ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ ໄດ້ຮັບໂທລະສັບ ແລະ ອີແມວຈາກທ່ານຜູ້ຟັງທີ່ສົ່ງເຖິງລາຍການ, ໃນນັ້ນທ່ານຜູ້ຟັງມີຄວາມສົນໃຈເຖິງການພັດທະນາກະສິກຳ, ຊົນນະບົດຂອງຫວຽດນາມ. ນອກຈາກນັ້ນ, ທ່ານຜູ້ຟັງຍັງຢາກຖາມກ່ຽວກັບຂອງຂວັນທີ່ສະຫງວນໃຫ້ແກ່ທ່ານຜູ້ຟັງທີ່ໄດ້ຮັບຟັງລາຍການເປັນເວລາຫຼາຍປີ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຈະຕອບບັນດາຄຳຖາມເຊິ່ງທ່ານຜູ້ຟັງສົ່ງເຖິງລາຍການຂອງພວກເຮົາ.
ເພື່ອນ ສຸກມະລີວົງ ແຂວງ ໄຊຍະບຸລີ ໄດ້ສົ່ງຈົດໝາຍຫາລາຍການໂດຍຖາມວ່າ: ໃນລາຍການຊົນນະບົດໃໝ່, ຂ້າພະເຈົ້າໄດ້ຮັບຟັງກ່ຽວກັບການພັດທະນາບັນດາຂະແໜງອາຊີບ, ທາງຄົມມະນາຄົມ, ວິທີປ່ຽນໃໝ່ໃນການພັດທະນາກະສິກຳ. ແຕ່ຂ້າພະເຈົ້າຍັງບໍ່ທັນເຂົ້າໃຈວ່າ ອີ່ງໃສ່ມາດຖານໃດເພື່ອຕີລາຄາວ່າແມ່ນຕາແສງທີ່ບັນລຸໄດ້ມາດຖານຊົນນະບົດໃໝ່?
ເພື່ອນ ສຸກມະລີວົງ ທີ່ຮັກແພງ, ຊຸດມາດຖານແຫ່ງຊາດກ່ຽວກັບການພັດທະນາຊົນນະບົດໃໝ່, ເຊິ່ງທ່ານນາຍົກລັດຖະມົນຕີໄດ້ເຊັນຂໍ້ຕົກລົງປະກາດໃນເດືອນ 4/2009, ໄດ້ແບ່ງເປັນ 5 ໝວດຄື: ໝວດທີ 1 ແມ່ນມາດຖານກ່ຽວກັບ “ແຜນກຳນົດ ແລະ ປະຕິບັດແຜນກຳນົດ”. ໝວດທີ 2 ແມ່ນ “ພື້ນຖານໂຄງລ່າງເສດຖະກິດ - ສັງຄົມ” ດ້ວຍບັນດາມາດຖານຄົມມະນາຄົມ, ຊົນລະປະທານ, ໄພຟ້າ, ໂຮງຮຽນ, ພື້ນຖານດ້ານວັດຖຸ, ວັດທະນະທຳ, ຕະຫຼາດຊົນນະບົດ, ໄປສະນີ, ເຮືອນຢູ່ຂອງປະຊາຊົນ. ໝວດທີ 3 ແມ່ນ “ເສດຖະກິດ ແລະ ຈັດຕັ້ງການຜະລິດ”, ເຊິ່ງລວມມີມາດຕະຖານດ້ານລາຍຮັບ, ຄອບຄົວທຸກຍາກ, ໂຄງປະກອບແຮງງານ ແລະ ຮູບການຈັດຕັ້ງການຜະລິດ. ໝວດທີ 4 ແມ່ນ “ວັດທະນະທຳ - ສັງຄົມ - ສິ່ງແວດລ້ອມ” ເຊິ່ງລວມມີການສຶກສາ, ສາທາລະນະສຸກ, ວັດທະນະທຳ ແລະ ສິ່ງແວດລ້ອມ. ແລະ ມາດຖານສຸດທ້າຍແມ່ນໝວດກ່ຽວກັບ “ລະບົບການເມືອງ” ດ້ວຍ 2 ມາດຖານ: ລະບົບອົງການຈັດຕັ້ງການເມືອງສັງຄົມເຂັ້ມແຂງ ແລະ ໝັ້ນຄົງ ມີຄວາມເປັນລະບຽບຮຽບຮ້ອຍທາງສົງຄົມ. ຊຸດມາດຖານແຫ່ງຊາດໄດ້ກຳນົດບັນດາມາດຖານຢ່າງລະອຽດ ແລະ ຮອບດ້ານຂອງຊີວິດສັງຄົມ, ການຜະລິດ, ການດຳລົງຊີວິດຢູ່ເຂດຊົນນະບົດ. ມີບັນດາມາດຖານທີ່ມີລັກສະນະເປັນຮູບຮ່າງຄື: ລະບົບຕາໜ່າງໄພຟ້າ, ທາງຄົມມະນາຄົມ, ສຸກສາລາ, ລາຍຮັບ, ເຮືອນຢູ່, ແຕ່ກໍມີບັນດາມາດຖານກໍມີລັກສະນະບໍ່ເປັນຮູບຮ່າງຄື: ອັດຕາສ່ວນການສຶກສາພາກບັງຄັບ, ຄົນງານໄດ້ຮັບການບຳລຸງສ້າງ, ເຂົ້າຮ່ວມບັນດາຮູບແບບປະກັນສຸຂະພາບ, ໝູ່ບ້ານບັນລຸມາດຖານບ້ານວັດທະນະທຳ...
ເພື່ອນ ລາດດາພອນ ພົມມາຈັນ, ແຂວງວຽງຈັນ ຖາມວ່າ. ຂ້າພະເຈົ້າໄດ້ຮັບຂ່າວວ່າ ວິທະຍຸກະຈາຍສຽງຫວຽດນາມ ໄດ້ມອບຂອງຂວັນໃຫ້ຜູ້ທີ່ຮັບຟັງລາຍການເປັນເວລາຫຼາຍປີ. ເພື່ອໄດ້ຮັບຂອງຂວັນນັ້ນຜູ້ຟັງຕ້ອງມີມາດຖານຄືແນວໃດແດ່?
ກ່ອນອື່ນໝົດພວກຂ້າພະເຈົ້າຂໍຂອບໃຈເພື່ອນ ລາດດາພອນ ພົມມາຈັນ ທີ່ໄດ້ສົນໃຈ, ຕິດຕາມຮັບຟັງລາຍການຂອງພວກຂ້າພະເຈົ້າໃນຕະຫຼອດໄລຍະຜ່ານມາ. ປະຈຸບັນ, ວິທະຍຸກະຈາຍສຽງຫວຽດນາມ ມີຂອງຂວັນສຳລັບຜູ້ຟັງທີ່ຮັບຟັງເປັນປະຈຳແຕ່ 3 ປີ, 5 ປີ ແລະ 10 ປີ. ເມື່ອທ່ານຜູ້ຟັງໄດ້ຮັບຟັງລາຍການຂອງພວກເຮົາເປັນປະຈຳ ແລະ ຕິດຕໍ່ຫາວິທະຍຸກະຈາຍສຽງຫວຽດນາມ, ພວກຂ້າພະເຈົ້າຈະອິງໃສ່ຈຸດເວລານັ້ນເພື່ອມອບຂອງຂວັນ. ຫວັງວ່າ ໃນໄລຍະຈະມາເຖິງ ພວກຂ້າພະເຈົ້າຈະໄດ້ຮັບຈົດໝາຍ, ໂທລະສັບ ຫຼື ອີແມວຈາກທ່ານທີ່ປະກອບຄຳເຫັນໃຫ້ແກ່ລາຍການຫຼາຍກວ່າອີກ ແລະ ຈະຊ່ວຍໃຫ້ລາຍການນັບມື້ນັບດີກວ່າ.
ນັ້ນແມ່ນບາງຄຳຖາມເຊິ່ງທ່ານຜູ້ຟັງສົ່ງເຖິງລາຍການພາສາລາວ, ວິທະຍາກະຈາຍສຽງຫວຽດນາມ ໃນອາທິດຜ່ານມາ. ຫວັງວ່າ ເພື່ອນ ສຸກມະລີວົງ ແລະ ເພື່ອນ ລາດດາພອນ ພົມມາຈັນ ຄົງພໍໃຈກ່ຽວກັບຄຳຕອບຂອງພວກຂ້າພະເຈົ້າ. ຖ້າຫາກທ່ານໃດມີຄຳເຫັນຕໍ່ລາຍການກໍສົ່ງເຖິງທີ່ຢູ່ : ວິທະຍຸກະຈາຍສຽງຫວຽດນາມ - ເຮືອນເລກທີ 45 ຖະໜົມບ່າຈ້ຽວ - ຮ່າໂນ້ຍ ຫຼື ໂທລະສັບຕາມເບີ: 0084 43 825 6631 ຫຼື ອີແມວດ້ວຍລະຫັດ laovov@yahoo.com. ທ່ານຜູ້ຟັງສາມາດແລກປ່ຽນ ແລະ ໃຫ້ຄຳເຫັນກ່ຽວກັບບັນດາລາຍການພາກພາສາລາວ ຜ່ານແວບໄຊ vovworld.vn ຫຼື vov5.vn.