ຮ່າໂນ້ຍ ມີປະຫວັດສາດນັບພັນໆປີ, ເຖິງວ່າໄດ້ຜ່ານໄລຍະເວລາ, ການຜັນແປທາງດ້ານປະຫວັດສາດຫຼາຍຢາງກໍຕາມ ແຕ່ຮ່າໂນ້ຍ ຍັງຄົງຮັກສາຄວາມເກົ່າແກ່ບູນຮານໄວ້ໄດ້ຢູ່. ເມື່ອມາຢ້ຽມຢາມນະຄອນຫຼວງຮ່າໂນ້ຍ, ແຂກທ່ອງທ່ຽວສາມາດທ່ຽວຊົມຄຸ້ມຖະໜົນເກົ່າ ເພື່ອເຈືອຈານເຂົ້າກັບເຂດຕົວເມືອງເກົ່າແຫ່ງອະລິຍະທຳນັບພັນປີນີ້. ຊາວຕ່າງປະເທດຫຼາຍຄົນທີ່ມາຮ່າໂນ້ຍ ເປັນເທື່ອທຳອິດກໍເຫັນໄດ້ຊີວິດກເປັນຢູ່ຂອງປະຊາຊົນຢູ່ທີ່ນີ້ເຕັມໄປດ້ວຍພະລັງຊີວິດ, ຂະຫຍັນຂັນເຂື່ອນ ແລະ ສຸພາບຮຽບຮ້ອຍ.
ຄຸ້ມຖະໜົນເກົ່າຮ່າໂນ້ຍໃນປະຈຸບັນ
ພາບ:laodong.com.vn
ຄຸ້ມຖະໜົນເກົ່າຮ່າໂນ້ຍ ຫຼືເອີ້ນວ່າເຂດຖະຫນົນ 36 ສາຍດ້ວຍຈຸດພິເສດທີ່ວ່າ ຊື່ຂອງຖະໜົນໄດ້ຂື້ນຕົ້ນດ້ວຍຄຳວ່າ ຮ່າງ ຄື ຮ່າງບາກ, ຮ່າງທຽກ, ຮ່າງໝ໋າ, ຮ່າງຈຽວ….ຖະໜົນແຕ່ລະສາຍໄດ້ຜະລິດ ແລະ ຂາຍສະເພາະແຕ່ຜະລິດຕະພັນປະເພດດຽວ, ຖະໜົນສາຍໃດກໍອຶກກະທຶກຄຶກໂຄມ, ເນືອງນັນປ່ຽບເໝືອນກັບໝູ່ບ້ານອາຊີບນ້ອຍແຫ່ງ 1. ຄຸ້ມຖະໜົນເກົ່າຮ່າໂນ້ຍ ຍັງດູດດືມໃຈແຂກທ່ອງທ່ຽວຕ່າງປະເທດ ຍ້ອນຄວາມສວຍງາມດ້ານສະຖາປັດຕະຍາກຳ ແລະ ຄວາມຮັກແພງແຂກຄົນຂອງປະຊາຊົນຢູ່ທີ່ນີ້. ບັນດາກິດຈະກຳ ສະຖາປັດຕະຍາກຳທີ່ມີລັກສະນະພິເສດສະເພາະ. ບັນດາວັດບູຮານຢູ່ໃນຮ່ອມທາງນ້ອຍ, ຕະຫຼາດແຄມທາງ ແລະ ບັນດາຮ້ານກາເຟຢູ່ຂ້າງຖະໜົນ….ທັງຫມົດເຫຼົ່ານັ້ນໄດ້ສ້າງເປັນຈຸດພິເສດສະເພາະ, ສ້າງຄວາມປະທັບໃຈ, ດູດດືມໃຈແຂກທ່ອງທ່ຽວມາຢ້ຽມຊົມຮ່າໂນ້ຍ. Alan ຊາວອາເມລິກາ ໄດ້ມາຢ້ຽມຢາມຄຸ້ມຖະໜົນເກົ່າຮ່າໂນ້ຍ ເປັນເທື່ອທຳອິດໄດ້ເລົ່າຄວາມໃນໃຈສູ່ຟັງວ່າ:
“ຂ້າພະເຈົ້າເຫັນໄດ້ບັນຍາກາດອົບອູ່ນເມື່ອມາຢ້ຽມຢາມຄຸ້ມຖະໜົນເກົ່າຮ່າໂນ້ຍ. ຄຸ້ມຖະໜົນເກົ່າຮ່າໂນ້ຍ ມີຄົນໄປມາຢ່າງຄັບຄາໜາແໜ້ນ, ອຶກກະທຶກຄຶກໂຄມ. ຢູ່ທີ່ນີ້, ຂ້າພະເຈົ້າໄດ້ພົບປະຫຼາຍຄົນ, ເຂົາເຈົ້າລ້ວນແຕ່ເປັນຄົນໃຈດີ ແລະ ຮັກແພງແຂກຄົນ”
ຊາວຕ່າງປະເທດມາຮ່າໂນ້ຍ, ມາຄຸ້ມຖະໜົນເກົ່າຮ່າໂນ້ຍ ຖືກດູດດື່ມໃຈກັບສິລະປະອາຫານການກິນຂອງຫວຽດນາມ ດ້ວຍບັນດາເຍື່ອງອາຫານພິເສດສະເພາະຄື: ເຝີ, ເຂົ້າປຽກປາ, ເຂົ້າປຸ້ນປາ….ບັນດາເຍື່ອງອາຫານຢູ່ຄຸ້ມຖະໜົນເກົ່າຮ່າໂນ້ຍ ໃນຮ້ານນ້ອຍຢູ່ຂ້າງຖະໜົນ, ຕະຫຼອດຮອດຜູ້ຂາຍອາຫານຕາມທາງ ລ້ວນແຕ່ໄດ້ສ້າງຄວາມແປກປະຫຼາດໃຈໃຫ້ແກ່ແຂກທ່ອງທ່ຽວ. ເອື້ອຍ Kathy ຄູສອນຊາວການາດາ ໄດ້ແບ່ງປັນບັນດາຄວາມປະທັບໃຈຂອງຕົນກ່ຽວກັບເຍື່ອງອາຫານຢູ່ຄຸ້ມຖະໜົນເກົ່າຮ່າໂນ້ຍ ວ່າ:
“ຂ້າພະເຈົ້າເຫັນວ່າເຍື່ອງອາຫານຢູ່ຄຸ້ມຖະໜົນເກົ່າຮ່າໂນ້ຍ ແຊບ ແລະ ສະອາດທີ່ສຸດ. ຂ້າພະເຈົ້າມັກບັນດາເຍື່ອງອາຫານຢູ່ນີ້ຫຼາຍ, ພິເສດແມ່ນລົດຊາດຂອງມັນ. ຂ້າພະເຈົ້າກໍມັກເຄື່ອງເທດໃນບັນດາເຍື່ອງອາຫານນີ້”
ແຕ່ເຖິງຢ່າງໃດກໍຕມ, ມີເຍື່ອງອາຫານປະເພດໜື່ງທີ່ແຊບນົວ, ພິເສດຢູ່ຄຸ້ມຖະໜົນເກົ່າຮ່າໂນ້ຍ ໄດ້ຮັບຄວາມນິຍົມຈາກແຂກທ່ອງທຽວຕ່າງປະເທດຫຼາຍຄົນ, ນັ້ນແມ່ນທອດມັນປາ. ທອດມັນປາໄດ້ກາຍເປັນເຍື່ອງອາຫານທີ່ມີຊື່ສຽງ ແລະ ລຶ້ງເຄີຍກັບຫຼາຍຄົນ ແລະ ຊື່ຂອງຖະໜົນ ຮ່າງເຊີນ ໃນເມື່ອກ່ອນຢູ່ຄຸ້ມຖະໜົນເກົ່າຮ່າໂນ້ຍ ຊື່ງມີຮ້ານຂາຍທອດມັນປາທີ່ມີເຄື່ອງໝາຍການຄ້າ ໄດ້ກາຍເປັນຖະໜົນທີ່ມີຊື່ຂອງເຍື່ອງອາຫານປະເພດນີ້: ຖະໜົນ ຈາກາ ແປ່ວ່າ ທອດມັນປາ. ເມື່ອມາຢ້ຽມຢາມຄຸ້ມຖະໜົນເກົ່າຮ່າໂນ້ຍ, ແຂກທ່ອງທ່ຽວບໍ່ພຽງແຕ່ໄດ້ຮັບປະທານບັນດາເຍື່ອງອາຫານທີ່ແຊບນົວ, ພິເສດເທົ່ານັ້ນ, ຫາກຍັງໄດ້ນັ່ງກິນກາເຟ ແລະ ຊົມເບີ່ງການດຳເນີນຊີວິດປະຈຳວັນທີ່ລຽບງ່າຍຂອງປະຊາຊົນຢູ່ທີ່ນີ້ອີກດ້ວຍ. ບັນດາສິ່ງເລົ່ານັ້ນ ໄດ້ສ້າງຄວາມດູດດື່ມໃຈແຂກທ່ອງທ່ຽວຕ່າງປະເທດແຕ່ລະຄົນ ເມື່ອມາຢ້ຽມຢາມຄຸ້ມຖະໜົນເກົ່າຮ່າໂນ້ຍ 36 ສາຍ.