(vovworld)- ການຢ້ຽມຢາມຫວຽດນາມ ຂອງປະທານາທິບໍດີ ອິນເດຍ Pranab Mukherjee ໃນວັນທີ 14-17/9/2014 ຕາມຄຳເຊີນຂອງທ່ານປະທານປະເທດຫວຽດນາມ ເຈືອງເຕີນຊາງ ແມ່ນເຫດການສຳຄັນໃນການພົວພັນລະຫວ່າງ ຫວຽດນາມ ແລະ ອິນເດຍ. ການຢ້ຽມຢາມຈະຊຸກຍູ້ຢ່າງແຮງການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດທີ່ມີຢູ່ແລ້ວລະຫວ່າງສອງປະເທດ. ເນື່ອງໃນໂອກາດນີ້ ນັກຂ່າວ ທູຮວາ ມີບົດຂຽນທີ່ພາດຫົວຂໍ້ວ່າ: ຍົກການພົວພັນຄູ່ຮ່ວມມືຍຸດທະສາດ ຫວຽດນາມ - ອິນເດຍ ຂຶ້ນສູ່ລະດັບສູງໃຫມ່
ພິທີຕ້ອນຮັບທ່ານປະທານາທິບໍດີ ອິນເດຍ Pranab Mukherjee
ພາບ:dantri.com
|
ການພົວພັນມິດຕະພາບທີ່ເປັນມູນເຊື້ອມີມາແຕ່ດົນນານລະຫວ່າງຫວຽດນາມ ແລະ ອິນເດຍ ແມ່ນເລີ່ມຕົ້ນແຕ່ທົດສະວັດຕົ້ນຂອງສັດຕະວັດທີ 20 ໂດຍທ່ານປະທານໂຮ່ຈິມີນ ແລະ ທ່ານນາຍົກລັດຖະມົນຕີ Jawaharlan Nehru ກໍ່ຕັ້ງ ແລະ ໄດ້ຮັບການເພີ່ມພູນຄູນສ້າງຈາກການນຳລຸ້ນຕ່າງໆພ້ອມກັບປະຊາຊົນສອງປະເທດ. ອິນເດຍ ໄດ້ຕັ້ງຫນ້າສະຫນັບສະຫນູນຫວຽດນາມໃນບັນດາການຕໍ່ຕ້ານຍາດເອົາເອກະລາດ, ໂຮມປະເທດຊາດເປັນເອກະພາບກ່ອນນີ້ ກໍຄືໃນພາລະກິດປ່ຽນແປງໃຫມ່ ແລະ ພັດທະນາປະຈຸບັນ. ປີ 1954 ອິນເດຍ ເປີດສະຖານກົງສູນໃຫຍ່ ຢູ່ຮ່າໂນ້ຍ, ຫລັງຈາກນັ້ນ ປີ 1956 ຫວຽດນາມ ເປີດສະຖານກົງສູນໃຫຍ່ ຢູ່ ນິວດີລີ. ວັນທີ 7/1/1972, ສອງປະເທດຍົກການພົວພັນຂຶ້ນສູ່ລະດັບສະຖານທູດ.
ປະສິດທິຜົນຈາກການພົວພັນມິດຕະພາບທີ່ເປັນມູນເຊື້ອ
ປະຈຸບັນ, ການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດ ຫວຽດນາມ - ອິນເດຍ ພວມພັດທະນາອັນຈົບງາມ, ສອງປະເທດ ແລກປ່ຽນຫລາຍຄະນະຜູ້ແທນຂັ້ນສູງ. ໃນການຢ້ຽມຢາມອິນເດຍຂອງທ່ານ ນາຍົກລັດຖະມົນຕີ ຫງວຽນເຕີນຢູງ ເມື່ອເດືອນ 7/2007, ສອງປະເທດ ໄດ້ລົງນາມໃນຖະແຫລງການຮ່ວມຢ່າງເປັນທາງການກ່ຽວກັບການສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ. ປີ 2011, ການຢ້ຽມຢາມ ອິນເດຍ ຂອງທ່ານປະທານປະເທດ ເຈືອງເຕີນຊາງ ໄດ້ຫັນການພົວພັນຄູ່ຮ່ວມມືຍຸດທະສາດ ລະຫວ່າງສອງປະເທດປະເທດໃຫ້ປະກົດຜົນເປັນຈິງໃນ ດ້ວຍ ຂໍ້ຕົກລົງການຮ່ວມມືສອງຝ່າຍ 7 ສະບັບ. ຕໍ່ຈາກນັ້ນ, ໃນການຢ້ຽມຢາມ ອິນເດຍຂອງທ່ານຮອງນາຍົກລັດຖະມົນຕີ ຫງວຽນທ້ຽນເຍີນ (4/2012), ສອງປະເທດ ໄດ້ລົງນາມໃນເອກະສານຮ່ວມມື 9 ສະບັບກ່ຽວກັບການຄົ້ນຄ້ວາ ແລະ ນຳໃຊ້ເຕັກໂນໂລຊີ ນາໂນ, ເຕັກໂລໂລຊີຊີວະສາດ, ເຕັກໂນໂລຊີຂໍ້ມູນຂ່າວສານ, ການປ່ຽນແປງຂອງດິນຟ້າອາກາດ, ການຄົ້ນຄ້ວາກ່ຽວກັບອິນເດຍ, ການຄົ້ນຄ້ວາກ່ຽວກັບຫວຽດນາມ ແລກປ່ຽນນັກຮຽນ ແລະ ອາຈານ. ໃນການຢ້ຽມຢາມອິນເດຍຂອງທ່ານ ຫງວຽນຟູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ເມື່ອເດືອນ 11/2013, ສອງປະເທດໄດ້ອອກຖະແຫລງການຮ່ວມ ແລະ ລົງນາມໃນຂໍ້ຕົກລົງການຮ່ວມມືໃນຫລາຍຂົງເຂດ 8 ສະບັບ.
ຄຽງຄູ່ກັນການແລກປ່ຽນຄະນະຜູ້ແທນຂັ້ນສູງ, ບັນດາກົນໄກຮ່ວມມືລະຫວ່າງສອງປະເທດ ກໍໄດ້ຮັບການຊຸກຍູ້ຢ່າງແຮງໃນໄລຍະຜ່ານມາຄື: ກົນໄກຄະນະກຳມະການລະຫວ່າງລັດຖະບານ ຫວຽດນາມ - ອິນເດຍ ກ່ຽວກັບວິທະຍາສາດ, ເຕັກນິກ ແລະ ວັດທະນະທຳ, ການສຶກສາ; ກົນໄກທາບທາມຄຳເຫັນດ້ານການເມືອງລະຫວ່າງສອງກະຊວງການຕ່າງປະເທດ, ກົນໄກເຈລະຈາຍຸດທະສາດລະຫວ່າງສອງກະຊວງການຕ່າງປະເທດ.
ການພົວພັນຮ່ວມມືທຸກດ້ານພວມໄດ້ຮັບການຊຸກຍູ້
ຫວຽດນາມ ແລະ ອິນເດຍ ແມ່ນຄູ່ຮ່ວມມືດ້ານການຄ້າສຳຄັນຂອງກັນ. ສະເພາະປີ 2013, ວົງເງິນການຄ້າລະຫວ່າງ ຫວຽດນາມ ແລະ ອິນເດຍ ບັນລຸ 5,23 ຕື້ ໂດລາສະຫະລັດ(ເພີ່ມຂຶ້ນ 32% ເມື່ອທຽບໃສ່ປີ 2012) ແລະ ອາດຈະບັນລຸ 7 ຕື້ ໂດລາສະຫະລັດໃນປີ 2015, ມູ່ງໄປເຖິງຈຸດໝາຍບັນລຸ 15 ຕື້ ໂດລາສະຫະລັດໃນປີ 2020. ຫວຽດນາມ ສົ່ງສິນຄ້າໄປຂາຍຢູ່ ອິນເດຍ ສ່ວນຫລາຍແມ່ນໂທລະສັບປະເພດຕ່າງໆ ແລະ ເຄື່ອງອາໄຫລ່; ກົນຈັກອຸປະກອນ. ຫວຽດນາມ ນຳເຂົ້າສິນຄ້າຈາກອິນເດຍ ສ່ວນຫລາຍແມ່ນສາລີ, ຫົວອາຫານສັດ ແລະ ອຸປະກອນ; ການຢາ. ການພົວພັນລົງທຶນລະຫວ່າງສອງະເທດ ຄາດວ່າ ຈະເພີ່ມຂຶ້ນຢ່າງໄວໃນໄລຍະຈະມາເຖິງ ເມື່ອ ກຸ່ມ ບໍລິສັດ TATA ຂອງອິນເດຍ ປະຕິບັດໂຄງການໄຟຟ້າໃຊ້ພະລັງຄວາມຮ້ອນ ລອງຟູ 2 ລວມມູນຄ່າ 1,8 ຕື້ ໂດລາສະຫະລັດ ຢູ່ ແຂວງ ຊອກຈັງ. ໄລ່ມາຮອດປະຈຸບັນ, ອິນເດຍ ມີ 73 ໂຄງການລົງທຶນໂດຍກົງຢູ່ ຫວຽດນາມ ດ້ວຍຍອດຈຳນວນທຶນຈົດທະບຽນແມ່ນ 273 ລ້ານໂດລາສະຫະລັດ. ໃນ 3 ປີຜ່ານມາ, ອິນເດຍ ສະຫງວນໃຫ້ແກ່ຫວຽດນາມ ບ້ວງສິນເຊື່ອບຸລິມະສິດພັດທະນາລວມມູນຄ່າ 19,5 ລ້ານ ໂດລາສະຫະລັດ, ໃນນັ້ນກວ່າ 10 ລ້ານໂດລາສະຫະລັດໃຫ້ແກ່ໂຄງການໄຟຟ້ານ້ຳຕົກ ນ້ຳຈາຍ (ເຊີນລາ). ປະຈຸບັນ ສອງຝ່າຍພວມປຶກສາຫາລືບັນດາມາດຕາກ່ຽວກັບບ້ວງສິນເຊື່ອລວມມູນຄ່າ 100 ລ້ານໂດລາສະຫະລັດຊື່ງ ອິນເດຍ ສະຫງວນໃຫ້ແກ່ຫວຽດນາມ.
ການພົວພັນຮ່ວມມືຂຸດຄົ້ນນ້ຳມັນອາຍແກສ ລະຫວ່າງ ຫວຽດນາມ ແລະ ອິນເດຍ ນັບແຕ່ປີ 1988 ມາຮອດປະຈຸບັນ ຍາມໃດກໍບັນລຸປະສິດທິຜົນສູງ. ໃນການຢ້ຽມຢາມອິນເດຍເມື່ອປີ 2011 ຂອງປະທານປະເທດ ເຈືອງເຕີນຊາງ, ສອງຝ່າຍໄດ້ເຫັນດີເພີ່ມທະວີການຮ່ວມມືກ່ຽວກັບການສຳຫລວດ, ຂຸດຄົ້ນບໍ່ແຮ່, ນ້ຳມັນອາຍແກສ ໃນນັ້ນ ອິນເດຍ ຢືດໝັ້ນປະຕິບັດບັນດາໂຄງການສຳຫລວດ ແລະ ຂຸດຄົ້ນບັນດາບໍ່ນ້ຳມັນມີຄວາມສາມາດບົ່ມຊ້ອນຂອງຫວຽດນາມ. ຄຽງຄູ່ກັນນັ້ນ ສອງປະເທດ ໄດ້ຕົກລົງ, ລົງນາມໃນສັນຍາ, ຂໍ້ຕົກລົງ, ບົດບັນທຶກຊ່ວຍຈຳກ່ຽວກັບບັນດາຂົງເຂດ, ຄົ້ນຄ້ວາວິທະຍາສາດ ແລະ ເຕັກນິກກະສິກຳ, ການເຄື່ອນໄຫວໄປມາຂອງພົນລະເມືອງສອງປະເທດ, ສັນຍາກ່ຽວກັບການສົ່ງຜູ້ຮ້າຍ, ການຄົ້ນຄ້ວາ ແລະ ບຳລຸງສ້າງໃນຂົງເຂດກະສິກຳ ແລະ ສິນໃນນ້ຳ, ການຮ່ວມມືກ່ຽວກັບການຂຸດຄົ້ນນ້ຳມັນອາຍແກສ.
ໃນຫລາຍປີມານີ້, ອິນເດຍ ໄດ້ຕັ້ງຫນ້າ ຊ່ວຍຫວຽດນາມບຳລຸງສ້າງແຫລ່ງຊັບພະຍາກອນມະນຸດມີຄຸນນະພາບສູງໃນຫລາຍຂົງເຂດຄື: ເຕັກໂນໂລຊີຂໍ້ມູນຂ່າວສານ, ເສດຖະກິດ, ກົດໝາຍ, ພາສາອັງກິດ… ດ້ວຍທຶນສຶກສາ ໄລຍະຍາວ ແລະ ໄລຍະສັ້ນ 150 ທຶນ. ອິນເດຍ ໄດ້ເປີດສູນສອນພາສາອັງກິດຢູ່ ນະຄອນ ດາຫນັງ; ສູນສອນພາສາອັງກິດຢູ່ ວິທະຍາຄານປ້ອງກັນຊາດ ແລະ ພວມຊຸກຍູ້ເປີດສູນວັດທະນະທຳ ອິນເດຍ ຢູ່ ຮ່າໂນ້ຍ ໃນປີນີ້. ສອງປະເທດ ໄດ້ຕໍ່ກຳນົດເວລາລາຍການແລກປ່ຽນວັດທະນະທຳ, ຈັດຕັ້ງການເຄື່ອນໄຫວວັດທະນະທຳ, ສິລະປະທີ່ຟົດຟື້ນຫລາຍຢ່າງຄື: ງານບຸນອາຫານການກິນ, ການພົວພັນແລກປ່ຽນສິລະປະ, ງານບຸນພຸດທະສາສະຫນາ… ໃນປີ 2013.
ໃນການຢ້ຽມຢາມຫວຽດນາມຄັ້ງນີ້ຂອງທ່ານ ປະທານາທິບໍດີ ອິນເດຍ Pranab Mukherjee, ສອງຝ່າຍຈະພ້ອມກັນສຳຫລວດການຜັນຂະຫຍາຍບັນດາໝາກຜົນທີ່ບັນລຸໄດ້ໃນການຢ້ຽມຢາມຄັ້ງຕ່າງໆຂອງການນຳສອງະເທດ, ພິເສດ ແມ່ນການຢ້ຽມຢາມ ອິນເດຍ ຂອງທ່ານປະທານປະເທດ ເຈືອງເຕີນຊາງເມື່ອເດືອນ 10/2011 ແລະ ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູຈ້ອງ ເມື່ອເດືອນ 11/2013. ຕາມລາຍການແລ້ວ, ມີເອກະສານຫລາຍສະບັບຈະໄດ້ຮັບການລົງນາມໃນການຢ້ຽມຢາມຫວຽດນາມ ຄັ້ງນີ້ ຂອງປະທານາທິບໍດີ ອິນເດຍ ແມ່ນຫັນການຮ່ວມມືໃຫ້ເປັນລະອຽດໃນລະດັບສູງໃຫມ່ຂອງການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດລະຫວ່າງສອງປະເທດໃນອະນາຄົດ.