ປະທານາທິບໍດີ ຊີຣີ Bashar Al-Assad ໄດ້ປະກົດຕົວຕໍ່ໜ້າມວນຊົນເມື່ອອາທິດແລ້ວນີ້
(ພາບ: AFP)
|
ວິກິດການດ້ານການເມືອງຢູ່ຊີຣີ ໄດ້ມີບາດລ້ຽວໃໝ່ພາຍຫລັງລັດຖະບານຂອງປະທານາທິບໍດີຊີຣີ Bashar al Assad ຖືກປັດເຂ່ຍອອກຈາກສະຫະພັນອາຣັບ (AL) ຢ່າງເປັນທາງການ ແລະ ຜູ້ຕາງໜ້າໃຫ້ປະເທດນີ້ແມ່ນກຳລັງຝ່າຍຄ້ານຊີຣີ. ເລື່ອງສະໜັບສະໜູນຢ່າງເປີດເຜີຍ ແລະ ມອບທີ່ນັ່ງເປັນສະມາຊິກໃຫ້ແກ່ຝ່າຍຄ້ານຊີຣີ ຖືກຖືວ່າແມ່ນບາດກ້າວເດີນທີ່ອັນຕະລາຍ, ຍູ້ປະເທດຕາເວັນອອກກາງນີ້ສືບຕໍ່ຕົກເຂົ້າສູ່ສະພາບໃຊ້ຄວາມຮຸນແຮງ ແລະ ແບ່ງແຍກຢ່າງເລິກເຊິ່ງ. .
ວັນທີ 26/3, ເມື່ອອັດກອງປະຊຸມສຸດຍອດສະຫະພັນອາຣັບ (AL) ປະຈຳປີຢູ່ Dohar ປະເທດກາຕາ, ບັນດາການນຳ AL ໄດ້ເຫັນດີເປັນເອກະສັນຮັບຮອງເອົາມະຕິຮັບຮູ້ບົດບາດສະມາຊິກຖືກຕ້ອງຕາມກົດໝາຍຂອງສຳພັນທະມິດແຫ່ງຊາດຊີຣີ (SNC), ຕາງໜ້າໃຫ້ຊີຣີ ຢູ່ AL ແລະ ໃນບັນດາອົງການຂຶ້ນກັບກຸ່ມນີ້, ຈົນເຖິງເວລາດຳເນີນບັນດາການເລືອກຕັ້ງເປີດຊ່ອງທາງໃຫ້ແກ່ການສ້າງຕັ້ງລັດຖະບານ. ມະຕິຂອງ 15 ປະເທດສະມາຊິກ AL ໃຫ້ສັດຕະຍາບັນໄດ້ເນັ້ນໜັກວ່າ: “ສິດຂອງທຸກປະເທດສະມາຊິກແມ່ນໄດ້ຕອບສະໜອງທຸກໆຮູບການປ້ອງກັນຕົວ, ທັງດ້ານການທະຫານ, ເພື່ອໜູນຊ່ວຍການຕໍ່ຕ້ານຂອງປະຊາຊົນຊີຣີ ແລະ ກອງທັບຊີຣີເສລີ“. ພ້ອມກັນນັ້ນ, AL ໄດ້ຊຸກຍູ້ບັນດາອົງການພາກພື້ນ ແລະ ສາກົນຮັບຮູ້ SNC ແມ່ນອົງການຕາງໜ້າຖືກຕ້ອງຕາມກົດໝາຍ ແລະ ອົງການໜຶ່ງດຽວຂອງປະຊາຊົນຊີຣີ. ອາດເຫັນໄດ້ວ່າ: ນີ້ແມ່ນບາດລ້ຽວທີ່ອັນຕະລາຍຍ້ອນວ່າ AL ໄດ້ປຸກລະດົມໃຫ້ແກ່ມາດຕະການດ້ານການທະຫານແນໃສ່ຢຸດຕິການປະທະ ແທນໃຫ້ການເຈລະຈາໂດຍສັນຕິວິທີ.
ໃນທັນທີ, ຄຳຕັດສິນດັ່ງກ່າວ, ໄດ້ຮັບການຕຳນິຕິຕຽນຢ່າງແຮງຈາກປະຊາຄົມໂລກ. ວັນທີ 27/3, ລັດເຊຍ ໄດ້ອອກສຽງຕຳນິຕິຕຽນການຕັດສິນຂອງ AL ຊື່ງໄດ້ມອບທີ່ນັ່ງສະມາຊິກຂອງຊີຣີ ໃຫ້ແກ່ສຳພັນທະມິດແຫ່ງຊາດຝ່າຍຄ້ານຊີຣີ ແລະ ກ່າວຫາວ່ານີ້ແມ່ນການກະທຳ “ຜິດກົດໝາຍ ແລະ ບໍ່ອາດແກ້ຄວາມໄດ້“. ໃນວັນດຽວກັນ, Damacus ໄດ້ກ່າວຫາ AL ໄດ້ຫັນລັດທິກໍ່ການຮ້າຍໃຫ້ຖືກຕ້ອງຕາມກົດໝາຍ ດ້ວຍຄຳຕັດສິນມອບທີ່ນັ່ງຕາງໜ້າຂອງຊີຣີ ຢູ່ອົງການນີ້ໃຫ້ແກ່ SNC. ກ່ອນໜ້ານັ້ນ, ໝາກຜົນການຢັ່ງຫາງສຽງໃຫ້ເຫັນວ່າ, ປະຊາຊົນອັງກິດ ແລະ ອາເມລິກາ ເປັນສ່ວນຫຼາຍໄດ້ຄັດຄ້ານແນວຄວາມຄິດສະໜອງອາວຸດໃຫ້ແກ່ກຳລັງລຸກຮຶ້ຂຶ້ນຢູ່ຊີຣີ ກໍ່ຄືຄວາມສາມາດສົ່ງທະຫານໄປຍັງປະເທດຕາເວັນອອກກກາງນີ້. ໃນຈຳນວນຊາວອາເມລິກາ ກ່ວາ 1 ພັນຄົນຖືກຖາມ, ມີເຖິງ 45% ໄດ້ຄັດຄ້ານແນວຄວາມຄິດປະກອບອາວຸດໃຫ້ແກ່ຝ່າຍຄ້ານຢູ່ຊີຣີ ໃນຂະນະທີ່ມີແຕ່ 16% ສະໜັບສະໜູນແນວຄວາມຄິດນີ້. ອັດຕາສ່ວນຊາວອັງກິດ ຄັດຄ້ານແມ່ນ 57% ໃນຈຳນວນຜູ້ຖືກຖາມທັງໝົດ 3600 ຄົນ ແລະ 16% ສະໜັບສະໜູນ. ນີ້ຖືກຖືວ່າ ແມ່ນຄຳກ່າວເຕືອນສຳລັບທ່ານນາຍົກລັດຖະມົນຕີອັງກິດ David Cameron ໃນຂະນະທີ່ອາທິດກ່ອນ, ທ່ານພ້ອມກັບປະທານາທິບໍດີຝະລັ່ງ Francois Hollande ອອກສຽງຮຽກຮ້ອງໃຫ້ສະຫະພາບເອີລົບ ຈົ່ງລົບລ້າງຄຳສັ່ງຂວ້ຳບາດດ້ານອາວຸດສຳລັບຊີຣີ ເພື່ອແນໃສ່ເປີດຊ່ອງທາງໃຫ້ແກ່ການສະໜອງອາວຸດໃຫ້ແກ່ກຳລັງຝ່າຍຄ້ານຢູ່ປະເທດນີ້.
ເປັນທີ່ຈະແຈ້ງແລ້ວວ່າ ດ້ວຍຂໍ້ຕົກລົງຂອງ AL ກໍຄືການຄິດໄລ່ຂອງບັນດາປະເທດມະຫາອຳນາດຝ່າຍຕາເວັນຕົກ, ຫາງສຽງສະແດງຄວາມເປັນຫ່ວງກັງວົນວ່າ ມີບົດລະຄອນເຊັ່ນດຽວກັນຄືຢູ່ລີບີ ພວມສະແດງຄືນຢູ່ຊີຣີ. ປະທານາທິບໍດີ ຊີຣີ Bashar Al-Assad ຕ້ອງລາອອກຈາກຕຳແໜ່ງແມ່ນສິ່ງທີ່ບໍ່ອາດຫຼີກລ້ຽງໄດ້ໃນອະນາຄົດໃກ້ໆນີ້, ແຕ່ການມອບໂອນສິດອຳນາດພວມດຳເນີນໄປຄືແນວໃດ ແມ່ນສິ່ງທີ່ຄວນປຶກສາໃນສະພາວະປະຈຸບັນ. ຄວາມຈິງແມ່ນບໍ່ມີໃຜສາມາດຄາດຄະເນໄດ້ກ່ຽວກັບສະພາບການຂອງປະເທດນີ້ຈະເປັນແນວໃດໃນອະນາຄົດ ຖ້າຫາກອຳນາດການປົກຄອງ Damacus ປະຈຸບັນຖືກພັງທະລາຍ. ເພາະກ່ອນໜ້ານັ້ນ, ບັນດາຄວາມຂັດແຍ້ງກັນລະຫວ່າງບັນດາຝ່າຍໃນກຳລັງຝ່າຍຄ້ານຢູ່ຊີຣີໄດ້ສໍ່ສະແດງໃຫ້ເຫັນຫຼາຍບັນຫາລະອຽດ ຄືວັນທີ 23/3, ຢູ່ Istanbul ປະເທດຕວກກີ, SNC ໄດ້ແຕ່ງຕັ້ງທ່ານ Ghassan Hitto ເປັນຜູ້ຮັກສາການນາຍົກລັດຖະມົນຕີເພື່ອກຳສິດຄວບຄຸມບັນດາເຂດທີ່ພວກກະບົດພວມຢຶດຄອງ, ແຕ່ສິ່ງນີ້ພັດເຮັດໃຫ້ບັນດາກຸ່ມກຳລັງກະບົດ ຊີຣີ ບໍ່ພໍໃຈ ເພາະ ທ່ານ Ghassan Hitto ແມ່ນພົນລະເມືອງອາເມລິກາ ຊຶ່ງເກີດຢູ່ຊີຣີ ແລະ ໄດ້ຮັບການໜູນຊ່ວຍຈາກຕ່າງປະເທດ. ໃນການປ່ອນບັດຢູ່ Istanbul ປະເທດຕວກກີ, ມີບາງບຸກຄົນທີ່ມີຊື່ສຽງຂອງຝ່າຍຄ້ານຊີຣີ ໄດ້ຖືກປັດເຂ່ຍອອກນອກ. ເຂົາເຈົ້າຖືເລື່ອງຕໍ່ລອງແຕ່ງຕັ້ງນີ້ ແມ່ນກົນອຸບາຍຂອງຝ່າຍຕາເວັນຕົກ, ແນໃສ່ຄອບງຳການເລືອກຕັ້ງ ແລະ ແຕ່ງຕັ້ງຕີນມືຂອງຝ່າຍຕາເວັນຕົກຂຶ້ນ. ພ້ອມກັນນັ້ນ, ໃນຂະນະທີ່ ຜູ້ຮັກສາການນາຍົກລັດຖະມົນຕີທ່ານນີ້ ມີແຜນການນຳໃຊ້ກອງທັບຊີຣີເສລີ ເພື່ອປັບປຸງສິດອຳນາດຂອງຕົນນັ້ນ, ໄດ້ປະສົບກັບການຕິຕຽນຂອງບັນດາກຳລັງຝ່າຍຄ້າຍຢູ່ຊີຣີ. ໃນຂະນະນັ້ນ, ສະພາບການຢູ່ຊີຣີໃນປະຈຸບັນ, ຍັງຄົງບໍ່ມີທາງອອກ. ວັນທີ 27/3 ໃນຈົດໝາຍສົ່ງເຖິງກອງປະຊຸມບັນດາການນຳກຸ່ມ BRICS , ປະທານາທິບໍດີ ຊີຣີ Bashar Al-Assad ໄດ້ສະເໜີບັນດາປະເທດ BRICS ພ້ອມກັນຮ່ວມມືເພື່ອສະກັດກັ້ນສະພາບການໃຊ້ຄວາມຮຸນແຮງຢູ່ຊີຣີ ແລະ ຊ່ວຍນຳວິທີການແກ້ໄຂດ້ານການເມືອງໄປສູ່ຜົນສຳເລັດ. ກ່ອນໜ້ານັ້ນ, ທ່ານເລຂາທິການໃຫຍ່ ສ.ປ.ຊ Ban Ki moon ໄດ້ກ່າວເຕືອນວ່າ ລັດຖະບານບັນດາປະເທດໃນໂລກຕ້ອງມີການກະທຳສະກັດກັ້ນໄພອັນຕະລາຍຕໍ່ໜ້າເລື່ອງຊີຣີ ຖືກດັບສູນຢ່າງສິ້ນເຊິ່ງໃນສະພາວະສົງຄາມກາງເມືອງຢູ່ປະເທດນີ້ໄດ້ກ້າວສູ່ປີທີ 3 ແລ້ວ. ເພາະໄລ່ຮອດປະຈຸບັນ, ສົງຄາມກາງເມືອງຢູ່ປະເທດນີ້ໄດ້ກໍ່ຄວາມເສຍຫາຍຢ່າງໜັກໜ່ວງ ດ້ວຍຜູ້ເສຍຊີວິດກ່ວາ 70.000 ຄົນ ແລະ ກ່ວາ 3 ລ້ານຄົນຕ້ອງຍົກຍ້າຍໄປແຫ່ງອື່ນ, ບັນດາໝູ່ບ້ານ, ນະຄອນໄດ້ຖືກທຳລາຍຢ່າງໜັກ. ຄວາມຈິງທີ່ເປັນໜ້າເສົ້າສະລົດໃຈຕໍ່ໜ້າການເລືອກເອົາວິທີນຳໃຊ້ອາວຸດແທນທີ່ການເຈລະຈາການເມືອງໂດຍສັນຕິວິທີ. ແຕ່ດ້ວຍການຜັນແປຄືປະຈຸບັນ, ຫາງສຽງຍັງບໍ່ທັນເຫັນສັນຍານແຫ່ງຄວາມປາດຖະໜາແຕ່ຢ່າງໃດ.