(vovworld) - ອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ຮັບ ຈົດໝາຍ, ອີແມວ, ໂທລະສັບ 7 ສະບັບຂອງທ່ານຜູ້ຟັງ ລາວ ຝາກມາລາຍການ. ໃນຈົດໝາຍ, ທ່ານຜູ້ຟັງໄດ້ສະແດງຄວາມເອົາໃຈໃສ່ເຖິງພາກພາສາລາວ ດ້ວຍບັນດາຂໍ້ໃຫ້ສັງເກດຕໍ່ບົດຂຽນ, ຂ່າວຄາວຕ່າງໆທີ່ອອກອາກາດໃນອາທິດ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍ້ຄັດສະເໜີເນື້ອໃນຈົດໝາຍ, ຕອບຄຳຖາມຂອງທ່ານຜູ້ຟັງຝາກມາໃນອາທິດຜ່ານມາ.
ເພື່ອນ ພຽນ ພົມມະວົງ, ແຂວງ ສະຫວັນນະເຂດ ໄດ້ຝາກຈົດໝາຍມາຍັງລາຍການດ້ວຍເນື້ອໃນວ່າ: “ອາທິດຜ່ານມາ, ຂ້າພະເຈົ້າໄດ້ຮັບຟັງບົດຂຽນໃນລາຍການ “ຄົ້ນຫາ ຫວຽດນາມ” ເວົ້າເຖິງຕະຫຼາດພາບແກ້ວມະນີ ຢູ່ລຸກອຽນ. ຂ້າພະເຈົ້າແມ່ນຜູ້ນິຍົມຈິດຕະກຳເວົ້າສະເພາະ ແລະ ສີລະປະເວົ້າລວມ, ດັ່ງນັ້ນບົດຂຽນດັ່ງກ່າວມີປະໂຫຍດຫຼາຍ. ຜ່ານບົດຂຽນ, ຂ້າພະເຈົ້າກໍຮູ້ໄດ້ວ່າຢູ່ ຫວຽດນາມ ມີພາບຫຼາຍປະເພດ, ຄືພາບສີຂັດມັນຕະຫຼອດຮອດພາບປັກແສ່ວ, ພາບດ້ວຍຂີ້ຊາຍ… ແລະ ປະຈຸບັນຮູ້ຕື່ມອີກວ່າຍັງມີພາບແກ້ວມະນີອີກດ້ວຍ. ບັນດານັກສີລະປິນ ຫວຽດນາມ ມີສີມືທີ່ຄ່ອງແຄ້ວທີ່ສຸດ ຍ້ອນໄດ້ປະດິດຄິດສ້າງພາບຫຼາຍປະເພດ. ຂ້າພະເຈົ້າຫວັງວ່າຈະໄດ້ ໄປຢ້ຽມຢາມ ຫວຽດນາມ ເທື່ອໜຶ່ງເພື່ອໄດ້ເຫັນປະຈັກຕາບັນດານັກສີລະປິນປະດິດແຕ່ງພາບແກ້ວມະນີ”
ພາບປະກອບ
|
ເພື່ອນ ພຽນ ພົມມະວົງ ທີ່ເຄົາລົບ, ພວກຂ້າພະເຈົ້າມີຄວາມປິຕິຊົມຊື່ນທີ່ສຸດຍ້ອນເພື່ອນໄດ້ຕິດຕາມລາຍການເປັນປະຈຳ. ຕະຫຼາດພາບແກ້ວມະນີ ລຸກອຽນ ຫ່າງຈາກໃຈກາງແຂວງ ອຽນບ໋າຍ (ເຂດພູພຽງທາງພາກເໜືອ ຫວຽດນາມ) ປະມານ 80 ກິໂລແມັດ. ນອກຈາກໄປຢ້ຽມຢາມ, ຊື້ແກ້ວມະນີຢູ່ຕະຫຼາດລຸກອຽນ ແລ້ວ, ເພື່ອນກໍສາມາດໄປຢ້ຽມຊົມທັດສະນີຍະພາບຫຼາຍແຫ່ງຢູ່ ອຽນບ໋າຍ ອີກຄື: ນາຂັ້ນໄດ ມູ່ກັງຈ໋າຍ, ເຂື່ອນໄຟຟ້ານ້ຳຕົກ ທາກບ່າ, ຫ້ວຍຢ່າງ…ອີກດ້ວຍ. ເມື່ອໄດ້ໄປທ່ອງທ່ຽວຢູ່ແຫ່ງນີ້ແລ້ວ, ເພື່ອນຢາລື່ມຂຽນບັນດາຄວາມຮູ້ສຶກຂອງຕົນກ່ຽວກັບເຂດດິນແດນນີ້ ແລະ ຝາກມາໃຫ້ພວກຂ້າພະເຈົ້າແດ່ເດີ.
++++
ກໍໃນອາທິດ, ເພື່ອນ ຈັນມະສອນ, ແຂວງ ຄຳມ່ວນໄດ້ຝາກ ອີແມວ ມາຍັງລາຍການຖາມກ່ຽວກັບພິທີຍ້ອງຍໍຊົມເຊີຍຕຳຫຼວດຍິງ ຫວຽດນາມ ທີ່ດີເດັ່ນໃນທົ່ວປະເທດ 142 ຄົນ. ເພື່ອນຍັງໃຫ້ຮູ້ຕື່ມອີກວ່າ: ໂດຍແມ່ນຕຳຫຼວດຍິງຜູ້ໜຶ່ງ ເພື່ອນຮູ້ສຶກເຄົາລົບບັນດາແບບຢ່າງດີເດັ່ນນີ້ຫຼາຍ. ນອກຈາກການປະຕິບັດວຽກງານໃນຄອບຄົວເປັນຢ່າງດີແລ້ວ, ພວກເອື້ອຍຍັງປະຕິບັດໜ້າທີ່ໂດຍພັກ, ລັດ ມອບໝາຍໃຫ້ເປັນຢ່າງດີ. ພວກເອື້ອຍເປັນແບບຢ່າງເພື່ອໃຫ້ບັນດາແມ່ຍິງຕຳຫຼວດຄືເພື່ອນປະຕິບັດຕາມ.
ເພື່ອນ ຈັນມະສອນ ທີ່ເຄົາລົບ, ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນມູນເຊື້ອຕຳຫຼວດປະຊາຊົນ (19/8/1945-19/8/2015), 10 ປີແຫ່ງວັນທົ່ວປວງຊົນປົກປັກຮັກສາຄວາມສະຫງົບປອດໄພແຫ່ງຊາດ, ວັນທີ 7/7, ຢູ່ນະຄອນ ດ່າລາດ, ແຂວງ ເລີມດົ່ງ, ກົມໃຫຍ່ຕຳຫຼວດ (ກະຊວງຕຳຫຼວດຫວຽດນາມ) ໄດ້ຈັດຕັ້ງພິທີຍ້ອງຍໍຕຳຫຼວດຍິງທີ່ດີເດັ່ນໃນທົ່ວປະເທດ 142 ຄົນ. ພິທີຍ້ອງຍໍກໍແມ່ນໂອກາດ ເພື່ອໃຫ້ບັນດາຕຳຫຼວດຍິງທີ່ດີເດັ່ນພົບປະແລກປ່ຽນ, ແບ່ງປັນບົດຮຽນໃນວຽກງານ ແລະ ຊີວິດ. ປະຈຸບັນ, ທົ່ວປະເທດມີຕຳຫຼວດຍິງປະຊາຊົນ 20.000 ຄົນທີ່ພວມປະຕິບັດໜ້າທີ່ ແລະ ສູ້ຮົບໃນບັນດາຂົງເຂດ, ວິຊາການຕ່າງໆ. ພວກຂ້າພະເຈົ້າມີຄວາມເອກອ້າງທະນົງໃຈຫຼາຍຍ້ອນມີແມ່ຍິງທີ່ພິລະອາດຫານຄືພວກເອື້ອຍ, ຍາມໃດກໍກຽມພ້ອມເສຍສະຫຼະເພື່ອປົກປັກຮັກສາພື້ນຖານສັນຕິພາບໃຫ້ແກ່ປະເທດຊາດ.
++++
ສ່ວນເພື່ອນ ວັນວິໄລ, ແຂວງ ບໍລິຄຳໄຊ ໄດ້ໂທລະສັບມາຍັງລາຍການເພື່ອຖາມກ່ຽວກັບການເຄື່ອນໄຫວສະເຫຼີມສະຫຼອງ 68 ປີແຫ່ງວັນທະຫານເສຍອົງຄະ ແລະ ນັກຮົບເສຍສະຫຼະຊີວິດເພື່ອຊາດ.
ເພື່ອນ ວັນວິໄລ ເຄົາລົບ, ປີນີ້, ເນື່ອງໃນໂອກາດສະເຫຼີມສະຫຼອງ 68 ປີແຫ່ງວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ (27/7/1947 – 27/7/2015) ນັບແຕ່ຕົ້ນເດືອນ 7 ມີຫຼາຍແຂວງ, ນະຄອນໃນທົ່ວປະເທດ ຫວຽດນາມ ໄດ້ຈັດຕັ້ງການເຄື່ອນໄຫວຈຸດສຸມເພື່ອຕອບບູນແທນຄູນບັນດາທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ການປະຕິວັດ. ພິເສດ, ໃນອາທິດຜ່ານມາຢູ່ 2 ແຂວງ ນິງບິ່ງ ແລະ ນາມດິ້ງ, ທ່ານນາງຮອງປະທານປະເທດ ຫງວຽນທິຢວານ, ປະທານສະພາປົກປ້ອງກອງທຶນຊ່ວຍເຫຼືອເດັກຫວຽດນາມ, ໄດ້ລົງຢ້ຽມຢາມ ແລະ ມອບຂອງຂວັນ, ລະດົມກຳລັງໃຈຜ່ານຜ່າຄວາມຫຍຸ້ງຍາກຂອງເດັກທີ່ປະສົບກັບຄວາມ ຫຍຸ້ງຍາກເປັນພິເສດຂອງ 2 ແຂວງ, ສົ່ງເສີມໃຫ້ພວກນ້ອງມີມາລະຈິດປືນຕົວຂຶ້ນໃນການຮໍ່າຮຽນ. ທີ່ສູນກາຍະບຳບັດອະໄວຍະວະເມືອງອຽນໂມ, ແຂວງນິງບິ່ງ, ທ່ານນາງຮອງປະທານປະເທດ ຫງວຽນທິຢວານ ໄດ້ມອບທຶນສຶກສາ“ພ້ອມກັບນ້ອງໄປໂຮງຮຽນ” ກວ່າ 200 ທຶນ ແຕ່ລະທຶນມີມູນຄ່າ 2 ລ້ານດົງ ໃຫ້ບັນດານັກຮຽນເຊິ່ງເປັນລູກຂອງນັກຮົບເຂດຊາຍແດນ, ທະເລໝູ່ເກາະ, ລູກຂອງທະຫານເຈັບປ່ວຍ ແລະ ເສຍອົງຄະ, ນັກຮຽນທຸກຍາກແຕ່ຮຽນເກັ່ງຂອງແຂວງນິງບິ່ງ ແລະ ນາມດິ້ງ. ໃນທ້າຍອາທິດຜ່ານມາ, ສະມາຄົນພຸດທະສາສະໜາແຂວງຮ່າຢາງ ໄດ້ຈັດຕັ້ງພິທີສວດມົນພາວະນາ ແລະ ໃຕ້ທຽນອາໄລຫາສະແດງຄວາມຮູ້ບຸນຄຸນຕໍ່ບັນດານັກຮົບວິລະຊົນທີ່ໄດ້ເສຍສະຫຼະຊີວິດເພື່ອຊາດ ຢູ່ເຂດສຸສານນັກຮົບເສຍຊີວິດເພື່ອຊາດເມືອງວິ້ຊວຽນ, ແຂວງຮ່າຢາງ. ເພື່ອນ ວັນວິໄລ ແລະ ທ່ານຜູ້ຟັງທີ່ສົນໃຈເຖິງການເຄື່ອນໄຫວຕອບບຸນແທນຄຸນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດອາດສາມາດຕິດຕາມຮັບຟັງລາຍການຂ່າວປະຈຳວັນຂອງພວກເຮົາ. ຫຼືທ່ານຜູ້ຟັງ, ຜູ້ອ່ານສາມາດອ່ານຂ່າວໃນແວບໄຊ vovworld.vn ຂອງພວກເຮົາກໍໄດ້.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ຟັງໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.