(vovworld) – ວັນທີ 5/3, ປະທານນາທິບໍດີມຽນມາ Thein Sein ໄດ້ໄປຮອດ ແບນຊິກ, ເຊິ່ງແມ່ນປະເທດທີ 4 ໃນການເດີນທາງໄປປະຕິບັດງານຢູ່ 5 ປະເທດທີ່ເປັນສະມາຊິກຂອງສະຫະພາບເອີລົບຄື: ນອກແວ, ແຟງລັງ, ອົດຕາລິດ, ແບນຊິກ ແລະ ອີຕາລີ, ນັບແຕ່ທ້າຍສັບປະດາກ່ອນ. ນີ້ແມ່ນການຢ້ຽມຢາມເອີລົບຄັ້ງທຳອິດຂອງທ່ານ Thein Sein ໃນຖານະເປັນປະທານາທິບໍດີ ເພື່ອແນໃສ່ເຮັດໃຫ້ສາຍພົວພັນກັບບັນດາປະເທດຝ່າຍຕາເວັນຕົກເລິກເຊິ່ງກວ່າອີກ. ບັນດາຜົນງານທີ່ບັນລຸໄດ້ໃນການຢ້ຽມຢາມສາມາດຕອບສະໜອງຈຸດປະສົງຂອງມຽນມາ ໄດ້ສ່ວນໃດສ່ວນໜຶ່ງ.
ປະທານາທິບໍດີ Thein Sein ຊອກຫາຄູ່ຮ່ວມມືໃໝ່ເອີລົບ
(ພາບ: The Nation)
ການຢ້ຽມຢາມຂອງທ່ານ Thein Sein ຖືກຖືວ່າ ແມ່ນການຫັນບັນດາກາລະໂອກາດຮ່ວມມື ເຊິ່ງທ່ານ ແລະ ການນຳ 5 ປະເທດດັ່ງກ່າວໄດ້ເຕື້ອງເຖິງໃນການພົບປະຕ່າງໆຢູ່ນອກກອງປະຊຸມ ASEM 9 ເຊິ່ງຈັດຂຶ້ນຢູ່ວຽງຈັນ (ລາວ) ເມື່ອທ້າຍປີ 2012 ແລະ ການຢ້ຽມຢາມມຽນມາຫວ່າງແລ້ວນີ້ຂອງເຈົ້າໜ້າທີ່ປະເທດຕ່າງໆເປັນລະອຽດ. ໂດຍລະອຽດແມ່ນ, ໃນການຢ້ຽມຢາມນອກແວ, ສອງຝ່າຍໄດ້ເຕື້ອງເຖິງການຊ່ວຍເຫຼືອພັດທະນາ, ການຮັກສາສິ່ງແວດລ້ອມ ແລະ ການຮ່ວມມືທາງດ້ານເສດຖະກິດ. ໃນການຢ້ຽມຢາມອົດຕະລິດ, ປະທານາທິບໍດີ Thein Sein ໄດ້ຢັ້ງຢືນເຖິງສາຍເຫດທີ່ພາໃຫ້ມຽນມາ ຂາດທຶນ ແລະ ເຕັກໂນໂລຢີທີ່ທັນສະໄໝ ແລະ ຄຳສັ່ງຂວ້ຳບາດທາງດ້ານເສດຖະກິດທີ່ແກ່ຍາວໃນຕະຫຼອດເວລາ 20 ປີທີ່ຜ່ານມາ. ທ່ານໄດ້ຮຽກຮ້ອງໃຫ້ຄູ່ຮ່ວມມືອົດຕະລິດ ຮ່ວມມືໃນບັນຫານີ້. ຄຳຮຽກຮ້ອງຂອງປະທານາທິບໍດີ Thein Sein ໄດ້ຮັບການສະໜັບສະໜູນຈາກຄູ່ຮ່ວມມື, ເມື່ອປະທານາທິບໍດີອົດຕະລິດທ່ານ Heinz Fischer ໃຫ້ຄຳໝັ້ນສັນຍາທີ່ວ່າ ລັດຖະບານອົດຕະລິດ ຈະສະໜັບສະໜູນບັນດາປະເທດທີ່ບັນລຸໄດ້ວິວັດທະນາການປະຕິຮູບ. ໃນຂະນະນັ້ນ, ກ່ອນການຢ້ຽມຢາມແບນຊິກ, ເຊິ່ງແມ່ນແຫ່ງທີ່ປະມຸກລັດມຽນມາ ຈະມີການເຈລະຈາກັບບັນດາເຈົ້າໜ້າທີ່ຂັ້ນສູງຂອງເອີລົບ ກ່ຽວກັບຫົວເລື່ອງຕ່າງໆຄື: ສິດທິມະນຸດ, ການປະຕິຮູບເສດຖະກິດ ແລະ ວິວັດທະນາການສ້າງສັນຕິພາບຄືນໃໝ່ຢູ່ທາງທິດເໜືອມຽນມາ, ປະທານາທິບໍດີ Thein Sein ໄດ້ຮຽກຮ້ອງໃຫ້ສະຫະພາບເອີລົບຍົກເລີກບັນດາຄຳສັ່ງຂວຳ້ບາດທີ່ມີຕໍ່ປະເທດນີ້.
ອາດເວົ້າໄດ້ວ່າ, ສຳລັບມຽນມາ, ເລື່ອງສ້າງ ແລະ ປັບປຸງການພົວພັນກັບອີຢູ ຈະນຳມາເຊິ່ງຜົນປະໂຫຍດຫຼາຍຢ່າງ, ພິເສດແມ່ນໃນສະພາບທີ່ມຽນມາພວມຕ້ອງການກຳລັງຄວາມສາມາດເພື່ອພັດທະນາ, ພາຍຫຼັງຫຼຸດພົ້ນອອກຈາກຄຳສັ່ງຂວ້ຳບາດ. ປະຈຸບັນ, ການລົງທຶນຂອງບັນດາປະເທດເອີລົບຢູ່ມຽນມາ ແມ່ນປະມານ 3,5 ຕື້ USD, ເຊິ່ງແມ່ນຕົວເລດບໍ່ຫຼາຍປານໃດ. ດັ່ງນັ້ນເລື່ອງເປີດກວ້າງການຮ່ວມມືກັບຝ່າຍຕາເວັນຕົກ ຈະນຳມາເຊິ່ງແຫຼ່ງທຶນ, ເຕັກໂນໂລຢີ ແລະ ພິເສດແມ່ນຄວາມສາມາດຄຸ້ມຄອງໃຫ້ແກ່ມຽນມາ ເພື່ອພັດທະນາໃນຕໍໜ້າ. ກົງກັນຂ້າມ, ດ້ວຍຄວາມສະດວກທາງດ້ານພູມີປະເທດ, ແຫຼ່ງຊັບພະຍາກອນທຳມະຊາດ, ແຫຼ່ງຊັບພະຍາກອນມະນຸດ ແລະ ຕະຫຼາດທີ່ຍັງບໍ່ທັນໄດ້ຮັບການຄຸດຄົ້ນນັ້ນ, ມຽນມາ ຈະກາຍເປັນປະເທດທີ່ດຶງດູດບັນດາປະເທດສະມາຊິກ ອີຢູ ເຂົ້າມາລົງທຶນ.
ການພົວພັນລະຫວ່າງມຽນມາ ກັບຝ່າຍຕາເວັນຕົກເລີ່ມພັດທະນາ, ພາຍຫຼັງທີ່ປະທານາທິບໍດີ Thein Sein ດຳເນີນການປະຕິຮູບ, ນັບແຕ່ຂຶ້ນກຳອຳນາດເມື່ອຕົ້ນປີ 2011. ໃນນັ້ນໜ້າສົນໃຈທີ່ສຸດນັ້ນແມ່ນເລື່ອງອຳນາດການປົກຄອງມຽນມາ ໄດ້ປ່ອຍນັກໂທດນັບຮ້ອຍຄົນ, ເຊິ່ງລວມມີນັກໂທດການເມືອງ, ສົ່ງເສີມຄວາມເສລີທາງດ້ານສື່ສານ, ອະນຸຍາດໃຫ້ບັນດານັກເຄື່ອນໄຫວຝ່າຍຄ້ານເຂົ້າຮ່ວມບັນຫາການເມືອງ ແລະ ເປີດປະຕູເພື່ອດຶງດູດການລົງທຶນຕ່າງປະເທດຢ່າງແຮງ. ບົນພື້ນຖານນັ້ນ, ເດືອນ 4/2012, ສະຫະພາບເອີລົບ ໄດ້ຢຸດຕິທຸກມາດຕະການລົງໂທດ, ເວັ້ນເສຍແຕ່ຂວ້ຳບາດດ້ານອາວຸດສຳລັບມຽນມາ ເທົ່ານັ້ນ. ປະທານຄະນະກຳມະການເອີລົບ ທ່ານ Jose Manuel Barroso ກໍ່ໝັ້ນໝາຍຊ່ວຍເຫຼືອປະເທດນີ້ 100 ລ້ານກວ່າ USD ເພື່ອພັດທະນາ, ເປີດຫ້ອງການຕາງໜ້າຂອງ ອີຢູ, ຢູ່ ຢາງກຸນ. ເດືອນ 9/2012, ຄະນະກຳມະການເອີລົບ ໄດ້ຮັບຮອງເອົາຂໍ້ລິເລີ່ມໃຫ້ມຽນມາ ໄດ້ຊົມໃຊ້ລະບຽບພິເສດດ້ານການຄ້າ ແລະ ຍົກເວັ້ນພາສີ, ຍົກເວັ້ນ ໂຄຕາໃຫ້ປະເທດນີ້ ເມື່ອສຳພັດກັບຕະຫຼາດເອີລົບ, ນັບແຕ່ຕົ້ນປີ 2013 ເປັນຕົ້ນໄປ. ໃນຂະນະນັ້ນ, ສະໂມສອນ ປາຮີ ໄດ້ຍົກເລີກບ້ວງໜີ້ສິນ 6 ລ້ານ USD ໃຫ້ແກ່ປະເທດນີ້.
ສິ່ງດັ່ງກ່າວບໍ່ໝາຍຄວາມວ່າການພົວພັນລະຫວ່າງອີຢູ ກັບມຽນມາ ມີຄວາມສະດວກສະບາຍທຸກຢ່າງ, ໂດຍສະເພາະແມ່ນໃນສະພາບທີ່ຍັງມີຄວາມວິຕົກກັງວົນຫຼາຍຢ່າງ ກ່ຽວກັບສະພາບການພາຍໃນປະເທດເຊັ່ນ: ການປະທະກັນທີ່ພວມດຳເນີນຢູ່ລັດ Kachin ແລະ ຄວາມຂາດສະຖຽນລະພາບລະຫວ່າງພຸດທະສາສະໜາ ກັບສາສະໜາອິດສະລາມຢູ່ລັດ Rakhine.
ເດືອນ 6/2012, ການນຳຝ່າຍຄ້ານຂອງມຽນມາ, ທ່ານນາງ Aung San Suu Kyi ໄດ້ໄປຢ້ຽມຢາມເອີລົບ. ການຢ້ຽມຢາມນີ້ຖືກຖືວ່າແມ່ນຂີດໝາຍສຳຄັນໃນວິວັດທະນາການການເມືອງຂອງມຽນມາ ແລະ ການຢ້ຽມຢາມເອີລົບເປັນເວລາ 10 ກວ່າວັນນີ້ ຂອງທ່ານປະທານາທິບໍດີ Thein Sein ໄດ້ສະແດງໃຫ້ເຫັນເຈດຕະນາດີຂອງມຽນມາ ແມ່ນຢາກເພີ່ມທະວີການຮ່ວມມືກັບເອີລົບໃນການພົວພັນຕ່າງຝ່າຍຕ່າງມີຜົນປະໂຫຍດ. ການຢ້ຽມຢາມກໍ່ໄດ້ປະກອບສ່ວນຊຸກຍູ້ການພົວພັນຮ່ວມມືລະຫວ່າງ ອີຢູ ແລະ ອາຊຽນ, ເຊິ່ງໃນນັ້ນ ມຽນມາ ແມ່ນປະເທດສະມາຊິກທີ່ຕັ້ງໜ້າ.