ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວຈາກທ່ານຜູ້ຟັງຫຼາຍທ່ານ, ຈົດໝາຍ, ອີແມວເຫຼົ່ານັ້ນໄດ້ຖາມກ່ຽວກັບບັນດາບົດ, ຂ່າວທີ່ໄດ້ອອກອາກາດໃນອາທິດ. ໃນລາຍການ “ໂອ້ລົມກັບເພື່ອນລາວ” ພາກນີ້, ພວກເຮົາຂໍຕອບບາງຄຳຖາມເຊິ່ງທ່ານຜູ້ຟັງຝາກມາໃນອາທິດຜ່ານມາ.
ທ່ານ ໄຊຍາລາດ, ຢູ່ແຂວງ ວຽງຈັນ ຝາກອີແມວມາຍັງລາຍການໂດຍຖາມວ່າ: ໃນລາຍການ ສີສັນ 54 ຊົນເຜົ່າ ຫວຽດນາມ ອອກອາກາດເມື່ອໃນວັນທີ 21/6, ຂ້າພະເຈົ້າໄດ້ຮັບຟັງບົດຂຽນກ່ຽວກັບຊົນເຜົ່າຢ້າວ, ແຕ່ຂ້າພະເຈົ້າບໍ່ສາມາດຕິດຕາມຮັບຟັງບົດດັ່ງກ່າວຈົນຈົບໄດ້ຍ້ອນຄາວຽກ. ທາງລາຍການສາມາດແນະນຳໂດຍຫຍໍ້ກ່ຽວກັບຊົນເຜົ່າດັ່ງກ່າວໄດ້ບໍ?
ຊົນເຜົ່າຢ້າວ (ຍັງມີຊື່ອື່ນທີ່ວ່າ: ເຜົ່າມ໋ານ, ດົງ, ກິມມ່ຽນ...) ເຊິ່ງແມ່ນຊົນເຜົ່າສ່ວນໜ້ອຍໃນຈຳນວນ 54 ຊົນເຜົ່າ ຫວຽດນາມ ດ້ວຍຈຳນວນພົນລະເມືອງປະນາມ 800.000 ຄົນ. ຢູ່ ຫວຽດນາມ, ເຖິງວ່າຊາວເຜົ່າຢ້າວມີພົນລະເມືອງບໍ່ຫຼາຍກໍ່ຕາມ ແຕ່ບັນດາບ້ານຂອງເຂົາເຈົ້າພັດຕັ້ງກະແຈກກະຈາຍຢ່າງກ້ວາງຂວາງຢູ່ເຂດພູສູງພາກເໜືອ (ຄືແຂວງ ກາວບັ່ງ, ຮ່າຢາງ, ລາວກາຍ, ອຽນບ໋າຍ...) ແລະ ບັນດາແຂວງພູພຽງຄື: ຟູ໋ທໍ້, ຫວີງຟຸກ, ຮ່ວາບິ່ງ ແລະ ແຂວງກວາງນິງ. ນອກຈາກນັ້ນ, ຊາວເຜົ່າຢ້າວຍັງໄດ້ແບ່ງເປັນຫຼາຍກຸ່ມໝວດທີ່ແຕກຕ່າງກັນ, ດ້ວຍບັນດາຈຸດທີ່ເປັນເອກະລັກສະເພາະກ່ຽວກັບປະເພນີ ເຊິ່ງສະແດງອອກຢ່າງຈະແຈ້ງທີ່ສຸດແມ່ນໃນຊຸດອາພອນຂອງເຂົາເຈົ້າຄື: ຢ້າວດໍ໋ (ຢ້າວແດງ), ຢ້າວ ກວນແຈດ (ຢ້າວໂສ້ງຄັບ), ຢ້າວແທງອີ (Dao Thanh Y), ຢ້າວອ໋າວຢ່າຍ (ຢ້າວເສື້ອຍາວ).... ເຖິງວ່າ, ເຂົາເຈົ້າໄດ້ແບ່ງເປັນຫຼາຍໝວດທີ່ແຕກຕ່າງກັນກໍ່ຕາມແຕ່ຍັງນຳໃຊ້ພາສາດຽວກັນ ເພື່ອຮັບປະກັນສາຍພົວພັນສະໜິດຕິດພັນລະຫວ່າງປະຊາຄົມຊາວເຜົ່າຢ້າວນຳກັນ.
ນອກຈາກແຫຼ່ງຂ່າວທີ່ກ່າວມາຂ້າງເທິງ, ພວກເພື່ອນສາມາດເຂົ້າຄໍລຳ “ສີສັນ 54 ຊົນເຜົ່າ” ໃນແວບໄຊ vov5.vn ຫຼື vovworld.vn ເພື່ອອ່ານເພີ່ມເຕີມກ່ຽວກັບບັນດາຊົນເຜົ່າຂອງ ຫວຽດນາມ. ຫວັງວ່າ, ຜ່ານບັນດາບົດຂຽນໃນຄໍລຳນີ້ ເພື່ອນອາດສາມາດເຂົ້າໃຈຕື່ມອີກກ່ຽວກັບບັນດາຊົນເຜົ່າ ຫວຽດນາມ.
ລະດູເກັບກູ້ໝາກລີ້ນຈີ່ ຢູ່ລູກງ້ານ
ສ່ວນທ່ານນາງ ສຸດທະສອນ, ແຂວງຫົວພັນ ໄດ້ຝາກຈົດໝາຍດ້ວຍເນື້ອໃນວ່າ: ຂ້າພະເຈົ້າໄດ້ເຂົ້າເບິ່ງລາຍການ “ພາບສາລະຄະດີ” ເຊິ່ງແນະນຳລະດູເກັບກູ້ໝາກລີ້ນຈີ່ຂອງ ຫວຽດນາມ ໃນແວບໄຊຂອງພວກເພື່ອນ. ຂ້າພະເຈົ້າເຫັນວ່າຮູບຖ່າຍນັ້ນງາມຫຼາຍ. ໝາກລີ້ນຈີ່ຂອງ ຫວຽດນາມ ກໍ່ໄດ້ສົ່ງໄປຂາຍຢູ່ລາວເປັນຈຳນວນຫຼາຍ, ຕາມຂ້າພະເຈົ້າແລ້ວ, ໝາກລີ້ນຈີ່ຢູ່ ຫວຽດນາມ ແຊບກ່ວາໝາກລີ້ນຈີ່ຢູ່ ໄທ. ເຖິງວ່າໄດ້ຊື້ ແລະ ກິນໝາກລີ້ນຈີ່ ຫຼາຍເທື່ອແລ້ວແຕ່ຂ້າພະເຈົ້າບໍ່ຮູ້ວ່າມັນໄດ້ປູກຢູ່ແຫ່ງໃດຂອງຫວຽດນາມຈະແຊບກ່ວາໝູ່. ພວກເພື່ອນສາມາດແນະນຳຂໍ້ມູນຂ່າວບາງຢ່າງກ່ຽວກັບໝາກໄມ້ນີ້ໄດ້ບໍ່?
ໝາກລີ້ນຈີ່ ທີ່ແຊບກ່ວາໝູ່ ແລະ ມີຊື່ສຽງຢູ່ ຫວຽດນາມ ແມ່ນໝາກລີ້ນຈີ່ທີ່ປູກຢູ່ເມືອງ ແທງຮ່າ, ແຂວງ ຫາຍເຢືອງ ແລະ ລູກງ້ານ, ແຂວງ ບັກຢາງ. ໝາກລີ້ນຈີ່ທີ່ປູກຢູ່ທີ່ນີ້ ມີລົດຫວານ, ຫອມ, ແຊບທີ່ສຸດຢູ່ ຫວຽດນາມ. ເຖິງວ່າປະລິມານໝາກລີ້ນຈີ່ ຢູ່ລູກງ້ານຫຼາຍກ່ວາ, ແຕ່ໝາກລີ່ນຈີ່ຢູ່ ແທງຮ່າພັດມີໜ່ວຍໃຫຍ່ ແລະ ຫວານກ່ວາ, ດັ່ງນັ້ນລາຄາກໍ່ສູງກ່ວາ… ປະຈຸບັນ, ຕະຫຼາດຈຳໜ່າຍຕົ້ນຕໍ່ຂອງໝາກລີ້ນຈີ່ແມ່ນຢູ່ພາຍໃນປະເທດ, ສ່ວນໜື່ງໄດ້ສົ່ງອອກໄປຍັງປະເທດ ຈີນ, ກຳປູເຈຍ, ລາວ ແລະ ບາງປະເທດເອີລົບ.
ເພື່ອນ ແສງພະຈັນ, ຢູ່ນະຄອນຫຼວງ ວຽງຈັນ ໄດ້ຝາກອີແມວມາຍັງລາຍການຖາມກ່ຽວກັບກອງປະຊຸມໃຫຍ່ຂອງສະຫະສະມາຄົມຟ້ອນຕຸກກະຕາ ອາຊີຕາເວັນອອກສ່ຽງໃຕ້ ໄດ້ຈັດຕັ້ງຢູ່ ຫວຽດນາມ ໃນອາທິດຜ່ານມາ.
ກອງປະຊຸມໃຫຍ່ຂອງສະຫະສະມາຄົມຟ້ອນຕຸກກະຕາ ອາຊີຕາເວັນອອກສ່ຽງໃຕ້ ຄັ້ງທີ 6 ໂດຍກະຊວງວັດທະນະທຳ, ກິລາ ແລະ ທ່ອງທ່ຽວ, ໂຮງລະຄອນຟ້ອນຕຸກກະຕາ ຫວຽດນາມ ເປັນເຈົ້າພາບຈັດຕັ້ງແຕ່ວັນທີ 19 – 21/6 ຢູ່ຮ່າໂນ້ຍ. ນີ້ເປັນຄັ້ງທຳອິດທີ່ ຫວຽດນາມ ເປັນເຈົ້າພາບຈັດຕັ້ງເຫດການນີ້. ກອງປະຊຸມໃຫຍ່ປີນີ້ ມີການເຂົ້າຮ່ວມຂອງ 11 ຄະນະທີ່ມາຈາກ 10 ປະເທດຄື: ຫວຽດນາມ, ກຳປູເຈຍ, ລາວ, ບຣູໄນ, ສິງກາໂປ, ມຽນມາ, ໄທ, ມາເລເຊຍ, ຟິລິບປິນ, ອິນໂດເນເຊຍ. ໃນໄລຍະດຳເນີນກອງປະຊຸມ, ບັນດາຄະນະສິລະປະໄດ້ຈັດຕັ້ງການສະແດງສິລະປະຟ້ອນຕຸກກະຕາທີ່ເປັນມູນເຊື້ອຂອງປະເທດຕົນ.
ອາທິດຜ່ານມາ, ພວກເຮົາກໍ່ໄດ້ຮັບຈົດໝາຍ, ໂທລະສັບ, ອີແມວອວຍພອນວັນສື່ມວນຊົນປະຕິວັດ ຫວຽດນາມຈາກທ່ານ: ຫງວຽນວັນແຕ້ວ, ເຈີ່ນຫາຍຮ່າ, ທ່ານຄຳແສງ, ບຸນເຮືອງ, ແສງຟ້າ ແລະ ອີກຫຼາຍທ່ານ. ຂໍຂອບໃຈພວກທ່ານທີ່ໄດ້ຝາກຄຳອວຍພອນໃຫ້ແກ່ພວກເຮົາ. ຂໍໃຫ້ພວກທ່ານຈົ່ງມີສຸຂະພາບເຂັ້ມແຂງ ແລະ ຕິດຕາມພາກພາສາລາວ ກໍ່ຄືປະກອບຄຳເຫັນໃຫ້ພວກເຮົາເປັນປະຈຳ.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ: Laovov@yahoo.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ. ສະບາຍດີ