ຂະແຫນງວິຈິດສິນຫວຽດນາມ ຮ່ວມເດີນທາງກັບ 30 ປີແຫ່ງການປ່ຽນແປງໃຫມ່ ຂອງປະເທດຊາດ

(vovworld)- ນັບແຕ່ປີ 1986, ພາຍຫລັງທີ່ໄດ້ປະຕິບັດກິດຈະການປ່ຽນແປງໃຫມ່ປະເທດຊາດ ໂດຍພັກກອມມູນິດຫວຽດນາມ ລິເລີ່ມ

(vovworld)- ນັບແຕ່ປີ 1986, ພາຍຫລັງທີ່ໄດ້ປະຕິບັດກິດຈະການປ່ຽນແປງໃຫມ່ປະເທດຊາດ ໂດຍພັກກອມມູນິດຫວຽດນາມ ລິເລີ່ມ ແລະ ຊີ້ນຳນຳພາ, ພື້ນຖານວິຈິດສິນຫວຽດນາມໄດ້ພັດທະນາດີສົມຄວນ ແລະ ບັນລຸໄດ້ບັນດາຜົນງານຫລາຍເປັນຫນ້າຊື່ນຊົມ. ບັນດາການປະກອບສ່ວນກ່ຽວກັບດ້ານສິລະປະ, ດ້ານແນວຄິດຂອງບັນດານັກຈິດຕະກອນເຂົ້າໃນສິລະປະວັນນະຄະດີລວມຂອງປະເທດຊາດໃນ ໄລຍະ 30 ປີຜ່ານມາ ແມ່ນບັນດາຄຸນຄ່າໄດ້ຮັບການຢັ້ງຢືນ. 30 ປີແມ່ນໄລຍະທາງບໍ່ສັ້ນແລະກໍ່ບໍ່ຍາວ, ແຕ່ພື້ນຖານວິຈິດສິນ ຫວຽດນາມ ທັນສະໄຫມໄດ້ມີບາດກ້າວຂະຫຍາຍຕົວ, ບັນລຸໄດ້ຜົນງານຫລາຍຢ່າງກ່ຽວກັບດ້ານແນວຄິດ, ສິລະປະ ວັນນະຄະດີ. ບົດຂຽນຂອງນັກຂ່າວ ລານແອງ.

ຮູບພາບໃນໄລຍະສົງຄາມ
ພາບ:cinet.vn

ພາຍຫລັງ 30 ປີແຫ່ງການປ່ຽນແປງໃຫມ່ຂອງປະເທດຊາດ, ພື້ນຖານວິຈິດສິນຫວຽດນາມ ໄດ້ມີບາດກ້າວພັດທະນາຢ່າງບຸກທະລຸກ່ຽວກັບດ້ານຈີນຕະນາການ, ສິລະປະ ແລະ ການເຕີບໃຫຍ່ກ່ຽວກັບຖັນແຖວນັກຈິດຕະກອນປະດິດຄິດແຕ່ງ ແລະ ນັກຄົ້ນຄ້ວາດ້ານວິຈິດສິນ. ສາດສະດາຈານ, ນັກຈິດຕະກອນ ເຈີນແຄງເຈືອງ, ປະທານສະມາຄົມວິຈິດສິນຫວຽດນາມ ໃຫ້ຮູ້ວ່າ: 30 ປີຜ່ານມາ, ຂະແຫນງວິຈິດສິນຫວຽດນາມ ໄດ້ມີລະດັບພັດທະນາຢ່າງວ່ອງໄວ ນັບທັງລະບົບບຳລຸງສ້າງ ແລະ ຖັນແຖວນັກຈິດຕະກອນທີ່ເຂົ້າຮ່ວມການປະດິດຄິດແຕ່ງ. ພິເສດ, ໃນໄລຍະແຫ່ງການປ່ຽນແປງໃຫມ່, ນອກຈາກຖັນແຖວນັກຈິດຕະກອນເກົ່າແລ້ວ, ໄດ້ມີນັກຈິດຕະກອນໃຫມ່ຕື່ມອີກຫລາຍຄົນທີ່ໄດ້ຮັບການບຳລຸງສ້າງເປັນລະບົບ. ປີ 2013, ມີປະມານ 10.000 ຄົນເຂົ້າຮຽນຂະແຫນງວິຈິດສິນ. ປະຈຸບັນ, ຫວຽດນາມ ຮາກຖານບຳລຸງສ້າງດ້ານວິຈິດສິນ ກວ່າ 80 ແຫ່ງ, ໃນນັ້ນ ມີບັນດາໂຮງຮຽນໃຫຍ່ທີ່ມີຊື່ສຽງຄື: ມະຫາວິທະຍາໄລວິຈິດສິນ ຮ່າໂນ້ຍ, ມະຫາວິທະຍາໄລວິຈິດສິນ ນະຄອນໂຮ່ຈິມີນ, ມະຫາວິທະຍາໄລອຸດສາຫະກຳ, ມະຫາວິທະຍາໄລ ເຫ້ວ… ສາດສະດາຈານ, ນັກຈິດຕະກອນ ເຈີນແຄງເຈືອງ ໃຫ້ຮູ້ວ່າ:

“ເມື່ອທົບທວນຄືນບັນດາປະເພດສິລະປະຄືແນວນັ້ນ, ກ່ອນທີ່ດຳເນີນການປ່ຽນແປງໃຫມ່, ເປັນທີ່ຈະແຈ້ງແລ້ວວ່າ ປະຈຸບັນ ຂະແຫນງວິຈິດສິນມີບາດກ້າວພັດທະນາຢ່າງກະໂດດຂັ້ນ. ເປັນອັນວ່າ ສິລະປະສ້າງພາບໃນໄລຍະປ່ຽນແປງໃຫມ່ມີສອງຢ່າງທີ່ພວກເຮົາເຫັນໄດ້ຢ່າງຈະແຈ້ງ. ທີຫນຶ່ງ ແມ່ນການພັດທະນາຫລາຍຮູບຫລາຍແບບຂອງສິລະປະສ້າງພາບ, ທີສອງ ແມ່ນການພັດທະນາກະໂດດຂັ້ນຂອງວິຈິດສິນໝູນໃຊ້, ສິລະປະທີ່ໄດ້ນຳໃຊ້ເຂົ້າໃນຊີວິດ ແລະ ປະກອບສ່ວນເຂົ້າໃນພື້ນຖານເສດຖະກິດ.”

ບໍ່ພຽງແຕ່ພັດທະນາກ່ຽວກັບລະບົບບຳລຸງສ້າງ ຈຳນວນສະມາຊິກສະມາຄົມວິຈິດສິນເທົ່ານັ້ນ ຫາກການຈັດຕັ້ງງານວາງສະແດງຂອງບັນດານັກຈິດຕະກອນກໍເພີ່ມຂຶ້ນຢ່າງກະໂດດຂັ້ນອີກດ້ວຍ. ຖ້າຫາກພາຍຫລັງ ພາກໃຕ້ຫວຽດນາມໄດ້ຮັບການປົດປ່ອຍຢ່າງສົມບູນ, ແຕ່ລະປີ ສະມາຄົມວິຈິດສິນຫວຽດນາມ ໄດ້ຈັດຕັ້ງງານວາງສະແດງພຽງແຕ່ 20 – 30 ຄັ້ງ ແລະ ສ່ວນຫລາຍແມ່ນດຳເນີນຢູ່ ຮ່າໂນ້ຍ ແລະ ນະຄອນໂຮ່ຈິມີນ, ສະເພາະປີ 1990, ມີງານວາງສະແດງ 200 ຄັ້ງໄດ້ດຳເນີນຢູ່ພາຍໃນປະເທດ. ພາຍຫລັງປີ 1990 ໄດ້ຈັດຕັ້ງງານວາງສະແດງກວ່າ 300 ຄັ້ງ. ແຕ່ລະປີ ມີ ປະມານ 2500 ຜະລິດຕະພັນວິຈິດສິນໄດ້ສົ່ງເຖິງບັນດາງານວາງສະແດງ ແລະ ທັງໝົດ ລ້ວນແຕ່ໄດ້ຮັບການປະດິດຄິດແຕ່ງໃຫມ່. ສິ່ງດັ່ງກ່າວໄດ້ສະແດງໃຫ້ເຫັນວ່າ ກຳລັງປະດິດຄິດແຕ່ງນັບມື້ນັບຫລາຍຂຶ້ນ. ບັນດາງານວາງສະແດງນີ້ມີຄຸນປະໂຫຍດໄດ້ຊ່ວຍໃຫ້ນັກຈິດຕະກອນພັດທະນາຄວາມເກັ່ງກ້າສາມາດ, ນຳເອົາບັນດາຜະລິດຕະພັນໃຫມ່, ພະລັງຊີວິດໃຫມ່ຂອງສິລະປະມາສູ່ສາທາລະນະຊົນ.

ແຕ່ລະປີ ມີ ປະມານ 2500 ຜະລິດຕະພັນວິຈິດສິນໄດ້ສົ່ງເຖິງບັນດາງານວາງສະແດງ

ພາບ: internet

ໂດຍສືບທອດ ແລະ ພັດທະນາຫົວເລື່ອງເກົ່າ, ຊອກຫາຫົວເລື່ອງໃຫມ່ ແມ່ນຈຸດທີ່ພົ້ນເດັ່ນຂອງພື້ນຖານວິຈິດສິນຫວຽດນາມໃນໄລຍະປ່ຽນແປງໃຫມ່. ເມື່ອປະເທດຊາດມີການປ່ຽນແປງໃຫມ່, ດ້ານເສດຖະກິດ, ການເມືອງ, ສັງຄົມກໍລ້ວນແຕ່ມີການປ່ຽນແປງໄປນຳ. ໄລຍະໃຫມ່ ສະນັ້ນ ດ້ານແນວຄິດ, ວິທີການສະແດງກໍຄວນມີການເຊື່ອມໂຍງ. ນັກຈິດຕະກອນ ເລຈ້ອງເລີນ, ປະທານສະພາສະມາຄົມວິຈິດສິນຈິດຕະກຳ ຫວຽດນາມ ໃຫ້ຮູ້ວ່າ: ກອ່ນນີ້ ຫົວເລື່ອງກ່ຽວກັບສົງຄາມແມ່ນຄວາມດຶງດູດການປະດິດຄິດແຕ່ງຂອງນັກຈິດຕະກອນ ແລະ ນີ້ແມ່ນຫົວເລື່ອງຮຽກຮ້ອງວົງການນັກຈິດຕະກອນຕ້ອງມີດ້ານສິລະປະສູງສຸດ.ໃນຈຳນວນຜະລິດຕະພັນວິຈິດສິນນັ້ນ ມີ 60-70% ແມ່ນຫົວເລື່ອງກ່ຽວກັບການຕໍ່ສູ້ປົກປັກຮັກສາປະເທດຊາດ. ແຕ່ປະຈຸບັນ, ບັນດານັກຈິດຕະກອນຫນຸ່ມໄດ້ເປີດກວ້າງຕື່ມອີກ, ມີບັນດາຮູບການ ແລະ ວິທີການສະແດງໃຫ້ເຫັນຫົວເລື່ອງທີ່ອຸດົມສົມບູນ ແລະ ເໝາະສົມກັບຊີວິດທັນສະໄຫມ. ນັກຈິດຕະກອນ ເລຈ້ອງເລີນ ໃຫ້ຮູ້ວ່າ:

“ຕົວຢ່າງ ເມື່ອເວົ້າເຖິງບັນດາຈີນຕະນາການ ກ່ອນນີ້ສັງເກດດ້ວຍຮູບພາບຊື່ງນັກຈິດຕະກອນອະວຸໂສກ່ອນນີ້ໄດ້ນຳໃຊ້ຮູບພາບລະອຽດເພື່ອເວົ້າເຖິງການຕໍ່ສູ້ຢ່າງສະຫງ່າອົງອາດນັ້ນ. ແຕ່ມາເຖິງປະຈຸບັນ ນັກຈິດຕະກອນໄດ້ນຳໃຊ້ແນວຄິດ, ຫາກບໍ່ນຳໃຊ້ຮູບພາບໂດຍກົງເພື່ອສ້າງການພົວພັນກ່ຽວກັບດ້ານອາລົມຈິດກໍຄືການແຕ້ມພາບ, ມີຮູບການ ແລະ ວິທີສະແດງແຕກຕ່າງກັນ.”

ໃນໄລຍະ 30 ປີແຫ່ງການປ່ຽນແປງໃຫມ່ ກໍເປັນຂີດໝາຍຂະແຫນງວິຈິດສິນທັນສະໄຫມຂອງຫວຽດນາມ ໄດ້ມີການປ່ຽນແປງຢ່າງກະໂດດຂັ້ນກ່ຽວກັບຄຸນນະພາບ, ມຸ່ງໄປເຖິງການໝູນໃຊ້ວິຈິດສິນ ແລະ ຮັບເອົາບັນດາການໝູນໃຊ້ດ້ານວິຈິດສິນທັນສະໄຫມຂອງໂລກ. ນັກຈິດຕະກອນ ເລຮູຍຕຽບ, ປະທານ ສະພາສິລະປະແຕ້ມພາບ, ສະມາຄົມວິຈິດສິນ ຫວຽດນາມ ໄດ້ຍົກຕົວຢ່າງວ່າ: ຖ້າຫາກການພັດທະນາຂອງສິລະປະການແຕ້ມຮູບໃສ່ຜະລິດຕະພັນຫຸ້ມຫໍ່ປະກົດອອກແຕ່ຊຸມປີ 1985, ສິລະປະແຕ້ມພາບປະກົດອອກຫລາຍສຸດນັບແຕ່ປີ 1990 ມາຮອດປະຈຸບັນ. ກ່ຽວກັບການພັດທະນາຂອງ logo, ການແຕ້ມພາບໃນການອອກແບບ ກໍ່ອາດ ເວົ້າໄດ້ວ່າ ໃນໄລຍະ 15-20 ປີມານີ້ ກໍ ໄດ້ຮັບການພັດທະນາຢ່າງເຫັນໄດ້ຊັດ. ນັກຈິດຕະກອນ ເລຮູຍຕຽບ ໃຫ້ຮູ້ວ່າ:

“ໃນໄລຍະ 30 ປີຜ່ານມາ, ອາດຈະເວົ້າໄດ້ວ່າ ສິລະປະແຕ້ມຮູບ ຫວຽດນາມມີບັນດາບາດກ້າວພັດທະນາດີສົມຄວນ. ນັ້ນແມ່ນການພັດທະນາກ່ຽວກັບຮູບການ, ເນື້ອໃນ ແລະ ຄຸນນະພາບ. ພ້ອມກັບການພັດທະນາຂອງສັງຄົມ, ຂອງເຕັກໂນໂລຊີ, ຕະຫລາດ, ໃນສິລະປະແຕ້ມຮູບໄດ້ມີບາດກ້າວພັດທະນາຢ່າງເຫັນໄດ້ຊັດໃນສິລະປະແຕ້ມຮູບໂຄສະນາ, ການອອກແບບ, ແຕ້ມກາໝາຍ, logo ແລະອື່ນໆລ້ວນແຕ່ມີການພັດທະນາດີສົມຄວນ.”

ອາດເວົ້າໄດວ່າ ກິດຈະການປ່ຽນແປງໃຫມ່ ໄດ້ເຮັດໃຫ້ຂະແຫນງວິຈິດສິນຫວຽດນາມ ພັດທະນານັບທັງປະລິມານກໍຄືຄຸນນະພາບ. ຍ້ອນເຫດນັ້ນ ໃນໄລຍະ 30 ປີແຫ່ງການປ່ຽນແປງໃຫມ່, ຂະແຫນງ ວິຈິດສິນຫວຽດນາມ ມີຄວາມເຊື່ອໝັ້ນ ເພື່ອ ເຊື່ອມໂຍງກັບວິຈິດສິນທັນສະໄຫມຂອງໂລກ, ປະກອບສ່ວນເຂົ້າໃນກິດຈະການກໍ່ສາ້ງ ແລະ ພັດທະນາມະນຸດຫວຽດນາມ ຢ່າງທັນສະໄຫມຮອບດ້ານ.