( ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈິ໋ວິ້ງ )
( vovworld ) - ວັນທີ 21/2 ຢູ່ Canberra, ອົດສະຕາລີ, ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຟ້າມກວາງວິງ ແລະ ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈິ໋ວິ້ງ ພ້ອມກັບທ່ານຮອງລັດຖະມົນຕີກະຊວງການຕ່າງປະເທດອົດສະຕາລີ Gillian Bird ແລະ ທ່ານຮອງລັດຖະມົນຕີກະຊວງປ້ອງກັນຊາດອົດສະຕາລີ Peter Jennings ໄດ້ເປັນປະທານຮ່ວມການສົນທະນາຫາລືຍຸດທະສາດລະຫວ່າງກະຊວງປ້ອງກັນປະເທດ, ກະຊວງການຕ່າງປະເທດຫວຽດນາມ - ອົດສະຕາລິ. ທີ່ການສົນທະນາຫາລື, ສອງຝ່າຍໄດ້ຢືນຢັນວ່າຈະສືບຕໍ່ຮ່ວມມືຢ່າງແໜ້ນແຟ້ນເພື່ອນຳສາຍພົວພັນຂື້ນສູ່ລະດັບສູງໃໝ່, ສືບຕໍ່ເພີ່ມທະວີການແລກປ່ຽນ ແລະ ສົມທົບກັນຢູ່ບັນດາເວທີປາໄສໃນພາກພື້ນ ແລະ ສາກົນ. ສອງຝ່າຍກໍ່ແບ່ງປັນຂໍ້ມູນຂ່າວສານກ່ຽວກັບການກຳນົດທິດນະໂຍບາຍຂອງແຕ່ລະປະເທດ, ໃນນັ້ນມີການພົວພັນຕ່າງປະເທດ ແລະ ການປ້ອງກັນປະເທດ. ທີ່ການພົບປະ, ສອງຝ່າຍກໍໄດ້ແລກປ່ຽນກ່ຽວກັບສະພາບການໃນພາກພື້ນກໍຄືບັນດາບັນຫາໃນພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ ພ້ອມກັນນັ້ນກໍສະໜັບສະໜູນບັນດາຄວາມມານະພະຍາຍາມຂອງອາຊຽນ ກ່ຽວກັບການເພີ່ມທະວີການຮ່ວມສຳພັນ, ກໍ່ສ້າງປະຊາຄົມ, ສະໜັບສະໜູນບົດບາດໃຈກາງຂອງອາຊຽນ ໃນການກໍ່ສ້າງໂຄງປະກອບຮ່ວມມືໃນພາກພື້ນ. ກ່ຽວກັບບັນຫາທະເລຕາເວັນອອກ, ສອງຝ່າຍຢືນຢັນຄວາມສຳຄັນຂອງວຽກງານຮັບປະກັນສັນຕິພາບສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລຢູ່ທະເລຕາເວັນອອກ, ແກ້ໄຂບັນດາການແກ່ງແຍ້ງດ້ວຍສັນຕິວິທີ, ປະຕິບັດຕາມກົດໝາຍສາກົນ. ສອງຝ່າຍກໍຢືນຢັນວ່າຈະຮັກສາກົນໄກດັ່ງກ່າວເປັນປະຈຳ ເພື່ອປະກອບສ່ວນຮັດແໜ້ນຄວາມໄວເນື້ອເຊື່ອໃຈ, ຄວາມເຂົ້າໃຈເຊິ່ງກັນ ແລະ ກັນ. ບົນຈິດໃຈດັ່ງກ່າວ, ສອງຝ່າຍໄດ້ເຫັນດີຈະດຳເນີນການສົນທະນາຫາລືຍຸດທະສາດຄັ້ງທີ 2 ຢູ່ຫວຽດນາມ ໃນເວລາທີ່ເໝາະສົມໃນປີ 2013.