បច្ចុប្បន្ននេះ វៀតណាមបំពេញបានត្រឹមតែ ៧០% នៃតម្រូវការប្រេងសាំងក្នុងស្រុកប៉ុណ្ណោះ។ ផ្នែកនៅសេសសល់គឺត្រូវការនាំចូល។ ក្នុងពេលនោះ ដោយសារតែការផលិតប្រេងឆៅក្នុងស្រុកធ្លាក់ចុះ វៀតណាមនៅតែត្រូវការនាំចូលប្រេងឆៅដើម្បីបម្រើផលិតកម្ម។ លោក Le Minh សមាជិកក្រុមប្រឹក្សាវិទ្យាសាស្ត្រនៃសមាគមថាមពលវៀតណាម បានថ្លែងថា៖ “ពិតណាស់ថា យើងកំពុងពឹងផ្អែកលើបរទេស។ បច្ចុប្បន្ន ទុនបម្រុងប្រេងសាំងពាណិជ្ជកម្មតាមបទប្បញ្ញត្តិ សម្រាប់សហគ្រាសធំៗគឺ ២០ ថ្ងៃ និងសហគ្រាសចែកចាយគឺរយៈពេល ៥ ថ្ងៃប៉ុណ្ណោះ។ តថភាពនេះ បានធ្វើឱ្យសហគ្រាសពិបាកឆ្លើយតប ចំពោះការប្រែប្រួលនៃទីផ្សារប្រេងសាំងពិភពលោក។ ដូច្នេះហើយ យើងត្រូវការឃ្លាំងទុកបម្រុងដ៏ចម្រុះមួយ មានន័យថា ក្រៅពីប្រេងឆៅសម្រាប់ផលិតសាំងនិងម៉ាស៊ូត យើងត្រូវរក្សាទុកផលិតផលប្រេងចម្រាញ់សម្រាប់ចែកចាយ”។
ការខ្វះខាតប្រភពផ្គត់ផ្គង់នាំចូលសម្រាប់រោងចក្រចម្រាញ់ប្រេងនិងគីមីឥន្ធនៈ Nghi Son និងប្រភពផ្គត់ផ្គង់ប្រេងសាំងទាំងមូល អាចនឹងអូសបន្លាយ ប្រសិនបើជម្លោះនៅមជ្ឈិមបូព៌ាបន្តកើនឡើង។
ដូច្នេះហើយ ការកសាងឃ្លាំងទុកបម្រុងប្រេងនិងឧស្ម័នជាតិ គឺជាតម្រូវការបន្ទាន់ និងជាជំហានយុទ្ធសាស្ត្រ ដើម្បីបង្កើត "ទ្រនាប់សុវត្ថិភាព" សម្រាប់សេដ្ឋកិច្ចវៀតណាម។ នៅពេលដែលទីផ្សារពិភពលោកមានការប្រែប្រួល រដ្ឋអាចបញ្ចេញទុនបម្រុងដោយម្ចាស់ការ ដើម្បីរក្សាស្ថិរភាពតម្លៃ កាត់បន្ថយផលប៉ះពាល់លើអតិផរណា និងជីវភាពរស់នៅរបស់ប្រជាជន។ នៅក្នុងកិច្ចប្រជុំ ជាមួយក្រុមការងារសន្តិសុខថាមពល និងសហគ្រាសនាពេលថ្មីៗនេះ លោកឧបនាយករដ្ឋមន្ត្រី ត្រឹន ហុងហា (អាណត្តិ ២០២១-២០២៦) បានសង្កត់ធ្ងន់ថា៖ “យើងត្រូវតែធានាទុនបម្រុង នៅពេលដែលមានបញ្ហាកើតឡើង ជាឧទាហរណ៍ ការប្រែប្រួលនាពេលកន្លងទៅ។ យើងអាចបង្កើតប្រព័ន្ធទុនបម្រុងដាច់ដោយឡែកទាំងស្រុង ដែលសម្របសម្រួលដោយសហគ្រាស និងរដ្ឋ”។
នៅថ្ងៃទី២៩ ខែមីនា លោកនាយករដ្ឋមន្ត្រី ហ្វាម មិញជីញ (អាណត្តិ ២០២១-២០២៦) បានចុះត្រួតពិនិត្យការដ្ឋានសាងសង់ខ្លាំងទុកបម្រុងប្រេងឥន្ធនៈយុទ្ធសាស្ត្រនៅស្រុក Nghi Son ខេត្ត Thanh Hoa ។ លោកនាយករដ្ឋមន្ត្រីបានសង្កត់ធ្ងន់ថា ការសាងសង់ឃ្លាំងទុកបម្រុងប្រេងឥន្ធនៈយុទ្ធសាស្ត្រជាតិ ត្រូវតែអនុវត្តជាបន្ទាន់។ ប្រការនេះនឹងមិនត្រឹមតែរួមចំណែកដល់ការសុក្រឹត្យហេដ្ឋារចនាសម្ព័ន្ធថាមពលជាតិប៉ុណ្ណោះទេ ប៉ុន្តែថែមទាំងជួយកាត់បន្ថយសម្ពាធលើប្រព័ន្ធចែកចាយនិងបង្កើនភាពបត់បែននៃទីផ្សារទៀតផង។
ទោះជាយ៉ាងណាក៏ដោយ ដើម្បីឱ្យគោលនយោបាយនេះមានប្រសិទ្ធភាព លោកនាយករដ្ឋមន្ត្រីបានស្នើថា ទំហំនៃឃ្លាំងទុកបម្រុងត្រូវតែខិតជិតស្តង់ដារអន្តរជាតិ; យន្តការគ្រប់គ្រងត្រូវមានតម្លាភាព បត់បែន ដោយជៀសវាងស្ថានភាពនៃការទុកបម្រុងគ្រាន់តែរូបភាពប៉ុណ្ណោះ ប៉ុន្តែគ្មានប្រសិទ្ធភាពនៅពេលចាំបាច់នោះ។ ប្រការដ៏សំខាន់បំផុត គឺធ្វើពិពិធកម្មប្រភពផ្គត់ផ្គង់ និងរួមផ្សំរវាងទុនបម្រុងរបស់រដ្ឋ ជាមួយនឹងទុនបម្រុងពាណិជ្ជកម្ម ដើម្បីបង្កើនប្រសិទ្ធភាពធនធាន។
ក្នុងរយៈពេលវែង ការកសាងឃ្លាំងទុកបម្រុងប្រេងឥន្ធនៈជាតិក៏ត្រូវដាក់បញ្ចូលក្នុងយុទ្ធសាស្ត្រអន្តរកាលថាមពលទាំងមូលទៀតផង។ នៅពេលដែលវៀតណាមលើកកម្ពស់ថាមពលកកើតឡើងវិញ និងកាត់បន្ថយការពឹងផ្អែកលើឥន្ធនៈហ្វូស៊ីល តួនាទីនៃឃ្លាំងទុកបម្រុងប្រេងឥន្ធនៈនឹងត្រូវបានកែសម្រួល ប៉ុន្តែមិនអាច់បន្ថយសារៈសំខាន់របស់វា ក្នុងអំឡុងពេលអន្តរកាលនោះទេ។ ការផ្លាស់ប្តូរយ៉ាងឆាប់រហ័សរបស់វៀតណាមទៅកាន់ឥន្ធនៈជីវសាស្ត្រ E10 នៅក្នុងខែមេសានេះ គឺជាសញ្ញាច្បាស់លាស់ដែលបង្ហាញថា ដំណើរការផ្លាស់ប្តូរថាមពលលែងស្ថិតនៅក្នុងដំណាក់កាលរៀបចំផែនការទៀតហើយ ប៉ុន្តែបានចូលដល់ដំណាក់កាលអនុវត្តជាក់ស្តែង។ អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Nguyen Sinh Nhat Tan បានបញ្ជាក់ថា៖ “ការប្រើប្រាស់ឥន្ធនៈជីវសាស្ត្រ គឺជានិន្នាការចៀសមិនរួច នៅក្នុងការផ្លាស់ប្តូរថាមពលសកល។ សម្រាប់វៀតណាម នេះមិនត្រឹមតែជាដំណោះស្រាយមួយដើម្បីរួមចំណែកកាត់បន្ថយការបំភាយឧស្ម័នផ្ទះកញ្ចក់ និងអនុវត្តន៍ការសន្យាអន្តរជាតិលើការប្រែប្រួលអាកាសធាតុប៉ុណ្ណោះទេ ប៉ុន្តែក៏ជាទិសដៅសំខាន់មួយដើម្បីធានាសន្តិសុខថាមពលជាតិ ធ្វើពិពិធកម្មប្រភពឥន្ធនៈ និងលើកកម្ពស់ការអភិវឌ្ឍសេដ្ឋកិច្ចបៃតង និងសេដ្ឋកិច្ចវិលជុំ”។
ទន្ទឹមជាមួយនឹងការផ្លាស់ប្តូរថាមពល ការវិនិយោគលើការសាងសង់ឃ្លាំងទុកបម្រុងប្រេងសាំងជាតិ គឺជាការសម្រេចចិត្តដែលកំណត់រូបរាងអនាគត និងដាក់គ្រឹះសម្រាប់ការផ្លាស់ប្តូរទៅជាប្រព័ន្ធថាមពលប្រកបដោយនិរន្តរភាពជាង។ ការកសាងឃ្លាំងទុកបម្រុងប្រេងសាំង គឺការពង្រឹងសមត្ថភាពខ្លួនទីពឹងខ្លួន និងភាពធន់នៃសេដ្ឋកិច្ច។ នៅក្នុងពិភពលោកដែលមានការប្រែប្រួលយ៉ាងខ្លាំង ប្រទេសដែលមានភាពម្ចាស់ការក្នុងវិស័យថាមពល នឹងមានឧត្តមភាពកាន់តែច្រើនក្នុងការអភិវឌ្ឍប្រកបដោយស្ថិរភាព និងទាក់ទាញការវិនិយោគ៕
