ຖະໜົນ ລ້ານອົງ ຂາຍຢາພື້ນເມືອງ
(ພາບ: vietbao.vn)
(vovrorld)- ຖ້າມີໂອກາດຍ່າງເລາະຫຼິ້ນໃນຄຸ້ມຖະໜົນເກ່ົາຮ່າໂນ້ຍ, ນັກທ່ອງທ່ຽວທັງຫຼາຍ ລ້ວນແຕ່ມີຕວາມປະຫຼາດໃຈຕໍ່ໜ້າກິນຫອມຂອງຢາສະໝູນໄພ, ຢາພື້ນເມືອງ ຊະນິດຕ່າງໆຖືກວາງຂາຍຢູ່ຕາມຮ້ານໜ້າບ້ານໃນຖະໜົນສາຍນ້ອຍ. ນັ້ນແມ່ນ ຖະໜົນ ລ້ານອົງຊຶ່ງແມ່ນຖະໜົນສາຍດຽວ ຂາຍຢາພື້ນເມືອງທີ່ນະຄອນຫຼວງຮ່າໂນ້ຍໂດຍໃສ່ຊື່ຂອງທ່ານໝໍມີຊື່ສຽງກ່ວາໝູ່ໃນປະຫວັດສາດຂອງຊາດຫວຽດນາມ
ຖະໜົນ ລ້ານອົງ ແມ່ນຖະໜົນສາຍໜຶ່ງໃນຄຸ້ມຖະໜົນເກົ່າ 36 ສາຍໃນນະຄອນຫຼວງຮ່າໂນ້ຍ. ຜ່ານການປ່ຽນແປງຕາມການເວລາ, ແຕ່ຮ້ານຂາຍເຄື່ອງສ່ວນຫຼາຍໃນ ຖະໜົນ ລ້ານອົງ ກໍຍັງຄົງສາມາດຮັກສາການປະກອບອາຊີບຂາຍຢາພື້ນເມືອງທີ່ມີມາແຕ່ດົນນານ, ບໍ່ຖືກປ່ຽນແປງຄືຖະໜົນອາຊີບສາຍອື່ນໆ. ຢູ່ຖະໜົນສາຍນີ້, ບັນດາຮ້ານຂາຍຢາຕັ້ງຕິດຕໍ່ກັນແບບເຮືອນຫ້ອງແຖວ ແລະ ວາງຂາຍຢາພື້ນເມືອງຫຼາຍຊະນິດຈາກ ຢິນແຊງ, ເຫັດລິນຈີ, ລຳໄຍແຫ້ງ ຕະຫຼອດຮອດສາມເຈັດ. ຢາພື້ນເມືອງຖືກວາງໃນຕູ້ແກ້ວຫຼືຖືກຫຸ້ມຫໍ່ດ້ວຍຖົງຢາງນີລົງ. ເມື່ອກ່ອນນີ້, ຜູ້ຂາຍຢາພື້ນເມືອງຢູ່ແຫ່ງນີ້, ມັກໃຊ້ຊີງນ້ອຍໆເພື່ອຊັ່ງຢາ, ແຕ່ມາຮອດປະຈຸບັນຖືກທົດແທນດ້ວຍຊີງໃຫຍ່ຊຶ່ງສາມາດຊັ່ງຢາດ້ວຍຈຳນວນຫຼາຍ. ເຄື່ອງຫັ່ນຢາແລ່ນດ້ວຍໂມເຕີໄຟຟ້າໄດ້ທົດແທນວິທີເຮັດດ້ວຍມື, ມີບາງຮ້ານກໍນຳໃຊ້ເຄື່ອງຄອມພີວເຕີເພື່ອບັນທຶກຊະນິດຢາຮັບໃຊ້ການບົ່ງມະຕິພະຍາດ, ດັ່ງນັ້ນວຽກງານປຸ່ງຢາກໍມີຄວາມສະດວກສະບາຍກວ່າເກົ່າ. ນາງ ແທງງາ ເຈົ້າຂອງຮ້າຍຂາຍຢາພື້ນເມືອງຢູ່ ຖະໜົນ ລ້ານອົງໃຫ້ຮູ້ວ່າ:
“ ຄອບຄົວຂ້າພະເຈົ້າປະກອບອາຊີບຂາຍຢາພື້ນເມືອງເປັນເວລາ 30 ປີແລ້ວ, ນີ້ແມ່ນອາຊີບສືບທອດໃນວົງຕະກູນ. ຖະໜົນ ລ້ານອົງ ແມ່ນຖະໜົນຕົ້ນຕໍ່ຂອງຂະແໜງການແພດພື້ນເມຶືອງ, ດັ່ງນັ້ນກໍມີຢາພື້ນເມືອງຄົບທຸກຊະນິດ ”
ບໍ່ພຽງແຕ່ຂາຍຢາພື້ນເມືອງເທົ່ານັ້ນ, ຖະໜົນ ລ້ານອົງ ຍັງມີຊື່ສຽງດ້ວຍບັນດາໝໍຢາພື້ນເມືອງອີກດ້ວຍ. ກ່ອນນີ້, ໝໍຢາສ່ວນຫຼາຍຢູ່ ຖະໜົນ ລ້ານອົງ ບໍ່ຜ່ານການສຶກສາຮຳຮຽນໃນໂຮງຮຽນ, ດັ່ງນັ້ນ ການປະກອບອາຊີບການແພດພື້ນເມືອງແມ່ນໄດ້ຮັບການສືບທອດໃນຄອບຄົວ, ໃນວົງຕະກູນດ້ວຍເຄັດລັບສະເພາະຂອງຕົນ. ແຕ່ມາຮອດປະຈຸບັນ, ໄດ້ປະກົດມີບັນດາໝໍຢາໄດ້ຮັບການບຳລຸງສ້າງໃນໂຮງຮຽນຢູ່ພາຍໃນ ແລະ ຕ່າງປະເທດ. ຜູ້ເຈັບເປັນມານີ້, ລ້ວນແຕ່ໄດ້ຮັບການແນະນຳ, ປິ່ນປົວຈາກພວກໝໍຢາຢ່າງສຸດໃຈ. ທ່ານ ຝ້າມຊວນໂນ້ຍຢູ່ ຖະໜົນ ລ້ານອົງ, ຜູ້ໄດ້ຕິດພັນກັບອາຊີບແພດພື້ນເມືອງໃນຕະຫຼອດຊີວິດເປີດເຜີຍວ່າ :
“ ສຳລັບການແພດພື້ນເມືອງ, ການປິ່ນປົວພະຍາດເຄີຍອີງຕາມວິທີ 4 ປະການຄື: ເບິ່ງ, ຟັງ, ຖາມ, ກວດຊີບພະຈອນ ເພື່ອບົ່ງມະຕິພະຍາດ. ຖ້າວ່າການບົ່ງມະຕິພະຍາດຖືກຕ້ອງ ຈະເຮັດໃຫ້ການປິ່ນປົວໄດ້ຮັບຜົນດີ ”
ຕາມການເວລາ, ຈຳນວນປະຊາກອນຢູ່ ຖະໜົນ ລ້ານອົງ ນັບມື້ນັບເພີ່ມຂຶ້ນ. ແລະ ອາຊີບຄ້າຂາຍຢາພື້ນເມືອງກໍນັບມື້ນັບເປີດກ້ວາງຕື່ມອີກ. ນັ້ນແມ່ນສັນຍານທີ່ສະແດງໃຫ້ເຫັນວ່າ : ອາຊີບຢາພື້ນເມືອງນັບມື້ນັບຂະຫຍາຍຕົວ. ໃນທ່າມກາງບັນຍາກາດທີ່ຟົດຟື້ນເນືອງນັນຢູ່ຄຸ້ມຖະໜົນເກົ່າຮ່າໂນ້ຍນັ້ນ, ພື້ນຖານການແພດພື້ນເມືອງໄດ້ຮັບການ ສືບທອດ ແລະ ຮັກສາໄວ້, ນີ້ກໍຍ້ອນມີບັນດາຜູ້ຄົນຢູ່ຖະໜົນສາຍນີ້ພວມເມົາມົວ, ຜູກພັນ ແລະ ຮັກສາອາຊີບທີ່ມີມາແຕ່ດົນນານໂດຍປູຍ່າຕາຍາຍປະໄວ້ໃຫ້.