(vovworld) – ຫວ່າງແລ້ວນີ້, ນະຄອນ Santa Ana, ທີ່ຂຶ້ນກັບລັດ California ແຫ່ງອາເມລິກາ ຫາກໍ່ຮັບຮອງເອົາມະຕິ ທີ່ກີດຂວາງບັນດາເຈົ້າໜ້າທີ່ຫວຽດນາມມາທ່ອງທ່ຽວ ຫຼືແວ່ຢາມນະຄອນແຫ່ງນີ້. ໃນຂະນະທີ່ການພົວພັນລະຫວ່າງຫວຽດນາມ - ອາເມລິກາ ນັບມື້ນັບໄດ້ຮັບການພັດທະນາ, ເໝາະສົມກັບຜົນປະໂຫຍດຂອງປະຊາຊົນສອງປະເທດນັ້ນ, ມະຕິນີ້ໄດ້ກາຍເປັນມະຕິທີ່ຕົກຢູ່ໂດດດ່ຽວ.
ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ແລະ
ທ່ານ ອະດິດປະທານາທິບໍດີ ອາເມລິກາ George W. Bush
(ພາບ: ອີນເຕີເນັດ) ມະຕິທີ່ກີດຂວາງບັນດາເຈົ້າໜ້າທີ່ຫວຽດນາມມາທ່ອງທ່ຽວ ຫຼືແວ່ຢາມນະຄອນ Santa Ana ນັ້ນ, ໂດຍເຈົ້າຄອງນະຄອນ Miguel Pulido ລົງນາມ ແລະ ປະກາດໃຊ້ເມື່ອວັນທີ 19/2/2013. ຕາມນັ້ນແລ້ວ, ກ່ອນຈະມາຢ້ຽມຢາມນະຄອນນີ້ 2 ສັບປະດາ, ວົງການເຈົ້າໜ້າທີ່ຫວຽດນາມຕ້ອງແຈ້ງໃຫ້ຕຳຫຼວດນະຄອນຊາບ, ເພື່ອໃຫ້ຕຳຫຼວດສະເໜີຕໍ່ເຈົ້າຄອງນະຄອນ ແລະ ສະພານະຄອນ. ມະຕິກໍ່ກຳນົດວ່າ ນະຄອນ Santa Ana ມີສິດບັງຄັບໃຫ້ບັນດາຫົວໜ່ວຍທີ່ເຊື້ອເຊີນເຈົ້າໜ້າທີ່ຫວຽດນາມມາຢ້ຽມຢາມຕ້ອງຊຳລະຄ່າໃຊ້ຈ່າຍທັງໝົດ ເຊິ່ງນະຄອນ Santa Ana ໄດ້ໃຊ້ຈ່າຍໃຫ້ແກ່ການຢ້ຽມຢາມເຫຼົ່ານັ້ນ.
ຖ້າພຽງແຕ່ຄືແນວນັ້ນ, ກໍ່ແມ່ນການກຳນົດສະເພາະກ່ຽວກັບດ້ານບໍລິຫານ, ພາຍໃນນະຄອນ Santa Ana, ເຊິ່ງແມ່ນນະຄອນທີ່ມີຊາວອາເມລິກາ ເຊື້ອຊາດຫວຽດນາມ ດຳລົງຊີວິດເປັນຈຳນວນຫຼວງຫຼາຍເທົ່ານັ້ນ. ແຕ່ມັນບໍ່ພຽງແຕ່ຄືແນວນັ້ນ. ຫາກມະຕິເລກທີ 55 B ນີ້ ພັດຊີ້ແຈ້ງວ່າ, ນະຄອນ Santa Ana ບໍ່ສົ່ງເສີມຜູ້ຕາງໜ້າອຳນາດການປົກຄອງຫວຽດນາມມາແຫ່ງນີ້, ຈົນກວ່າເວລາໃດທີ່ກະຊວງການຕ່າງປະເທດອາເມລິກາ ຫືີຼບັນດາອົງການຈັດຕັ້ງສາກົນ ກຳນົດ ຫຼື ຮັບຮອງວ່າ ປະເທດສາທາລະນະລັດ ສັງຄົມນິຍົມຫວຽດນາມ ໄດ້ປັບປຸງຜົນງານດ້ານສິດທິມະນຸດ ແລະ ເຄົາລົບບັນດາສິດທີ່ເປັນພື້ນຖານຂອງພົນລະເມືອງ. ວັນທີ 20/2/2013, ເຈົ້າຄອງນະຄອນ Santa Ana , ຍັງເວົ້າທາງວິທະຍຸ VOA ວ່າ: “ສານຕົ້ນຕໍຂອງມະຕິນີ້ ເພື່ອແນໃສ່ສະແດງຄວາມສາມັກຄີກັບວົງຄະນາຍາດຊາວຫວຽດນາມ ອາໄສໃນທົ່ວໂລກ ທີ່ບໍ່ຊົມເຊີຍການມີໜ້າ, ການຢ້ຽມຢາມຂອງວົງການເຈົ້າໜ້າທີ່ຫວຽດນາມ ເພື່ອຄັດຄ້ານການລະເມີດສິດທິມະນຸດທີ່ມີຕໍ່ປະຊາຊົນພາຍໃນປະເທດ, ເຊິ່ງພວມເກີດຂຶ້ນຢ່າງຮ້າຍແຮງຢູ່ຮ່າໂນ້ຍ“. ສິ່ງທີ່ໜ້າເສຍດາຍກວ່ານັ້ນແມ່ນ, ເຈົ້າຄອງນະຄອນຍັງເວົ້າວ່າ: “ຂ້າພະເຈົ້າຫວັງວ່າບັນດາລັດອື່ນໆ ຈະປະຕິບັດຕາມພວກຂ້າພະເຈົ້າໃນການປະກາດໃຊ້ບັນດາມະຕິທີ່ຄ້າຍຄືກັນ ເພື່ອແນໃສ່ຊຸກຍູ້ສິດທິມະນຸດໃຫ້ແກ່ຫວຽດນາມ“.
ເປັນທີ່ຈະແຈ້ງແລ້ວວ່າ ມະຕິເລກທີ 55 B ບໍ່ພຽງແຕ່ຖືກຈຳກັດໃນຂອບເຂດ ເພື່ອໃຫ້ເປົ້າໝາຍຈຳນວນໜຶ່ງໃນວົງຄະນາຍາດຊາວອາເມລິກາ ເຊື້ອຊາດຫວຽດນາມ ຢູ່ນະຄອນ Santa Ana ພໍໃຈເທົ່ານັ້ນ, ຫາກເພື່ອກີດຂວາງເຈົ້າໜ້າທີ່ຫວຽດນາມມາທ່ອງທ່ຽວ ຫຼືແວ່ຢາມນະຄອນ Santa Ana, ແນໃສ່ “ຄັດຄ້ານການລະເມີດ“, ຫຼື “ແນໃສ່ຊຸກຍູ້ສິດທິມະນຸດໃຫ້ແກ່ຫວຽດນາມ“ … ມັນແມ່ນສິ່ງທີ່ເປັນຕາຫົວເລາະແທ້ໆ.
ຄວາມຈິງແລ້ວ, ຫວຽດນາມ ບໍ່ມີການລະເມີດ ສິດທິມະນຸດ. ສິດທິມະນຸດລວມມີ: ສິດໄດ້ດຳລົງຊີວິດ, ໄດ້ເຮັດວຽກ, ໄດ້ຮຳ່ຮຽນ, ມີຄວາມເສລີໃນການປາກເວົ້າ, ການເຫຼືອມໄສ ເຊື່ອຖືສາສະໜາ... ຂອງປະຊາຊົນ ຫວຽດນາມ ທຸກຄົນ ຍາມໃດກໍ່ໄດ້ຮັບປະກັນໃນລັດຖະທຳມະນູນ, ກົດໝາຍ ແລະ ໃນຕົວຈິງ. ບັນດາຜົນງານກ່ຽວກັບສິດທິມະນຸດຂອງ ຫວຽດນາມ ທີ່ຮັບການຮັບຮູ້ຈາກປະຊາຄົມໂລກ ໃນບັນດາບົດລາຍງານສາກົນກ່ຽວກັບສິດທິມະນຸດ ແລະ ຜ່ານການຕີລາຄາຂອງຊາວຕ່າງປະເທດ, ໃນນັ້ນມີທັງຊາວ ອາເມລິກາ ທີ່ໄດ້ມາ ຫວຽດນາມ.
ແຂກທ່ອງທ່ຽວ ອາເມລິກາ ມາທ່ອງທ່ຽວ ຢູ່ ຫວຽດນາມ ເປັນຈຳນວນຫຼວງຫຼາຍ
(ພາບປະກອບ)
ການພົວພັນ ຫວຽດນາມ - ອາເມລິກາ ນັບມື້ນັບໄດ້ຮັບການພັດທະນານັບແຕ່ປີ 1995, ເມື່ອ 2 ປະເທດໄດ້ສ້າງການພົວພັນເປັນປົກກະຕິ. 2 ປະເທດ ໄດ້ມີການພົວພັນອັນດີງາມທັງດ້ານການເມືອງ, ເສດຖະກິດ, ວັດທະນະທຳສັງຄົມ... ບັນດາເຈົ້າໜ້າທີ່ສຸງສຸດຂອງ ອາເມລິກາ, ຄືທ່ານປະທານາທິບໍດີ Bill Clinton, ທ່ານປະທານາທິບໍດີ George W. Bush ເຄີຍມາຢ້ຽມຢາມ ຫວຽດນາມ. ສ່ວນບັນດາການນຳຂັ້ນສູງຂອງ ຫວຽດນາມ, ໃນນັ້ນມີທ່ານປະທານປະເທດ ຫງວຽນມິນຈຽດ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການຢ້ຽມຢາມ ແລະ ເຮັດວຽກຢູ່ ເອເມລິກາ. 2 ປະເທດ ໄດ້ພັດທະນາການພົວພັນ, ເພີ່ມທະວີການຮ່ວມມືໃນທຸກຂົງເຂດຢ່າງບໍ່ຢຸດຢັ້ງ. ວົງຄະນະຍາດຊາວ ຫວຽດນາມ ອາໄສຢູ່ ອາເມລິກາ ປະມານ 2 ລ້ານຄົນ ໄດ້ ແລະ ພວມເຊື່ອມໂຍງເຂົ້າປະເທດ ອາເມລິກາ ເປັນຢ່າງດີ, ມີການປະກອບສ່ວນພໍສົມຄວນເຂົ້າການພັດທະນາຂອງທ້ອງຖີ່ນຕ່າງໆເຊິ່ງເຂົາເຈົ້າພວມດຳລົງຊີວິດ, ໃນນັ້ນມີນະຄອນ Santa Ana. ໃນຊຸມປີມໍ່ໆມານີ້, ພົນລະເມືອງ ຫວຽດນາມ ນັບໝື່ນຄົນ ໄດ້ໄປ ອາເມລິກາ ເພື່ອຮຳ່ຮຽນ, ດຳເນີນທຸລະກິດ, ຢ້ຽມຢາມຍາດຕິພີ່ນ້ອງ ແລະ ທ່ອງທ່ຽວ... ຢ່າງເປັນປົກກະຕິ. ກົງກັນຂ້າມ, ມີພົນລະເມືອງ ອາເມລິກາ ຫຼາຍຄົນ, ໃນນັ້ນມີບັນດານັກການເມືອງ, ບັນດາທະຫານຜ່ານເສີກ, ບັນດານັກສຶກສາ ມາ ຫວຽດນາມ ໃນແຕ່ລະມື ເພື່ອໄກ່ເກ່ຍ, ແກ້ໄຂຜົນຮ້າຍຢ້ອນຫຼັງຈາກສົງຄາມຕາມບັນດາໂຄງການຂອງລັດຖະບານ ອາເມລິກາ, ຫຼື ເພື່ອສະແດງຄວາມຮັກແພງລະຫວ່າງຊາວ ອາເມລິກາ ກັບຊາວ ຫວຽດນາມ ຜ່ານລາຍການກຸສົນຄັ້ງຕ່າງໆ. ຄວາມຈິງແລ້ວ, ນັ້ນແມ່ນການດຳລົງຊີວິດທີ່ດຳເນີນໃນແຕ່ລະມື້, ມັນແຂງແຮງກ່ວາ ຂໍ້ກຳນົດບໍລິຫານໃດໆ ທີ່ກີດຂວາງສາຍພົວພັນ, ຄວາມສະໜິດສະໜົມລະຫວ່າງ ປະຊາຊົນ 2 ປະເທດ. ຍ້ອນເຫດນັ້ນ, ເຖິງວ່າໄດ້ຮັບການປຸກລະດົມຄືແນວໃດ ກໍຕາມ ມະຕິກີດຂວາງເຈົ້າໜ້າທີ່ຂອງລັດ ຫວຽດນາມ ມາທ່ອງທ່ຽວ ແລະ ຢ້ຽມຢາມນະຄອນ Santa Ana ຍັງຕົກຢູ່ໂດດດຽວ ໃນວິວັດແຫ່ງການພັດທະນາການພົວພັນລະຫວ່າງ ຫວຽດນາມ - ອາເມລິກາ ທີ່ນັບມື້ນັບແຂງແຮງໃນປະຈຸບັນ.