຂາທິການໃຫຍ່ ໂຕເລິມ ແລ້ວ, ສະພາແຫ່ງຊາດແມ່ນບ່ອນເຕົ້າໂຮມເຈດຈຳນົງ, ຄວາມມຸ່ງມາດປາດຖະໜາ ແລະ ສິດເປັນເຈົ້າຂອງປະຊາຊົນ, ແມ່ນບ່ອນຕັດສິນບັນດາບັນຫາໃຫຍ່ຂອງປະເທດຊາດ, ແມ່ນບ່ອນຫັນແຜນນະໂຍບາຍຂອງພັກເປັນກົດໝາຍ, ນະໂຍບາຍ ແລະ ກຳລັງແຮງຈັດຕັ້ງປະຕິບັດຕົວຈິງ. ສະມາຊິກສະພາແຫ່ງຊາດແຕ່ລະຄົນ ຍາມໃດກໍຕ້ອງມີຄວາມຮັບຮູ້ຢ່າງເລິກເຊິ່ງວ່າ ຕົນເອງ ບໍ່ພຽງແຕ່ໄດ້ຮັບຄວາມໄວ້ວາງໃຈຈາກຜູ້ມີສິດເລືອກຕັ້ງເທົ່ານັ້ນ ຫາກຍັງຕ້ອງແບບຫາບໜ້າທີ່ຕໍ່ຊາຕາກຳຂອງຊາດ, ຕໍ່ຄວາມເຊື່ອໝັ້ນຂອງປະຊາຊົນ, ຕໍ່ອະນາຄົດໃຫ້ຄົນລຸ້ນຫຼັງອີກດ້ວຍ. ຈາກຈິດໃຈນັ້ນ, ທ່ານເລຂາທິການໃຫຍ່ ສະເໜີໃຫ້ສະພາແຫ່ງຊາດຊຸດທີ XVI ສຸມໃສ່ປະຕິບັດ 4 ໜ້າທີ່ໃຫຍ່ໃຫ້ດີທີ່ສຸດ. ໃນນັ້ນ, ໜ້າທີ່ທຳອິດແມ່ນວຽກງານນິຕິບັນຍັດ. ທ່ານກ່າວວ່າ:
“ທີໜຶ່ງແມ່ນ, ປ່ຽນແປງໃໝ່ວຽກງານນິຕິບັນຍັດຢ່າງແຮງ, ສ້າງລະບົບນິຕິບັນຍັດທີ່ທັນສະໄໝ, ເປັນເອກະພາບ, ໝັ້ນຄົງ, ມີຄວາມເປັນໄປໄດ້ ແລະ ສ້າງສາພັດທະນາໃຫ້ໄດ້. ສະພາແຫ່ງຊາດຕ້ອງສຸມໃສ່ຍົກສູງຄວາມສາມາດຫັນ ມະຕິຂອງພັກເປັນນະໂຍບາຍ ແລະ ກົດໝາຍອັນລະອຽດ, ສ້າງຂອບນິຕິກຳອັນໝັ້ນແກ່ນເພື່ອປະຕິບັດບັນດາໜ້າທີ່ພັດທະນາເສດຖະກິດ, ສັງຄົມຢ່າງມີໄຊ. ລະບົບກົດໝາຍຕ້ອງກາຍເປັນພື້ນຖານລະບອບລະບຽບການຂອງການພັດທະນາຢ່າງແທ້ຈິງ, ແມ່ນເຄື່ອງມືເພື່ອປົກປ້ອງສິດທິມະນຸດ, ສິດພົນລະເມືອງ, ແມ່ນກຳລັງໜູນຊຸກຍູ້ນະວັດຕະກຳ, ປົດປ່ອຍກຳລັງຜະລິດ,ເປີດບໍລິເວນພັດທະນາໃໝ່ໃຫ້ແກ່ປະເທດ”.
ສະພາແຫ່ງຊາດຕ້ອງຊີ້ນຳວຽກງານສຳຫຼວດກວດຄືນທົ່ວລະບົບກົດໝາຍ, ປັບປຸງໂຄງສ້າງລະບົບກົດໝາຍແຫ່ງຊາດໃຫ້ສົມບູນແບບ, ຕ້ອງເຮັດແນວໃດເພື່ອໃຫ້ກົດໝາຍທີ່ໄດ້ປະກາດໃຊ້ກ້າວ ເຂົ້າສູ່ຊີວິດຕົວຈິງ. ປະຊາຊົນເຂົ້າໃຈໄດ້ງ່າຍ, ວິສາຫະກິດປະຕິບັດໄດ້ງ່າຍ, ອົງການລັດໝູນໃຊ້ໄດ້ງ່າຍ.
“ພິເສດ ຕ້ອງປ່ຽນແປງໃໝ່ຈິນຕະນາການສ້າງກົດໝາຍຕາມທິດສ້າງສາພັດທະນາໂດຍພື້ນຖານ. ກົດໝາຍບໍ່ພຽງແຕ່ເພື່ອຄຸ້ມຄອງສິ່ງທີ່ມີຢູ່ແລ້ວເທົ່ານັ້ນ ຫາກຍັງຕ້ອງເປີດທາງໃຫ້ແກ່ສິ່ງໃໝ່, ບໍ່ພຽງແຕ່ດັດປັບສະພາບການຕົວຈິງໃນປັດຈຸບັນເທົ່ານັ້ນ, ຫາກຍັງຕ້ອງສ້າງສາອະນາຄົດອີກດ້ວຍ. ກົດໝາຍ ບໍ່ພຽງແຕ່ເປີດທາງເທົ່ານັ້ນ ຫາກຍັງຕ້ອງສ້ອມແປງທາງອີກດ້ວຍ. ຕ້ອງຫັນຈາກຈິນຕະນາການສ້າງກົດໝາຍໃຫ້ຄົບ ໄປສູ່ຈິນຕະນາການສ້າງກົດໝາຍເພື່ອພັດທະນາ; ຈາກກົດໝາຍດີທີ່ເປັນລາຍລັກອັກສອນໄປສູ່ກົດໝາຍທີ່ດີໃນການດຳລົງຊີວິດ”.
ຍົກລະດັບການຕິດຕາມກວດກາສູງສຸດຂອງສະພາແຫ່ງຊາດຕາມທິດແທດຈິງ ແລະ ແຫຼມຄົມ
ທ່ານເລຂາທິການໃຫຍ່ ໂຕເລິມ ຮຽກຮ້ອງໃຫ້ສະພາແຫ່ງຊາດຍົກລະດັບການຕິດຕາມກວດກາໃຫ້ສູງສຸດຕາມທິດແທດຈິງ, ແຫຼມຄົມ, ມີຄວາມຮັບຜິດຊອບ. ການຕິດຕາມກວດກາຕ້ອງກາຍເປັນເຄື່ອງມືຍົກສູງຜົນສັກສິດ, ປະສິດທິຜົນການບໍລິຫານແຫ່ງຊາດຢ່າງແທ້ຈິງ, ຕ້ອງປະກອບສ່ວນປັບປຸງໃຫ້ຖືກຕ້ອງ, ເຮັດໃຫ້ດີກວ່າ, ແກ້ໄຂສິ່ງທີ່ຍັງຄົງຄ້າງ, ກ່າວເຕືອນຄວາມສ່ຽງໂດຍໄວ ແລະ ຊຸກຍູ້ການກະທຳໃຫ້ໄດ້.
“ຂ້າພະເຈົ້າສະເໜີໃຫ້ສະພາແຫ່ງຊາດຊຸດນີ້, ສຸມໃສ່ຕິດຕາມກວດກາບັນດາບັນຫາໃຫຍ່, ບັນດາຂົງເຂດແກ່ນສານ, ບັນດາສິ່ງທີ່ຍັງຄົງຄ້າງໃນການພັດທະນາ, ບັນດາບັນຫາທີ່ຮີບຮ້ອນ ເຊິ່ງຜູ້ມີສິດເລືອກຕັ້ງ ແລະ ປະຊາຊົນມີຄວາມສົນໃຈ; ພິເສດແມ່ນການປະຕິບັດບັນດາແຜນນະໂຍບາຍໃຫຍ່ຂອງພັກ, ການຈັດຕັ້ງປະຕິບັດກົດໝາຍ, ການນຳໃຊ້ແຫຼ່ງກຳລັງແຫ່ງຊາດ, ການຄຸ້ມຄອງຊັບສິນສາທາລະນະ, ປະຕິບັດການປະຢັດ, ຕ້ານການໃຊ້ຈ່າຍຟຸມເຟືອຍ ແລະ ມີຄວາມຮັບຜິດຊອບອະພິປາຍຂອງບັນດາອົງການລັດ.”
ຕາມທ່ານເລຂາທິການໃຫຍ່ແລ້ວ, ສະພາແຫ່ງຊາດຊຸດທີ XVI ຕ້ອງຍົກສູງຄຸນນະທາດ ແລະ ວິໄສທັດເມື່ອຕັດສິນບັນດາບັນຫາສຳຄັນຂອງປະເທດຊາດ. ການຕັດສິນຕ້ອງຖືກຕ້ອງ, ຖືກເປົ້າ, ທັນການ ເພື່ອຜົນປະໂຫຍດຍາວນານຂອງປະເທດຊາດ.
“ບັນດາບັນຫາໃນຂົງເຂດເສດຖະກິດ, ສັງຄົມ, ງົບປະມານແຫ່ງລັດ, ການລົງທຶນສາທາລະນະ, ບັນດາລາຍກາຍເປົ້າໝາຍແຫ່ງຊາດ, ບັນດາໂຄງການສຳຄັນແຫ່ງຊາດ ລ້ວນແຕ່ແມ່ນບັນດານະໂຍບາຍຊີ້ຂາດຕິດພັນກັບຜົນປະໂຫຍດພື້ນຖານຍາວນານຂອງປະເທດຊາດ, ຂອງຊາດ, ຕ້ອງໄດ້ຮັບການພິຈາລະນາຢ່າງຮອບດ້ານ, ມີວິທະຍາສາດ, ລະມັດລະວັງ ແຕ່ກໍບໍ່ໃຫ້ຄວາມຊັກຊ້າກາຍເປັນສິ່ງກີດຂວາງການພັດທະນາຢ່າງເດັດຂາດ. ສະພາແຫ່ງຊາດຕັດສິນໃຫ້ປະຈຸບັນ ແຕ່ຕ້ອງມີຄວາມຮັບຜິດຊອບຕໍ່ອະນາຄົດ. ນັ້ນແມ່ນຄຸນນະທາດການເມືອງ, ວິໄສທັດຍຸດທະສາດ, ພູມປັນຍານິຕິບັນຍັດ ແລະ ແມ່ນລ່ວງເລິກຂອງອົງການທີ່ມີສິດອຳນາດລັດສູງສຸດ.”
ທ່ານເລຂາທິການໃຫຍ່ ໂຕເລິມ ກໍສະເໜີໃຫ້ສະພາແຫ່ງຊາດຊຸດທີ XVI ສືບຕໍ່ປ່ຽນແປງໃໝ່ການຈັດຕັ້ງ ແລະ ແບບວິທີເຄື່ອນໄຫວຕາມທິດທັນສະໄໝເປັນມືອາຊີບ, ໃກ້ຊິດກັບປະຊາຊົນ, ກັບພຶດຕິກຳຕົວຈິງ ແລະ ເປັນເຈົ້າການ, ມີໄຫວພິບດັດປັບນະໂຍບາຍໃຫ້ໄວກວ່າ.
ສະພາແຫ່ງຊາດສະໄໝທີ XVI ໄດ້ເລີ່ມຕົ້ນດ້ວຍຄວາມຮັບຜິດຊອບອັນສຳຄັນ ແລະ ສູງສົ່ງທີ່ສຸດ. ທ່ານເລຂາທິການໃຫຍ່ເຊື່ອໝັ້ນວ່າ ຕໍ່ໜ້າໂອກາດໃໝ່ທີ່ມີລັກສະນະປະຫວັດສາດຂອງຊາດ, ແນ່ນອນວ່າ ສະພາແຫ່ງຊາດຊຸດທີ XVI ຈະປະຕິບັດສຳເລັດໜ້າທີ່ອັນສຳຄັນເຊິ່ງພັກ, ລັດ ແລະ ປະຊາຊົນໄດ້ມອບໝາຍໃຫ້, ປະກອບສ່ວນຫັນຄວາມຄາດຫວັງສ້າງປະເທດ ຫວຽດນາມ ສັນຕິພາບ, ເອກະລາດ, ປະຊາທິປະໄຕ, ຮັ່ງມີເຂັ້ມແຂງ, ວັດທະນາຖາວອນ, ສິວິໄລ, ຜາສຸກ, ກ້າວຂຶ້ນສັງຄົມນິຍົມຢ່າງໝັ້ນແກ່ນນັ້ນ ໃຫ້ປະກົດຜົນເປັນຈິງ./.
