(vovworld)- ໃນໄລຍະກວ່າ 1 ເດືອນຜ່ານມາ ພາຍຫລັງຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ, ມີຂ່າວຄາວບໍ່ຊັດເຈນຈຳນວນຫນຶ່ງ ກ່ຽວກັບການເຄື່ອນໄຫວເສດຖະກິດຢູ່ເຂດຊາຍແດນ, ດ່ານຊາຍແດນຫວຽດນາມ ຕິດກັບ ຈີນ ຖືກຢຸດຕິ ແລະ ຖືກຜົນສະທ້ອນ. ເຖິງຢ່າງໃດກໍຕາມ, ຕາມການຕີລາຄາຂອງນັກຂ່າວວິທະຍຸກະຈາຍສຽງຫວຽດນາມແລ້ວ, ທຸກການເຄື່ອນໄຫວຢູ່ເຂດຊາຍແດນດ່ານຊາຍແດນໃນບໍລິເວນແຂວງ ກວ໋າງນີງ ຍັງດຳເນີນໄປຢ່າງຟົດຟື້ນ.
ພາບປະກອບ:internet
|
ສະຖານທີ່ທຳອິດໃນການໄປປະຕິບັດງານ ຢູ່ລຽບຕາມເຂດຊາຍແດນຂອງແຂວງ ກວ໋າງນີງ ຂອງນັກຂ່າວວິທະຍຸກະຈາຍສຽງຫວຽດນາມ ນັ້ນແມ່ນ ດ່ານຊາຍແດນ ແຮ່ງໂມ ຂອງເມືອງ ບີງລຽວ ຂຶ້ນກັບແຂວງ ກວ໋າງນີງ. ການເຄື່ອນໄຫວ ຄ້າຂາຍສິນຄ້າຢູ່ທີ່ນີ້ຍັງດຳເນີນໄປເປັນປົກກະຕິ. ສະເພາະໃນຕອນເຊົ້າມື້ຕົ້ນເດືອນ 6/2014 ມີລົດ contener ປະມານ 15 ຄັນ ຂົນສ່ົງສິນຄ້າມາຂາຍຢູ່ດ່ານຊາຍແດນ ແຮ່ງໂມ ດ້ວຍສິນຄ້າທຸກປະເພດ, ໃນນັ້ນສ່ວນຫລາຍແມ່ນຜະລິດຕະພັນກະເສດ ແລະ ຕົ້ນໄມ້ອຸດສາຫະກຳ. ເມື່ອແລກປ່ຽນກັບນັກຂ່າວວິທະຍຸກະຈາຍສຽງຫວຽດນາມ, ທ່ານ ເລແທ່ງຮຶງ, ຫົວຫນ້າ ຫນ່ວຍເຮັດລະບຽບການ ຂາອອກຂາເຂົ້າ, ອົງການພາສີ ແຮ່ງໂມ ເມືອງ ບີງລຽວ ໃຫ້ຮູ້ວ່າ:
“ໃນຊຸມມື້ຜ່ານມາ, ການເຄື່ອນໄຫວຂາອອກຂາເຂົ້າຜ່ານດ່ານຊາຍແດນ ແຮ່ງໂມ ແລະ ຈູງກວານ ຂອງຈີນ ຍັງດຳເນີນໄປເປັນປົກກະຕິ. ສິນຄ້າສົ່ງອອກ ສ່ວນຫລາຍແມ່ນສິນທະເລແຊເຢັນ, ສ່ວນສິນຄ້ານຳເຂົ້າແມ່ນບັນດາປະເພດສິນຄ້ານຳໃຊ້ປະຈຳວັນ. ປະຊາຊົນສອງປະເທດ ຫວຽດນາມ ແລະ ຈີນ ຍັງຄົງໄປມາຜ່ານດ່ານຊາຍແດນເພື່ອແລກປ່ຽນຄ້າຂາຍ ແລະ ຢື້ຢາມຖາມຂ່າວກັນເປັນປົກກະຕິ.”
ຢູ່ ຄູ່ດ່ານຊາຍແດນ ບັກຟອງຊີງ- ຫລີຮວາ, ການເຄື່ອນໄຫວແລກປ່ຽນຄ້າຂາຍສິນຄ້າລະຫວ່າງ 2 ຝ່າຍຍັງຄົງດຳເນີນໄປຢ່າງຟົດຟື້ນ. ຕາມບົດລາຍງານດ່ວນຂອງ ອົງການພາສີ ບັກຟອງຊີງ, ໃນໄລຍະ 20 ມື້ ຕົ້ນເດືອນ 5, ການເກັບພາສີຜ່ານດ່າຍຊາຍແດນນີ້ບັນລຸ 6,24 ຕື້ດົ່ງ, ເພີ່ມຂຶ້ນ 147% ເມື່ອທຽບໃສ່ໄລຍະດຽວກັນຂອງເດືອນກອ່ນ. ນອກຈາກສິນທະເລແຊເຢັນແລ້ວ, ປະຈຸບັນ ຍັງມີໝວດສິນຄ້າຫນູນຊ່ວຍການຕັດຫຍິບ, ອຸປະກອນຜະລິດສາດໄມ້ໄຜ່, ວັດສະດຸກໍ່ສ້າງ ຕາມສັນຍາການຄ້າ ຜ່ານບັນດາດ່ານຊາຍແດນເພີ່ມຂຶ້ນຫລາຍເມື່ອທຽບໃສ່ເດືອນກ່ອນ, ເວລາເປີດປະຕູດ່ານຊາຍແດນໄດ້ເພີ່ມຂຶ້ນ ຈາກ 4 ຊົ່ວໂມງ/ມື້ຂື້ນເຖິງ 6 ຊົ່ວໂມງ/ມື້. ທ່ານ ຟ້າມວັນຫາຍ, ຫົວຫນ້າຫນ່ວຍວິຊາການ, ອົງການພາສີດ່ານຊາຍແດນ ບັກຟອງຊີງ ເມືອງຫາຍຮ່າ ໃຫ້ຮູ້ວ່າ: ພະນັກງານພາສີ ໄດ້ ແລະ ພວມຍູ້ແຮງວຽກງານເຮັດລະບຽບການພາສີດ້ວຍເຄືອຂ່າຍເອເລັກໂຕນິກ ພ້ອມທັງສ້າງເງື່ອນໄຂສະດວກທີ່ສຸດໃຫ້ແກ່ວິສາຫະກິດ ແລະ ປະຊາຊົນຢູ່ເຂດຊາຍແດນໃນການແລກປ່ຽນຄ້າຂາຍສິນຄ້າ. ທ່ານ ຟ້າມວັນຫາຍ ຖືວ່າ:
“ສະພາບການເຄື່ອນໄຫວຢູ່ດ່ານຊາຍແດນ ບັກຟອງຊີງ ໃນຊຸມມື້ຜ່ານມາ ຍັງຄົງດຳເນີນໄປເປັນປົກກະຕິ. ບັນດາວິສາຫະກິດເຄື່ອນໄຫວຢູ່ບໍລິເວນ ຍັງສືບຕໍ່ມາເຮັດລະບຽບການ ແລະ ສົ່ງສິນຄ້າຜ່ານດ່ານຊາຍແດນ. ວົງເງິນຂາອອກຂາເຂົ້າຜ່ານດ່ານຊາຍແດນ ບັກຟອງຊີງ ລ້ວນແຕ່ເພີ່ມຂຶ້ນເມື່ອທຽບໃສ່ເດືອນກ່ອນ. ບັນດາອົງການກ່ຽວຂ້ອງຄື: ທະຫານປ້ອງກັນຊາຍແດນ, ພາສີ, ກວດກາໂລກລະບາດ ຍາມໃດກໍ່ສ້າງເງື່ອນໄຂດີທີ່ສຸດໃຫ້ແກ່ປະຊາຊົນ ແລະ ບັນດາວິສາຫະກິດສອງປະເທດແລກປ່ຽນຄ້າຂາຍ ແລະ ໄປມາຜ່ານຊາຍແດນ.”
ບໍ່ພຽງແຕ່ບັນດາການເຄື່ອນໄຫວແລກປ່ຽນຄ້າຂາຍສິນຄ້າເທົ່ານັ້ນ ຫາກການເຄື່ອນໄຫວທ່ອງທ່ຽວ,ບໍລິການ, ການຜະລິດ ຍັງຄົງສືບຕໍ່ດຳເນີນໄປເປັນປົກກະຕິ. ການແລກປ່ຽນການຄ້າຢູ່ ນະຄອນ ມອງກາຍ ໃນຊຸມມື້ນີ້ຍັງຄົງສືບຕໍ່ດຳເນີນໄປຢ່າງຟົດຟື້ນ. ຈຳນວນນັກທ່ອງທ່ຽວຈີນ ມານະຄອນ ບໍ່ຫລຸດລົງ, ແຕ່ລະມື້ ໂຮງໂຮມສາກົນ 5 ດາວ ເລີ້ຍລາຍ ຢູ່ ນະຄອນ ມອງກາຍ ຍັງຄົງຕ້ອນຮັບນັກທ່ອງທ່ຽວມາຈາກຈີນ ປະມານ 200 ຄົນ ແລະ ຈັດຕັ້ງບັນດາລາຍການທ່ອງທ່ຽວເຖິງ ອ່າວຮ້າລອງ. ທ່ານ ຫງວຽນຮົ່ງເຊີນ, ຮອງຜູ້ອຳນວຍການໃຫຍ່ໂຮງແຮມສາກົນ ເລີ້ຍລາຍ ໃຫ້ຮູ້ວ່າ:
“ນັບແຕ່ຕົ້ນເດືອນມາຮອດປະຈຸບັນ, ນັກທ່ອງທ່ຽວພັກຜ່ອນຢູ່ໂຮງແຮມຍັງ ເຕີບໂຕເປັນປົກກະຕິ, ປະມານ 100 ຄົນ/ມື້. ປະຈຸບັນ ນັກທ່ອງທ່ຽວມາພັກຜ່ອນຢູ່ໂຮງແຮມຂອງພວກຂ້າພະເຈົ້າສ່ວນຫລາຍແມ່ນມາຈາກຈີນ, ກວມເຖິງ 70% ຍອດຈຳນວນນັກທ່ອງທ່ຽວ.”
ຢູ່ບໍລິເວນດ່ານຊາຍແດນ ບັກລວນ ລູກຄ້າໄປມາແມ່ນຄັບຄາຫນາແຫນ້ນ. ໃນນັ້ນນັບທັງນັກທ່ອງທ່ຽວ ແລະ ປະຊາຊົນໄປມາຄ້າຂາຍ. ກຳລັງພາສີຢູ່ດ່ານ ຊາຍແດນ ບັກລວນ ໃນຊຸມມື້ຜ່ານມາ ຕ້ອງເພີ່ມໂມງລັດຖະການເພື່ອໃຫ້ປະຊາຊົນ ແລະ ວິສາຫະກິດແຈ້ງລະບຽບການ, ເກັບພາສີຢູ່ດ່ານຊາຍແດນດຳເນີນໄປຢ່າງວ່ອງໄວ. ນັບແຕ່ຕົ້ນເດືອນ 5 ມາຮອດປະຈຸບັນ, ສະເລ່ຍແຕ່ລະອາທິດ, ມີປະມານ 1000 contener ໄປມາຜ່ານດ່ານຊາຍແດນ ບັກລວນ ຕາມສັນຍາການຄ້າ. ທ່ານ ຫງວຽນຕຽນຢູງ, ຮອງປະທານຄະນະກຳມະການປະຊາຊົນ ນະຄອນ ມອງກາຍ ໃຫ້ຮູ້ວ່າ: ທຸກການເຄື່ອນໄຫວການຄ້າຢູ່ເຂດຊາຍແດນມອງກາຍ ຍັງຄົງດຳເນີນໄປເປັນປົກກະຕິ ແລະ ມອງກາຍ ຍັງແມ່ນສະຖານທີ່ດຶງດູດນັກທ່ອງທ່ຽວ ແລະ ບັນດານັກລົງທຶນ.