ພາຍຫຼັງ 30 ປີແຫ່ງການປ່ຽນແປງໃໝ່, ຫວຽດນາມ ບັນລຸໄດ້ຜົນງານອັນໃຫຍ່ຫຼວງຫຼາຍຢ່າງໃນທຸກຂົງເຂດ, ມີຄວາມໝາຍປະຫວັດສາດ. ນັ້ນແມ່ນ: ປະເທດຊາດຫຼຸດພົ້ນອອກຈາກວິກິດການເສດຖະກິດ, ສັງຄົມ, ກ້າວເຂົ້າສູ່ກຸ່ມປະເທດທີ່ມີລາຍຮັບປານກາງ. ໃນຕະຫຼອດໄລຍະ, ລະດັບເຕີບໂຕ GDP ສະເລ່ຍຢູ່ໃນລະດັບສູງ (ປີ 2014 ລື່ນກາຍລະດັບ 2.000 USD/ຄົນ), ຊີວິດການເປັນຢູ່ຂອງປະຊາຊົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ. ບັນດາຜົນງານດັ່ງກ່າວໄດ້ເຮັດໃຫ້ທີ່ຕັ້ງ ແລະ ກຳລັງແຮງຂອງຫວຽດນາມ ໄດ້ຮັບການຍົກສູງຂຶ້ນບົນເວທີສາກົນຢ່າງບໍ່ຢຸດຢັ້ງ. ເພື່ອບັນລຸໄດ້ບັນດາຜົນງານນັ້ນ, ໜຶ່ງໃນບັນດາສາຍເຫດນັ້ນແມ່ນຍ້ອນຫວຽດນາມ ໄດ້ດຶງດູດ ແລະ ເສີມຂະຫຍາຍທຸກໆແຫຼ່ງກຳລັງຂອງປະຊາຊົນຢ່າງບໍ່ຢຸດຢັ້ງ.
ຜົນງານໃນການດຶງດູດແຫຼ່ງກຳລັງຈາກປະຊາຊົນ
ໃນຕະຫຼອດຊຸມປີແຫ່ງການປ່ຽນແປງໃໝ່, ພ້ອມກັບການຍູ້ແຮງການພັດທະນາເສດຖະກິດ, ພັກ ແລະ ລັດຫວຽດນາມ ຍາມໃດກໍເອົາໃຈໃສ່, ເບິ່ງແຍງເຖິງການພັດທະນາຊີວິດການເປັນຢູ່ທຸກດ້ານຂອງປະຊາຊົນ; ເສີມຂະຫຍາຍສິດເປັນເຈົ້າຢ່າງແທ້ຈິງຂອງປະຊາຊົນບົນພື້ນຖານເພີ່ມທະວີກຸ່ນກ້ອນມະຫາສາມັກຄີທົ່ວປວງຊົນທັງຊາດ ແລະ ບັນລຸໄດ້ບັນດາໝາກຜົນທີ່ສຳຄັນກ່ຽວກັບການເບິ່ງແຍງດູແລຊີວິດການເປັນຢູ່ໃຫ້ປະຊາຊົນ, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ. ພົ້ນເດັ່ນແມ່ນໃນໄລຍະ 25 ປີ (1990 - 2015), ອັດຕາຄວາມທຸກຍາກຢູ່ຫວຽດນາມ ໄດ້ຫຼຸດແຕ່ລະດັບເກືອບ 60% ລົງເຫຼືອພຽງ 5,97% ດ້ວຍປະຊາຊົນກວ່າ 30 ລ້ານຄົນຫຼຸດພົ້ນອອກຈາກຄວາມທຸກຍາກ. ຫວຽດນາມ ກໍ່ບັນລຸໄດ້ບັນດາຜົນງານທີ່ໜ້າປະທັບໃຈກ່ຽວກັບດ້ານການສຶກສາ ແລະ ສາທາລະນະສຸກ. ອັດຕາສ່ວນນັກຮຽນໄດ້ເຂົ້າໂຮງຮຽນຊັ້ນປະຖົມບັນລຸກວ່າ 95% ແລະ ຢູ່ຊັ້ນມັດທະຍົມຕອນຕົ້ນແມ່ນ 80%. ຫວຽດນາມ ໄດ້ກາຍເປັນໜຶ່ງໃນບັນດາ “ຈຸດພົ້ນເດັ່ນ” ເຊິ່ງໄດ້ຮັບການຮັບຮອງຈາກທົ່ວໂລກກ່ຽວກັບວຽກງານຮັບປະກັນຊີວິດສັງຄົມ. ພ້ອມກັບວິວັດທະນາການພັດທະນາປະເທດຊາດນັ້ນ, ບົດບາດເປັນເຈົ້າຂອງປະຊາຊົນໄດ້ຮັບການຖືເປັນສຳຄັນ, ເສີມຂະຫຍາຍໃນພຶດຕິກຳຕົວຈິງ. ດ້ວຍທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ” ໄດ້ເອົາໃຈໃສ່ເປັນພິເສດໃນການປະຕິບັດຢູ່ບັນດາຂັ້ນເປັນຢ່າງດີ, ຜ່ານນັ້ນຊ່ວຍໃຫ້ປະຊາຊົນມີເງື່ອນໄຂເຂົ້າຮ່ວມທຸກການເຄື່ອນໄຫວດ້ານການເມືອງ, ເສດຖະກິດ, ວັດທະນະທຳ, ສັງຄົມ ດ້ວຍບົດບາດເປັນເຈົ້າ. ພ້ອມກັນນັ້ນ, ກຸ່ມກ້ອນມະຫາສາມັກຄີທົ່ວປວງຊົນທັງຊາດ ຍາມໃດກໍ່ໄດ້ຮັບການປັບປຸງ, ເພີ່ມທະວີ ແລະ ເສີມຂະຫຍາຍຢູ່ໃນລະດັບສູງ, ປະກອບສ່ວນສ້າງຄວາມເຫັນດີເຫັນພ້ອມສູງໃນໝູ່ປະຊາຊົນທຸກຊັ້ນວັນນະ.
ສືບຕໍ່ເສີມຂະຫຍາຍທຸກແຫຼ່ງກຳລັງໃນການປ່ຽນແປງໃໝ່
ແກ່ນສານຂອງການສືບຕໍ່ພາລະກິດປ່ຽນແປງໃໝ່ປະເທດຊາດໃນປະຈຸບັນແມ່ນນຳຫວຽດນາມ ກາຍເປັນປະເທດອຸດສາຫະກຳ ແລະ ທັນສະໄໝ. ມາດຕະການບຸກທະລຸແມ່ນຖືວິທະຍາສາດ, ເຕັກໂນໂລຊີ, ພູມປັນຍາ ແລະ ແຫຼ່ງຊັບພະຍາກອນມະນຸດທີ່ມີຄຸນນະພາບສູງເປັນກຳລັງໜູນຕົ້ນຕໍ. ຕາມນັ້ນແລ້ວ, ຫວຽດນາມ ໄດ້ເລືອກເຟັ້ນບາງຂະແໜງອຸດສາຫະກຳປຸງແຕ່ງ, ຜະລິດ, ອຸດສາຫະກຳເຕັກໂນໂລຊີສູງ, ອຸດສາຫະກຳສະອາດ, ອຸດສາຫະກຳພະລັງງານ, ກໍ່ສ້າງພື້ນຖານກະສິກຳຕາມທິດຜະລິດເປັນສິນຄ້າໃຫຍ່, ນຳໃຊ້ເຕັກໂນໂລຊີສູງ. ພ້ອມທັງ, ຍູ້ແຮງການພັດທະນາພື້ນຖານກະສິກຳຕາມທິດທັນສະໄໝ, ບັນລຸລະດັບເຕີບໂຕສູງກວ່າບັນດາເຂດຜະລິດ ແລະ ສູງກວ່າລະດັບເຕີບໂຕຂອງພື້ນຖານເສດຖະກິດ. ທ່ານສາດສະດາຈານ, ປະລິຍາເອກ ໂດ້ເທ໋ຕຸ່ງ, ອະດີດຫົວໜ້າສະຖາບັນເສດຖະກິດການເມືອງ, ສະຖາບັນການເມືອງແຫ່ງຊາດໂຮ່ຈິມິນ, ໄດ້ຍົກອອກມາດຕະການແກ້ໄຂ.
“ຢາກມີເຕັກໂນໂລຊີສູງແມ່ນຕ້ອງຍູ້ແຮງການຄົ້ນຄວ້າວິທະຍາສາດ ຫຼື ນຳເຂົ້າເຕັກໂນໂລຊີ. ຄຳຖາມທີ່ວາງອອກແມ່ນເຮັດແນວໃດໃຫ້ມີຊັບພະຍາກອນມະນຸດມີເຕັກໂນໂລຊີສູງ ແລະ ທຶນໃຫ້ແກ່ການຄົ້ນຄວ້າ ຫຼື ນຳເຂົ້າເຕັກໂນໂລຊີ? ຖ້າຫາກພຽງແຕ່ຮັບຮູ້ຕ້ອງເຮັດຫຍັງເມື່ອເລີ່ມຕົ້ນວິວັດການປ່ຽນແປງໃໝ່ ແມ່ນບໍ່ສາມາດສືບຕໍ່ປ່ຽນໃໝ່ຢ່າງຮອບດ້ານ ແລະ ຄົບຊຸດໄດ້, ຫາກຕ້ອງຖືກນຳໃຊ້ແຫຼ່ງຊັບພະຍາກອນມະນຸດ, ວັດຖຸ, ໂດຍສະເພາະແມ່ນເຕັກໂນໂລຊີສູງເພື່ອປະຕິບັດການປ່ຽນແປງໃໝ່”.
ເພື່ອສືບຕໍ່ພາລະກິດປ່ຽນແປງໃໝ່, ແນວຄິດຊີ້ນຳຂອງພັກກອມມູນິດຫວຽດນາມ ນັ້ນແມ່ນ: ພັດທະນາຢ່າງວ່ອງໄວ ແລະ ໝັ້ນຄົງໃນທຸກຂົງເຂດເສດຖະກິດ, ວັດທະນະທຳ, ສັງຄົມ ແລະ ສິ່ງແວດລ້ອມ. ພ້ອມທັງ, ສືບຕໍ່ຕີລາຄາຄວາມຖືກຕ້ອງຂອງບັນດາແຜນນະໂຍບາຍ, ນະໂຍບາຍເພື່ອແນໃສ່ຍົກສູງສະມັດຕະພາບ, ຄຸນນະພາບ, ປະສິດທິຜົນ, ກຳລັງແກ່ງແຍ້ງຂອງພື້ນຖານເສດຖະກິດ. ກ່ຽວກັບສິ່ງດັ່ງກ່າວ, ທ່ານ ຫງວຽນຊີ້ຢຸງ, ອະດີດຮອງຫົວໜ້າຫ້ອງວ່າການສະພາແຫ່ງຊາດ, ກ່າວຄຳເຫັນວ່າ.
“ພວກເຮົາຊຸກຍູ້ຄວາມເສລີໃນການດຳເນີນທຸລະກິດຫຼາຍແລ້ວ, ຍັງເຫຼືອພຽງບັນດາຂົງເຂດຈຳເປັນຕ້ອງໄດ້ຮັບການປັບປຸງເທົ່ານັ້ນ. ໃນໄລຍະຜ່ານມາ, ກະຊວງອຸດສາຫະກຳການຄ້າໄດ້ຍົກອອກ 20 ຂົງເຂດຜູກຂາດຂອງລັດ. ຄືແນວນັ້ນແມ່ນຈຳກັດສິດດຳເນີນທຸລະກິດຢ່າງເສລີຂອງປະຊາຊົນ ແລະ ວິສາຫະກິດ. ຖ້າຍັງມີສິດຜູກຂາດຫຼາຍແລ້ວ, ສິດເສລີໃນການດຳເນີນທຸລະກິດບໍ່ມີອີກ, ຄືແນວນັ້ນແມ່ນບໍ່ສາມາດສ້າງຄວາມຮັ່ງມີໄດ້. ດັ່ງນັ້ນ, ຕ້ອງໃຫ້ປະຊາຊົນໄດ້ສຳຜັດກັບຕະຫຼາດ, ດຳເນີນທຸລະກິດຢ່າງເສລີ, ພະຍາຍາມຕ້ານສິດຜູກຂາດພາກລັດ.”
ໃນອາຍຸການກອງປະຊຸມໃຫຍ່ຄັ້ງທີ 12 ຂອງພັກ, ພັກກອມມູນິດຫວຽດນາມ ໄດ້ກຳນົດ “ຍູ້ແຮງການປ່ຽນແປງໃໝ່ຢ່າງຮອບດ້ານ, ຄົບຊຸດ, ເສີມຂະຫຍາຍທຸກແຫຼ່ງກຳລັງ ແລະ ກຳລັງໜູນເພື່ອພັດທະນາປະເທດຊາດຢ່າງວ່ອງໄວ ແລະ ໝັ້ນຄົງ”. ໜຶ່ງໃນຈຳນວນ 6 ໜ້າທີ່ຈຸດສຸມໄດ້ສຸມໃສ່ປະຕິບັດນັ້ນແມ່ນ “ດຶງດູດ, ເສີມຂະຫຍາຍທຸກແຫຼ່ງກຳລັງ ແລະ ກຳລັງປະດິດສ້າງຂອງປະຊາຊົນຢ່າງແຮງ”. ຈາກທິດສະດີເຖິງພຶດຕະກຳຕົວຈິງລ້ວນແຕ່ຊີ້ໃຫ້ເຫັນບັນຫາການຂຸດຄົ້ນ, ການນຳໃຊ້ຢ່າງເໝາະສົມ ໄປຄຽງຄູ່ກັບການປົກປັກຮັກສາ, ຜະລິດຄືນໃໝ່ ແລະ ເສີມຂະຫຍາຍບັນດາແຫຼ່ງກຳລັງຢ່າງບໍ່ຢຸດຢັ້ງ, ພິເສດແມ່ນແຫຼ່ງກຳລັງຈາກປະຊາຊົນ, ເພື່ອຮັບປະກັນບັນດາເງືຶ່ອນໄຂໃຫ້ແກ່ການພັດທະນາຢ່າງວ່ອງໄວ ແລະ ໝັ້ນຄົງຂອງຫວຽດນາມ ໃນປະຈຸບັນ ແລະ ໃນອະນາຄົດແມ່ນສິ່ງທີ່ມີຄວາມໝາຍອັນໃຫຍ່ຫຼວງໃນພາລະກິດປ່ຽນແປງໃໝ່ປະຈຸບັນ.