(vovworld)- ໃນອາທິດຜ່ານມາ, ພາກພາສາລາວວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອິແມວ ຫລາຍສະບັບ ແລະ ໂທລະສັບຈາກຜູ້ຟັງລາວຫລາຍ ທ່ານ. ໃນຈົດໝາຍຝາກມາລາຍການ, ຜູ້ຟັງບາງທ່ານໄດ້ສະແດງຄວາມຮູ້ສຶກຂອງຕົນເມື່ອໄດ້ຮັບຟັງຄໍລຳຕ່າງໆ ກໍຄືປະກອບຄຳເຫັນ ແລະ ຢາກຊອກຮູ້ບາງບັນຫາທີ່ເຂົາເຈົ້າສົນໃຈ. ໃນລາຍການໂອ້ລົມກັບເພື່ອນລາວພາກນີ້, ພວກເຮົາຂໍຄັດສະເຫນີເນື້ອໃນຈົດໝາຍບາງສະບັບຊຶ່ງທ່ານຜູ້ຟັງໄດ້ຝາກມາລາຍການໃນອາທິດຜ່ານມາ..
ພາບປະກອບ:vietbao.vn
|
ເພື່ອນ ຄຳສານ ຢູ່ ແຂວງອຸດົມໄຊ ຝາກຈົດໝາຍມາລາຍການໂດຍເວົ້າວ່າ: ຂ້າພະເຈົ້າມີຄວາມປະທັບໃຈທີ່ສຸດຕໍ່ຮູບພາບເສື້ອຍາວຂອງແມ່ຍິງຫວຽດນາມ. ຄັ້ງທຳອິດທີ່ຂ້າພະເຈົ້າໄດ້ພົບເຫັນເສື້ອຍາວທີ່ບັນດານາງອາກາດຂອງບໍລິສັດການບິນຫວຽດນາມນຸ່ງຊຸດເສື້ອຍາວງາມທີ່ສຸດ ແລະ ໃນຄັ້ງຕໍ່ໄປ ຂ້າພະເຈົ້າໄດ້ພົບກັບບັນດາພະນັກງານຍິງຫວຽດນາມ ທີ່ບັນດາກອງປະຊຸມສາກົນ, ເຂົາເຈົ້ານຸ່ງຊຸດເສື້ອຍາວທີ່ເປັນມູນເຊື້ອຂອງແມ່ຍິງຫວຽດນາມ ດ້ວຍຫລາຍຮູບພາບ, ສີສັນກໍຫລາກຫລາຍ. ຂ້າພະເຈົ້າເຫັນວ່າ ເສື້ອຍາວ ຫວຽດນາມ ບໍ່ພຽງແຕ່ເຊີດຊູຄວາມງາມຂອງແມ່ຍິງຫວຽດນາມ ເທົ່ານັ້ນ ຫາກສະແດງໃຫ້ເຫັນຄວາມງາມແບບສຸພາບຮຽບຮ້ອຍອີກດ້ວຍ. ໃນອາທິດຜ່ານມາ, ໃນຄໍລຳ ວັດທະນະທຳຫວຽດນາມ, ລາຍການພາກພາສາລາວ ໄດ້ອອກອາກາດບົດທີ່ພາດຫົວຂໍ້ວ່າ: ເສື້ອຍາວເຊີດຊູ ຄວາມງາມຂອງແມ່ຍິງຫວຽດນາມ”, ອີກຄັ້ງຫນຶ່ງຂ້າພະເຈົ້າໄດ້ເຂົ້າໃຈຕື່ມອີກກ່ຽວກັບປະຫວັດຄວາມເປັນມາຂອງເສື້ອຍາວຫວຽດນາມ.
ເພື່ອນສົມພັນ, ນັກສຶກສາມະຫາວິທະຍາໄລແຫ່ງຊາດລາວ ຝາກຈົດໝາຍມາລາຍການໂດຍເວົ້າວ່າ: ນ້ອງຕິດຕາມຮັບຟັງ ແລະ ຊົມບັນດາລາຍການຂອງ VOV5, ພິເສດແມ່ນລາຍການສາລະຄະດີ. ເນື້ອໃນຂອງບັນດາບົດສາລະຄະດີລ້ວນແຕ່ສ່ອງແສງຫລາຍເຫດການໃຫມ່ ແລະ ມີຊີວິດຊີວາ.
ໃນຈົດໝາຍສົ່ງເຖິງລາຍການພາກພາສາລາວ, ເພື່ອນ ຄຳແພງ ຢູ່ແຂວງ ອັດຕະປື ເວົ້າວ່າ: ໄລຍະຜ່ານມາ ຂ້າພະເຈົ້າໄດ້ອ່ານຂ່າວທາງເຄືອຂ່າຍອິນເຕີແນັດ ແລະ ໄດ້ຮູ້ຈັກວ່າ ອາຫານຫວຽດນາມ ມີຫລາຍເຍື່ອງໄດ້ຮັບການເຊີດຊູຈາກໂລກຄື: ເຝີ, ເຂົ້າຈີປາເຕ,ເຂົ້າປຸ້ນເຫ້ວ… ແລະ ຢູ່ ລາວ ຂ້າພະເຈົ້າກໍໄດ້ຮັບປະທານອາຫານຫວຽດຫລາຍເຍື່ອງ ໂດຍຊາວຫວຽດນາມ ອາໄສຢູ່ລາວ ປຸງແຕ່ງເອງ. ຂ້າພະເຈົ້າເຫັນວ່າ ບັນດາເຍື່ອງອາຫານຂອງຫວຽດນາມ ແມ່ນແຊບຫລາຍ. ຂ້າພະເຈົ້າກໍແມ່ນຜູ້ມັກອາຫານການກິນທີ່ສຸດ. ສະນັ້ນ ຂ້າພະເຈົ້າ ຫວັງວ່າ ໃນໄລຍະຈະມາເຖີງ ລາຍການພາກພາສາລາວ ຈະມີບົດຂຽນຫລາຍບົດທີ່ແນະນຳບັນດາເຍື່ອງອາຫານ ຂອງຫວຽດນາມ ເພື່ອມີໂອກາດມາຢ້ຽມຢາມຫວຽດນາມ ພວກຂ້າພະເຈົ້າຈະໄດ້ຮູ້ຈັກເພື່ອໄດ້ຊີມບັນດາເຍື່ອງອາຫານທີ່ແຊບນົວແລະ ອຸດົມສົມບູນຂອງຫວຽດນາມ.
ໃນຈົດໝາຍຂອງທ່ານສົມເພັດຢູ່ແຂວງ ບໍ່ແກ້ວ ທີ່ຝາກມາລາຍການພາກພາລາວໄດ້ແບ່ງປັນວ່າ: ຂ້າພະເຈົ້າຕິດຕາມລາຍການພາກພາສາລາວເປັນປະຈຳ, ລາຍການໄດ້ນຳມາຂໍ້ມູນທີ່ມີປະໂຫຍດຫລາຍຢ່າງໃຫ້ແກ່ຜູ້ຟັງ, ຂ້າພະເຈົ້າມັກຮັບຟັງທີ່ສຸດລາຍການໂອ້ລົມກັບເພື່ອນລາວ ກໍ່ຄືລາຍການຕອບຈົດໝາຍທ່ານຜູ້ຟັງ. ຜ່ານບັນດາລາຍການນີ້ ຂ້າພະເຈົ້າໄດ້ຮູ້ຈັກເຖິງຂ່າວຄາວກ່ຽວກັບການພົວພັນຮ່ວມມືລະຫວ່າງ ຫວຽດນາມ ແລະ ລາວ, ພິເສດສຳລັບບັນຫາທີ່ຂ້າພະເຈົ້າເອງ ກໍຄືຜູ້ຟັງຫລາຍຄົນສົນໃຈນັ້ນ ຍາມໃດບັນນາທິການພາກພາສາລາວກໍມີຄຳຕອບຢ່າງຈະແຈ້ງ ແລະ ທັນການ.
ໃນອິແມວ ສົ່ງເຖິງລາຍການ, ເພື່ອນ ສິງຄຳ ຢູ່ ແຂວງ ຫົວພັນ ເວົ້າວ່າ: ຍ້ອນຄ້າງຄາກັບວຽກງານ ສະນັ້ນ ຂ້າພະເຈົ້າບໍ່ຕິດຕາມລາຍການຂ່າວຈາກວິທະຍຸໄດ້. ສະນັ້ນ ຫນ້າເວັບ vovworld.vn ໄດ້ຊ່ວຍໃຫ້ຂ້າພະເຈົ້າອັບເດັດບັນດາເຫດການຢູ່ ຫວຽດນາມ ກໍຄືຢູ່ໃນໂລກ. ຂ້າພະເຈົ້າມັກທີ່ສຸດແມ່ນບົດວິເຄາະສະຖານະການຂອງ VOV5, ເນື້ອໃນຈະແຈ້ງ, ເຂົ້າໃຈງ່າຍ ແລະ logic.
ທ່ານຜູ້ຟັງທີ່ເຄົາລົບ. ທີ່ທ່ານຫາກໍຮັບຟັງຜ່ານໄປແລ້ວນັ້ນ ແມ່ນຄຳເຫັນຂອງຜູ້ຟັງຈຳນວນຫນຶ່ງທີ່ຝາກມາລາຍການພາກພາສາລາວໃນອາທິດຜ່ານມາ. ພວກຂ້າພະເຈົ້າຂໍຂອບອົກຂອບໃຈທ່ານຜູ້ຟັງທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ ກໍຄືປະກອບຄຳເຫັນໃຫ້ລາຍການ. ຫວັງຢ່າງຍິ່ງວ່າ ທ່ານຜູ້ຟັງຄົງຈະສືບຕໍ່ຝາກຈົດໝາຍມາລາຍການນັບມື້ນັບຫລາຍກວ່າ. ສຸດທ້າຍ ຂໍອວຍພອນທ່ານຜູ້ຟັງທຸກທ່ານຈົ່ງມີສຸຂະພາບເຂັ້ມແຂງ ແລະ ສຳເລັດວຽກງານຂອງຕົນ.
ທ່ານຜູ້ຟັງສາມາດຮັບຟັງລາຍການພາກພາລາວຄືນຜ່ານຫນ້າເວັບ vovworld.vn ຫລື vov5.vn
ຢ່າລືມຂຽນຈົດໝາຍມາຫາລາຍການເດີ!
ໂດຍຈ່າຫນ້າຊອງວ່າ: ພາກພາສາລາວ ວິທະຍຸກະຈາຍສຽງຫວຽດນາມ
45 Ba Trieu Ha Noi
ໂທລະສັບ: 0084438256631.
email:laovov@yahoo.com, laovov5@gmail.com