ອາທິດຜ່ານມາ, ວິທະຍຸກະຈາຍສຽງ ຫວຽດນາມ ພາກພາສາຕ່າງປະເທດໄດ້ຮັດຈົດໝາຍເກືອບ 200 ສະບັບຂອງທ່ານຜູ້ຟັງທີ່ມາຈາກ 35 ປະເທດ ແລະ ເຂດແຄ້ວນໃນໂລກ, ໃນນັ້ນ, ພາກພາສາລາວ ໄດ້ຮັບ 7 ອີແມວ, ຈົດໝາຍ, ໂທລະສັບ ຂອງທ່ານຜູ້ຟັງທີ່ຝາກມາຈາກ ຫວຽດນາມ, ລາວ, ໄທ. ໃນລາຍການໂອ້ລົມກັບເພື່ອນລາວມື້ນີ້, ພວກເຮົາຂໍ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາວິທະຍຸກະຈາຍສຽງ ຫວຽດນາມ ພາກພາສາລາວ ໃນອາທິດຜ່ານມາ.
ທ່ານ ມີໄຊ ຕະວິນຍານ, ໄດ້ໂທລະສັບມາຍັງລາຍການສະແດງຄວາມປາດຖະໜາຢາກຮູ້ບາງຂໍ້ມູນກ່ຽວກັບຫາດຊາຍທະເລທີ່ສວຍງາມຈຳນວນໜຶ່ງຂອງພາກເໜືອ ຫວຽດນາມ.
ທ່ານ ມີໄຊ ທີ່ເຄົາລົບ, ພວກຂ້າພະເຈົ້າຂໍແນະນຳຫາດຊາຍທະເລທີ່ສວຍງາມຢູ່ບາງແຫ່ງຢູ່ພາກເໜືອຂອງ ຫວຽດນາມ ໃຫ້ທ່ານຊາບ. ທຳອິດຕ້ອງເວົ້າເຖິງທະເລ ເຊີ່ມເຊີນ, ຂຶ້ນກັບແຂວງ ແທງຮ໋ວາ. ພູມສັນຖານຂອງ ເຊີ່ມເຊີນ ຮາບພຽງພໍສົມຄວນ, ແມ່ນເຂດທີ່ມີພູຜາປ່າໄມ້, ແມ່ນ້ຳລຳເຊທີ່ສວຍງາມ, ມີອາກາດປອດໂປ່ງ, ຫາດຊາຍທະເລກ້ວາງ, ນ້ຳຂຽວສະອາດ. ຫາດຊາຍທະເລ ເຊີ່ມເຊີນ ແມ່ນບ່ອນທີ່ມີຄື້ນໃຫຍ່, ຟອງແຮງ ເໝາະສົມກັບຜູ້ທີ່ມັກພະຈົນໄພ. ນອກຈາກນັ້ນແລ້ວ, ທະເລ ເຊີ່ມເຊີນ ຍັງແມ່ນແຫ່ງສະໜອງສິນທະເລທີ່ອຸດົມສົມບູນດ້ວຍຫຼາຍປະເພດຄື: ກຸ້ງ, ປາມຶກ, ປູ, ແລະ ສິນທະເລທີ່ຫາຍາກອື່ນໆອີກ….
ຈາກນັ້ນ ແມ່ນທະເລ ຈ່າໂກ໋ ຂຶ້ນກັບແຂວງ ກວາງນິງ. ທະເລ ຈ່າໂກ໋ ໄດ້ຮັບການຂະໜານນາມວ່າແມ່ນ “ຫາດຊາຍທະເລງາມກ່ວາໝູ່ຢູ່ພາກເໜືອ ຫວຽດນາມ”, ດ້ວຍຫາດຊາຍທະເລທີ່ກ້ວາງໃຫຍ່ ແລະ ຮາບພຽງ, ຂີ້ຊາຍສີຂາວ ແລະ ນ້ຳທະເລຂຽວສະອາດທັງ 4 ລະດູໃນປີ. ຢູ່ໃກ້ກັບຫາດຊາຍທະເລແມ່ນປ່າຕົ້ນສົນ ແລະ ຢູ່ໃກ້ໆນັ້ນມີປ່າເຄັມຊາຍເລັນ. ອາກາດຢູ່ ຈ່າໂກ໋ເຢັນສະບາຍ, ສະພາບແວດລ້ອມສະຫງົບງຽບ ແລະ ຍັງມີຄວາມງາມແບບດັ້ງເດີມ. ມາແຫ່ງນີ້, ເພື່ອນກໍ່ສາມາດຊື້ສິນທະເລສົດໆຢູ່ແຄມທະເລ ເມື່ອເຮືອຂອງຊາວປະມົງໄປຫາປາຢູ່ທະເລກັບມາໄດ້.
ເກາະ ໂກໂຕ
ນອກຈາກນັ້ນ ຍັງມີ ເກາະ ໂກໂຕ ກໍ່ຂຶ້ນກັບແຂວງ ກວາງນິງ. ໂກໂຕ ມີຫາດຊາຍທະເລ 2 ແຫ່ງທີ່ສວຍງາມ ແມ່ນ ວ່ານຈ໋າຍ ແລະ ຮົ່ງວ່ານ. ຫາດຊາຍທະເລ ວ່ານຈ໋າຍ ນອນຢູ່ທາງທິດຕາເວັນຕົກຂອງເກາະ, ນີ້ແມ່ນຫາດຊາຍທະເລຮົກເຮຶ້ອ, ຂີ້ຊາຍສີຂາວ ແລະ ສະອາດ, ຄື້ນບໍ່ແຮງສາມາດລະຫຼີ້ນເທິງຫາດຊາຍນີ້ໄດ້. ສ່ວນຫາດຊາຍທະເລ ຮົ່ງວ່ານ ຕັ້ງຢູ່ທາງທິດຕາເວັນອອກຂອງເກາະ, ຂີ້ຊາຍຢູ່ທີ່ນີ້ອ່ອນນວນຫຼາຍ. ນອກຈາກອາບນ້ຳທະເລແລ້ວ, ເພື່ອນສາມາດ ໄປຢ້ຽມຢາມປ່າທຳມະຊາດ, ໂຄມໄຟທະເລ, ເຂດອະນຸສະຖານ ແລະ ສາວາລີປະທານ ໂຮ່ຈີມິນ, ຂົວກຳປັ່ນ, ໝູ່ບ້ານຂອງຊາວປະມົງ, ບັນດາອ່າວທະເລ, ຫາດຫິນທຳມະຊາດໄດ້.
ຍັງມີຫາດຊາຍທະເລບາງແຫ່ງຄື: ຫາຍທິ້ງ ຢູ່ ນາມດິ້ງ, ເກື໋ອໂຮ້ຍ ຢູ່ແຂວງເຫງ້ອານ, ຮ່ວາຫາຍ ຢູ່ ເມືອງ ຕິ້ງຢາ, ແຂວງ ແທງຮ໋ວາ, ເຂດ resort ລິງເຈື່ອງ ຢູ່ ເມືອງ ຮວັງຮ໋ວາ, ແທງຮ໋ວາ... ລ້ວນແຕ່ແມ່ນສະຖານທີ່ທ່ອງທ່ຽວທີ່ສ້າງຄວາມປະທັບໃຈ. ຫວັງວ່າ, ບັນດາຂໍ້ມູນດັ່ງກ່າວ ຈະຊ່ວຍໃຫ້ເພື່ອນ ມີໄຊ ເຂົ້າໃຈກ່ວາອີກກ່ຽວກັບບັນດາຫາດຊາຍທະເລຢູ່ ຫວຽດນາມ. ພວກຂ້າພະເຈົ້າປາດຖະໜາຢາກໄດ້ຕ້ອນຮັບເພື່ອນມາຢ້ຽມຢາມ ຫວຽດນາມ ໃນເວລາໄວທີ່ສຸດ.
ໃນອາທິດ, ພວກເຮົາກໍ່ໄດ້ຮັບ ອີເມວຈາກທ່ານ ເພັດສະຫວັນ ສີສະນົນ ເຊິ່ງໄດ້ຖາມກ່ຽວກັບອາກາດຂອງ ຮ່າໂນ້ຍ, ພວກເຮົາຂໍ້ແຈ້ງໃຫ້ທ່ານໄດ້ຮັບຊາບວ່າ: ຕົ້ນອາທິດ, ອາກາດຢູ່ ຮ່າໂນ້ຍ ມີຝົນຕົກຍ້ອນຖືກຜົນສະທ້ອນຈາກພະຍຸເລກທີ 2 ຢູ່ທະເລຕາເວັນອອກ. ນັບແຕ່ວັນທີ 27 – 30 ອາກາດແດດຮ້ອນ, ອຸນຫະພຸມສະເລຍແຕ່ 26 – 35 ອົງສາ.
ນາງ ທິດາ, ນັກສຶກສາພະແນກກະເສດສາດ, ມະຫາວິທະຍາໄລແຫ່ງຊາດ ລາວ ຝາກ ອີເມວມາຍັງລາຍການໂດຍຖາມວ່າ: ໂດຍແມ່ນຜູ້ຟັງບໍ່ເປັນປະຈຳຂອງລາຍການ, ດັ່ງນັ້ນເມື່ອໄດ້ຮັບຟັງ 19 ມາດຖານໃນການກໍ່ສ້າງຊົນນະບົດໃໝ່ ຂ້າພະເຈົ້າບໍ່ຮູ້ວ່າ 19 ມາດຖານນັ້ນແມ່ນແນວໃດ. ຂໍໃຫ້ທາງລາຍການຕອບໃຫ້ຂ້າພະເຈົ້າຮູ້ກ່ຽວກັບ 19 ມາດຖານນີ້ໄດ້ຫລືບໍ່?
ເພື່ອນ ທິດາ ທີ່ຮັກແພງ, 19 ມາດຖານໃນການກໍ່ສ້າງຊົນນະບົດໃໝ່ແມ່ນ: ວາງແຜນກຳນົດ, ຄົມມະນະຄົມ, ຊົນລະປະທານ, ໄຟຟ້າ, ໂຮງຮຽນ, ພື້ນຖານວັດຖຸວັດທະນະທຳ, ຕະຫລາດ, ໄປສະນີ, ເຮືອນຢູ່ຂອງປະຊາຊົນ, ລາຍຮັບ, ອັດຕາຄອບຄົວທຸກຍາກ, ອົງປະກອບຄົນງານ, ຮູບແບບຈັດຕັ້ງການຜະລິດ, ການສຶກສາ, ສາທາລະນະສຸກ, ວັດທະນະທຳ, ສິ່ງແວດລ້ອມ, ລະບົບອົງການຈັດຕັ້ງການເມືອງສັງຄົມໝັ້ນຄົງ, ຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມໄດ້ຮັບການຮັກສາໄວ້ຢ່າງໝັ້ນຄົງ.
ພວກເຮົາມີຄວາມມ່ວນຊື່ນເມື່ອໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງ: ມີໄຊ, ວັນໄຊ, ທິດາ, ເພັດສະຫວັນ, ຂໍຂອບໃຈພວກເພື່ອນຫຼາຍໆ. ນອກຈາກຕິດຕໍ່ກັບພວກຂ້າພະເຈົ້າທາງໂທລະສັບ, ອີແມວ, ໄປສະນີແລ້ວ, ທ່ານສາມາດປະກອບຄຳເຫັນໂດຍກົງໃນ ແວັບໄຊ vovworld.vn ຂອງພວກເຮົາ. ຫວັງວ່າ, ໃນໄລຍະຈະມາເຖິງ, ພວກເພື່ອນຈະສືບຕໍ່ຕິດຕາມລາຍການຂອງພວກເຮົາເປັນປະຈຳກ່ວາ ແລະ ປະກອບຄຳເຫັນ ເພື່ອໃຫ້ລາຍການນັບມື້ນັບສົມບູນກ່ວາອີກ.