ວັນທີ 27 ເມສາ, ທ່ານເອກອັກຄະລັດຖະທູດຫວຽດນາມ ປະຈຳອາເມລິກາ ຮ່າກິມງອັກ ພ້ອມກັບເອກອັກຄະລັດຖະທູດ ແລະ ອຸປະທຸດບັນດາປະເທດອາຊຽນ ໄດ້ເຂົ້າຮ່ວມກອງປະຊຸມທາງອອນລາຍຄັ້ງທຳອິດຂອງຄະນະກຳມະການອາຊຽນ ຢູ່ນະຄອນຫຼວງວໍຊິງຕັນ (ACW) ໂດຍທ່ານເອກອັກຄະລັດຖະທູດກຳປູເຈຍ Chum Sounry, ປະທານ ACW, ເປັນເຈົ້າພາບຈັດຕັ້ງ.

ເອກອັກຄະລັດຖະທູດ ແລະ ອຸປະທຸດບັນດາປະເທດອາຊຽນ ປະຈຳນະຄອນຫຼວງວໍຊິງຕັນ ໄດ້ແລກປ່ຽນກ່ຽວກັບໝາກຜົນບັນດາກອງປະຊຸມສຸດຍອດພິເສດທາງອອນລາຍ ອາຊຽນ ແລະ ອາຊຽນ+3 ເມື່ອວັນທີ 14 ເມສາ, ກອງປະຊຸມທາງອອນລາຍລັດຖະມົນຕີການຕ່າງປະເທດອາຊຽນ - ອາເມລິກາ ເມື່ອວັນທີ 23 ເມສາ. ກ່ຽວກັບຜົນກະທົບທາງດ້ານເສດຖະກິດຂອງໂລກລະບາດໂຄວິດ- 19 ຕໍ່ ພາກພື້ນ, ບັນດາຜູ້ແທນໄດ້ເນັ້ນໜັກວ່າ ອາຊຽນ ຄວນສືບຕໍ່ຊຸກຍູ້ບັນດາຄວາມມານະພະຍາຍາມໃນການຮ່ວມມືປ້ອງກັນ, ຕ້ານໂລກລະບາດ, ຄົ້ນຄວ້າຜະລິດວັກຊິນ ແລະ ຢາປິ່ນປົວພະຍາດໂຄວິດ- 19 ແລະ ການຟື້ນຟູເສດຖະກິດພາຍຫຼັງໂລກລະບາດ. ບັນດາຜູ້ແທນກໍ່ຕີລາຄາສູງບັນດາຂໍ້ລິເລີ່ມຂອງຫວຽດນາມ ໃນການຊຸກຍູ້ການຮ່ວມມືພາຍໃນກຸ່ມອາຊຽນ ກໍຄືລະຫວ່າງອາຊຽນ ກັບບັນດາຄູ່ຮ່ວມມືພາຍນອກ, ໃນນັ້ນມີອາເມລິກາ, ໃນການຮັບມືກັບໂລກລະບາດໂຄວິດ- 19.

ທີ່ກອງປະຊຸມ, ທ່ານເອກອັກຄະລັດຖະທູດ ຮ່າກິມງອັກ, ກໍ່ໄດ້ແບ່ງປັນບັນດາຊຸດ Kit ວິໄຈເຊື້ອໄວຣັດໂຄວິດ- 19 ໂດຍຫວຽດນາມ ຜະລິດ, ເຊິ່ງອົງການອະນາໄມໂລກ (WHO) ແລະ ບັນດາປະເທດເອີລົບ ໄດ້ອອກໃບຢັ້ງຢືນບັນລຸມາດຕະຖານ.