 ບັນດາບຸກຄົນໄດ້ຮັບໃບຍ້ອງຍໍໃນ Gala ພົບປະ, ເຊີດຊູວິສາຫະກິດ, ນັກທຸລະກິດນະຄອນຫຼວງປີ 2017 |
ໄລຍະຜ່ານມາ, ຖັນແຖວນັກທຸລະກິດ, ວິສາຫະກິດ ຫວຽດນາມ ໄດ້ມີການປະກອບສ່ວນສຳຄັນຫຼາຍຢ່າງເຂົ້າໃນການເຕີບໂຕລວມຂອງພື້ນຖານເສດຖະກິດປະເທດຊາດດ້ວຍປະມານ 40% GDP ໃນແຕ່ລະປີ. ປະຊາຄົມວິສາຫະກິດ, ນັກທຸລະກິດບໍ່ພຽງແຕ່ມານະພະຍາຍາມ ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງເທົ່ານັ້ນ ຫາກຍາມໃດກໍ່ນຳໜ້າໃນການເປີດກ້ວາງການຜະລິດ, ດຳເນີນທຸລະກິດ, ສ້າງວຽກເຮັດງານທຳໃຫ້ແກ່ຜູ້ອອກແຮງງານ, ປະກອບສ່ວນເຂົ້າໃນການເຕີບໂຕເສດຖະກິດ - ສັງຄົມຂອງປະເທດຊາດອີກດ້ວຍ.
ສ້າງເງື່ອນໄຂດີທີ່ສຸດ ເພື່ອໃຫ້ນັກທຸລະກິດເລີ່ມທຸລະກິດ ແລະ ພັດທະນາ
ໃນ 9 ເດືອນຜ່ານມາ, ຫວຽດນາມ ມີວິສາຫະກິດເກືອບ 94.000 ແຫ່ງໄດ້ຈົດທະບຽນ ສ້າງຕັ້ງໃໝ່, ດ້ວຍຍອດຈຳນວນທຶນຈົດທະບຽນກ່ວາ 900.000 ຕື້ດົ່ງ, ເພີ່ມຂຶ້ນກ່ວາ 15% ກ່ຽວກັບຈຳນວນວິສາຫະກິດ ແລະ ເພີ່ມຂຶ້ນ 43% ກ່ຽວກັບຈຳນວນທຶນຈົດທະບຽນເມື່ອທຽບໃສ່ໄລຍະດຽວກັນຂອງປີ 2016. ດ້ວຍຫຼາຍນະໂຍບາຍ, ມະຕິຂອງລັດ ແລະ ລັດຖະບານ ພ້ອມກັບສະພາບແວດລ້ອມແຫ່ງການດຳເນີນທຸລະກິດສະດວກສະບາຍນັ້ນ, ຈຳນວນນັກທຸລະກິດເລີ່ມທຸລະກິດນັບມື້ນັບເພີ່ມຂຶ້ນ. ຢູ່ນະຄອນ ໂຮ່ຈີມິນ, ໃນ 9 ເດືອນຂອງປີ 2017, ມີນັກທຸລະກິດປະມານ 30.000 ຄົນໄດ້ເລີ່ມທຸລະກິດ. ປະຈຸບັນ, ນະຄອນ ໄດ້ສ້າງບັນດາເງື່ອນໄຂດີທີ່ສຸດເພື່ອໃຫ້ບັນດາສ່ວນບຸກຄົນສ້າງຕັ້ງວິສາຫະກິດ, ຄວາມຫຍຸ້ງຍາກທຸກຢ່າງເມື່ອດຳເນີນທຸລະກິດຍາມໃດກໍ່ໄດ້ຮັບການແກ້ໄຂຈາກອຳນາດການປົກຄອງນະຄອນ. ທ່ານ ຈູຕ໋ຽນຢູ້ງ, ປະທານສະມາຄົມວິສາຫະກິດນະຄອນ ໂຮ່ຈີມິນ, ໃຫ້ຮູ້ວ່າ:
“ອາດເວົ້າໄດ້ວ່າ, ທັງລະບົບການເມືອງມຸ່ງໄປເຖິງວິສາຫະກິດ, ນັກທຸລະກິດ ແລະ ພັດທະນາເສດຖະກິດ. ດັ່ງນັ້ນ, ໝາກຜົນການເຄື່ອນໄຫວດຳເນີນທຸລະກິດຂອງບັນດາວິສາຫະກິດມີບັນດາຄວາມຄືບໜ້າທີ່ດີກ່ວາ. ໂດຍລະອຽດແມ່ນສາມາດປະກອບເຂົ້າງົບປະມານໄດ້ຫຼາຍກ່ວາ, ຈຳນວນວິສາຫະກິດສ້າງຕັ້ງໃໝ່ຂອງ ນະຄອນໂຮ່ຈີມິນ ໃນປີນີ້ຫຼາຍກ່ວາປີກ່ອນ. ບັນດາວິສາຫະກິດເຂົ້າຮ່ວມບັນດາໂຄງການສະຫວັດດີການສັງຄົມກໍ່ຕັ້ງໜ້າກ່ວາເມື່ອກ່ອນ.”
ນັກທຸລະກິດ, ວິສາຫະກິດສ້າງເຄື່ອງໝາຍການຄ້າ ຫວຽດນາມ ອອກສູ່ໂລກ
ປະຈຸບັນ, ມີຫຼາຍວິສາຫະກິດ, ນັກທຸລະກິດ ຫວຽດນາມ ໄດ້ສ້າງເຄື່ອງໝາຍການຄ້າທີ່ໂດ່ງດັງຢູ່ພາກພື້ນ ແລະ ຢູ່ໃນໂລກ. ເລື່ອງສ້າງບັນດາເຄື່ອງໝາຍການຄ້າທີ່ມີຊື່ສຽງໂດ່ງດັງໃນຕະຫຼາດໂລກຂອງບັນດາວິສາຫະກິດນັ້ນ ແມ່ນສັນຍານເປັນໜ້າຊື່ນຊົມ, ສະແດງໃຫ້ເຫັນແຜນນະໂຍບາຍປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ, ສົ່ງເສີມການເລີ່ມທຸລະກິດ, ປ່ຽນໃໝ່ຢ່າງມີຫົວຄິດປະດິດສ້າງ, ພັດທະນາວິສາຫະກິດຂອງລັດຖະບານ ໄດ້ກ້າວເຂົ້າສູ່ຊີວິດການເປັນຢູ່ເທື່ອລະກ້າວ, ສ້າງຄວາມໄວ້ເນື້ອເຊື່ອໃຈໃນການດຳເນີນທຸລະກິດ. Vinacafe ບຽນຮ່ວາ ກໍ່ແມ່ນຕົວຢ່າງໜຶ່ງເມື່ອກຳມະສິດເຄື່ອງໝາຍ Vinacafe ໂດ່ງດັງ ທີ່ກວມອັດຕາສ່ວນຈຳໜ່າຍຢູ່ ຫວຽດນາມ ແລະ ໄດ້ສົ່ງອອກເຖິງກ່ວາ 30 ປະເທດໃນໂລກ. ທ່ານ ຫງວຽນເຕີນກີ໋, ຜູ້ອຳນວຍການບໍລິສັດຫຸ້ນສ່ວນ Vinacafe ບຽນຮ່ວາ ໄດ້ແບ່ງປັນວ່າ:
“ພວກຂ້າພະເຈົ້າມີຄວາມເຊື່ອໝັ້ນວ່າ, ເຄື່ອງໝາຍການຄ້າແຂງແຮງຕ້ອງແມ່ນຄຸນຄ່າຫຼັກແຫຼ່ງຂອງວິສາຫະກິດ. ໃນວິວັດການສ້າງຕັ້ງ, ພວກຂ້າພະເຈົ້າໄດ້ຮັບຮູ້ຢ່າງຈະແຈ້ງ ແລະ ສຸມໃສ່ການສ້າງເຄື່ອງໝາຍການຄ້າໃຫ້ມືຊື່ສຽງໂດ່ງດັງ ແລະ ຮັບຄວາມນິຍົມຈາກຜູ້ໃຊ້ສອຍ. ມາຮອດປະຈຸບັນ, ຜະລິດຕະພັນຂອງພວກຂ້າພະເຈົ້າໄດ້ຮັບການຮູ້ຈັກເຖິງຈາກຜູ້ໃຊ້ສອຍກ່ວາ 80%. ໄລຍະຈະມາເຖິງ, ພວກຂ້າພະເຈົ້າຈະສຸມໃສ່ເຂົ້າການສ້າງເຄື່ອງໝາຍການຄ້າເພື່ອເຮັດແນວໃດ ໃຫ້ສິນຄ້າຂອງຕົນມີຄຸນຄ່າສົມກັບມູນຄ່າຂອງຜະລິດຕະພັນທີ່ມີລະດັບສາກົນ.”
 ຂັ້ນຕອນການຜະລິດຂອງວິສາຫະກິດ |
ມີຄວາມສະດຸງໄວ, ຂະຫຍັນຂັນເຄື່ອນ, ມີຫົວຄິດປະດິດສ້າງແມ່ນບັນດາມາດຕະຖານທີ່ຫຼາຍວິສາຫະກິດ, ນັກທຸລະກິດພວມເອົາໃຈໃສ່ ແລະ ມຸ່ງໄປເຖິງ ເພື່ອບໍ່ພຽງແຕ່ກວມເອົາຕະຫຼາດພາຍໃນປະເທດເທົ່ານັ້ນ ຫາກຍັງບື່ນຕົວໄປໄກອີກ, ຮັບໃຊ້ບັນດາຕະຫຼາດຕ້ອງການຄຸນນະພາບສູງຄື ເອີລົບ ຫຼື ຕາເວັນອອກກາງອີກດ້ວຍ. ເມື່ອແບ່ງປັນກ່ຽວກັບຍຸດທະສາດນີ້, ນັກທຸລະກິດ ຫງວຽນລຽນເຟືອງ, ຜູ້ອຳນວຍການກຸ່ມບໍລິສັດ LP, ໃຫ້ຮູ້ວ່າ:
“ບໍ່ວ່າຜະລິດຕະພັນໃດກໍ່ມີເປົ້າໝາຍລູກຄ້າ, ພວກຂ້າພະເຈົ້າໄດ້ມຸ່ງໄປເຖິງຕະຫຼາດ ຜູ້ໃຊ້ສອຍ ຫວຽດນາມ 100.000 ຄົນ ແລະ ຜູ້ໃຊ້ສອຍຈີນ 1 ລ້ານຄົນ, ໄປຄຽງຄູ່ກັນນັ້ນ, ແມ່ນຕະຫຼາດບັນດາປະເທດ ອາຊີຕາເວັນອອກສ່ຽງເໜືອ ອື່ນໆ, ຕະຫຼາດ ຕາເວັນອອກກາງ ແມ່ນໄດ້ເຂົ້າແລ້ວ, ຂ້າພະເຈົ້າປາດຖະໜາຢາກປະດິດສ້າງບັນດາຜະລິດຕະພັນນ້ຳຫອມດ້ວຍໄມ້ເກດສະໜາໃນປີໜ້າ.”
ສ້າງທຸກເງື່ອນໄຂສະດວກໃຫ້ ນັກທຸລະກິດ, ວິສາຫະກິດຫວຽດນາມ ພັດທະນາ
ໄລຍະຜ່ານມາ, ສະພາບການເສດຖະກິດພະຫາພາກຂອງ ຫວຽດນາມ ນັບມື້ນັບເປັນປົກກະຕິ, GDP ປີ 2017 ຄາດວ່າບັນລຸ 6,7%, ສິ່ງດັ່ງກ່າວມີການປະກອບສ່ວນສຳຄັນຂອງປະຊາຄົມວິສາຫະກິດ. ການພັດທະນາຂອງວິສາຫະກິດມີສ່ວນໜຶ່ງສຳຄັນ ແມ່ນການຊີ້ນຳ, ສ້າງທຸກເງື່ອນໄຂສະດວກຂອງລັດຖະບານ ດ້ວຍມະຕິຕ່າງໆໄດ້ສ້າງເງື່ອນໄຂໃຫ້ຫຼາຍຄົນເລີ່ມທຸລະກິດດຳເນີນທຸລະກິດ, ເພື່ອໃຫ້ບັນດາວິສາຫະກິດພັດທະນາ. ກ່າວຄຳເຫັນທີ່ກອງປະຊຸມນາຍົກລັດຖະມົນຕີຮ່ວມເດີນທາງພ້ອມກັບວິສາຫະກິດຫວ່າງແລ້ວນີ້, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກວ່າ:
“ລັດຖະບານສືບຕໍ່ກວດກາບັນດາຂໍ້ກຳນົດ ແລະ ປະຕິບັດບັນດາມາດຕະການຢ່າງຂ້ຽວຂາດເພື່ອແນໃສ່ຫລຸດຜ່ອນລາຍຈ່າຍໃຫ້ແກ່ວິສາຫະກິດ ຄືລາຍຈ່າຍດ້ານລະບຽບການບໍລິຫານກ່ຽວກັບພາສີ, ອາກອນ, ໃບອະນຸຍາດ, ຄ່າທະນຽມ BOT… ນີ້ແມ່ນບ້ວງເງິນທີ່ວິສາຫະກິດຕ້ອງແບກຫາບເຊິ່ງພວກເຮົາຕ້ອງຄົ້ນຄ້ວາ ເພື່ອຫລຸດຜ່ອນໃຫ້ແກ່ວິສາຫະກິດ. ປີ 2017, ຈະແມ່ນ “ປີຫລຸດຜ່ອນລາຍຈ່າຍໃນແກ່ວິສາຫະກິດ””
ປະຊາຄົມວິສາຫະກິດ ຫວຽດນາມ ພວມມຸ່ງໄປເຖິງຄາດໝາຍສູ້ຊົນຮອດປີ 2020, ທົ່ວປະເທດຈະມີວິສາຫະກິດກ່ວາ 1 ລ້ານແຫ່ງເຄື່ອນໄຫວຢ່າງມີປະສິດທິຜົນ, ມີຫຼາຍຜະລິດຕະພັນມີເຄື່ອງໝາຍການຄ້າລະດັບໃນພາກພື້ນ ແລະ ໃນອາຊີ. ເຖິງວ່າ ຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງທີ່ຕ້ອງໄດ້ຜ່ານຜ່າ, ແຕ່ບັນດາການຮ່ວມເດີນທາງຂອງລັດຖະບານ, ຖັນແຖວນັກທຸລະກິດ ຫວຽດນາມ ຍັງມີຄວາມເຊື່ອໝັ້ນກ້າວເດີນພ້ອມກັບການພັດທະນາຂອງປະເທດຊາດ.
