(vovworld) – ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງລາວ ຫຼາຍທ່ານ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການ.
ເພື່ອນ ດາລາວັນ ສີຫາລາດ, ແຂວງ ຫົວພັນ ສົ່ງອີແມວມາຍັງລາຍການໂດຍໃຫ້ຮູ້ວ່າ: ຂ້າພະເຈົ້າຕິດຕາມບັນດາລາຍການພາກພາສາລາວຜ່ານວິທະຍຸກະຈາຍສຽງຫວຽດນາມ ແລະ ເວັບໄຊ ເປັນປະຈຳ ແລະ ເຫັນວ່າຫວ່າງມໍ່ໆມານີ້, ພວກເພື່ອນໄດ້ອັບເດັດບັນດາພາບກ່ຽວກັບເຫດການໃໝ່ໆ ຄືງານວາງສະແດງຂອງບັນດາປະເທດອາຊຽນ ແລະ ໂລກ. ຜ່ານນັ້ນໄດ້ຊ່ວຍຂ້າພະເຈົ້າມີຄວາມເຂົ້າໃຈຕື່ມອີກກ່ຽວກັບບັນດາການເຄື່ອນໄຫວທີ່ໄດ້ຮັບການຈັດຕັ້ງຢູ່ຫວຽດນາມ.
ເພື່ອນບູນທະວີ, ອິນທະວົງ, ຢູ່ນະຄອນຫຼວງວຽງຈັນ ໄດ້ສົ່ງອີແມວມາຍັງລາຍການໂດຍຖາມວ່າ: ຜ່ານພາບສາລະຄະດີທີ່ກ່ຽວກັບງານບຸນໂຄສະນາການທ່ອງທ່ຽວ, ຮູບພາບປະເທດ ຊາດ ແລະ ປະຊາຊົນບັນດາປະເທດອາຊຽນ, ເຊິ່ງໄດ້ຈັດຂຶ້ນຢູ່ບ້ານວັດທະນະທຳ - ທ່ອງທ່ຽວຊົນເຜົ່າຫວຽດນາມ ໃນໝູ່ບ້ານດົ່ງໂມ, ຮ່າໂນ້ຍ ນັ້ນ, ຂ້າພະເຈົ້າເຫັນວ່າຝ່າຍລາວກໍ່ເຂົ້າຮ່ວມ. ຂ້າພະເຈົ້າຢາກຮູ້ວ່າ, ບັນດາຜູ້ຊົມໄດ້ຕີລາຄາຄືແນວໃດກ່ຽວກັບວາດຟ້ອນທີ່ເປັນມູນເຊື້ອຂອງລາວ?
ເພື່ອນບູນທະວີ, ອິນທະວົງທີ່ຮັກແພງ, ວັນທີ 02/11 ຜ່ານມາ, ຢູ່ບ້ານວັດທະນະທຳ - ທ່ອງທ່ຽວຊົນເຜົ່າຫວຽດນາມ, ຢູ່ໝູ່ບ້ານດົ່ງໂມ, ຮ່າໂນ້ຍ ໄດ້ດຳເນີນງານພົບປະແລກປ່ຽນວັດທະນະທຳລະຫວ່າງບັນດາປະເທດອາຊຽນ ດ້ວຍຫົວຂໍ້ວ່າ “ຊຸມມື້ມະຫາສາມັກຄີອາຊຽນ - ວິໄສທັດດຽວ, ສີສັນດຽວ, ປະຊາຄົມດຽວ”. ໃນນັ້ນໄດ້ຈັດງານບຸນໂຄສະນາການທ່ອງທ່ຽວ, ຮູບພາບປະເທດຊາດ ແລະ ປະຊາຊົນບັນດາປະເທດອາຊຽນ. ເຂົ້າຮ່ວມງານບຸນມີບັນດາປະເທດ: ລາວ, ກຳປູເຈຍ, ຫວຽດນາມ, ມາເລເຊຍ, ໄທ… ບັນດາປະເທດເຂົ້າຮ່ວມໄດ້ສະແດງບັນດາລາຍການທີ່ເປັນເອກະລັກສະເພາະຂອງຕົນ ກໍ່ຄືແນະນຳບັນດາສະຖານທີ່ທ່ອງທ່ຽວທີ່ມີຊື່ສຽງ, ວັດທະນະທຳ, ອາຫານພື້ນເມືອງ… ຂອງປະເທດຕົນ. ເຂົ້າຮ່ວມງານບຸນ, ຄະນະຜູ້ແທນລາວ ໄດ້ສະແດງຟ້ອນແຄນ. ເພື່ອນ ສອນໄຈ ຢາທໍ່ຕູ, ພວມຮ່ຳຮຽນຢູ່ໂຮງຮຽນມິດຕະພາບ T80, ແມ່ນຜູ້ທີ່ເຂົ້າຮ່ວມລາຍການສະແດງຟ້ອນແຄນໃຫ້ຮູ້ວ່າ.
“ພວກຂ້າພະເຈົ້າຢາກແນະນຳເຖິງເພື່ອນມິດສາກົນກ່ຽວກັບປະເທດລາວ, ເຊິ່ງເປັນປະເທດທີ່ມີຮີດຄອງປະເພນີ້ພິເສດຫຼາຍຢ່າງ, ໃນນັ້ນມີຟ້ອນແຄນລາວ, ສຽງແຄນລາວ ໄດ້ເປັນສັນຍາລັກໃຫ້ແກ່ຄວາມສາມັກຄີຂອງປະຊາຊົນ.”
ພາຍຫຼັງຮັບຊົມລາຍການຟ້ອນແຄນ. ອ້າຍ ຄ໋ວດຕຽນຄວາ ແລະ ທ່ານນາງ Diana, ຊາວມາເລເຊີຍ ໃຫ້ຂໍ້ສັງເກດວ່າ.
“ຜ່ານການນຸ່ງຖືຂອງລາວ, ຂ້າພະເຈົ້າເຫັນວ່າ, ມັນຄ້າຍຄືກັບການນຸ່ງຖືຂອງບາງຊົນເຜົ່າຢູ່ຫວຽດນາມ, ຕົວຢ່າງຄືຊົນເຜົ່າມົງ. ຂ້າພະເຈົ້າມີຄວາມປະທັບໃຈຕໍ່ການນຸ່ງຖື ແລະ ຮູ້ສຶກມີຄວາມໃກ້ຊິດສະໜິດສະໜົມກັບເພື່ອນລາວຫຼາຍ”.
“ຂ້າພະເຈົ້າເຫັນວ່າວາດຟ້ອນຂອງລາວອ່ອນຊ້ອນ ແລະ ງາມຫຼາຍ. ດ້ວຍກິລິຍາທ່າທາງທີ່ເປັນເອກະລັກສະເພາະ, ຕ່າງກັບວາດຟ້ອນທີ່ເປັນມູນເຊື້ອຂອງມາເລເຊຍ, ຂ້າພະເຈົ້າມັກວາດຟ້ອນນີ້. ນອກນັ້ນ, ເຄື່ອງນຸງຂອງເຂົ້າເຈົ້າກໍ່ງາມຫຼາຍ.”
ທ່ານນາງ ທອງມີ ດວນສັກດາ, ຮອງທີ່ປຶກສາຝ່າຍສຶກສາ - ວັດທະນະທຳ ສະຖານທູດລາວປະຈຳຫວຽດນາມ ກໍ່ໃຫ້ຮູ້ວ່າ.
“ເຂົ້າຮ່ວມງານບຸນນີ້, ສະຖານທູດລາວປະຈຳຫວຽດນາມ ຢາກແນະນຳເຖິງເພື່ອນມິດສາກົນກ່ຽວກັບຊຸດອາພອນພື້ນເມືອງຂອງລາວ, ແນະນຳພິທີບາສີສູ່ຂວັນ, ບັນດາເຍື່ອງອາຫານ ກໍ່ຄືແນະນຳກ່ຽວກັບບັນດາສະຖານທີ່ທ່ອງທ່ຽວຂອງລາວ.”
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ
laovov@yahoo.com,
laovov5@gmail.com. ພວກເຮົາຈະຍິນດີຕ້ອນຮັບ ແລະ ພ້ອມແລ້ວທີ່ຈະຕອບສະໜອງຕາມຄວາມປະສົງຂອງທຸກໆທ່ານ.