(vovworld) - ວັນທີ 25/10, ຢູ່ຮ່າໂນ້ຍ, ໄດ້ດຳເນີນເວທີປາໄສກອງປະຊຸມລັດຖະມົນຕີ ASEM ກ່ຽວກັບແຮງງານ - ວຽກເຮັດງານທຳຄັ້ງທີ 4 ດ້ວຍຫົວຂໍ້ວ່າ “ວຽກເຮັດງານທຳ ແລະ ຮັບປະກັນຊີວິດສັງຄົມ, ຂໍ້ກຸນແຈເພື່ອພັດທະນາແບບຍື່ນຍົງ ແລະ ຮອບດ້ານ” . ກ່າວຄຳເຫັນທີ່ພິທີໄຂ, ທ່ານນາຍົກລັດຖະມົນຕີຫວຽດນາມ Nguyen Tan Dung ຖືວ່າ ກອງປະຊຸມແມ່ນໂອກາດເພື່ອແລກປ່ຽນບັນດາບົດຮຽນທີ່ດີ, ຊຸກຍູ້ການຮ່ວມມື ແລະ ຢືນຢັນບົດບາດໂອ້ລົມສົນທະນາ, ຮ່ວມມືອາຊີ - ເອີລົບ ໃນຂົງເຂດແຮງງານ - ວຽກເຮັດງານທຳ ແລະ ຮັບປະກັນຊີວິດສັງຄົມ, ຊຸກຍູ້ການຟື້ນຟູເສດຖະກິດ ແລະ ພັດທະນາແບບຍື່ນຍົງ. ທ່ານນາຍົກລັດຖະມົນຕີ Nguyen Tan Dung ເນັ້ນໜັກວ່າ.
“ພວກຂ້າພະເຈົ້າຖືວ່າ ໃນໄລຍະຈະມາເຖິງ, ພວກເຮົາຕ້ອງຍູ້ແຮງການຮ່ວມມືຢ່າງມີປະສິດທິຜົນກວ່າອີກ ແລະ ຍູ້ແຮງການແບ່ງປັນບົດຮຽນສ້າງນະໂຍບາຍ ກໍຄືບັນດາບົດຮຽນທີ່ເປັນຮູບແບບຕາມທິດ: ໜູນຊ່ວຍການກໍ່ສ້າງນະໂຍບາຍ, ປະຕິບັດສຳລັດການປັບປຸງລະບົບກົດໝາຍກ່ຽວກັບແຮງງານ ແລະ ຮັບປະກັນຊີວິດສັງຄົມ; ເພີ່ມທະວີຄວາມສາມາດຮັບມືກັບສິ່ງທ້າທາຍ, ການຫັນປ່ຽນ. ການຮັບປະກັນຊີວິດສັງຄົມ, ສ້າງວຽກເຮັດງານທຳຢ່າງໝັ້ນຄົງຕິດພັນກັບການຫັນປ່ຽນຮູບແບບການເຕີບໂຕຕາມທິດໝັ້ນຄົງ ແລະ ປະຕິບັດບັນດາເປົ້າໝາຍສະຫັດສະວັດ. ຟື້ນຟູເສດຖະກິດໄປຄຽງຄູ່ກັບການປະຕິບັດໂຄງການດຳເນີນງານວຽກເຮັດງານທຳແບບຍື່ນຍົງ. ເພີ່ມທະວີການຮ່ວມມື ASEM ໃນບັນດາຂົງເຂດລະອຽດຄື ສ້າງວຽກເຮັດງານທຳຕິດພັນກັບການບຳລຸງສ້າງວິຊາຊີບ, ຮັບປະກັນຊີວິດສັງຄົມ, ຄວາມປອດໄພ - ອະນາໄມແຮງງານ, ໃນນັ້ນເອົາໃຈໃສ່ໃຫ້ບຸລິມະສິດແກ່ແມ່ຍິງ, ຊາວໜຸ່ມ ແລະ ຄົນພິການ”.
ທ່ານນາຍົດລັດຖະມົນຕີ Nguyen Tan Dung ໄດ້ຢືນຢັນວ່າ ຫວຽດນາມ ຈະເຮັດຈົນສຸດຄວາມສາມາດຂອງຕົນ ເພື່ອພັດທະນາການພົວພັນມິດຕະພາບ, ການຮ່ວມມືກັບບັນດາປະເທດໃນ ASEM, ຮັບໃຊ້ໃຫ້ແກ່ພາລະກິດພັດທະນາຂອງຫວຽດນາມ ຢ່າງຕັ້ງໜ້າ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຂອງພາກພື້ນ ແລະ ຢູ່ໃນໂລກ.