ຮ່າງບົດລາຍງານການເມືອງຂອງຄະນະບໍລິຫານງານສູນກາງພັກຊຸດທີ 11 ຢູ່ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມພວມຖືກນຳມາເອົາຄຳເຫັນຈາກປະຊາຊົນ. ເປັນໜ້າສົນໃຈ, ນັ້ນແມ່ນເນື້ອໃນກໍ່ສ້າງພັກໃນຮ່າງບົດລາຍໄດ້ຮັບການເພີ່ມເຕີມເນື້ອໃນຫຼາຍປະການກ່ຽວກັບໜ້າທີ່, ວິທີການແກ້ໄຂເພື່ອກໍ່ສ້າງ ແລະ ຂະຫຍາຍສະມາຊິກພັກເພື່ອຕອບສະໜອງຄວາມຮຽກຮ້ອງຕ້ອງການໃນໜ້າທີ່ພັດທະນາເສດຖະກິດ-ສັງຄົມຂອງປະເທດຊາດ. ສິ່ງນີ້ໄດ້ສະແດງໃຫ້ເຫັນວ່າ ບັນຫາກໍ່ສ້າງປັບປຸງພັກ ແມ່ນມີຄວາມສຳຄັນພິເສດ, ແມ່ນບັນຫາກຸນແຈໃນກິດຈະການປ່ຽນແປງໃໝ່ໃນປະຈຸບັນ.
ພາບປຸກລະດົມກຳລັງໃຈກ່ອນທີ່ດຳເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ |
ຮ່າງບົດລາຍງານການເມືອງໄດ້ເລີ່ມຕົ້ນດ້ວຍເນື້ອໃນກໍ່ສ້າງພັກໃຫ້ໂປ່ງໃສ, ໝັນຄົງເຂັ້ມແຂງ. ຮ່າງເອກະສານຍັງກຳນົດວ່າ : ຍູ້ແຮງວຽກງານກໍ່ສ້າງພັກໃຫ້ເຂັ້ມແຂງກວ່າ, ຈຸດສຸມແມ່ນເດັດດຽວ, ຍຶດໝັ້ນສືບຕໍ່ປະຕິບັດມະຕິສູນກາງພັກຄັ້ງທີ 4 ຊຸດທີ 11.
ປ່ຽນແປງໃໝ່ວຽກງານການເມືອງ, ແນວຄິດ
ທາງດ້ານການເມືອງ, ຮ່າງເອກະສານເພີ່ມເຕີມບັນດາໜ້າທີ່, ວິທີການແກ້ໄຂໃໝ່ຄື ຍຶດໝັ້ນບັນດາບັນຫາທີ່ມີລັກສະນະຫຼັກການໃນວຽກງານກໍ່ສ້າງພັກ. ຍົກສູງຄວາມສາມາດກຳອຳນາດຂອງພັກ ແລະ ຮັບປະກັນການນຳພາຂອງພັກໃຫ້ມີປະສິດທິພາບ, ປະສິດທິຜົນ, ຄຸນນະທາດການເມືອງຂອງພັກ, ຂອງບັນດາອົງການຈັດຕັ້ງພັກ, ຂອງພະນັກງານ, ສະມາຊິກພັກ. ສ້າງກົນໄກ, ຂໍ້ກຳນົດໃຫ້ສົມບູນແບບ ແລະ ຈັດຕັ້ງປະຕິບັດວຽກງານຕຳໜິຕິຊົມຕົນເອງ ແລະ ຕຳໜິຕິຊົມກັນ, ການຊັກຖາມໃນກອງປະຊຸມຄັ້ງຕ່າງໆຂອງ ຄະນະບໍລິຫານງານສູນກາງພັກ, ຄະນະພັກ, ຄະນະປະຈຳຄະນະພັກຂັ້ນຕ່າງໆຢ່າງເຂັ້ມງວດ ແລະ ມີປະສິດທິຜົນ. ກໍ່ສ້າງ ແລະ ຈັດຕັ້ງປະຕິບັດກົນໄກເສີມຂະຫຍາຍບົດບາດຂອງປະຊາຊົນເຂົ້າຮ່ວມການກໍ່ສ້າງພັກຢ່າງມີປະສິດທິຜົນ.
ຮ່າງເອກະສານກຳນົດວ່າ ຕ້ອງປ່ຽນແປງໃໝ່ວຽກງານແນວຄິດ, ທິດສະດີ, ໃນນັ້ນສືບຕໍ່ປ່ຽນໃໝ່ເນື້ອໃນ, ແບບວິທີການ, ຍົກສູງລັກສະນະປະສິດທິຜົນຂອງວຽກງານແນວຄິດກວ່າອີກ; ເນັ້ນໜັກເຖິງການສະກັດກັ້ນ, ຍູ້ຖອຍບັນດາປະກົດການຜັນແປ ແລະ ຫັນປ່ຽນໂດຍຕົນເອງຢູ່ພາຍໃນ . ຕາມທ່ານ ຟານວັນກິ້ງ, ຢູ່ເມືອງເກົາໄຢ, ຮ່າໂນ້ຍແລ້ວ, ຮ່າງບົດລາຍງານການເມືອງທີ່ຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ເຕື້ອງເຖິງວຽກງານ ກໍ່ສ້າງພັກຢ່າງຮອບດ້ານ. ທ່ານ ຟານວັນກິ້ງ, ຢູ່ເມືອງເກົາໄຢ, ຮ່າໂນ້ຍ ໃຫ້ຮູ້ວ່າ :
“ ໃນເທື່ອນີ້, ບັນຫາກໍ່ສ້າງພັກແມ່ນມີຄວາມໝາຍສຳຄັນທີ່ສຸດ. ເພາະໄດ້ເຖິງເວລາແລ້ວ, ຖ້າຫາກບໍ່ປະຕິບັດວຽກງານນີ້ໃຫ້ເປັນຢ່າງດີ, ຈະສົ່ງຜົນສະທ້ອນເຖິງບັນຫາຄົງຕົວຂອງປະເທດຊາດ ແລະ ກຳນົດການນຳພາຂອງພັກຕໍ່ປະເທດຊາດ. ຂ້າພະເຈົ້າຄິດວ່າ ນີ້ແມ່ນບັນຫາສຳຄັນ ແລະ ຮີບດ່ວນ. ”
ຍົກສູງປະສິດທິຜົນການເຄື່ອນໄຫວຂອງອົງການພັກຂັ້ນຮາກຖານ ແລະ ຄຸນນະພາບຂອງສະມາຊິກພັກ.
ຮ່າງເອກະສານໄດ້ນຳບັນຫາສຶກສາອົບຮົມ, ຝຶກຝົນຫຼໍ່ຫຼອມຄຸນນະທາດ, ຄຸນສົມບັດເປັນປະຈຳກາຍເປັນເນື້ອໃນສຳຄັນໃນຈຸດໝາຍກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງທາງດານການເມືອງ, ແນວຄິດ, ການຈັດຕັ້ງ ແລະ ຄຸນສົມບັດ.
ຮ່າງເອກະສານຍັງກຳນົດວ່າ ຕ້ອງປ່ຽນໃໝ່ວຽກງານພະນັກງານໃຫ້ແຂງແຮງ. ລະອຽດແມ່ນປ່ຽນໃໝ່ການເລືອກຕັ້ງໃນພັກ, ແບບວິທີຄັດເລືອກ, ແຕ່ງຕັ້ງພະນັກງານ…ເພື່ອເລືອກເຟັ້ນເອົາບັນດາຜູ້ທີ່ມີຄຸນນະທາດການເມືອງຢ່າງໝັ້ນຄົງ, ຄຸນທາດ, ຄຸນສົມບັດທີ່ດີ, ກ້າຄິດກ້າເຮັດ ແລະ ກ້າຮັບຜິດຊອບບັນດາໜ້າທີ່ການນຳ, ພິເສດແມ່ນຜູ້ເປັນຫົວໜ້າ. ທ່ານ ເລຊວນບິກ ພັກນັກງານສັງກັດສະມາຄົມນັກປະພັນຫວຽດນາມ ຖືວ່າ :
“ ໃນຮ່າງເອກະສານຂອງພັກກ່ຽວກັບວຽກງານພະນັກງານ, ຂ້າພະເຈົ້າເຫັນວ່າ ພັກໄດ້ເອົາໃຈໃສ່ຮັບເອົາຄຳເຫັນປະກອບ, ສືບທອດບັນດາສິ່ງທີ່ຍອດຍິ່ງ, ຄຳສັ່ງສອນຂອງປະທານໂຮ່ຈິມິນກ່ຽວກັບການກໍ່ສ້າງພະນັກງານ. ພັກພວມເອົາໃຈໃສ່ກໍ່ສ້າງຖັນແຖວພະນັກງານທີ່ມີຄວາມຮູ້ຄວາມສາມາດ, ມີແນວຄິດ, ຄຸນສົມບັດເພື່ອຮັບໃຊ້ປະຊາຊົນ ”
ຖ້າຫາກວ່າ ໃນເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ ໄດ້ເຕື້ອງເຖິງບັນຫາຕໍ່ສູ້, ປ້ອງກັນ ແລະ ຕ້ານການສໍ້ລາດບັງຫຼວງ, ການຟຸ່ມເຟືອຍໃນພາກກ່ຽວກັບການກໍ່ສ້າງລັດແຫ່ງອຳນາດນິຕິບັນຍັດສັງຄົມນິຍົມນັ້ນ, ຮ່າງບົດລາຍງານການເມືອງຄັ້ງນີ້ ກໍສະເໜີທັງພາກກ່ຽວກັບການກໍ່ສ້າງພັກ, ໃນນັ້ນ ໄດ້ຊີ້ແຈ້ງເຖິງການກໍ່ສ້າງກົນໄກປ້ອງກັນ, ສະກັດກັ້ນການພົວພັນແບບ “ສະແຫວງຫາຜົນປະໂຫຍດເປັນກຸ່ມ” ຕ້ານການໃຊ້ສິດພິເສດສ່ວນຕົວ, ເດັດດຽວ, ຍຶດໝັ້ນກໍ່ສ້າງກົນໄກປ້ອງກັນ, ສະກັດກັ້ນການກະທຳສໍ້ລາດບັງຫຼວງ; ສ້າງກົນໄກຕັກເຕືອນ, ປັບໄໝລົງໂທດເພື່ອສະກັດກັ້ນການກະທຳສໍ້ລາດບັງຫຼວງ.
ກ່ຽວກັບການປ່ຽນໃໝ່ແບບວິທີນຳພາ. ແບບວິທີກຳອຳນາດຂອງພັກ, ເມື່ອທຽບໃສ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ, ຮ່າງບົດລາຍງານການເມືອງຄັ້ງນີ້ໄດ້ກຳນົດແຈ້ງກວ່າກ່ຽວກັບເລື່ອງພັກຮັບໃຊ້ປະຊາຊົນ, ຢູ່ໃຕ້ການຕິດຕາມກວດກາຂອງປະຊາຊົນ, ຮັບຜິດຊອບຕໍ່ປະຊາຊົນກ່ຽວກັບການຕັດສິນຂອງຕົນ; ຍູ້ແຮງການຈັດແບ່ງຂັ້ນ, ຈັດແບ່ງສິດອຳນາດ, ພ້ອມທັງຮັບປະກັນການນຳພາ, ຄຸ້ມຄອງຢ່າງເປັນເອກະພາບຂອງສູນກາງພັກ.
ເລື່ອງຮ່າງບົດລາຍງານການເມືອງທີ່ຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ເນັ້ນໜັກເຖິງຫົວຂໍ້ : “ເພີ່ມທະວີວຽກງານກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ” ແມ່ນໄດ້ສະແດງໃຫ້ເຫັນວ່າ ຄວາມຮຽກຮ້ອງຕ້ອງການທີ່ໃຫຍ່ຫຼວງ ແລະ ຮອບດ້ານກວ່າເມື່ອທຽບໃສ່ ຄວາມຮຽກຮ້ອງຕ້ອງການທີ່ໄດ້ວາງອອກໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ ນັ້ນແມ່ນ “ສືບຕໍ່ຍົກສູງຄວາມສາມາດນຳພາ ແລະ ກຳລັງຕໍ່ສູ້ຂອງພັກ” . ຄວາມຮຽກຮ້ອງຕ້ອງການເຫຼົ່ານັ້ນ, ກໍແມ່ນກຳນັດທິດທີ່ສຳຄັນໃຫ້ແກ່ທົ່ວພັກໃນຊຸມປີທີ່ຈະມາເຖິງ, ພ້ອມກັນນັ້ນ ກໍສະແດງໃຫ້ເຫັນຄວາມຕັດສິນໃຈກໍ່ສ້າງພັກກຳອຳນາດໃຫ້ໝັ້ນຄົງເຂັ້ມແຂງໃນທຸກດ້ານ.