ພິທີສະເຫຼີມສະຫຼອງ 45 ປີແຫ່ງວັນສ້າງຕັ້ງ ອາຊຽນ
ບັນດາຜູ້ແທນເຂົ້າຮ່ວມງານພົບປະແລກປ່ຽນວັດທະນະທຳ ອາຊຽນ
(vovworld) - ພິທີສະເຫຼີມສະຫຼອງ 45 ປີແຫ່ງວັນສ້າງຕັ້ງສະຫະສະມາຄົມບັນດາປະເທດ ອາຊີ ຕາເວັນອອກສ່ຽງໃຕ້ (ຫຼື ອາຊຽນ) ແລະ ງານພົບປະແລກປ່ຽນວັດທະນະທຳ ອາຊຽນ ໂດຍກະຊວງການຕ່າງປະເທດຫວຽດນາມ ຈັດຕັ້ງຂຶ້ນ ໃນຕອນຄຳ່ວັນທີ 8/8, ຢູ່ເຮືອນຮັບແຂກລັດຖະບານ. ໂດຍເປັນປະທານພິທີ, ທ່ານລັດຖະມົນຕີການຕ່າງປະເທດຫວຽດນາມ Pham Binh Minh ຢືນຢັນການເຕີບໃຫຍ່ເຂັ້ມແຂງຂອງ ອາຊຽນ ແມ່ນປັດໄຈສຳຄັນທີ່ຂາດບໍ່ໄດ້ສຳລັບສັນຕິພາບ, ສະຖຽນລະພາບ ແລະ ການພັດທະນາຢູ່ ອາຊີ ຕາເວັນອອກສຽງໃຕ້, ພ້ອມທັງແມ່ນກຳລັງໜູນຍູ້ແຮງການໂອ້ລົມສົນທະນາ, ການຮ່ວມມື ແລະ ຮ່ວມສຳພັນຢູ່ ອາຊີ ຕາເວັນອອກ ແລະ ອາຊີ ປາຊີຟີກ. ທ່ານລັດຖະມົນຕີ Pham Binh Minh ໃຫ້ຮູ້ວ່າ ອາຊຽນ ພວມສືບຕໍ່ປັບປຸງ, ສ້າງສຳເລັດທຸກໆດ້ານ ເພື່ອໃຫ້ ອາຊຽນ ກ້າວເດີນຢ່າງໝັ້ນຄົງບົນເສັ້ນທາງສ້າງປະຊາຄົມ ອາຊຽນ ໃນປີ 2015 ຢ່າງບໍ່ຢຸດຢັ້ງ. ທ່ານລັດຖະມົນຕີ Pham Binh Minh ເນັ້ນໜັກວ່າ:
“ດ້ວຍທິດນຳ “ຕັ້ງໜ້າເປັນເຈົ້າການ ແລະ ມີຄວາມຮັບຜິດຊອບ” ໃນການຮ່ວມມືກັບອາຊຽນ, ຍາມໃດຫວຽດນາມ ກໍເອກອ້າງທະນົງໃຈທີ່ໄດ້ມີການປະກອບສ່ວນສຳຄັນໃຫ້ແກ່ສະຫະສະມາຄົມໃນຕະຫຼອດ 17 ປີຜ່ານມາ, ພິເສດ ແມ່ນໃນອາຍຸການເປັນປະທານ ອາຊຽນ ໃນປີ 2010, ສ້າງບັນດາຂີດໝາຍທີ່ເຂັ້ມຂົ້ນໄປດ້ວຍສີສັນຫວຽດນາມ. ໂດຍແມ່ນພາກສ່ວນໜຶ່ງຂອງ ອາຊຽນ, ຍາມໃດຫວຽດນາມ ກໍຢືນຢັນວ່າ ການຮ່ວມມື ອາຊຽນ ແມ່ນໜຶ່ງໃນບັນດາເສົາຄ້ຳສຳຄັນໃນທິດທາງການຕ່າງປະເທດເອກະລາດ, ເປັນເຈົ້າຕົນເອງ, ຫຼາຍຮູບຫຼາຍແບບ, ຫຼາຍຝ່າຍເປັນເຈົ້າການເຊື່ອມໂຍງເຂົ້າກັບພາກພື້ນ ແລະ ສາກົນຂອງຕົນ”
ພາຍຫຼັງພິທີສະເຫຼີມສະຫຼອງ ແມ່ນງານພົບປະແລກປ່ຽນວັດທະນະທຳ ອາຊຽນ ໂດຍກະຊວງການຕ່າງປະເທດຫວຽດນາມ, ສະຫະພັນບັນດາອົງການມິດຕະພາບ ຮ່າໂນ້ຍ ແລະ ສະຖານທູດບັນດາປະເທດ ອາຊຽນ ພ້ອມກັນຈັດຕັ້ງ. ງານພົບປະແລກປ່ຽນ ໄດ້ຮັບການຈັດຕັ້ງຂຶ້ນເພື່ອແນໃສ່ເພີ່ມທະວີການໂຄສະນາ, ເຜີຍແຜ່ຢ່າງເລິກເຊິ່ງ, ກ້ວາງຂວາງກ່ຽວກັບການສ້າງປະຊາຄົມ ອາຊຽນ ໝັ້ນຄົງ ແລະ ສະໜິດແໜ້ນ. ຜ່ານການເຄື່ອນໄຫວນີ້, ອາຊຽນ ກໍ ຢັ້ງຢືນວ່າ: ອາຊຽນ ຈະສືບຕໍ່ແມ່ນກຸ່ມກ້ອນພັນທະມິດທີ່ໝັ້ນຄົງ, ສັນຕິພາບ ແລະ ວັດທະນາຖາວອນ ໃນປະຈຸບັນ ກໍຄື ໃນອະນາຄົດ.