ໃນອາທິດຜ່ານມາ, ວິທະຍຸກະຈາຍສຽງຫວຽດນາມ ພາກພາສາລາວ ໄດ້ຮັບຈົດໝາຍ, email ຫລາຍສະບັບ ແລະ ໂທລະສັບ ຈາກຜູ້ຟັງລາວ. ໃນຈົດໝາຍສົ່ງເຖິງລາຍການ, ບັນດາທ່ານຜູ້ຟັງລ້ວນແຕ່ໃຫ້ຂໍ້ສັງເກດກ່ຽວກັບເນື້ອໃນຂອງລາຍການ, ສະແດງຄວາມຮູ້ສຶກເມື່ອໄດ້ຮັບຟັງແຕ່ລະລາຍການ ກໍ່ຄືປະກອບຄຳຄິດຄຳເຫັນ, ຊອກຮູ້ກ່ຽວກັບບາງບັນຫາທີ່ກ່ຽວຂ້ອງເຖິງຂົງເຂດຈຳນວນຫນຶ່ງຢູ່ ຫວຽດນາມ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍທົບທວນຄືນບາງຄຳເຫັນຊຶ່ງທ່ານຜູ້ຟັງໄດ້ສົ່ງເຖິງລາຍການໃນອາທິດຜ່ານມາ.
ພາຍຫລັງໄດ້ຮັບຂອງຂວັນ ແລະ ໃບຢັ້ງຢືນຜູ້ຟັງທີ່ຕິດຕາມລາຍການຕ່າງໆຂອງວິທະຍຸກະຈາຍສຽງ ຫວຽດນາມ ໃນໄລຍະ 3 ປີລຽນຕິດ ໂດຍ ວິທະຍຸກະຈາຍສຽງ ຫວຽດນາມ ມອບໃຫ້, ທ່ານ ສຸບິນ ພິມມະສອນ ຢູ່ເມືອງ ປາກເຊ ແຂວງ ຈຳປາສັກ ໄດ້ສົ່ງ email ເຖິງລາຍການ ຂອບອົກຂອບໃຈບັນດາການນຳ ວິທະຍຸກະຈາຍສຽງຫວຽດນາມ, ລະບົບກະຈາຍສຽງພາສາຕ່າງປະເທດ ແລະ ບັນນາທິການໃນພາກພາສາລາວ ຍາມໃດກໍເອົາໃຈໃສ່ເຖິງຜູ້ຟັງ. ເມື່ອໃຫ້ຂໍ້ສັງເກດກ່ຽວກັບລາຍການພາກພາສາລາວ, ທ່ານສຸບິນ ເວົ້າວ່າ : ລາຍການພາກພາສາລາວ ໄດ້ນຳມາເຊິ່ງຂ່າວຄາວຫລາຍຢ່າງທີທັນການ ແລະ ມີປະໂຫຍດ, ພິເສດ ນັບແຕ່ເມື່ອມີຫນ້າເວັບ vovworld.vn ພວກຂ້າພະເຈົ້າຕິດຕາມລາຍການຢ່າງສະດວກກວ່າ ແລະ ຍັງໄດ້ຮັບຊົມຮູບພາບຕ່າງໆທີ່ສວຍງາມຂອງບັນດາແຖບຖິ່ນຢູ່ ຫວຽດນາມ.
ທ່ານບຸນເລີດຢູ່ແຂວງ ອຸດົມໄຊ ສົ່ງຈົດໝາຍເຖິງລາຍການ, ໂດຍເວົ້າວ່າ : ໃນອາທິດຜ່ານມາ, ລາຍການກະຈາຍສຽງພາກພາສາລາວ ໄດ້ອອກອາກາດບົດທ່ີພາດຫົວເລື່ອງວ່າ : “ອາຊີບຜະລິດກ້າເບ້ຍໄມ້ຢູ່ເຂດທົ່ງພຽງແມ່ນ້ຳຂອງ” ໄດ້ນຳມາເຊິ່ງຜົນປະໂຫຍດສູງໃຫ້ແກ່ປະຊາຊົນ. ບົດຂຽນມີຄວາມໝາຍຢ່າງແທ້ຈິງສຳລັບຜູ້ຜະລິດກະສິກຳຄືພວກຂ້າພະເຈົ້າ, ຈາກການເລືອກເຟັ້ນແນວພັນປູກ, ວິທີກ້າເບ້ຍຕະຫລອດຮອດຂັ້ນຕອນຈຳຫນ່າຍຢູ່ຕະຫລາດ. ພິເສດຜ່ານບົດຂຽນ, ພວກຂ້າພະເຈົ້າຈຶ່ງຮູ້ຈັກເຖິງເຂດບ້ານນາແຫ່ງຫນຶ່ງຢູ່ ຫວຽດນາມ ມີໝາກໄມ້ທີ່ແຊບນົວຫລາຍຊະນິດ ແລະ ໄດ້ນຳໄປຂາຍຢູ່ຕະຫລາດໂລກຄື : ໝາກມ່ວງ ຮ່ວາໂລກ, ໝາກຜຸກນຳຣອຍ….
ທ່ານ ມານິວົງ ຢູ່ແຂວງ ບໍລິຄຳໄຊ ສົ່ງຈົດໝາຍເຖິງລາຍການໂດຍເວົ້າວ່າ : ຂ້າພະເຈົ້າຕິດຕາມລາຍການກະຈາຍສຽງຂອງພາກພາສາລາວເປັນປະຈຳ, ລາຍການໄດ້ນຳມາເຊິ່ງຂໍ້ມູນຂ່າວສານທີ່ມີປະໂຫຍດຫລາຍຢ່າງ, ພິເສດຂ້າພະເຈົ້າມັກຮັບຟັງລາຍການຊາຍຄາອາຊຽນ ທີ່ສຸດ, ເພາະວ່າ ຜ່ານລາຍການນີ້ ຂ້າພະເຈົ້າມີຄວາມເຂົ້າໃຈກ່ຽວກັບຮີດຄອງປະເພນີ, ພື້ນຖານວັດທະນະທຳ ແລະ ການພົວພັນຮ່ວມມືລະຫວ່າງບັນດາປະເທດສະມາຊິກ ອາຊຽນ.
ຮູບພາບທ່ານ Ninomiya ເກັບຂີ້ເຫຍື້ອຢູ່ຫນອງຮ່ວານກຽມ ໄດ້ສ້າງຄວາມ
ຕື້ນຕັນໃຈໃຫ້ແກ່ທ່ານສົມດີ
ພາບ: internet
|
ໃນຈົດໝາຍສົ່ງເຖິງລາຍການໃນອາທິດຜ່ານມາ, ທ່ານ ສົມດີ ຢູ່ ແຂວງ ວຽງຈັນ ເວົ້າວ່າ : ບົດສາລະຄະດີອອກເມື່ອວັນເສົາໃນອາທິດຜ່ານມາ ໄດ້ເວົ້າເຖິງນັກທຸລະກິດຊາວຍີ່ປຸ່ນ ຜູ້ຫນຶ່ງມາເກັບຂີ້ເຫຍື້ອຢູ່ຕາມເດີນຫຍ້າຫລືຢູ່ກ້ອງຕັ່ງຫີນ ເພື່ອປົກປັກຮັກສາສິ່ງແວດລ້ອມຢູ່ອອ້ມຫນອງ ຮ່ວານກຽມ ຮ່າໂນ້ຍ, ຂ້າພະເຈົ້າຮູ້ສຶກຕື້ນຕັນໃຈ ແລະ ເຄົາລົບນັບຖືຕໍ່ວຽງງານທີ່ມີຄວາມໝາຍຂອງທ່ານ Ninomiya. ມີໄລຍະຫນຶ່ງ ຂ້າພະເຈົ້າເຄີຍໄປປະຕິບັດງານຢູ່ ຮ່າໂນ້ຍ ແລະ ກໍຍ່າງເລາະຫລິ້ນແຄມຫນອງ ຮ່ວານກຽມຫລາຍເທື່ອ, ສະນັ້ນ ຂ້າພະເຈົ້າເຫັນວ່າ ການເກັບຂີ້ເຫຍື້ອດັ່ງກ່າວແມ່ນເລ່ືອງບໍ່ງ່າຍດາຍ ດ້ວຍເນື້ອທີ່ກວ້າງຂວາງຄືແນວນັ້ນ ແລະ ຄົນໄປມາຢ່າງຄັບຄາຫນາແຫນ້ນ, ການເກັບຂີ້ເຫຍື້ອຄື ທ່ານ Ninomiya ແມ່ນສະແດງໃຫ້ເຫັນຄວາມຮັກຂອງເພີ່ນຕໍ່ນະຄອນຫລວງ ຮ່າໂນ້ຍ ແມ່ນເລິກເຊິ່ງທີ່ສຸດ. ສິ່ງທີ່ທ່ານ Ninomiya ເຮັດຄືສານສົ່ງເຖິງທຸກຄົນພ້ອມກັນປົກປັກຮັກສາສິ່ງແວດລ້ອມຢູ່ສະຖານທີ່ຕົນເອງດຳລົງຊີວິດ.
ທີ່ທ່ານໄດ້ຮັບຟັງຜ່ານໄປແລ້ວນັ້ນ ແມ່ນບາງຄຳເຫັນຂອງບັນດາທ່ານຜູ້ຟັງໄດ້ສົ່ງເຖິງລາຍການຂອງພວກເຮົາໃນອາທິດຜ່ານມາ. ພວກຂ້າພະເຈົ້າ ມີຄວາມປິຕິຊົມຊື່ນ ແລະ ຂໍສະແດງຄວາມຂອບອົກຂອບໃຈຕໍ່ທ່ານຜູ້ຟັງທີ່ໄດ້ຮັບຟັງ ແລະ ສົ່ງຈົດໝາຍເຖິງລາຍການ. ບັນດາຄຳເຫັນປະກອບຂອງພວກທ່ານ ແມ່ນແຫລ່ງລະດົມກຳລັງໃຈຕໍ່ນັກຂ່າວ, ບັນນາທິການ ແລະ ໂຄສົກໃນພາກພາສາລາວສຳເລັດວຽກງານຂອງຕົນໃຫ້ດີກວ່າເກົ່າ.
ສຸດທ້າຍ ຂໍອວຍພອນໃຫ້ພວກທ່ານຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.
ພວກທ່ານສາມາດຮັບຟັງລາຍການພາກພາສາລາວ ຄືນ ຜ່ານເວັບໄຊ : vov5, vovworld.vn
ທ່ານຢ່າລືມຂຽນຈົດໝາຍມາໃຫ້ລາຍການເດີ!
ໂດຍຈ່າຫນ້າຊອງວ່າ: ວິທະຍຸກະຈາຍສຽງຫວຽດນາມ ພາກພາສາລາວ ເຮືອນເລກທີ 45 ຖະຫນົນ Ba Trieu Ha Noi, ໂທລະສັບ 84-4-38256631. Email: Laovov@hotmai.com. ຂໍຂອບໃຈຫລ່ວງຫນ້າ.