(vovworld)- ທ່ານນາຍົກລັດຖະມົນຕີ Matteo Renzi ແມ່ນນາຍົກລັດຖະມົນຕີ ອີຕາລີ ຜູ້ທຳອິດ ມາຢ້ຽມຢາມຫວຽດນາມ ຢ່າງເປັນທາງການ ນັບແຕ່ເມື່ອສອງະເທດ ສ້າງຕັ້ງສາຍພົວພັນທາງການທູດເມື່ອປີ 1973. ການຢ້ຽມຢາມດຳເນີນໄປໃນສະພາວະການທີ່ສອງປະເທດ ຫາກໍຈັດພິທີສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ແລະ ສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງເປັນທາງການ, ການຢ້ຽມຢາມຫວຽດນາມ ຂອງນາຍົກລັດຖະມົນຕີ ອີຕາລີ ຄັ້ງນີ້ ສືບຕໍ່ປັບປຸງ ແລະເຮັດໃຫ້ການພົວພັນລະຫວ່າງ ຫວຽດນາມ ແລະ ອີຕາລີ ເລິກເຊິ່ງກວ່າ.
ທ່ານນາຍົກລັດຖະມົນຕີ Matteo Renzi
|
ຫວຽດນາມ ແລະ ອີຕາລີ ສ້າງຕັ້ງສາຍພົວພັນທາງການທູດຢ່າງເປັນທາງການເມື່ອວັນທີ 23/3/1973. ການພົວພັນດ້ານການເມືອງລະຫວ່າງສອງປະເທດ ນັບແຕ່ຊຸມປີ 90 ໄດ້ຮັບການປັບປຸງ ແລະ ພັດທະນາຢ່າງເຫັນໄດ້ຊັດ. ອີຕາລີ ແມ່ນປະເທດ ເອີລົບຕາເວັນຕົກ ທຳອິດ ທີ່ໄດ້ຕັ້ງຫນ້າສະຫນັບສະຫນູນເພີ່ມທະວີການຮ່ວມມືລະຫວ່າງ ຫວຽດນາມ ແລະ ສະຫະພາບເອີລົບ, ຢູ່ບັນດາເວທີປາໄສສາກົນໃຫຍ່ກໍຄືເລື່ອງ ສ້າງການພົວພັນລະຫວ່າງຫວຽດນາມ ແລະ ບັນດາອົງການການເງິນ, ການຄ້າ, ເງິນຕາສາກົນໃນຊຸມປີ 90 ເປັນປົກກະຕິ. ສອງປະເທດ ຮັກສາການແລກປ່ຽນຄະນະຜູ້ແທນຂັ້ນສູງ ເປັນປະຈຳ. ໃນການພົບປະຄັ້ງຕ່າງໆ, ການນຳຂັ້ນສູງ ອີຕາລີ ຍາມໃດກໍຢືນຢັນຄວາມຕັດສິນໃຈ ຊຸກຍູ້ການພົວພັນຮ່ວມມືຫລາຍດ້ານກັບຫວຽດນາມ, ຖືຫວຽດນາມ ແມ່ນປະເທດໃຫ້ບຸລິມະສິດພັດທະນາການພົວພັນຢູ່ພາກພື້ນ ອາຊີຕາເວັນອອກສ່ຽງໃຕ້ ແລະ ແມ່ນຈຸດນັດພົບຂອງບັນດາວິສາຫະກິດ ອີຕາລີ ນັບແຕ່ນີ້ຮອດປີ 2020.
ຍົກການພົວພັນຂຶ້ນສູ່ລະດັບສູງໃຫມ່
ເພື່ອຜັນຂະຫຍາຍຄວາມຕັດສິນໃຈຂອງການນຳສອງປະເທດ ນຳການພົວພັນລະຫວ່າງ ຫວຽດນາມ ແລະ ອີຕາລີ ກ້າວເຂົ້າສູ່ໄລຍະໃຫມ່, ວັນທີ 21/1/2013, ຫວຽດນາມ ແລະ ອີຕາລີ ໄດ້ລົງນາມໃນຖະແຫລງການຮ່ວມ ກ່ຽວກັບການສ້າງຕັ້ງຄູ່ຮ່ວມມືຍຸດທະສາດ ເນື່ອງໃນໂອກາດການຢ້ຽມຢາມທາງລັດຖະກິດເຖິງ ອີຕາລີຂອງທ່ານ ເລຂາທິການໃຫຍ່ ພັກກອມມູນິດຫວຽດນາມ ຫງວຽນຟູຈ້ອງ. ຕໍ່ຈາກນັ້ນ ສອງຝ່າຍ ໄດ້ລົງນາມໃນແຜນການດຳເນີນງານ ເພື່ອຜັນຂະຫຍາຍຄູ່ຮ່ວມມືຍຸດທະສາດໄລຍະ 2013-2014. ເມື່ອຕີລາຄາກ່ຽວກັບຂີດໝາຍສຳຄັນ ລະຫວ່າງສອງປະເທດ, ທ່ານ Lorenzo Angeloni, ເອກອັກຄະລັດຖະທູດ ອີຕາລີ ປະຈຳຫວຽດນາມ ຢືນຢັນວ່າ:
“ສັນຍາຄູ່ຮ່ວມມືຍຸດທະສາດ ແມ່ນສັນຍາສະບັບສຳຄັນທີ່ສຸດ ເພາະວ່າ ປະເທດທີ່ລົງນາມໃນສັນຍານີ້ບໍ່ມີຫລາຍ. ກ່ອນ ອີຕາລີ ມີພຽງອັງກິດ ແລະ ເຢຍລະມັນລົງນາມໃນສັນຍາຄູ່ຮ່ວມມືຍຸດທະສາດກັບຫວຽດນາມ. ພວກຂ້າພະເຈົ້າຫວັງວ່າ: ບັນດາຜົນສຳເລັດຊື່ງສັນຍານີ້ນຳມາໃຫ້ສອງຝ່າຍໃນທຸກຂົງເຂດ. ຕາມຂ້າພະເຈົ້າແລ້ວ, ສັນຍາຄູ່ຮ່ວມມືຍຸດທະສາດບໍ່ພຽງແຕ່ວາງອອກບັນດາຂົງເຂດຊື່ງພວກເຮົາພ້ອມກັນຮ່ວມມືເທົ່ານັ້ນ ຫາກຍັງສ້າງສະພາບແວດລ້ອມທີ່ໂປ່ງໃສ, ມີຄວາມເຊື່ອໝັ້ນເຊິ່ງກັນ ແລະ ກັນ. ບົນພື້ນຖານນັ້ນ, ການຮ່ວມມື ແລະ ຊຸກຍູ້ການພົວພັນລະຫວ່າງຫວຽດນາມ ແລະ ອີຕາລີ ຈະສະດວກກວ່າ.”
ເຖິງວ່າວົງເງິນການຄ້າ 2 ສົ້ນເພີ່ມຂຶ້ນຢ່າງຕໍ່ເນື່ອງໃນຊຸມປີຜ່ານມາກໍ່ຕາມ, ແຕ່ວ່າ ຕາມການຕີລາຄາຂອງທັງ 2 ຝ່າຍ ແມ່ນຍັງບໍ່ທັນສົມກັບຄວາມສາມາດບົມຊ້ອນດ້ານເສດຖະກິດຂອງແຕ່ລະປະເທດເທື່ອ. ປີ 2013, ວົງເງິນການຄ້າ 2 ສົ້ນລະຫວ່າງຫວຽດນາມ - ອີຕາລີ ບັນລຸ 3,5 ຕື້ USD (ເມື່ອທຽບໃສ່ລະດັບ 2,8 ຕື້ USD ໃນປີ 2012). ກ່ຽວກັບການລົງທຶນ, ໄລ່ຮອດປີ 2013, ອີຕາລີ ຢືນອັນດັບທີ 29 ໃນຈຳນວນ 100 ປະເທດ ແລະ ເຂດແຄວ້ນທີ່ລົງທຶນເຂົ້າຫວຽດນາມ ດ້ວຍ 53 ໂຄງການລົງທຶນ ລວມຍອດຈຳນວນທຶນເກືອບ 295 ລ້ານ USD, ເປັນຕົ້ນແມ່ນໃນບັນດາຂະແໜງອຸດສາຫະກຳຜະລິດປຸ້ງແຕ່ງ, ປະດິດສ້າງ, ເກີບໜັງ, ກໍ່ສ້າງ… ເພື່ອຫັນການພົວພັນຄູ່ຮ່ວມມືຍຸດທະສາດເປັນລະອຽດ, ຫວ່າງມໍ່ໆມານີ້, ອີຕາລີ ໄດ້ນຳຫວຽດນາມ ເຂົ້າບັນຊີລາຍຊື່ຕະຫຼາດ 10 ແຫ່ງຫາກໍ່ພົ້ນເດັ່ນຂຶ້ນ ເຊິ່ງຈະໄດ້ຮັບບຸລິມະສິດພັດທະນາດ້ານການຄ້າ ແລະ ການລົງທຶນ. ຕາມທ່ານເອກອັກຄະລັດຖະທູດອີຕາລີ ປະຈຳຫວຽດນາມ Lorenzo Angeloni ແລ້ວ, ແນ່ນອນວ່າ ມີວຽກງານຫຼາຍຢ່າງເຊິ່ງ 2 ປະເທດຕ້ອງເຮັດໃນໄລຍະຈະມາເຖິງ ເພື່ອຊຸກຍູ້ການພົວພັນດ້ານເສດຖະກິດ, ການຄ້າ ແລະ ການລົງທຶນ.
“ປະຈຸບັນ, ພວກເຮົາໄດ້ມີເງື່ອນໄຂຢ່າງພຽງພໍ ເພື່ອມີບັນດາບາດກ້າວພັດທະນາກວ່າອີກໃນການພົວພັນລະຫວ່າງຫວຽດນາມ - ອີຕາລີ. ໃນຂົງເຂດເສດຖະກິດ, ທັງ ຫວຽດນາມ ແລະ ອີຕາລີ ລ້ວນແຕ່ມີຈຸດທີ່ຄ້າຍຄືກັນ ນັ້ນແມ່ນ ເສດຖະກິດຫວຽດນາມ ແລະ ອີຕາລີ ລ້ວນແຕ່ອີງໃສ່ພື້ນຖານພັດທະນາຂອງບັນດາວິສາຫະກິດຂະໜາດກາງ ແລະ ນ້ອຍ. ພວກຂ້າພະເຈົ້າໄດ້ມີບັນດາວິສາຫະກິດຂະໜາດກາງ ແລະ ນ້ອຍ ທີ່ພວມປະສົບຜົນສຳເລັດໃນໂລກ ແລະ ເຂົາເຈົ້າຈະມຸ່ງໄປສູ່ຫວຽດນາມ ຄືຕະຫຼາດໃໝ່.
“ພວກເພື່ອນກໍ່ມີບັນດາວິສາຫະກິດພັດທະນາສະເພາະຂອງຕົນ ແຕ່ເຂົາເຈົ້າກໍ່ຕ້ອງມີບັນດາເຄື່ອງໝາຍການຄ້າ ກໍ່ຄືມີເຕັກໂນໂລຊີສະເພາະຂອງຕົນ. ດັ່ງນັ້ນ, ເລື່ອງສ້າງຂົວເຊື່ອມຕໍ່ໃຫ້ແກ່ບັນດາວິສາຫະກິດ ອີຕາລີ ແລະ ວິສາຫະກິດ ຫວຽດນາມ ພົບປະກັນ, ພ້ອມກັນເຮັດວຽກແມ່ນຈຳເປັນ. ສິ່ງດັ່ງກ່າວກໍ່ມີຄວາມໝາຍວ່າ: ບັນດາວິສາຫະກິດ ອີຕາລີ ອາດຈະຊອກຫາບັນດາຄູ່ຮ່ວມມືຢູ່ ຫວຽດນາມ ແລະ ບັນດາຜະລິດຕະພັນໄດ້ຮັບການຜະລິດຢູ່ ຫວຽດນາມ ຈະມີເຄື່ອງໝາຍການຄ້າຂອງບໍລິສັດທີ່ມີຊື່ສຽງຂອງພວກຂ້າພະເຈົ້າ ແລະ ສົ່ງອອກເຖິງບັນດາປະເທດ ເອີລົບ”
ຜັນຂະຫຍາຍການພົວພັນຄູ່ຮ່ວມມືຍຸດທະສາດໂດຍໄວ
ການພັວພັນ ຫວຽດນາມ - ອີຕາລີ ໃນຂົງເຂດອື່ນໆຄື: ວັດທະນະທຳ, ການທ່ອງທ່ຽວ, ການສຶກສາ ລ້ວນແຕ່ໄດ້ຮັບການຮັບຮູ້ດ້ວຍບັນດາຜົນງານທີ່ຕັ້ງໜ້າ. ລັດຖະບານ ອີຕາລີ ສົມທົບກັບ UNESCO ຊ່ວຍເຫຼືອ ຫວຽດນາມ ບູລະນະປະຕິສັງຂອນເຂດປູຊະນີຍະສະຖານ ໝີເຊີນ ດ້ວຍຍອດຈຳນວນທຶນກ່ວາ 435.000 USD, ພ້ອມທັງຊ່ວຍບຳລຸງສ້າງ ແລະ ສຶກສາຄວາມຮູ້ກ່ຽວກັບການອະນຸລັກຮັກສາມໍລະດົກວັດທະນະທຳຕາມມາດຖານສາກົນໃຫ້ພະນັກງານ ຄົ້ນຄ້ວາປະຫວັດສາດເດີມ, ນັກສະຖາປານິກ, ນັກຊ່ຽວຊານ ແລະ ພະນັກງານຄຸ້ມຄອງ. ໜ້າເອົາໃຈໃສ່ນັ້ນແມ່ນ, ເລື່ອງ 2 ປະເທດຈັດຕັ້ງເຫດການປີ ຫວຽດນາມ ຢູ່ ອີຕາລີ ແລະ ປີ ອີຕາລີ ຢູ່ ຫວຽດນາມ ປີ 2013 ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດ (1973 – 2013) ສຳເລັດຜົນ, ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ປະຊາຊົນ 2 ປະເທດ.
ບົນພື້ນຖານການພົວພັນມິດຕະພາບອັນດີງາມນັ້ນ, ການຢ້ຽມຢາມເປັນຄັ້ງທຳອິດຂອງທ່ານນາຍົກລັດຖະມົນຕີ ອີຕາລີ ເຖິງ ຫວຽດນາມ ນັ້ນໄດ້ສ້າງກຳລັງໜູນໃໝ່ໃຫ້ແກ່ການພົວພັນລະຫວ່າງ 2 ປະເທດ. ແນ່ນອນວ່າການເຈລະຈາ, ພົບປະຄັ້ງຕ່າງໆໃນການຢ້ຽມຢາມຄັ້ງນີ້ຂອງ ທ່ານນາຍົກລັດຖະມົນຕີ Matteo Renzi ກັບບັນດາຜູ້ນຳ ຫວຽດນາມ ເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໝັ້ນຄົງກ່ວາອີກໃນໄລຍະຈະມາເຖິງ.