ດ້ວຍຈຳນວນ 229 ບັດເຫັນດີ, 64 ບັດຄັດຄ້ານ ແລະ 6 ບັດຂາວ, ວັນທີ 16/7, ສະພາແຫ່ງຊາດເກຼັກ ໄດ້ຮັບຮອງເອົາຮ່າງກົດໝາຍວ່າດ້ວຍບັນດາມາດຕະການປະຕິຮູບຢ່າງໜັກຕາມຄວາມຮຽກຮ້ອງຕ້ອງການຂອງບັນດາເຈົ້າໜີ້ ແນໃສ່ແລກເອົາບ້ວງເງິນຊ່ວຍກູ້ໃໝ່ ລວມມູນຄ່າ 86 ຕື້ ເອີໂຣ( 94 ຕື້ USD ). ໃນຂະນະນັ້ນ, ບັນດາປະເທດສະມາຊິກອື່ນໃນພາກພື້ນໃຊ້ສະກຸນເງິນເອີໂຣລວມ Eurozone ກໍເລີ່ມຕົ້ນພິຈາລະນາສະໜອງ ບ້ວງເງິນຊ່ວຍກູ້ທີ 3 ໃຫ້ແກ່ອາແທນ. ເປັນອັນວ່າ ໃນເບື້ອງຕົ້ນ, ເກຼັກໄດ້ສາມາດຫຼຸດພົ້ນອອກຈາກຂອບເຂດອັນຕະລາຍ, ຫຼີກລ້ຽງຈາກການຖືກປັດເຂ່ຍອອກຈາກ Eurozone, ແຕ່ ເກຼັກສາມາດຟື້ນຕົວຂຶ້ນໃນໄລຍະທີ່ຈະມາເຖິງໄດ້ຫຼືບໍ່? ນັ້ນກໍແມ່ນບັນຫາທີ່ຍາວໄກ
 |
ຮ່າງກົດໝາຍໄດ້ຮັບການຮັບຮອງເອົາພາຍຫຼັງການໂຕ້ແຍ້ງທີ່ເຄັ່ງຕຶງຢູ່ສະພາແຫ່ງຊາດ, ພັກ ຊີຣີຊາ ກຳອຳນາດໄດ້ຮັບຮອງເອົາຮ່າງກົດໝາຍດັ່ງກ່າວ ໂດຍອີງບົນການສະໜັບສະໜູນຈາກບັນດາພັກຝ່າຍຄ້ານທີ່ມີທັດສະນະສະໜັບສະໜູນເອີລົບ. ແຕ່ມີ ສ.ສ.ຊ 38 ທ່ານສັງກັດພັກ ຊີຣີຊາໄດ້ປ່ອນບັດຂາວຫຼືບັດຄັດຄ້ານ, ໃນນັ້ນ, ມີທັງບັນດາບຸກຄົນທີ່ພວມດຳລົງຕຳແໜ່ງສຳຄັນໃນຄະນະລັດຖະບານ. ສິ່ງດັ່ງກ່າວໄດ້ສະແດງໃຫ້ເຫັນການແບ່ງແຍກພາຍໃນພັກກຳອຳນາດທີ່ມີຕໍ່ການປະຕິບັດບັນດາມາດຕະການຮັກເຂັມຄັດ, ຊຶ່ງເຄີຍຖືກຜູ້ມີສິດປ່ອນບັດ ເກຼັກ ຄັດຄ້ານໃນການລົງປະຊາມະຕິກ່ອນນັ້ນ. ແຕ່ໃນຈຸເວລາປະຈຸບັນ, ເບິ່ງຄືວ່າ ບັນດາສ.ສ.ຊ ເກຼັກຍາກທີ່ຈະມີການຄັດເລືອກໃດໆເພື່ອປະຕິເສດຕໍ່ກັບຂໍ້ຕົກລົງນີ້.
ສິ່ງກີດຂວາງຂອງແຜນການຊ່ວຍກູ້
ຕາມຂໍ້ຕົກລົງທີ່ບັນລຸໄດ້ກັບ Eurozone ເມື່ອວັນທີ 13/7, ສະພາແຫ່ງຊາດ ເກຼັກຕ້ອງໄດ້ຮັບຮອງເອົາບັນດາການປ່ຽນແປງຢ່າງກ້ວາງຂວາງກ່ຽວກັບກົດໝາຍວ່າດ້ວຍແຮງງານ, ເງິນເດືອນ, ພາສີອາກອນ ເພື່ອໄດ້ຮັບ ບ້ວງເງິນຊ່ວຍໜູນຈາກ 82 – 86 ຕື້ເອີໂຣໃນຮອບ 3 ປີຂ້າງໜ້າ. ແຕ່ແຜນການນີ້ ຕ້ອງໄດ້ຮັບການຮັບຮອງເອົາຈາກສະພາແຫ່ງຊາດ 8 ປະເທດໃນພາກພື້ນ Eurozone ແລະ ວິວັດການນີ້ ຄາດຄະເນວ່າ ຈະຕ້ອງໃຊ້ເວລາ 2-3 ເດືອນ. ມາຮອດປະຈຸບັນ, ມີພຽງແຕ່ສະພາແຫ່ງຊາດຝະລັ່ງຮັບຮອງເອົາເທົ່ານັ້ນ ແລະ ວິວັດທະນາການນີ້ໄດ້ຮັບຖືວ່າ ແມ່ນຫຍຸ້ງຍາກພໍສົມຄວນເພາະວົງການນັກການເມືອງ ຫຼາຍປະເທດບໍ່ເຫັນດີກັບການຊ່ວຍກູ້ ເກຼັກ .
ບໍ່ພຽງແຕ່ເທົ່ານັ້ນ, ຄວາມຫຍຸ້ງຍາກຍັງເກີດມາຈາກຢູ່ພາຍໃນ ເກຼັກເອງ. ນັ້ນແມ່ນການແບ່ງແຍກຢ່າງເລິກເຊິ່ງຢູ່ໃນສະພາແຫ່ງຊາດ ເກຼັກ ຂະນະທີ່ນັບມື້ນັບມີຫຼາຍຄຳເຫັນຄັດຄ້ານຂໍ້ຕົກລົງຊ່ວຍກູ້ ຍ້ອນຖືວ່າ ນີ້ແມ່ນຂໍ້ຕົກລົງທີ່ຊົ່ວຮ້າຍທີ່ສຸດ. ສິ່ງນີ້ ໄດ້ບອກເຕືອນສັນຍານກ່ຽວກັບໄລຍະຂາດສະຖຽນລະພາບເລີ່ມເກີດຂຶ້ນຢູ່ປະເທດນີ້. ພ້ອມກັບບັນດາການປະຕິຮູບທີ່ໄດ້ຮຽກຮ້ອງປະຕິບັດນັ້ນ, ເກຼັກຍັງຕ້ອງຊອກຫາບັນດາເສັ້ນທາງເພື່ອເຕີບໂຕ ແລະ ນີ້ຈຶ່ງແມ່ນຄວາມທ້າທາຍຢ່າງແທ້ຈິງ.
ພຽງແຕ່ແມ່ນບັນດາມາດຕະການ “ຮັດເຂັມຄັດ”
ເຖິງວ່າໄດ້ຊ່ວຍ ເກຼັກ ຫຼີກລ້ຽງຈາກສະພາບລົ້ມລະລາຍໃນຈຸດເວລາສຸດທ້າຍກໍຕາມ, ແຕ່ກໍບໍ່ມີຄວາມໝາຍວ່າວົງການນັກຊ່ຽວຊານບໍ່ເປັນຫ່ວງຫຼາຍກ່ຽວກັບກໍລະນີລົມລະລາຍຂອງປະເທດນີ້ໃນອະນາຄົດ. ມີຄຳຖາມໃຫຍ່ຂໍ້ໜຶ່ງ, ນັ້ນແມ່ນການຊ່ວຍກູ້ ອາດຈະແກ່ຍາວການຄົງຕົວຂອງ ເກຼັກໄດ້ນານປານໃດ? . ກ່ຽວກັບບ້ວງເງິນຊ່ວຍກູ້ທີ 3 ນີ້, ຕາມບັນດາຜູ້ຊ່ຽວຊານແລ້ວ, ກໍເປັນການຍາກທີ່ຈະຮັບປະກັນກ່ຽວກັບຄວາມສາມາດຊຳລະໜີ້ສິນຂອງ ເກຼັກ ໃນອະນາຄົດ.
ໃນການຄົນຄ້ວາກ່ຽວກັບສະພາບການ ເກຼັກ ເມື່ອວັນທີ 14/7, IMF ໃຫ້ຂໍ້ສັງເກດວ່າ ໜີ້ສິນຂອງ ເກຼັກ ໃນຮອບ 10 ປີທີ່ຈະມາເຖິງ ຈະຫຼາຍກວ່າເມືອ່ທຽບໃສ່ການຄາດຄະເນ. IMF ຄາດຄະເນວ່າ ໜີ້ສາທາລະນະຂອງ IMF ຈະເທົ່າທຽມປະມານ 200% GDP ຂອງປະເທດນີ້ໃນປີໜ້າ, ເພີ່ມຂຶ້ນກວ່າ 20% ເມື່ອທຽບໃສ່ການຄາດຄະເນກ່ອນນັ້ນ, ສ່ວນໜຶ່ງກໍຍ້ອນພື້ນຖານເສດຖະກິດສືບຕໍ່ຊຸດໂຊມໃນປີນີ້. ດັ່ງນັ້ນ ເກຼັກຕ້ອງການຫຼາຍກວ່າບ້ວງເງິນຊ່ວຍກູ້ທີ່ມີມູນຄ່າປະມານ 86 ຕື້ເອີໂຣ ທີ່ຫາກໍບັນລຸໄດ້ເພື່ອສາມາດຮັກສາສະຖຽນລະພາບໃຫ້ພື້ນຖານເສດຖະກິດ.
ຍັງບໍ່ທັນຄາດຄະເນໄດ້ໃນອະນາຄົດ
ນັບແຕ່ເວລາເກີດວິກິດການເມື່ອປີ 2010, ອຳນາດການປົກຄອງຊຸດຕ່າງໆຂອງ ເກຼັກ , ໃນພື້ນຖານໄດ້ເດີນຕາມແບບວິທີແກ້ໄຂຂອງກຸ່ມ 3 ເຈົ້າໜີ້. ແຕ່ສິ່ງທີ່ເປັນໜ້າວິຕົກກັງວົນ, ນັ້ນແມ່ນ ເກຼັກ ນັບມື້ນັບຕົກເຂົ້າສູ່ສະພາບຊຸດໂຊມຢ່າງຮ້າຍແຮງ. ປະຈຸບັນອັດຕາການວ່າງງານຂອງ ເກຼັກແມ່ນ 26,5%, ຊຶ່ງແມ່ນຕົວເລກສູງສຸດຢູ່ເອີລົບ, ແລະ ໃນໄວໜຸ່ມ, ອັດຕາສ່ວນນີ້ ແມ່ນຂຶ້ນເຖິງ 60%. ນີ້ແມ່ນຜົນຮ້າຍຢ່ອນຫຼັງຈາກການຫຼຸດຜ່ອນເງິນເດືອນໃນພາກລັດ ແລະ ເພີ່ມອັດຕາພາສີອາກອນໃນຕະຫຼອດໄລຍະຊຸດໂຊມ. ບັນດາມາດຕະການຫຼຸດຜ່ອນຫຼາຍກວ່າອີກເພື່ອແລກເອົາ ບ້ວງເງິນຊ່ວຍກູ້ຄັ້ງນີ້ ຈະພາໃຫ້ພື້ນຖານເສດຖະກິດ ເກຼັກ ຍິ່ງຕົກເຂົ້າສູ່ສະພາບຈົນຕະແຈ. ສະພາບຂາດສະຖຽນລະພາບໃນສັງຄົມສືບຕໍ່ເກີດຂຶ້ນ, ຄວາມມານະອົດທົນຂອງປະຊາຊົນ ເກຼັກພວມຖືກສູນເສຍໄປຍ້ອນບັນດານະໂຍບາຍຂອງລັດຖະບານ. ວັນທີ 15/7, ຊາວ ເກຼັກ ນັບພັນຄົນໄດ້ພາກັນລົງຖະໜົນເດີນຂະບວນປະທ້ວງ ຄັດຄ້ານນະໂຍບາຍ ຮັດເຂັມຄັດ ແລະ ການເດີນຂະບວນປະທ້ວງໄດ້ກາຍເປັນການຈະລາຈົນ. ແນ່ນອນວ່າ ໃນຊຸມມື້ທີ່ຈະມາເຖິງ, ເກຼັກ ຍັງມີການຜັນແປຫຼາຍຢ່າງທີ່ຍາກຈະຄາດຄະເນໄວ້ລວງໜ້າ.